Wóltaʼii 30
Tsʼídá akéeʼdi yoołkááł góneʼ Gentile dineʼé beʼiinaʼ łahgo áńdaahdlééh biʼdooʼniid, dóó Christ baa hokááh, dóó Israel baʼáłchíní bił nihiʼdooltah biʼdooʼniid. Díí éiyá Jesus náádiidzá dóó bikééʼdóó 34–35gi nahalzhiishgo yihahą́ądą́ą́ʼ ádahóótʼįįd.
1 O Gentile Dineʼé danohłíinii, daʼiisinółtsʼą́ą́ʼ, dóó Jesus Christ bizaad dadoohtsʼį́į́h, Diyin God hináanii biYeʼ, éí díí bídéétʼiʼígíí bee bichʼįʼ hadíídzih shidííniid, jó háálá díí bikááʼ ánílééh shidííniid, kóníigo:
2 Gentile dineʼé nohłíinii, nihibąąhági átʼéii, bitsʼánóhkááh; dóó bąąhági átʼéii baa naakaahígíí yóó adahidohʼaah, nihiyoochʼídígíí dóó nihińdaʼadlohígíí, dóó iłjiłgo, dóó aláahdi joodláhígíí ndanohłʼingo baa naahkaiígíí, dóó tʼáadoo leʼé bidaʼoohłeʼgo bichʼįʼ ndaholáhígíí, dóó ndaʼohłtseedígíí, dóó béeso bikʼé sodadołzinígíí, dóó nihiʼoolchʼį́į́d, dóó daʼahohgánígíí, dóó tsʼídá tʼáá átʼé bee niheʼiiníziinii dóó aláahdi joodláhígíí bitsʼánóhkááh, dóó shaa hohkááh, dóó shízhiʼ binahjįʼ tó bee danihiʼdilzį́į́h, áko bąąhági átʼéii baa nisoohkai yę́ę nahjįʼ nihá kódadoolnííł, dóó Iiʼsizį́ Diyinii biiʼ hadadidoobį́į́ł, áko shidineʼé Israel bighandóó danilíinii bił nihidiʼdooltah.