1 Áádóó Jesus kótʼéego Nephi, dóó bikʼidahodiiniiʼę́ę yichʼįʼ haadzííʼ, (áko díí diné bikʼidahodiiniiʼę́ę, dóó óhólníihii bikʼehgo tó bee alzį́į́h baa dahasyáhą́ą, éí naakitsʼáadah) jó áádóó, diné áłah jílínę́ę bílaʼ yee yichʼįʼ dah didiilniiʼii, dóó yichʼįʼ haadzííʼ, kóníigo: Nihikʼijideeshdliił díí nihitahdóó naakitsʼáadahgo ndanihinitin, dóó nihá ndaalnish doo biniiyé bikʼidadiishniiʼígíí deísínóołtsʼą́ąʼgo; dóó eii éí tó bee alzį́į́h bee adziilii baa hélá tó yee danihidoosį́į́ł biniiyé; áádóó tó bee nihiʼdoolzį́į́ʼ dóó shí éí kǫʼ dóó Iiʼsizį́ Diyinii bee nihideesįįł; éí bąą nihikʼihojídlí dóó shiisoohdląądgo dóó tó bee nihiʼdoolzį́įʼgo, éí bikééʼdóó dashoołtsą́ągo honishłónígíí nihił béédahodoozįįł.

2 Dóó nááná, nihizaad dayoosdląądígíí łą́ągo bikʼidahojidoodliił háálá dashoołtsánígíí tʼáá aaníí baa dahodoołnih, dóó tʼáá aaníí honishłónígíí nihił béédahodoozįįł. Aooʼ, nihizaad dayoosdląądígíí éí bikʼidahojídlíi dooleeł, dóó hojoobaʼgo ńdaasdlį́ʼígíí dóó tó bee dabiʼdoolzį́ʼígíí, háálá kǫʼ dóó Iiʼsizį́ Diyinii bee baa hodootʼih, dóó bąąhági átʼéii yaa naaskai yę́ę baa ńdadidootʼááł.

3 Aooʼ, hojoobaʼ ádeinízingo shaa hakáahii éí bikʼidahojídlí, háálá yáʼąąshdi hazʼáanii daabí.

4 Dóó nááná, tʼáá ałtso yínííł ndaakai bikʼidahojídlí, háálá éí hadaʼólníigo ádadoolnííł.

5 Dóó aa hojoobaʼígíí bikʼidahojídlí, háálá éí nahasdzáán daabí dooleeł.

6 Dóó tʼáá ałtso yáʼátʼéehii yíká dichin dóó dibááʼ danízinii bikʼidahojídlí, háálá éí éí Iiʼsizį́ Diyinii bił dahólǫ́ǫ doo.

7 Dóó adajoobaʼii bikʼidahojídlí, háálá éí ajoobaʼ daabí dooleeł.

8 Dóó bijéí biiʼ daniłtólígíí bikʼidahojídlí, háálá Diyin God deidoołtsééł.

9 Dóó kʼé ńdahoołeełii bikʼidahojídlí, háálá Diyin God baʼáłchíní dabiʼdiʼníi dooleeł.

10 Dóó tʼáá ałtso shízhiʼ biniinaa atídabiʼdiilyaaí éí bikʼidahojídlí, háálá yáʼąąshdi hazʼánígíí daabí.

11 Dóó shiniinaa tʼáá ádzaagóó diné nihaa ndahalneʼgo dóó nihichʼįʼ ndahwiiłnáago, dóó nichxǫ́ǫ́ʼígo aseezį́ nihikʼijįʼ ádeiłʼį́įgo, nihikʼidahojídlí.

12 Háálá tʼáá íiyisíí ił hózhóonii nihiiʼ dooleeł dóó tʼáá íiyisíí baa nihił dahodoozhǫǫł, háálá ayóó átʼéii yáʼąąshdi yisołbą́ dooleeł; háálá tʼáá díigi átʼéego nihilą́ąjįʼ Diyin God yá dahalneʼii yichʼįʼ ndahwiisnááʼ.

13 Tʼáá aaníí, tʼáá aaníigo ánihidishní, nahasdzáán beʼáshįįh danohłį́; ndi áshįįh doo halniih da silį́įʼgoshąʼ haʼátʼíí nahasdzáán bikʼídoonił? Áshįįhę́ę éí áádóó tʼáadoo biniiyéhé da doo, ndi tʼóó chʼídoolkał dóó diné yikʼi naaldeeh doo.

14 Tʼáá aaníí, tʼáá aaníigo, ánihidishní, nihí díí diné bá adinídíín danohłį́įgo. Kin hókʼą́ądi dashijaaʼgo éí doo ńdidoolʼį́įł da.

15 Jó, dinésh akʼahkǫʼ deidiiłtłiʼ dóó ásaaʼ yistłʼónígíí yił yaa ninádeiʼááh? Nda shį́į́, akʼahkǫʼ anátsihígi ańdeitsih, dóó hóneʼ hojílónígíí há bee adinídíin doo.

16 Éí bąą niheʼadinídíín bíniʼdii diné bilą́ąjįʼ adiníłdíín, áko naanish yáʼátʼéehgo óhłʼínígíí deiniłʼį́ dóó Diyin nihiTaaʼ yáʼąąshdi hólóonii yaa dahaniih.

17 Tʼáadoo beehazʼáanii dóó Diyin God yá dahalneʼii yee hadahasdzíʼę́ę biʼniiłchxǫʼ danohsiní. Doo éí ideeshchxǫǫł biniiyé níyáa da ndi tʼáá ałtso biʼdoolnííł biniiyé.

18 Háálá tʼáá aaníí ánihidishní, tʼááłáʼígo dah alzhin dóó tʼááłáʼígo adeesdzoh ndi doo beehazʼáanii bitsʼą́ą́dóó nahjįʼ kódzaa da, ndi shinahjįʼ tʼáá ałtso beʼelyaa.

19 Jó áádóó, shiTaaʼ bibeehazʼáanii dóó saad bikʼeh dahonołʼį́į dooleełígíí nihił ííshją́ą́ íishłaa, éí dashiidoohdląął, dóó niheʼiinaʼ łahgo áńdaahdlééh, dóó bąąhági átʼéii nihijéí yisdiłgo dóó baa yínííł danohłį́įgo shaa wohkááh. Jó, saad bikʼeh dahonołʼį́į dooleełígíí éí nihidáahgo, dóó beehazʼáanii éí ałtso beʼelyaa.

20 Éí bąą dashiinohdlą́ dóó shaa wohkáahgo yisdáoohkááh; háálá tʼáá aaníí ánihidishní, tʼáá hazhóʼó shibeehazʼáanii bikʼeh dahonołʼį́į doo, éí éí kʼad nihidííniidę́ę bikʼeh dahonołʼį́įgo tʼéiyá, yáʼąąsh hazʼą́ąjįʼ yah ahidoohkah.

21 Ałkʼidą́ą́ʼ hastóí yę́ę éí díí yaa yádaałtiʼ haʼníigo dasidootsʼą́ą́ʼ, dóó kǫ́ǫ́dóʼ bee bikʼeʼeshchį́, doo niʼdziłtseed da níigo, dóó háíshį́į́ naʼałtseedgo éí Diyin God bee nihwiitʼaahii tʼáá íiyisíí bikʼijįʼ kótʼée dooleeł.

22 Ndi ánihidishní, tʼáá háiida bikʼis yichʼįʼ bá hóóchįįdígíí éí bibee nihwiitʼaahii tʼáá íiyisíí bikʼijįʼ kótʼée dooleeł. Áádóó tʼáá háiida bikʼis, Raca yiłníigo, éí báhádzidgo da naatʼáanii danilíinii baa nihodootʼááł; dóó tʼáá háiida, Diigis nínígíí, éí chʼį́įdiitah hodookʼą́ąłdi hojílǫ́ǫ doo.

23 Éí bąą, háíshį́į́ shaa nooyáhígíí, índa baa deeshááł nohsinígíí, dóó béédaohłniih nihikʼis tʼáá haʼátʼííshį́į́ biniinaa nihichʼįʼ átʼéego—

24 Nikʼis bichʼįʼ dinááh, dóó áłtsé nikʼis hazhóʼó kʼénábididííniił, áádóó índa nijéí biyiʼdę́ę́ʼ tʼáá aaníí nínízingo shaa díínááł, dóó nidááh deeshááł.

25 Nihitsʼą́ąjįʼ danilínígíí tʼahdii kʼé dabidohnínídą́ą́ʼ tsxį́įłgo yaa yáłtiʼígíí tʼáá ákótʼé bidohní, áko náasdi doo nihikʼehdidoodleeł da, dóó doo awáalyaa góneʼ anihidoołtʼeeł da.

26 Tʼáá aaníí, tʼáá aaníigo, ánihidishní, ákogo doo éí chʼééh dohdáał da tsʼídá ałtso nihaa nihootʼánę́ę senine bíighah ninooláago tʼéiyá. Dóó awáalyaa góneʼ sínídáagoósh senine tʼááłáʼí ndi nináʼdíídlééł. Tʼáá aaníí, tʼáá aaníigo, shí éiyá Ndagaʼ nihidishní.

27 Jó, ałkʼidą́ą́ʼ hastóí yę́ę ndaʼadzo, doo azhdilée da dadííniid.

28 Ndi shí ánihidishní, tʼáá háiida asdzání yiníłʼį́įgo, yídanoosniiʼgo, éí tʼáá íídą́ą́ʼ bijéí biyiʼdi adíílá.

29 Jó, díí bee hazʼą́ągo bee nihichʼįʼ haasdziih, áko díí doo łaʼ nihijéí biiʼ dooleeł da.

30 Háálá díigi ádaatʼéhígíí atsʼádinootʼą́ągo éí nihá yáʼátʼéeh doo, ákótʼéego nihitsin ałnáozʼai ndadidootį́į́ł, áko doo chʼį́įdiitahgóó kónihidiʼdoolníił da.

31 Díí éí ałkʼidą́ą́ʼ bikááʼ ályaa, tʼáá háiida beʼesdzáán nahjįʼ kóyiilaaígíí, éí ałtsʼátʼáázhígíí naaltsoos bee ałtsátʼaash bikʼeʼeshchį́įgo yeidoołtsos.

32 Tʼáá aaníí, tʼáá aaníigo, ánihidishní, tʼáá háiida beʼesdzáán nahjįʼ kóyiilaaígíí, doo adilyé biniinaagóó, éí adilyé bee bá hojiiłʼaʼ dooleeł; áádóó háíshį́į́ yóó abiʼdootʼą́shį́į́ náábizyehgo éí adííláa doo.

33 Dóó nááná bikʼi nináʼásdzoh, tʼáadoo tʼóó ádíníigo ádee hadídziihí, ndi bee hadídziihígíí Diyin God binááł biʼołʼį́;

34 Ndi tʼáá aaníí, tʼáá aaníigo, ánihidishní, tʼáadoo ńdaʼohdzihí; yádiłhił ndi bee dooda, háálá éí éí Diyin God yikááʼ dah sidáhígíí átʼé;

35 Nahasdzáán ndi dooda, háálá éí éí yikááʼ dah ndilʼisígíí átʼé;

36 Dóó ałdóʼ nihitsiitsʼiin ndi tʼáadoo binahjįʼ ádee hádadohdziihí, háálá nihitsiiʼ ła łizhin dóó łaʼ łigaigo ádoohłíłígíí éí doo bíínóhghah da;

37 Ndi ałchʼįʼ yádaałtiʼgo Aooʼ, Aooʼ; Dooda, Dooda dadohníi dooleeł; háálá tʼáá haʼátʼííshį́į́ bínáánéitʼą́ągo éí doo yáʼáshóonii átʼé.

38 Jó áádóó, bikááʼ nááháasdzo, anááʼ éí anááʼ bikʼé naazláa dooleeł, dóó awooʼ éí awooʼ bikʼé naazláa dooleeł;

39 Ndi shí ánihidishní, éí tʼáadoo doo yáʼátʼéehii nátʼą́ą́ʼ doo yáʼátʼééh bee akʼee dohniihí, ndi tʼáá háiida nihinishʼnáájí nihiniiʼ néidííkaadgo, éí łahjígíí ałdóʼ baa nínáádidooʼááł.

40 Dóó tʼáá háiida diné nihee niʼníłtsoozgo nihiʼéétsoh nihighai níłtsoozgo, ééʼ bikʼínáltihí ałdóʼ baa dííłtsoos;

41 Dóó háiida tsin sitą́ąjįʼ shił dííʼash nihidííniidgo, éí naaki tsin sitą́ąjįʼ bił ndííʼash.

42 Tʼáá háiida tʼáadoo leʼé nihiyííkeedgo baa doohłééł, dóó tʼáá háiida tʼáadoo leʼé shaʼnílé nihidííniidgo tʼáadoo dooda diníní.

43 Jó áádóó ałdóʼ bikʼínááʼaschį́, bił kʼéédaʼahidohʼnínígíí ayóí ííníʼní dóó niheʼenaʼí éí jiiníłá;

44 Jó ndi shí ánihidishní, niheʼenaʼí ayóí ííníʼní, danódziihii éí bikʼijinídlí, dóó danjoołáhígíí yáʼátʼéehgo tʼéiyá bił nanilnish, dóó atínihiiłʼínígíí dóó nihichʼįʼ nahwiiłnánígíí éí bá sodílzin.

45 Áko niTaaʼ yáʼąąshdi hólóonii baʼáłchíní danohłį́į dooleeł; háálá bijóhonaaʼéí yáʼátʼéehii dóó doo yáʼátʼéehii yikááʼ hanádáahgo áyósin.

46 Éí bąą tʼáadoo leʼé ałkʼidą́ą́ʼ yę́ę beehazʼáanii, bikʼidaastiʼę́ę, éí tʼáá ałtso shinahjįʼ bidaʼalyaa.

47 Ałkʼidą́ą́ʼ ádaatʼéhę́ę éí nahjįʼ kódaalyaa, dóó tʼáá ałtso ániidí daazlį́į́ʼ.

48 Éí bąą shígi átʼáo, éí doodago niTaaʼ yáʼąąshdi hólóonii haałtʼéhígi átʼáo nihídóʼ hadanołtʼé.