1 Áádóó kʼad Nephi bidineʼé, tʼóó ahayóí áłah silį́įʼgo, kéyah Hwiináago Hoolyéhę́ęgi sodizin bá hooghan siʼánę́ę binaagóó; dóó díí hoł ádahóótʼįįdę́ę dóó łahgo ádahootʼé dahazlį́ʼígíí bee ahił dahojilneʼgo, ákweʼé áłah jílį́.

2 Dóó díí Jesus Christ bee ahił dahojilneʼ, daaztsą́ągo bee ééhózin doo haʼnínę́ę éí hoł ííshjání ályaaígíí bee ahił dahojilneʼ.

3 Áádóó díigi átʼéego ahił dahalneʼ ńtʼę́ę́ʼ, yáʼąąshdę́ę́ʼ iinééʼ dazhdiiztsʼą́ą́ʼ, áádóó ndajizghal, háálá díí iinééʼ diistsʼą́ʼígíí tʼáadoo bikʼidazhdiitą́ą da; dóó díí iinééʼ éí doo bikʼeʼeshchʼíiʼ da, doo ndóʼ éí ayóo íitsʼaʼ da, ákótʼée ndi, dóó azhą́ hazhóʼógo yáłtiʼ ndi íiyisíí biyiʼ ałníiʼdi dabidiisnááʼ, wónáásdóó bitsʼíís tʼáá átʼé deidiisnááʼ; aooʼ, tsʼídá bitsʼíís dóó biyiʼsizíinii deidiisnááʼ, dóó bijéí diltłiʼ nahalingo ádayiilaa.

4 Áádóó iinééʼ náádeidiiztsʼą́ą́ʼ, dóó tʼáadoo yikʼidaʼdiitą́ą da.

5 Dóó nááná tááʼ góneʼ hanááʼoodzíiʼgo índa iinééʼ dazhdiiztsʼą́ą́ʼ, dóó deididootsʼį́į́ł biniiyé bijaaʼ ąą ádayiilaa; dóó hodiitsʼaʼígíí yichʼįʼ dadéeʼį́į́ʼ, dóó yáʼąąsh gódei, doo nahjįʼ kódaanééhgóó hodiiztsʼą́ą́ʼjígo dadéeʼį́į́ʼ.

6 Jó áádóó, táadi azlį́įʼgo índa haʼoodzíʼígíí iinééʼ deidiiztsʼą́ą́ʼ doo yikʼidaʼdiitą́; dóó kóbiʼdooʼniid;

7 Danółʼį́ shiYeʼ Ayóí ííníshʼníinii, éí íiyisíí baa shił hózhǫ́, éí bee shízhiʼ ayóó ánoolningo íishłaa—deísínóołtsʼą́ą́ʼ.

8 Áádóó, akʼidaʼdiitą́ągo yáʼąąsh gódei náádadéezʼį́į́ʼ; jó áádóó, Diné léiʼ yáʼąąshdę́ę́ʼ adah yigáałgo dayiiłtsą́; dóó ééʼ łigai léiʼ yiiʼ sitį́įgo; dóó adááyá dóó yitahgi yiizįʼ; dóó diné tsʼídá tʼáá átʼé dabinéłʼį́, dóó ałchʼįʼ hadadoodzih ndi, yichʼįʼ daastiih, dóó díí átʼínígíí éí doo bił béédahózin da, háálá bí ádeinízingo éí diyin yá naalʼaʼí łaʼ nihaa níyá daniizį́į́ʼ.

9 Áádóó bílaʼ yee diné yichʼįʼ dah diilniiʼ dóó kótʼéego diné yichʼįʼ haadzííʼ, kóníigo:

10 Jó, shí éí Jesus Christ áshtʼį́, Diyin God yá halneʼii nahasdzáán yikááʼ doogááł daanínę́ę éí shí áshtʼį́.

11 Jó áádóó, shí éiyá nahasdzáán beʼadinídíín dóó beʼiinaʼ nishłį́; dóó aTaaʼ bąąh haʼíízhahí díchʼíiʼgo yee sheiníkánígíí yishdlą́ą́ʼ, dóó aTaaʼ íinízinígíí bikʼehgo nihookááʼ dineʼé tʼáá ałtsoní hodeeyáádą́ą́ʼ ndaʼiisíʼhę́ę bá tiʼhwiiséniiʼ, áko éí éí aTaaʼ ayóó ánoolningo íishłaa.

12 Áádóó Jesus kótʼéego haadzíiʼgo diné tʼáá ałtso nahasdzáán bikáaʼjįʼ naaʼaníídeeʼ; háálá Diyin God yá dahalneʼii Christ yáʼąąshgóó nináásdzáago díí dineʼé yaa doogááł dadííniidę́ę éí yéédaasniiʼ.

13 Áádóó Bóhólníihii diné yichʼįʼ haadzííʼ kóníigo:

14 Daoohsįįh dóó wóshdę́ę́ʼ shaa hohkááh, áko shooshkʼiizh tídiilyaa yę́ę bídadidoołnih, áádóó shílaʼ dóó shikeeʼ góneʼ bił adaʼaskaalę́ę bídadidoołnih, áko shí tʼáá aaníí Israel biDiyin God nishłį́, dóó nahasdzáán tʼáá átʼéé ńtʼę́ę́ʼ biDiyin God nishłį́, dóó nahasdzáán bibąąhági átʼéii biniinaa shiʼdiisxínígíí nihił béédahodoozįįł.

15 Áádóó diné bichʼįʼ dah dadiikai, booshkʼiizh gónaa yídadeesniiʼ, dóó bílaʼ dóó bikeeʼ bił adaʼaskaalę́ę yídadeesniiʼ; dóó díigi éí ádáádzaa, tʼááłáʼí nízinígo áajįʼ nihiikáahgo, binááʼ yee deinííłʼį́į́ʼ dóó bílaʼ yee yídadeesniiʼ, dóó tʼáá aaníí bił béédahoozįįd, díí éí, Diyin God yá dahalneʼii, doogááł daaníigo, yikʼidaʼashchínę́ę.

16 Dóó tʼáá átʼé áajįʼ niheeskai doo tʼáá bí bił béédahoozingo, tʼáá átʼé tʼáá áłahjįʼ hadadeeshghaazh, kódaaníigo:

17 Hosanna! Diyin God Aláahdi Átʼéii nízhiʼ baa dahwiiʼniih! Dóó Jesus bikétsį́įjįʼ niʼ kódaadzaahii, yichʼįʼ sodadoolzįįd.

18 Áádóó Nephi yichʼįʼ haadzííʼ (háálá Nephi áłah jílínę́ę ajítah ńtʼę́ę́ʼ) dóó wóshdę́ę́ʼ deʼ nínááh hodííniid.

19 Dóó Nephi ńdiiʼnaʼ dóó yichʼįʼ dah diiyá, dóó Bóhólníihii yidááhdóó ntsidinígoʼ dóó bikeeʼ yiztsʼǫs.

20 Dóó Bóhólníihii ńdiiʼnééh bidííniid. Dóó ńdiiʼnaʼ dóó yidááhdóó yiizįʼ.

21 Dóó Bóhólníihii kóbidííniid: Tó bee alzį́į́hjígo adziilii naa nishłé áko yáʼąąshgóó náásdzáago díí diné tó bee dadíísįįł.

22 Dóó nááná Bóhólníihii łaʼ wóshdę́ę́ʼ náánéidooʼniid, dóó kótʼéego yichʼįʼ hanáánáádzííʼ; dóó tó bee alzį́į́hjígo adziilii yaa yizlá. Dóó yichʼįʼ haadzííʼ: Kótʼéego tó bee daʼohłsį́įh doo; dóó tʼáadoo bee ałghadaʼdohtʼáhí dooleeł.

23 Tʼáá aaníigo ánihidishní, háíshį́į́ nihizaad binahjįʼ bibąąhági átʼéii yoo íídiiʼánígíí, dóó shízhiʼ binahjįʼ tó bee shidiʼdoolzį́į́ł nízinígíí, éí kótʼéego tó bee dadoohsį́į́ł—jó, taah hokáahgo dóó táyiʼ nisoozį́įgo, dóó shízhiʼ binahjįʼ tó bee daʼohsį́įh doo.

24 Jó dóó kʼad, díí éí saad bee hadoohdzih, áłtsé bízhiʼ bee yínóhshíigo, kódadohníigo:

25 Jesus Christ bee óhólníihii sheiníláhígíí binahjįʼ, shí tó bee niisįįh aTaaʼ bízhiʼ binahjįʼ, dóó aYeʼ bízhiʼ binahjįʼ dóó Iiʼsizį́ Diyinii bízhiʼ binahjįʼ. Amen.

26 Dóó índa tó bił didoołkǫǫł, dóó táyiʼdę́ę́ʼ háá doołtʼeeł.

27 Dóó díí bikʼehgo shízhiʼ binahjįʼ tó bee daʼohsį́įh dooleeł; jó háálá, tʼáá aaníí ánihidishníigo, éí aTaaʼ dóó aYeʼ, dóó Iiʼsizį́ Diyinii éí tʼááłáʼígíí yee naazį́; dóó aTaaʼ bił honishłǫ́, dóó aTaaʼ éí shił hólǫ́; dóó aTaaʼ dóó shí éí tʼááłáʼí bee siidzį́.

28 Dóó díí bee nihichʼįʼ haasdzíʼígíí kótʼáo tó bee oohsį́įh doo. Dóó tʼáadoo bee ałghadaʼdohtʼáhí dooleeł, áłtséédą́ą́ʼ ádaahtʼínę́ęgi átʼéego; doo ndi łahdóó shinaʼnitin tʼáadoo bee ałghadaʼdohtʼáhí dooleeł, ałtséédą́ą́ʼ ádaahtʼínę́ęgi átʼéego.

29 Háálá tʼáá aaníí, tʼáá aaníí ánihidishníigo, tʼáá háíshį́į́ saad ahétʼáahii biiʼ hólónígíí éí doo shikééʼ sizį́į da, ndi éí chʼį́įdii beʼiiníziinii yikééʼ sizį́, éí éí saad ahétʼááh yizhéʼé nilį́, dóó diné bijéí neiyiłná saad ahétʼáahgo, ałchʼįʼ bá dahachįʼgo ádeileʼ.

30 Jó, diné bijéí biiʼ á háchįʼ, dóó ałkʼijįʼ naʼadzil, éí doo shí shinaʼnitin da; ndi díí éí shinaʼnitin, kódaatʼéhígíí éí yóó ádidootʼááł.

31 Jó, tʼáá aaníí, tʼáá aaníigo, ánihidishní, shinaʼnitin bee nihił hodeeshnih.

32 Dóó díí éí shinaʼnitin, dóó díí naʼnitin éí aTaaʼ sheinílá; dóó tʼáá aaníí aTaaʼ baa hashneʼ, aTaaʼdóʼ tʼáá aaníí shaa halneʼ, dóó Iiʼsizį́ Diyiniidóʼ aTaaʼ dóó shí tʼáá aaníí nihaa halneʼ; dóó shí éí aTaaʼ diné, tʼáá ałtso, niheʼiinaʼ łahgo áńdaahdléhígíí dóó deinohdlą́ shił nínígíí éí baa hashneʼ.

33 Dóó háíshį́į́ shoosdląądígíí dóó tó bee yilzį́ʼígíí, éí yisdádoodlóós; dóó éí éí Diyin God bił hazʼą́ądi bá hwiidoohʼaał.

34 Dóó háíshį́į́ doo shoodlánígíí, dóó doo tó bee yilzį́ʼígíí, éí diyinkʼehgo iináájígo doo haa doolyéeł da.

35 Tʼáá aaníí, tʼáá aaníigo, ánihidishní, díí shinaʼnitin átʼé, dóó tʼáá shí aTaaʼ ánínígíí baa hashneʼ; dóó háíshį́į́ shoodlánígíí ałdóʼ aTaaʼ yoodlą́; dóó éí bichʼįʼ éí aTaaʼ shí nishłínígíí yił ííshjání íidoolííł, háálá éí éí kǫʼ dóó Iiʼsizį́ Diyinii yee yidoosį́į́ł.

36 Dóó ákótʼáo aTaaʼ tʼáá aaníí shaa halneʼ dooleeł, dóó Iiʼsizį́ Diyinii éí aTaaʼ dóó shí yichʼįʼ ííshjání íidoolííł; háálá aTaaʼ, dóó shí, dóó Iiʼsizį́ Diyinii éí tʼááłáʼígíí bee ndasiidzį́.

37 Dóó ánáánihidishní; niheʼiinaʼ łahgo áńdaahdlééh, dóó áłchínígi átʼéego ídaʼdółnééh, dóó shízhiʼ binahjįʼ tó bee danihiʼdilzį́į́h, éí doodago díí doo shódeidoołtʼeeł da.

38 Dóó ánáánihidishní, niheʼiinaʼ łahgo áńdaahdléhígíí, dóó shízhiʼ binahjįʼ tó bee danihiʼdilzį́į́h, dóó áłchínígi átʼéego ídaʼdołnééh, éí doodago díí aTaaʼ bił hazʼą́ądi doo nihá hwiidooʼaał da.

39 Tʼáá aaníí, tʼáá aaníigo, ánihidishní, díí éí shí shinaʼnitin átʼé, háíshį́į́ díí yoosdląądígíí éí shitseʼ bikáaʼgi haʼdoohtłʼį́į́ł, dóó chʼį́įdiitah bidáńdítį́hí doo bikʼehdidoodleeł da.

40 Dóó tʼáá háíshį́į́ díí biláahgo índa biʼohgo baa hojilneʼígíí, dóó díí Bóhólníihii binaʼnitin jinínígíí, éí doo yáʼáshóonii bitsʼą́ą́dę́ę́ʼ, dóó doo éí shí shitseʼ bikááʼ jiztłʼin da; ndi éí éí séí yikáaʼgi aztłʼin, dóó tó bił yiląąhgo dóó níyol dah nayiiłhango chʼį́įdiitah bidáńdítį́hí bichʼįʼ ąą átʼée dooleeł.

41 Éí bąą, díí diné bitah nohkááh, dóó díí saad bee nichʼįʼ haadzíʼę́ę bee bił dahołneʼ, nahasdzáán nineelʼą́ąjįʼ.