1 Áádóó kʼad Jesus kótʼáo haadzííʼ dóó áłah daazlį́ʼígíí yichʼįʼ nínááhaayá, dóó yichʼįʼ hanáánáádzííʼ, kóníigo: Tʼáá aaníí, Tʼáá aaníigo, ánihidishní, diné doo bá nahwijiiʼaah da, áko doo diné nihá ninááhodooʼáał da.

2 Háálá haʼátʼííshį́į́ bee nahwiiyíʼaahígíí, tʼáá éí bee há nináhodootʼááł; dóó haʼátʼííshį́į́ bee iʼííníłʼąąd yę́ęgi anéeltʼeʼgo, bee ndiʼdinoolʼąął.

3 Dóó haʼátʼíísh éí biniiyé nihikʼis áłtsʼóózígo binákʼee aztánígíí bá baa ákonohsin, ákondi ntsxaazgo nihinákʼee aztánígíí éí doo baa ákonohsin da?

4 Éí doodago haash yitʼéego éí nihikʼis kóbídídohniił: Eii áłtsʼíísígo ninákʼee aztánígíí náhaashtįįh—jó áádóó, ninákʼee éí ntsxaaz aztą́ągo?

5 Ni tʼóó áhoʼdilʼíinii, áłtsé ninákʼee ntsxaaz sitánígíí nahjįʼ hańtįįh; dóó índa hazhóʼó díníʼį́įʼgo nikʼis áłtsʼíísígo binákʼee aztánígíí bá hadíítį́į́ł.

6 Haʼátʼíida dadiyinii tʼáadoo łééchąąʼí bichʼįʼ adahohłtłʼiidí, doo ndi nihiyooʼ ílíinii tʼáadoo bisóodi bidáahjįʼ adaohłkaadí, háálá éí tʼóó yikʼi ndookah, dóó nihichʼįʼ náhidookah dóó biwooʼ yee anihidoołdlał.

7 Binaʼídółkid, dóó nihaa doolyééł; hanohtá, áko bikʼidínóohtááł, dáádílkał nanóhłtsʼin, dóó nihá ąą ádoolnííł.

8 Háálá tsʼídá tʼáá ałtso ndaʼídíłkidígíí, éí bichʼįʼ kódaalneʼ; dóó haʼnitáhígíí, éí akʼí dínóotaał, dóó háíshį́į́ dáádílkał neiniłtsʼinígíí bichʼįʼ, ąą ádoolnííł.

9 Éí doodago háíshąʼ diné, éí éí biyeʼ łeesʼáán łaʼ bił níigo, tsé yee dooʼááł?

10 Éí doodago łóóʼ łaʼ níigo, naʼashǫʼii yeidoolééł?

11 Nihígo índa, doo yaʼánóshónígíí, nihaʼáłchíní haitʼáo yáʼátʼéehii baa doolyéłígíí nihił bééhózingo, nihiTaaʼ yáʼąąshdi hólónígíí dashąʼ haa néelą́ą́ʼ ndaʼídíłkidígíí hózhǫ́ yaʼdoolééł?

12 Éí bąą, tʼáá ałtso ádoohłíłígíí diné shichʼįʼgo ádeidoolííł danohsinígíí, áko bichʼįʼ kódoohłííł ndi, háálá díí éí beehazʼáanii dóó Diyin God yá dahalneʼii átʼé.

13 Áhoołtsʼóózígo yah ahóótʼiʼ góneʼ yah hohkááh; háálá dáńdítį́hí ayóó aníłtéél, dóó ayóó áhoníłtéelgo honítʼiʼ, éí éí hóóchxǫʼíjí bichʼįʼ ahóótʼiʼ, dóó tʼóó ahayóí éí áájígo yah dahakááh;

14 Háálá iiná bichʼįʼ honítʼiʼígíí, éí dáńdítį́hí áłtsʼóózígo, dóó áhoołtsʼóózígo honítʼiʼ, dóó tʼáá díkwíhíyeeʼ yikʼi dahakááh.

15 Doo tʼáá aaníí Diyin God yá dahalneʼígíí tʼáá baa ákonohsin, éí éí dibé ndahalingo hadadítʼéego ndaakai, ndi biyiʼdi éí mąʼiitsoh kʼad dichin biʼniighą́ʼígíí ádáátʼį́.

16 Eii éiyá bineestʼąʼ binahjįʼ béédahodoohsįįł. Dinésh chʼil dadeenínígíí yitsʼą́ą́dóó chʼil naʼatłʼoʼii dayóbé, éí doodago hosh yitsʼą́ą́dóó figs wolyéhígíí dayóbé?

17 Áko azhą́ ndi tsin yáʼádaatʼéehii éí neestʼą́ yáʼátʼéehii bitsʼą́ą́dóó ndahoodleeł; ndi tsin yíchxǫʼígíí éí neestʼą́ doo yáʼáshóonii bitsʼą́ą́dóó ndahoodleeł.

18 Tsin yáʼátʼéehii neestʼą́ doo yáʼáshónígíí bąąh hodooleełgo éí doo bíighah da, índa tsin yíchxǫʼígíí neestʼą́ yáʼátʼéehgo doo bąąh dínóotʼį́įł ndi da.

19 Tsʼídá tʼáá ałtso tsin bineestʼąʼ doo yáʼátʼéhígíí éí hidookał, dóó dzídzahaltłʼiid.

20 Ákohgo, bineestʼąʼ binahjįʼ béédahodoohsįįł.

21 Doo tʼáá átʼé Bóhólníihii, Bóhólníihii dashiłnínígíí, yáʼąąsh hazʼą́ądi yah ahidookah da; tʼáá hazhóʼó tʼáá háíshį́į́ shiTaaʼ yáʼąąshdi hólóonii yinízinígíí yeʼełʼínígíí tʼéiyá.

22 Áadi bíiníłką́ągo tʼóó ahayóí ádashididooniił; Bóhólníihii, Bóhólníihii shą́ą́ʼ nízhiʼ binahjįʼ náás ádahodooníiłii baa ndahosiilneʼ neʼ, dóó chʼį́įdii bidaʼiiníziinii nahjįʼ adahineesdzood neʼ, dóó nízhiʼ binahjįʼ naanish baa dahózhóonii ádeiilyaa neʼ?

23 Dóó índa bichʼįʼ hadeesdzih: Doo niheedahasin da; shitsʼánohkááh, nichxǫ́ǫ́ʼígo ndaahłnishii.

24 Éí bąą, tʼáá háíshį́į́ díí ádíshnínígíí yidiiztsʼą́ąʼgo dóó yeʼíilaaígíí, éí diné hóyáanii, tsé bikáaʼgi bighan áyiilaaígíí nahalingo, baa ntséskees dooleeł—

25 Dóó ahoʼniiłtą́, dóó tó yíląąd, dóó deiyol, dóó hooghanę́ę dah nayíłhxan; dóó tʼáadoo nááłdaaz da, háálá tsé bikáaʼgi ályaa.

26 Dóó tʼáá ałtso díí ádíshnínígíí yidiiztsʼą́ʼígíí dóó doo yeʼiilaaígíí éí diné doo áhályáanii, bighan séí yikááʼ hooghan niiníʼáanii nahalingo, baa ntséskees dooleeł—

27 Dóó ahoʼniiłtą́, dóó tó yíląąd, dóó deiyol, dóó hooghanę́ę dah nayíłhxan; dóó ahiinááłdááz, dóó ayóó átʼéego adoołdas.