1 Jó, áádóó kʼad kótʼéego Jesus saad yee haadzíiʼgo áłah jílínę́ę hatáázghal dóó áhodiʼní: Jó, kʼad nikiníyáhą́ą baa hoolzhiizh.

2 Doo danihidziilgóó nihaa ákonisin, díí aTaaʼ kweʼé saad bee bichʼįʼ hadíídzih shiłnínę́ę doo tʼáá átʼé hazhóʼó bikʼiʼdoohtįįh da.

3 Éí bąą, nihighangóó ńdohkah, dóó áadi hazhóʼó bee nihichʼįʼ haasdzíʼígíí baa ntsídaahkees, dóó shízhiʼ binahjįʼ, aTaaʼ hazhóʼó bikʼidadiʼdiitį́į́ł dadohníigo, baa ńdeinohkąąh, dóó yiską́ągo biniiyé hashtʼeʼádadidoołnííł, dóó nihaa náádeeshdááł.

4 Ndi kʼad éí aTaaʼ bichʼįʼ déyá, dóó ałdóʼ Israel dóó ałʼąą dóoneʼé doo béédahózinę́ę bichʼįʼ ííshją́ą́ íʼdíshnééh, háálá aTaaʼ bichʼįʼgo éí doo yóó aheeskai da, háálá éí ayíízhʼeezhgóó bił bééhózin.

5 Áádóó Jesus ákótʼéego haadzíiʼgo, áłah jílínę́ę hatah nináánáázghal, dóó dajichago hoołtsą́, dóó tʼóó dadéezʼį́į́ʼ áłtsé tʼáá kǫ́ǫ́ nihitah honílǫ́ daaní nahalingo.

6 Dóó kóyidííniid, jó, nihąąh ą́ą́h niizį́į́ʼ.

7 Nihitahísh diné bitah doo dahatsʼídígíí hólǫ́? Wóshdę́ę́ʼ bił nihohkááh. Chʼééh dah dadiikáhígíí, doodago binááʼ ádaadinígíí, éí doodago ndaʼniłhodígíí, doodago bitsʼíís łaʼ doo ndaalnish daazlį́ʼígíí, índa łóód doo náádziihii bee dahólónígíí, doodago bitsʼíís łaʼ daniiłnaʼígíí, éí doodago bijééhkałígíí, éí doodago tʼáá haitʼéego da bąąh dah nahazʼánígíísh hólǫ́? Wóshdę́ę́ʼ bił nihohkááh dóó hadaałtʼéego áńdadeeshdlííł, háálá nihąąh hą́ą́h niizį́į́ʼ; ajoobaʼ shiiʼ hadéébįįd.

8 Háálá nihikʼisóó Jerusalemdi kéédahatʼínígíí haʼííshłaaígíí nihił béédahodoozįįł danohsingo shił bééhózin, háálá niheʼoodląʼ bee nanihiisdziihgo bídeínóhghahgo shił bééhózin.

9 Áádóó ákótʼéego haadzíiʼgo, diné tʼáá ałtso jílínę́ę, tʼááłaʼ, doo bitah dahatsʼídę́ę dóó bichʼįʼ ndahwiiʼnánę́ę, dóó chʼééh dah dadiikáhą́ą dóó binááʼ ádaadinę́ę dóó doo yádaałtiʼ yę́ę áádóó tʼáá haitʼéego da bąąh dah nahazʼánę́ę yaa dayiizhʼéézh; áádóó tsʼídá tʼáá átʼé naheeshtʼeezhę́ę hadaałtʼéego ánáyiidlaa.

10 Dóó tsʼídá tʼáá átʼé, ndahaaskai yę́ę dóó doo ádaatʼéhę́ę, bikétsį́įjįʼ nitsidadeesgoʼ, dóó yichʼįʼ sodadoolzin; dóó ląʼída yaa haskaiígíí éí yikeeʼ deiztsʼǫs, áko wónáasiiʼ binákʼeeshtoʼ yee táádeizgis.

11 Áádóó nihaʼáłchíní yázhí shaa dahóhjááh yidííniid.

12 Áko baʼáłchíní yázhí ndeiízjaaʼiiʼ binaagóó niʼgóó deidínéesbin, dóó Jesus yitahdóó yiizįʼ; dóó áłah jílínę́ę dahojiiłʼaʼ dóó tsʼídá ałtso niheeshtʼeezh.

13 Áádóó ałtso ahaa naheeshtʼeezhgo, dóó Jesus yitahdóó yiizįʼ, doo áłah nilínę́ę áháłní niʼ bikáaʼjįʼ nitsidadinohgeeh.

14 Áádóó ałtso niʼjįʼ nitsidaazhdeezgoʼgo, Jesus ádiiʼádííniid, dóó ání: shiTaaʼ, Israel bighandóó danilínígíí bąąhági átʼéii yaa naakaiígíí bąąh shíniʼ.

15 Dóó kótʼéego haadzíiʼgo, bídóʼ niʼ bikáaʼjįʼ ntsidinígoʼ; jó áádóó aTaaʼ yichʼįʼ sodoolzin, dóó sodizin yee haadzíʼígíí éí nááhídóodzohgo doo bíighah da, dóó áłah jílínę́ę deidiiztsʼą́ʼígíí ałdóʼ ákótʼéego yaa dahalneʼ.

16 Dóó kótʼéego éí yaa dahalneʼ: Hádą́ąʼda tʼah doo diné łaʼ kótʼéego yiyiiłtséeh da, dóó yidiitsʼį́įh da, ńtʼę́ę́ʼ, ayóó átʼéego dóó ayóó ánoolningo deiiltsą́ doo dasidiitsʼą́ą́ʼ Jesus aTaaʼ yichʼįʼ yáłtiʼgo.

17 Dóó díí ayóó átʼéego dóó ayóó ánoolningo Jesus haadzíiʼgo deiiltsánígíí dóó dasidiitsʼą́ʼígíí, éí doo bee hadoodzih átʼée da, doo ndóʼ ndi diné nááyíizóóh átʼée da, doo diné yaa ntsékees átʼée ndi da. Áádóó doo diné yikʼidookahígi átʼéego nihił dahóóshǫǫd aTaaʼ yichʼįʼ nihá sodilzingo dasidiitsʼą́ą́ʼ.

18 Áádóó Jesus aTaaʼ bichʼįʼ ałtso sodoolzingo, yiizįʼ; ndi áłah jílíę́ę tsʼídá yéigo bił dahóózhǫǫdgo biniinaa ałtso naaʼaníídeeʼ.

19 Áádóó Jesus yichʼįʼ hanáánáádzííʼ, dóó daoohsįįh yidííniid.

20 Dóó niʼ bikááʼdóó deizįʼ, dóó kwíídííniid: Niheʼoodląʼígíí binahjįʼ nihikʼihojídlíi dooleeł. Dóó kʼad, éí shijéí bił hózhǫ́.

21 Dóó kódííniidgo, yícha, dóó áłah jílíę́ę ałtso díí yaa dahoolneʼ, dóó baʼáłchíní, tʼááłáʼí nízinígo, yikʼijisdliʼ, dóó aTaaʼ yichʼįʼ yá sodoolzin.

22 Dóó díí ałtso áyiilaago hanáánácha;

23 Dóó áłah jílínę́ę hachʼįʼ hanáánáádzííʼ, kóníigo: Nihaʼáłchíní danółʼį́.

24 Dóó áajįʼ dazhdéeʼį́į́ʼ ńtʼę́ę́ʼ jó deigo hadajizghal, yáʼąąsh ąą ádzaago dayiiłtsą́, dóó diyin bá naalʼaʼii yáʼąąshdę́ę́ʼ adah deíkáahgo dayiiłtsą́ kǫʼ biyiʼdę́ę́ʼ nahalingo; dóó niʼ náhaaskaii áłchíní yázhí ałtso yináztʼiʼ. Dóó kǫʼ bináztʼiʼ; dóó diyin bá naalʼaʼí yikʼi sodadoolzin.

25 Dóó áłah jílínę́ę dajiiłtsą́ dóó dazhdiiztsʼą́ą́ʼ dóó tʼáá aaníí áhóótʼįįdgo haa dahaneʼ; háálá tʼáá ájíłtso éí dajiiłtsą́ dóó dazhdiiztsʼą́ą́ʼ, tʼááłáʼí jinízinígo; naakidi mííl dóó baʼaan ashdladi neeznádiin yiltʼéehgo; dóó díí éí łaʼ diné, asdzání dóó áłchíní dajílį́.