1 Áádóó kʼad díí Jesus ałtso yaa nahasneʼgo tsʼídá nizhónígo áháʼnínígíí átʼéii diné áłah jílínę́ę yił yiyííłtaʼ; tsʼídá ałtso dantsaa dóó ádaałtsʼísíjįʼ ałtso nizhónígo yaa nahasneʼ.

2 Dóó ání: Díí saad doo nihee dahólónę́ę, aTaaʼ éí bee bił hodíílnih shidííniid; háálá éí biniiyéii bił bééhózinígíí bąą náásgóó oochíłígíí baa díílééł dííniid.

3 Dóó tsʼídá tʼáá ałtsoní, hodeeyáádą́ą́ʼ ádahoodzaahą́ą dóó ńléí ayóó átʼéii nilį́įgo doogáałjįʼ, nizhónígo yaa nahasneʼ—aooʼ, tsʼídá ałtso nahadzáán bikááʼgóó ádahodooníłígíí yaa nahasneʼ, ńléí nahasdzáán bee hadilyaaígíí ałtso doo chohooʼį́į́góó honiigaiigo ałtso dadidoołhįh ndi, dóó nahasdzáán éí naaltsoos nahalingo doodis, dóó yádiłhił dóó nahasdzáán éí ádin dooleeł.

4 Dóó ayóó átʼéego ándahwiitʼaah bijį́įgi ndi, diné tʼáá ałtsogo, dóó ałʼąą dóoneʼé dóó bił nahazʼą́ągo dóó ałʼąą dabizaadii tsʼídá ałtso Diyin God yidááhdóó deidoozįįłgo, binaanish ádayiilaa yę́ę binahjįʼ bá ndahwidiyootʼááł, yáʼátʼéehgo da daatsʼí éí doodago doo yáʼátʼééhgóó daatsʼí beʼiinaʼ ádayiilaa—

5 Nizhónígo beʼiinaʼ ádayiilaaígíí, éí hoolʼáágóó iiná yichʼįʼ náhididoojah; dóó doo yáʼáshǫ́ǫ́góó dahináanii, éí doo yáʼátʼééhgóó hazʼą́ą́jí nahizhdidoojah; ahąąh nítʼiʼ nahalin, łaʼ kojí nishʼnáájí dóó náánáłaʼ éí ńléí nishtłʼají, díí éí Christ, nahasdzáán tʼah doo álnééhdą́ą́ʼ hináanii, ajoobaʼ, dóó tʼáá ákótʼéhígíí dóó hodiyingo biiʼ hólóonii bikʼehgo.

6 Dóó kʼad díí haneʼ hadilyaaígíí éí biyiʼ áłchʼį́į́dígo ndi Jesus tʼáá aaníí yínaʼneestą́ʼą́ą bikááʼ álnéehgo doo bíighah da.

7 Jó ndi Nephi bibéésh tʼą́hí bikáaʼjįʼ éí tsʼídá ląʼída yínaʼneestą́ʼą́ą bikááʼ.

8 Dóó díí éí shí íishłaa, éí áłchʼį́į́dígo tʼéiyá diné yee neineeztą́ʼą́ą átʼé, dóó díí íishłaaígíí áko náasdi díí diné, Gentile dineʼé bitsʼą́ą́dę́ę́ʼ, bitah ndootʼááł biniiyé, Jesus bizaad yee yáłtiʼę́ę bikʼehgo.

9 Dóó díí ńdeidiiláago, éí éí tsʼídá áłtsé bílákʼedoolyééł beʼoodląʼ bee bíhodínóotah, dóó díí dayoosdląądgo índa hózhǫ́ haneʼ dabidziilii bił ííshjání ádoolnííł.

10 Dóó díí doo dayoosdląądgóó, éí bíniʼ hózhǫ́ dabidziilii doo bichʼįʼ kódoolníił da, éí bikʼehgo doo bidiʼnóodzįįł da.

11 Jó, tsʼídá kʼad, Nephi bibéésh tʼą́ʼhí bikáʼígíí haneʼ dabidziilii sinilígíí bikááʼ, ábiʼniishłaago, ndi Bóhólníihii éí dooda ní, kóníigo: Shidineʼé beʼoodląʼ bídínéeshtah.

12 Éí bąą shí, Mormon, éí Bóhólníihii bikááʼ ádíílííł shiłnínígíí tʼéiyá bikááʼ íishłaa. Dóó kʼad éí shí, Mormon shizaadígíí tʼáá ákódí dooleeł, doo kʼad éí bikááʼ nááhidíidzoh shiʼdooʼniidę́ę éí nínáhásoh dooleeł.

13 Éí bąą, díí éí nihił bééhózin doo laanaa nisin Bóhólníihii tʼáá aaníí diné neinitingo, tágí jį́ azlį́į́ʼ; dóó bikʼijįʼ yichʼįʼ ííshjání áʼdiilyaa doo éí tʼáá ahą́ą́h yaa nádááh ńtʼę́ę́ʼ, dóó tʼáá ahą́ą́h bááh nináyitiʼ, dóó yá sońdílzįįh, dóó hatah neikaah ńtʼę́ę́ʼ.

14 Áádóó diné áłah jílínę́ę há haadzíʼę́ę hadaʼáłchíní neidíníitą́ą́ʼ dóó yíká aheeswod, dóó áłchíní bitsooʼ bee hadoodzih bíighahgo áyiilaa, dóó bishchíinii ayóó átʼéii dóó ayóó ádahooshónígíí yee yichʼįʼ yádaałtiʼ, azhą́ diné yił ííshjání áyiilaa yę́ę ndi yiláahgo yaa dahoolneʼ; áko bitsooʼ yee hadadoodzihgo áyiilaa.

15 Áádóó yáʼąąshgóó nínáánádzáago—naaki góneʼ hachʼįʼ ííshjání áʼdiilyaa, dóó aTaaʼ yichʼįʼ náádzá, ałtso hadaałtʼéego áńdahoodlaago, dóó ndanitłʼah yę́ę, dóó doo daʼooʼínę́ę dadeezghal dóó doo dadiitsʼaʼą́ą ńdaʼdiiztsʼą́ą́ʼ, dóó tsʼídá ałtso bąąh dah nahazʼáanii hadaałtʼéego ánáyiidlaa ndi, dóó diné łaʼ ádinę́ę nínéidiisą́, dóó beʼadziil ííshjání áyiilaa, dóó aTaaʼ yichʼįʼ deigo dah nahodiidleʼ—

16 Jó, áádóó biiskání diné ałtso áłah anáánádzá, dóó áłchíní yázhí yádaałtiʼgo dajiiłtsą́ dóó deidiiztsʼą́ą́ʼ; aooʼ, azhą́ awééchʼíʼí ndi bizééʼ ąą ádayiilaa dóó nizhónígo hadaasdzííʼ; dóó yaa yádaałtiʼígíí éí doo nááhídóosoh da hodooʼniid.

17 Áádóó naakitsʼáadah Jesus hastóí náyiizláʼą́ą tó yee daʼasį́įhgo hahoolzhiizh dóó haashį́į́ néelą́ą́ʼ diné baa dahakáhígíí ndeinitin; dóó haashį́į́ néelą́ą́ʼ Jesus bízhiʼ binahjįʼ tó bee dabiʼdoolzį́ʼígíí éí Iiʼsizį́ Diyinii biiʼ hadadéébįįd.

18 Dóó tʼóó ahayóí diné éí doo bee hajidziih ádaatʼéii dayiiłtsą́ dóó deidiiztsʼą́ą́ʼ, díí éí nááhídóodzohígíí doo bee hazʼą́ą da.

19 Dóó ndaʼnitin, dóó tʼáá bí ndaʼahinitin; dóó tʼáá ałtsoní aheełtʼéego áłká ańdaajah, tʼáá ałtso diné tʼáá ákogi átʼéego, ahił ndaalnish.

20 Áádóó Jesus yee bichʼįʼ haadzíʼę́ę tʼáá ałtso yidaʼiilaa.

21 Dóó Jesus bízhiʼ binahjįʼ tó bee dabiʼdoolzį́ʼę́ę éí Christ bisodizin bá hooghan daʼatahgo bee dabiʼdééjiʼ.