Wóltaʼii 29
Mormon haneʼ áyiilaa yę́ę naaltsoos bee dadínéezdeeʼgo éí Bóhólníihii Israel áłah ánéídléehgo dóó yił ałhadaʼdeestʼánę́ę yindiilnishgo bee ééhózin dooleeł—Háíshį́į́ díí akéeʼdi yoołkáłígíí haneʼ ííshjání ádaalyaaígíí dóó diyinkʼehgo aʼiilyéii doo deiniizį́ʼígíí éí doo bá yáʼádaatʼéeh da dooleeł. Díí éiyá Jesus náádiidzá dóó bikééʼdóó 34–35gi nahalzhiishgo yihahą́ądą́ą́ʼ ádahóótʼįįd.
1 Jó dóó kʼad, ánihidishní Bóhólníihii yaa ntsékeesígíí, dóó ádííniidę́ę bikʼehgo díí náádaháasdzooígíí Gentile dineʼé bichʼįʼ kódadoolnííł, ákódzaago nihił béédahodoozįįł aTaaʼ Israel baʼáłchíní yił ałhadaʼdeestʼánę́ę, díí kéyah ałkʼidą́ą́ʼ yee diníʼánę́ę baa ndeetʼaahígíí éí tʼáá íídą́ą́ʼ hahoolzhiizh dooleeł.
2 Dóó nihił béédahodoozįįł díí Bóhólníihii bizaad, éí éí Diyin God yá dahalneʼii yaa dahoolneʼę́ę, éí ałtso bidaʼdoolnííł; dóó éí Bóhólníihii Israel baʼáłchíní yee yigháhą́ą biláahgo ahoolzhiizh doo dadidoohniił da.
3 Dóó doo éí díí saad bee hadaʼiisdzíʼę́ę tʼáadoo biniiyéhé da doo łaʼ dadínóosįįł da, jó háálá, Bóhólníihii éí bidineʼé Israel bighandóó danilínígíí yił ałhadaʼdeestʼánę́ę yéédoolnih.
4 Dóó díí kóhaʼnínę́ę danółʼį́ nihitahgo bidaʼdoolníiłgo, áko ákódzaago éí Bóhólníihii binaanish áyoolíiłii tʼáadoo deínóhdziihí dooleeł, háálá bitʼáá ákogi átʼáo ánihwiitʼaahii bééshhał nahalinii éí nishʼnáájígo dah yootį́į́ł; jó áádóó, éí bijį́, binaanish deínohshiihgo éí nihikʼíndookǫs.
5 Háiida Bóhólníihii binaanish yikʼijįʼ nilíinii hóyééʼ bí dooleeł; aooʼ, háiida Christ dóó binaanish doo yiniizį́ʼígíí éí hóyééʼ bí dooleeł
6 Aooʼ, háiida Bóhólníihii bizaad ííshjání áyiilaaígíí doo jiniizį́ʼígíí, dóó Bóhólníihii éí kʼad doo tʼáadoo leʼé yáʼąąshdę́ę́ʼ ííshjání ááníłígíí yikʼehgo naalnish da jinínígíí, éí doodago doo náasdi ádahodooníłígíí baa nadahaneʼ dajinínígíí, éí doodago haʼátʼííshį́į́ Bóhólníihii aʼiiléhę́ę ndi ádin, éí doodago saad ałʼąą átʼéii bee yátiʼ dóó diitsʼaʼígíí ndi ádin, éí doodago álílee hadaałtʼé áńdaʼadleʼígíí ndi ádin, éí doodago Iiʼsizį́ Diyinii éí doo bee ndaʼanish daanínígíí, éí hóyééʼ bí dooleeł!
7 Aooʼ, háíshį́į́ akéeʼdi yoołkáłígíí biyiʼ, atʼį́ biniiyé, Jesus Christ éí kʼad doo álíleekʼehgo naalnish, nínígíí éí hóyééʼ bí dooleeł; háálá háíshį́į́ kójitʼínígíí chʼį́įdii beʼiiníziinii éí yóó adootʼáanii biyeʼgi nahalingo jílį́į doo, éí éí doo haa hojidoobaał da, Christ bizaadígíí bikʼehgo!
8 Aooʼ, kʼad éí doo Jew dineʼé doodago Israel bighandóó dineʼé danilínígíí bichʼįʼ tʼáadoo hiss dadohníní, doodago deínóhdziihí, doodago dajiinohłahí; jó háálá, Bóhólníihii yił ałhadaʼdeetʼánę́ę yénáálniiʼ, dóó éí yił ałhaʼdeetʼánę́ę bikʼehgo yiʼdoolííł.
9 Éí bąą Bóhólníihii, bílaʼ nishʼnáájígo nishtłʼajígo dah doolnihgo éí doo ádoohłíił da, áko Israel bighandóó danilíinii tʼáá átʼé yił ałhadaʼdeestʼánę́ę éí doo yiʼdoolíił da.