1 Tʼáá aaníí, tʼáá aaníigo, ádíshní baa dahojoobáʼí baa dajiinohbaah; ndi díí aa nohłéhígíí éí tʼáadoo hazʼą́ągi bee shidiʼdooltsééł nohsiní; ákótʼéego éí nihiTaaʼ yáʼąąshdi hólóonii doo nihaʼdooléeł da.

2 Éí bąą, aa nohłéhígíí éí tʼáadoo ayóó íitsʼaʼgo ádaa hohniihí, tʼóó ádahoʼdilʼínígíí nahalingo ńléí sodizin bá dahooghangóó dóó daʼnítiingóó ákódaatʼį́, ákogo diné shaa dahodoonih danízin. Tʼáá aaníigo ánihidishní, éí éí tʼáá íídą́ą́ʼ baa daʼiisyá.

3 Ndi áká anilyeedgo éí tʼáadoo nihílaʼ nishtłʼajígíí nihílaʼ nishʼnáájí yaa naagháhígíí yiniihí.

4 Nihí aa nohłéhígíí éí tʼáadoo nihá yiʼniihí; niTaaʼ doo yitʼíinii yooʼíinii, tʼáá bí hootʼį́įgo nihaʼdoolééł.

5 Dóó sodílzingo tʼáadoo tʼóó ádahoʼdilʼínígíí nahalingo sodadołziní, háálá éí éí sodizin bá hooghan góneʼ dóó ahidaʼdiitiingo naazį́įgo, sodadilzingo bił ayóó ádaatʼé, diné danihiidoołtsééł danízin. Tʼáá aaníí ánihidishní, éídóʼ tʼáá íídą́ą́ʼ baa daʼiisyá.

6 Ndi ni, sodílzingo, doo naagháhí góneʼ yah nánídáahgo, dóó dádiʼníłkaałgo, niTaaʼ doo hootʼį́įdi hólóonii bichʼįʼ sodílzin; dóó niTaaʼ, doo yitʼíinii yooʼíinii, hootʼį́įgo naʼdoolééł.

7 Ndi sodílzingo, doo tʼáá ádzaagóó tʼóó ałkééʼ náhidééłtʼéʼé, doo Diyin God dayoodlánígíí ádáátʼínígi átʼáo, háálá éí éí yéigo ałkʼińdeidiyiłtʼéego shididootsʼį́į́ł danízin.

8 Nihí éí tʼáadoo ákódaahtʼíní, háálá nihiTaaʼ éí bee nihichʼįʼ anáhóótʼiʼígíí tʼáá íídą́ą́ʼ tʼáadoo bee haadziihgo bił bééhózin.

9 Díí bikʼehgo sodadołzin doo: NihiTaaʼ yáʼąąshdi honílóonii, nízhiʼ diyinii.

10 Íinínízinii nihookááʼ bikʼehgo áhodoonííł yáʼąąshdi átʼéhígi átʼáo.

11 Dóó bee nihąąh adaazʼáhígíí bee nihaa ndiníʼaah, nihí nihąąh hadayíłʼahígíí baa ndaʼdiitʼaahgo.

12 Dóó doo yáʼátʼéehii achʼįʼ nahwiiłnáanii biyiʼjįʼ kónihóleʼ lágo, ndi doo yáʼáshóonii bitsʼą́ąjigo kónihidíílííł.

13 Háálá yáʼąąsh hazʼą́ądi, dóó adziilii, dóó ayóó átʼéii, éí hoolʼáágóó ni. Amen.

14 Háálá, diné nihíniʼ dayííłʼaʼii baa ńdahidohʼaahgo éí nihiTaaʼ yáʼąąshdi hólóonii nihídóʼ nihaa ndizhʼdooʼááł.

15 Ndi diné doo baa ndinohʼaahgóó éí nihiTaaʼ ałdóʼ doo nihaa ndizhʼdooʼáał da.

16 Ałdóʼ nááná, chʼiyáán ádąąh wohtʼį́įgo sodołzingo tʼáadoo tʼóó ádahoʼdilʼíinii ádáátʼínígi ádanohtʼéhé, doo bił dahózhǫ́ǫgo nahalin, háálá éí éí biniiʼ yínííł naʼadá nahalingo ádaʼdólzingo ndaakai áko diné díí chʼiyáán ádąąh deitʼį́įgo sodadilzin diné danihinéłʼį́į doo danízin. Tʼáá aaníigo ánihidishní, tʼáá íídą́ą́ʼ baa daʼiisyá.

17 Ndi ni, chʼiyáán ádąąh nitʼį́įgo sodílzingo, nitsiiʼ niłtłah, dóó niniiʼ táánígis;

18 Áko tʼáadoo diné binááł chʼiyáán ádąąh nitʼį́įgo sodílziní, ndi niTaaʼ bichʼįʼ sodílzin, éí éí doo hootʼį́įdi hólóonii, dóó niTaaʼ, doo yitʼíinii yooʼíinii, hootʼį́įgo naʼdoolééł.

19 Tʼáadoo naadeełii daʼílíinii nahasdzáán bikáaʼgi hashtʼendahojáhí, háálá éí chʼosh ałchozhí yiih hijeeh dóó dadiichííh, dóó daʼniʼįįhii yił yah adahalyeed dóó deiniʼįįh;

20 Ndi naadeełii daʼílíinii yáʼąąshdi hashtʼendahojááh, áadi éí chʼosh ałchozhii ádin dóó doo dadiichíih da, dóó daʼniʼįįhii doo yah adahaʼnéeh da dóó doo daʼniʼįįh da.

21 Háálá naadeełii daʼílíinii sinilígi, ákweʼé ałdóʼ nihijéí siʼą́ą dooleeł.

22 Anááʼ éí atsʼíís bibee adinídíín átʼé; áko, éí bąą, tʼááłáʼí tʼéí nółʼį́įgo, nihitsʼíís tʼáá átʼé adinídíín biiʼ hólǫ́ǫ dooleeł.

23 Ndi doo yáʼáshóonii tʼéí nihináaʼgo, nihitsʼíís tʼáá átʼé biiʼ chahodoołhił. Áko éí bąą niiʼ adinídínígíí chahałheełgo, éí chahałheełígíí shąʼ haabóodziil!

24 Diné binantʼaʼí naaki áyósingo éí doo yíighah da; háálá łaʼ éí yijoołáa doo dóó łaʼ éí ayóí áyóʼníi doo, éí doodago łaʼ doo yinízin da doo, éí doodago éí yótąʼ doo. Diyin God dóó Naalyéhé tʼáá áła bá nizhdoolnishgo doo bíighah da.

25 Áádóó kʼad díí ałtso Jesus saad yee haadzíiʼgo hastóí naakʼitsʼáadahí náyiizláʼą́ą yichʼįʼ déeʼį́į́ʼ, dóó yichʼįʼ haadzííʼ: Díí saad bee nihichʼįʼ haasdzíʼígíí béédaohłniih. Jó háálá, nihí éí nanihiyélááʼ díí diné ndanohtin doo biniiyé. Éí bąą ánihidishní, niheʼiinaʼ éí tʼáadoo baa ntsídaahkeesí, haʼátʼíí lá dadoohsį́į́ł, éí doodago haʼátʼíí lá dadoohdlį́į́ł; éí doodago ndi nihitsʼíís, haʼátʼíí ééʼ lá biih doohkah. Daʼ iináásh atsįʼ bitisgo átʼé, dóó atsʼíís ééʼ yiláahgo átʼé?

26 Jó tsídii níłchʼi yiiʼ ndaatʼaʼígíí, doo kʼéédaʼdidléeh da, doo ndóʼ ndaalnish da, doo tłʼoh bighan biyiʼjįʼ áłah adaʼaléeh ndi da; ákondi nihiTaaʼ yáʼąąshdi hólóonii éí yanáʼáłtsoʼ. Daʼ éísh biláahdi daniidlį́ danohsin?

27 Tʼáá noháiida baa ntsóhkeesgo daatsʼí łaʼ dah alzhin ánółtsooígíí bínínáánéidoohʼááł?

28 Dóó haʼátʼíísh éí biniiyé biih dooháłígíí baa ntsóhkees doo? Chʼilátah hózhóón dahonteelgo deilʼáhígíí danéeséłígíí baa ntsídaahkees; doo éí ndaalnish da, doo ndi daʼadiz da;

29 Dóó ánihidishní, azhą́ éí Solomon ndi, ayóó ájítʼéii, tʼáadoo díigi átʼáo ééhjíiyá da.

30 Ákohgo, Diyin God tłʼoh kótʼéego háídohsingo, éí éí díí jį́ hólǫ́, dóó yiską́ągo biiʼ atʼeesí biih doojih, kótʼéego nihídóʼ ééʼ nihidoołtééł, niheʼoodląʼ doo áłtsʼíísígóó.

31 Éí bąą tʼáadoo baa ntsídaahkeesí, kódadohníigo, Haʼátʼíí lá dadiidį́į́ł lá? Éí doodago, Haʼátʼíí lá dadiidlį́į́ł lá? Éí doodago, Haʼátʼíí lá biih dadiikah lá?

32 Háálá nihiTaaʼ yáʼąąshdi hólóonii éí tʼáá íídą́ą́ʼ díí bee nihichʼįʼ anáhóótʼiʼígíí bił bééhózin.

33 Ndi Diyin God bił hazʼáanii dóó biyáʼátʼéehii áłtsé bíká hádaahtʼį́, dóó díí tʼáá ałtso nihaa doolyééł.

34 Áko yiską́ągoígíí éí tʼáadoo baa ntsídaahkeesí, háálá yiską́ągoígíí éí tʼáá bí ádaa ntsékees. Yoołkáłígíí éí tʼáá átʼé áchʼįʼ anáhóótʼiʼ biiʼ dahólǫ́.