1. Erio ekero Yeso akora gokwana akarigereria goetanana naende ase omoganda, na akabatebia ng’a: Rigereria ensa yane yaikire.

2. Nigo ingoteba ng’a nigo more aboro, motanyare koigwa amang’ana ane onsi aria nachigetwe natata gokwana ase more engaki eye.

3. Aseigo gende chika chiaino na koinyora amangana onsi nakwanire, na nakoboria Tata, ase erieta riane, erinde monyare komanya, na korengereria igoro ya mambia, na ninchiche naende ase more.

4. Korende bono nkogenda inde ase Tata na boigo kweorokia ase ching’ondi chinsiru chia Israel, tibasireti se Tata namanyete ase abairete.

5. Erio agaika engaki ekero Yeso akora gokwana, akayorigereria omoganda naende, na rigereria nigo barenge baichire namariga na bakaba bakomorigereria bokong’u bare nokogania gwokomoboria erinde anyare koba nabarobwo ase engaki ende enke.

6. Naboigo akabatebia ng’a: Rigereria, ime yane naichoirwe namabera ase more.

7. Inee onde nare egati yaino ore omorwaire? Morete, inee more nekerema egati yaino gose omouko gose abakogotaru gose abachandeku, gose abare na “ukoma,” gose baria bare emetino, gose baria bachandegete ingencho ende yonsi? Barete nainche nimbe inkobagwenia, ekiagera nimbwate amabera ase more;

8. Nigo ndegereretie ng’a onye naba inkoborokia keria naorogetie ase abamino igaria Yerusalemu, ekiagera narorire ng’a okwegena kwaino nokonene kongwenerete imbabwenie.

9. Erio egaika engaki ekoro akora gokwana omoganda bwonsi ase omoyo oyomo bakagenda nabarwaire babo na ebirema, emeuko, emetino, na bonsi baria bachandegete ngencho ende yonsi; na akaba okobagwenia buna bagocha ase are.

10. Naboigo bagakora bo onsi baria bagwenetigwe na bonsi bari barenge buya, bakagwa ase inse amagoro aye nakomosasima; ase obonge buna bachete abande bakanyunyunta amagoro aye; naboigo bagakora amagoro aya akaba are buna amache ase amariga abo.

11. Erio egaika engaki agochika ng’a abana babo abake baretwe.

12. Erio bakareta abana babo abake nakobabeka ase are ang’e, bamoetanaine erio Yeso agatenena egati yabo; na omoganda okarwa ribaga goika bonsi bakaretwa ase are.

13. Erio ekero bonsi baretwa, Yeso agatenena ase egati yabo nagochika omoganda banyare gotung’ama inse ase obonyonsi.

14. Erio ekero batung’ama ase obonyansi, Yeso akaba okorera bweka, na goteba ng’a Tata nigo inchandire ase engencho yebibe biabanto benyomba ya Israel.

15. Erio ekero akwana amang’ana aya naboigo nere agatung’ama inse; rigereria akaba ogosaba ase Tata na ebinto asabete tibikonyareka korikwa, na omoganda oria obete okomoigwa okagacha amang’ana.

16. Na nyuma ase aya, amang’ana aya akarikwa: N’ga amaiso atanya korora gose koigwa, aseigo nigo biarenge ebinto biogokumia na ebiomoichano Yeso abete ogokwana ase Tata;

17. Na romeme ronde tirori rorakwane, gose korikwa na monto onde bwensi, gose enkoro yomonto bwanchete ebinto ebi biamakumia na ebinene Yeso abete ogokwana, na onde tari oramanye omogoko oria otochorete engaki eyio twaigwete ogotosabera ase Tata.

18. Erio ekero Yeso akora gosaba ase Tata akaimoka; korende omogoko okoba Omonene ase omoganda oria abwate.

19. Erio Yeso agakwana na kobatebia baimoke korwa igaria ase barenge batung’amete.

20. Erio bakaimoka, naboigo akabatebia ng’a; mosesenigwe ekiagera mwegenire, na bono rora omogoko one nigo oichire.

21. Erio ekero akwana amang’ana aya akarera, na omoganda okarika amang’ana aya, erio akabaira abana abake babo, oyomo ase oyomo na kobasesenia, nakobasabera ase Tata.

22. Naboigo ekero akora gokora aya akaba okorera naende;

23. Naende agakwana ase omoganda, na koyotebia ng’a: Rigereria abana aba abake.

24. Na ekero bagania korigereria amaiso abo akarigereria igoro, na bakarora igoro eigoire, naboigo bakarora amaraika agoika korwa igoro buna aria are ase obogati bw’omorero; erio bagaika inse nagoetana abana baria abake, naboigo bagaetananwa nomorero; erio amaraika akaba akobaorokereria.

25. Na omoganda oria oroche nakoigwa okogacha amang’ana aya na bakamanya ng’a amang’ana abo nigo are ayekeene na ayoboronge ekiagera baroche nakoigwa kera omonto bweka omonyene na omobaro obo nigo barenge chiribu ibere na amang’ana atano; nabo mbarengeo abakungu na abana.