1 Dóó tʼáá aaníí, tʼáá aaníigo, ánihidishní łaʼ dibé shee nááhódlǫ́, éí éí doo díí kǫ́ǫ́ kéyah bikááʼgóó kéédahatʼį́į da, doo ndi Jerusalemdi kéyahígíí da, doo ndóʼ kéyah bikááʼ naʼnétą́ʼą́ą binaagóó yikááʼ kéédahatʼį́į da.

2 Háálá díí baa yáshtiʼígíí éí tʼah doo shinééʼ deidíítsʼį́įh da, doo ndi háadida tʼah doo bichʼįʼ ííshjání íʼdíshnéeh da.

3 Ndi aTaaʼ éí bitah díínááł shiłní, dóó éí shinééʼ deididootsʼį́į́ł, dóó shilį́į́ʼ danilínígíí yitah bił daóltaʼ doo, áko tʼááłáʼíjįʼ dibé hólǫ́ǫ dooleeł dóó tʼááłáʼí dibé yaa áhályą́ą doo; éí bąą ákǫ́ǫ́ bichʼįʼ deeshááł dóó bichʼįʼ ííshjání ádiʼdideeshnííł.

4 Dóó shí ánihidishní dah ńdiisdzáago díí bee nanihinétą́ʼígíí náádahídóohsoh, áko shidineʼé Jerusalemdi kéédahatʼínígíí, dashiiłtsánę́ę dóó naʼnishtingo shił dahólónę́ę, doo aTaaʼ shízhiʼ binahjįʼ ndeídíłkidgo, áko Iiʼsizį́ Diyinii binahjįʼ nihaa bił bééhodoozįįłgo, dóó diné náánáłaʼ nááhódlǫ́ doo bił béédahózinígíí ałdóʼ, áko díí naʼnitin náádahídóohsohígíí éí ndaahʼáa dooleeł dóó Gentile dineʼé bichʼįʼ ííshjání ádoolnííł, áko Gentile dineʼé baa hoolzhiizhgo, baʼáłchíní łaʼ, doo daʼoodlánígíí biniinaa nahasdzáán tʼáá ałtso bikááʼgóó taooskaigo, shóńdeidoołtʼeeł, éí doodago naneestą́ąʼgo sheeńdahodoosįįł, biNináʼnídláii.

5 Dóó índa nahasdzáán bikááʼ tʼáá dį́į́ʼgóó adahwiisʼáádę́ę́ʼ áłah ádeeshłííł; dóó índa aTaaʼ dineʼé Israel bighandóó danilínígíí yił ahaʼdeetʼánę́ę ałtso biʼdeeshłííł.

6 Dóó Gentile dineʼé éí bikʼihojídlí, Iiʼsizį́ Diyinii, éí éí shí dóó aTaaʼ yił ííshjání ádayiilaago, dashoodlánígíí biniinaa.

7 Jó, dashoodlánígíí biniinaa, aTaaʼ ání, dóó doo daʼiinohdlánígíí biniinaa, O Israel bighandóó danohłíinii, akéeʼdi yoołkáłígíí biyiʼ tʼáá aaníinii éí Gentile dineʼé bichʼįʼ kódoolnííł, dóó tsʼídá ałtso ííshją́ą́ ádaalyaaígíí ííshją́ą́ ádadoolnííł.

8 Ndi yíi, aTaaʼ ání, Gentile dineʼé doo daʼoodlánígíí yichʼįʼ—háálá ákótʼée ndi éí díí kéyah yikááʼ náhaaskaiígíí, dóó shidineʼé éí éí Israel bighandóó danilínígíí ałtso baa tádaozhjééʼ; dóó shidineʼé Israel bighandóó danilínígíí ałtsʼáńdeineeskaad, dóó tʼóó yikʼi naaskai;

9 Dóó háálá aTaaʼ Gentile dineʼé yaa joobaʼígíí biniinaa, dóó aTaaʼ shidineʼé Israel bighandóó danilínígíí yá nihoníʼánígíí biniinaa, tʼáá aaníí, tʼáá aaníigo, ánihidishní, díí bikééʼdóó, dóó shidineʼé Israel bighandóó danilínígíí atídaalyaa, dóó bichʼįʼ ndahwiiʼnáa dooleeł, dóó ndabiʼdistseed dooleeł, dóó bitahdóó chʼihidooltłʼił, dóó dabiʼjoodláago, dóó hiss biʼdiʼní dóó baa daʼoodlohgo ádeeshłííł—

10 Dóó ákótʼéego díí éí aTaaʼ kóbidiní shiłní: Aajįʼ ayííłką́ągo Gentile dineʼé shinaʼnitin bił ndaʼjiisííh dooleełgo, dóó shinaʼnitin tʼáá átʼéii doo deinízingóó dooleeł, dóó kéyah tʼáá naaznilígíí biláahgo bijéí biyiʼ ádaa dadzódlíi dadooleeł, dóó tʼáá ałtso nihookááʼ dineʼé biláahgo, dóó tʼóó báhádzidgo dabiyoochʼííd dooleeł, dóó bindaʼadloʼ dooleeł, dóó tʼáá ałtsoní yá ndahałtʼiʼ dooleeł, dóó tʼóó ídaʼdilʼį́į dooleeł, dóó ndaʼałtseed doo, dóó sodizin yee ndaʼííłbįįh dooleeł, dóó bąąhági átʼéii doo, dóó doo hootʼį́įdi tsʼídá aláahdi joodláhígíí yaa naakai dooleeł; dóó díí ałtso ádeidoolíiłgo, dóó shinaʼnitin tʼáá átʼéii doo deinízin da dooleeł, jó, aTaaʼ ání, shinaʼnitin bitahdóó náádideeshdlééł.

11 Dóó índa shí shidineʼé bił ałhadiʼnishtʼánę́ę béédeeshnih, O Israel bighandóó danilíinii, dóó shinaʼnitin baa deeshłééł.

12 Dóó nihił ííshjání ádeeshłííł, O Israel bighandóó danohłíinii, éí díí Gentile dineʼé doo nihikʼehdidlį́įʼ da dooleeł; ndi Israel bighandóó danohłíinii, nihił ałhadiʼnishtʼánę́ę béédeeshnih, dóó shinaʼnitin hadaałtʼéhígíí nihił béédahodoozįįł.

13 Ndi Gentile dineʼé beʼiinaʼ łahgo áńdayiidlaa dóó shaa náhaaskaigo, jó éí shidineʼé, O Israel bighandóó danilíinii, yitah danilį́įgo bił daóltaʼ dooleeł, ní aTaaʼ.

14 Dóó aTaaʼ ání, shidineʼé, Israel bighandóó danilínígíí, doo bíniʼ yitah hadidookah da, dóó doo yikʼindookah da.

15 Ndi doo shichʼįʼgo nahakaigóó, dóó shinééʼ doo dazhdiitsʼaʼgóó, shidineʼé, O Israel bighandóó danilíinii, hachʼįʼ deeshʼaał, éí bíniʼ hatah dookahii, dóó yikʼi ndookah, dóó áshįįh doo halniih da silį́ʼígíí ndahojílin doo, éí éí tʼáadoo yee chooʼíní da dooleeł ndi tʼóó chʼídoolkał, dóó shidineʼé, O Israel bighandóó danilíinii, éí tʼóó hakʼi naakai dooleeł.

16 Tʼáá aaníí, tʼáá aaníigo, ánihidishní, ákótʼáo éí aTaaʼ shichʼįʼ haadzííʼ—éí díí diné díí kéyah baa didííʼááł áko daabí dooleeł.

17 Dóó índa Diyin God yá halneʼii Isaiah kóníigo haadzíʼę́ę biʼdoolnííł, éí kóní:

18 Nihá hadaʼasíidii iinééʼ diitsʼaʼgo; iinééʼ yił dahataał dooleeł, háálá tʼáá áłah anááʼ yee déezʼį́į́ʼ dooleeł Bóhólníihii Zion nináánéídláago.

19 Nihił dahózhǫ́ǫgo dahohtaał, tʼáá ánółtso dahohtaał, nihí ndahiishochxǫʼígíí Jerusalem; háálá Bóhólníihii éí bidineʼé yikʼijisdliʼ, éí Jerusalem yikʼé nináʼnídlá.

20 Bóhólníihii bigaan dílzinii tʼáá ałtso ałʼąą dineʼé dah deíkáahii yitʼį́įgo ííshją́ą́ áyiilaa; dóó kéyah nináneelʼą́ąjįʼ Diyin God biyisdáʼiiníiłii deizdoołtsééł.