1. Ekeene, ekeene, nabatebirie ng’a nimbwate ching’ondi chinde chitari echiense eye natari ase ense ya Yerusalemu, nonya nase chinse chietanaine ang’e na Yerusalemu echio nabeire inkoranderia.

2. Naboigo aba ingokwana igoro yabo mbaria bataraba bakoigwa eriogi riane; gose kweorokia inche bweka ase bare.

3. Korende nanyorire ogochika korwa ase Tata ng’a imbe nkogenda ase bare, erinde banyare kobogoria eriogi riane, na kobarwa ase ching’ondi chiane, erinde banyare koba riicho erimo na omorisia oyomo; aseigo nkogenda inde kweorokia ase bare.

4. Na nabachikire monyare korika enkwana eye nyuma ekero nachiire, onye ekoba bo ase abanto bane ba Yerusalemu, nabarigie banyigure nakondora tibari nokoboria ase Tata ase erieta riane, erinde banyare konyora obong’aini bwaino goetera ase Omoika Omochenu, naboigo ase ebisaku binde ebio bitamanyeti igoro yabo enkwana eye morabe mokorika ebe ekogachwa ekiagera nebe ekworokigwa ase abanto bebisaku, na goetera ase ogoichorwa kwabo, abatigari boroiboro rwabo, abwo barabe bagosiarerekana ase obosio bwense ase engencho yebibe na ogotegena kwabo, mbabe bakoretwa ase obong’aini na gosoigwa ase chisemi chiane oyore omoboria obo.

5. Na nimbe inkobasangereria korwa ase chinsemo inye chiense; naboigo imbe ingoikerania obobwatani boria Tata arosetie nabonsi abanto benyomba ya Israel.

6. Basesenigwe abanto bebisaku, ase okwegena kwabo ase inde, na ase Omoika Omochenu, oria obatebetie igoro yane na Tata.

7. Rigereria ase engencho y’okwegena ime yane otebire Tata, na asengencho y’ogotegena kwaino, O inwe enyomba ya Israel, ase amatuko agocha ekeene ngosoe ase abanto bebisaku, abwo ebinto ebi bionsi biranyare korokigwa ase bare.

8. Korende okoragererigwa otebire Tata, ase baria abategenwa ase abanto bebisaku – – tari ase ogotatenena kwabo kwagerete bagacha igaa ase ense eye, na babatananire abanto benyomba ya Israel; na abanto bane abwo bare abenyomba ya Israel baserigwe korwa ase bare, na babekirwe ase amagoro abo.

9. Na ase engencho y’amabera atata ase abanto bebisaku na ekina ki’Omonene ase enyomba ya Israel, ekeene ekeene nabatebirie, ng’a nyuma ya amang’ana aya onsi, na korwa abanto bane abwo bare enyomba ya Israel goitwa, na gochandwa, na gosirigwa, na goserigwa korwa egati yabo na kogechwa nabwo, na koba ogochaywa na abanyamang’ana ase bare –

10. Na bono ochikere Tata ng’a imbe ingokwana ase more: Ng’a ase rituko riria ekero abanto bebisaku barakore ebibe mamincha y’enchiri yane, na kweorora ase chinkoro chiabo, goetania ense yonsi, na ase abanto bonsi bense yonsi naboigo mbabe bagoichorwa na kera engencho y’oborimo na obong’ainereria, na oboenenu, na chingencho chionsi chiogwekora, na oboiti na ogwetang’anania, na abagenki, na okogechia kwa bobisi; onye bakora aya onsi, na kwanga oboikeranu bwenchiri yane rigereria otebire Tata, ng’a nimbe inkoreta oboikeranu bwenchili korwa ase bare.

11. Nainche nimbe inkoinyora okobwatana kwane nabegete ase abanto, O inwe enyomba ya Israel na nindete enchiri yane ase bare.

12. Na nimbe inkoborokia inwe abanto benyomba ya Israel, ng’a Abayunani tibakoba nechunguru ase more; korende nimbe inkoinyora obobwatati bwane ase more, O inwe enyomba ya Israel, inamobe mogosoa ase obong’aini ase oboisaneku bwenchiri.

13. Korende onye Abayunani bakoangama nakoirana ase inde, otebire Tata ng’a, rigereria mbabe bakobarwa ase abanto bane, O inwe enyomba ya Israel.

14. Naende tinkobatiga abanto bane, abwo bare enyomba ya Israel, kogenda ase bare, na kobachanda otebire Tata.

15. Korende onye tibakoirana ase inde, nakoigwa eriogi riane, nimbe inkobatiga, nimbatige O enyomba ya Israeli, erinde banyare kogenda ase bare, na kobabeka inse, na imbabe buna omonyo otabwati obwansu bwaye, na nigo erabe bosa ase ogotugutwa isiko, na gotiringwa namagoro ane, O enyomba ya Israeli.

16. Ekeene, ekeene, nabatebirie ng’a Omonene nigo anchigete – – ng’a inyare koa abanto aba obomenyo bwabo.

17. Na amang’ana y’omobani Isaya naikeranigwe, aria agoteba:

18. Abarendi baino imbaimokie eriogi igoro; ase erio amo bonsi imbabe bagotera, ekiagera barobwo mbarore eriso ase eriso ekero Omonene ararete Zayoni Naende.

19. Kabe nomogoko na tera more amo, nakoira chinsemo chia Yerusalemu; ekiagera Omonene nabaremie abanto baye, obeire okoboria Yerusalemu.

20. Omonene obekire okoboko kwaye ogochenu ase kera eriso rie chinse chionsi; na chinsemo chionsi chiense nchinyore ogotoreka kwa Nyasae.