1 Áádóó kʼad Jesus díí ałtso nanitin yaa nahasneʼgo áłah jílínę́ę hatah ahééníghal, dóó áháłní: Jó, díí tʼah doo shiZhéʼé bichʼįʼ dah ńdiishdáahgo naʼnitin bee naʼnétą́ʼą́ą dashidoohtsʼą́ą́ʼ, éí bąą, tʼáá háiida díí shinaʼnitin yénálniih dóó yikʼeh hółʼínígíí, éí akéeʼdi ayííłką́ągo naabídídeeshnah.

2 Áádóó Jesus díí ałtso saad yee haadzíiʼgo, diné łaʼ Moses bibeehazʼáanii shąʼ haadoonííł danízingo yaa ákoniizį́į́ʼ; háálá ałkʼidą́ą́ʼ ádaatʼéhę́ę éí ałtso bił áhóóyá, dóó tʼáá ałtsoní ániidí daazlį́į́ʼ haʼnínígíí tʼáadoo yikʼidaʼdiitą́ą da.

3 Dóó kóyidííniid: Ałkʼidą́ą́ʼ ádaatʼéhę́ę ałtso bił áhóóyá, dóó tʼáá ałtsoní áníídí daazlį́į́ʼ, dishnínígíí tʼáadoo haitʼáo lá danohsiní.

4 Jó, shí ánihidishní Moses beehazʼáanii beilyáhą́ą éí ałtso beʼelyaa.

5 Jó, shí éí beehazʼáanii ninílá, dóó shí shidineʼé Israel bił ałhadiʼnishtʼą́; éí bąą, éí beehazʼáanii yę́ę shí shinahjįʼ ałtso beʼelyaa, háálá shí éí beehazʼáanii biʼdeeshłííł biniiyé níyá; éí bąą éí kojįʼ ninítʼiʼ.

6 Jó, Diyin God yá dahalneʼii haneʼ ádayiilaa yę́ę éí doo deeshchxǫǫł da, háálá ląʼída tʼáadoo shinahjįʼ bidaʼalyaa da, tʼáá aaníí ánihidishníigo, éí díí ałtso bidaʼdoolnííł.

7 Dóó ałkʼidą́ʼígíí ałtso bił ayííłką́ nihidishnínígíí, éí doo náasjįʼ ádahodoonííł daanínę́ę yíłchxǫʼ da.

8 Jó háálá, shidineʼé bił ahaʼdinishtʼánę́ę éí tʼah doo ałtso beʼelnéeh da; ndi beehazʼáanii Moses beilyáhą́ą éí shinahjįʼ ałtso beʼelyaa.

9 Jó, shí éí beehazʼáanii, dóó adinídíín nishłį́. Shichʼįʼ dadínóoʼį́į́ʼ, dóó nihá ndahwiistʼą́ bijį́įjįʼ yéigo ádaahtʼį́, dóó dahinohnáa doo; háálá, háíshį́į́ bá nihootʼą́ bijį́įjįʼ yéigo átʼíinii éí hoolʼáágóó iiná Diyin God bił baa deeshłééł.

10 Jó, beehazʼáanii nihaanílá; éí bąą shibeehazʼáanii bikʼeh dahonołʼį́. Dóó díí éí beehazʼáanii átʼé dóó Diyin God yá dahalneʼii haneʼ ádayiilaa yę́ę átʼé, háálá éí tʼáá aaníí shaa ndahasneʼ.

11 Áádóó kʼad Jesus díí saad yee haadzíiʼgo, hastóí naakitsʼáadahgo náyiizláʼą́ą éí kótʼéego yichʼįʼ haadzííʼ:

12 Nihí éí shikééʼ nisoozį́; dóó nihí éí díí Joseph bighandóó dineʼé danilínígíí, bibee adinídíín danohłį́.

13 Jó áádóó, díí éí kéyah nihí; dóó aTaaʼ éí nihaidiníʼą́.

14 Dóó hádą́ąʼda éí doo aTaaʼ díí kéyah nihikʼisóó Jerusalemdi kéédahatʼíinii bił hodíílnih shidííniid da.

15 Dóó ałdóʼ hádą́ąʼda éí doo aTaaʼ náánáłaʼ Israel bighandóó ałʼąą dóoneʼé danilínígíí ałʼąą ayíízhʼeezhgo, díí dineʼé bił chʼídííʼááł shidííniid da.

16 Díí kóníłtsoígo aTaaʼ éí bił hodíílnih, shidííniid:

17 Łaʼ dibé shee nááhódlǫ́ éí éí doo kǫ́ǫ́ atah da; éídóʼ áádę́ę́ʼ deeshʼish, dóó shinééʼ deididootsʼį́į́ł; dóó tʼááłáʼíjįʼ dibé hólǫ́ǫ dooleeł, dóó tʼááłáʼí dibé yá sizį́į dooleeł.

18 Dóó kʼad, bikʼos daniłdzil dóó doo daʼoodlą́ą́góó biniinaa shizaad tʼáadoo yikʼidaʼdiitą́ą da; éí bąą aTaaʼ áshidííniid díí baa haneʼígíí tʼáá ákódígo bee bił hodíílnih shidííniid.

19 Ndi, tʼáá aaníigo, ánihidishní díí aTaaʼ bee bił hodíílnih shiłnínígíí, dóó bee nihił hashneʼ, nihí bitsʼánihiʼdeeʼnil bąąhági átʼéii yaa naakaigo biniinaa; éí bąą bąąhági átʼéii yaa naakaiígíí biniinaa kǫ́ǫ́ honohłónígíí doo béédahózin da.

20 Dóó tʼáá aaníí, ánáánihidishní náánáłaʼ dóoneʼé danilínígíí ałdóʼ aTaaʼ yitsʼéíninil; dóó bibąąhági átʼéii biniinaa éí dahólǫ́ǫdi doo bił béédahózin da.

21 Dóó tʼáá aaníí ánihidishní, nihí ánihidishní kódííniidę́ędą́ą́ʼ: Dibé łaʼ shee nááhódlǫ́ éí doo kǫ́ǫ́ atah da; éídóʼ áádę́ę́ʼ deeshʼish, dóó shinééʼ deididootsʼį́į́ł; dóó tʼááłáʼí dayikah dooleeł dóó tʼááłáʼí yá sizį́į dooleeł.

22 Dóó tʼáadoo shikʼidaʼdiitą́ą da, háálá Gentile dineʼé baa yájíłtiʼ danízin; háálá Gentile dineʼé éí binaʼnitinígíí binahjįʼ sodizin yihididookahígíí éí doo bił béédahózin da.

23 Dóó tʼáadoo shikʼidaʼdiitą́ą da éí shinééʼ deididootsʼį́į́ł dííniidígíí; dóó tʼáadoo shikʼi náádaʼdiitą́ą da Gentile dineʼé éí tʼáá haaʼída doo shinééʼ deididootsʼį́įł da—éí doo bichʼįʼ ííshją́ą́ ádiʼdideeshníił da tʼáá hazhóʼó Iiʼsizį́ Diyinii binahjįʼ tʼéiyá.

24 Jó ndi, nihí éí shinééʼ dashidootsʼą́ą́ʼ, dóó dashoołtsą́; dóó nihí éí shidibé danohłį́, dóó nihí éí aTaaʼ shee diníʼánígíí yitah danohłį́.