1 Ket napasamak a binilin ni Jesus dagiti disipulona a mangyeg kenkuana iti sumagmamano a tinapay ken arak.

2 Ket idi napanda nangala iti tinapay ken arak, imbilinna kadagiti ummong nga agtugawda iti daga.

3 Ket idi simmangpet dagiti disipulo nga addan tinapay ken arak, innalana ti tinapay ket pinirsapirsay ken binendisionanna; ket intedna kadagiti disipulona ket imbilinna a manganda.

4 Ket idi nalpasda a mangan ken nabsogda, imbilinna kadakuada a warasanda ti ummong.

5 Ket idi nalpas a mangan ti ummong ken nabsogda, kinunana kadagiti disipulo: Adtoy nasken nga adda maysa a madutokan kadakayo, ket itedko kenkuana ti pannakabalin a mangpirsay iti tinapay ken bendisionanna ket itedna kadagiti tao iti simbaanko, kadagiti amin a mamati ken mabuniagan iti naganko.

6 Ket daytoy ti kanayon a rumbeng nga aramidenyo, a kas iti inaramidko, a kas iti panangpirsayko iti tinapay ken panangbendision ken pannangtedko kadakayo.

7 Ket aramidenyo daytoy a mangipalagip kadakayo iti bagik, nga imparangko kadakayo. Ket isunto ti mangipaneknek iti Ama a kanayon a laglagipendak. Ket addanto ti espirituk kadakayo no kanayon a laglagipendak.

8 Ket napasamak nga idi naisawangna dagitoy a balikas, imbilinna kadagiti disipulo a mangalada iti naikopa nga arak ket inumenda, ket ikkandanto ti ummong tapno uminumda met.

9 Ket napasamak nga inaramidda, ket imminum ken nabsogda; ket nangtedda iti ummong, ket imminumda, ket nabsogda.

10 Ket idi nalpas dagiti disipulo daytoy, kinuna ni Jesus kadakuada: Bendisionankayo iti daytoy a banag nga inaramidyo, agsipud ta panagtungpal daytoy kadagiti bilinko, ket saksian daytoy iti Ama a siaayatkayo a mangaramid kadagiti imbilinko kadakayo.

11 Ket daytoy ti kanayon nga aramidenyonto kadagiti agbabawi ken mabuniagan iti naganko; ket aramidenyonto a panglagip iti darak, nga imbukbokko gapu kadakayo, tapno paneknekanyo iti Ama a kanayon a laglagipendak, ket no kanayon a laglagipendak addanto ti Espirituk kadakayo.

12 Ket ibilinko kadakayo nga aramidenyonto dagitoy a banag, ket no kanayonto nga aramidenyo dagitoy a banag mabendisionankayo, agsipud ta naipatakderkayo iti batok.

13 Ngem siasino man kadakayo ti agaramidto iti ad-adu wenno basbassit ngem iti daytoy saan a naipatakder iti batok, ngem naipatakder iti kadaratan; ket inton agtudo, ken aglayus, ken agangin iti napigsa, a mangsagsag kadakuada, matinnagdanto, ket silulukat ti ruangan ti impierno nga umawat kadakuada.

14 Ngarud mabendisionankayo no tungpalenyo dagiti bilinko, nga imbilin ti Ama kaniak a rumbeng nga itedko kadakayo.

15 Pudno, pudno, kunak kadakayo, masapul nga agannad ken agkararagkayo a kanayon, amangan ta masulisogkayo iti sairo, ket ipanawnakayo nga adipenen.

16 Ket kas iti panagkararagko iti imatangyo kasta met ti panagkararagyo iti simbaanko, kadagiti taok a nagbabawi ken nabuniagan iti naganko. Adtoy siak ti silaw; nangaramidak iti pagulidananyo.

17 Ket napasamak nga idi naibaga ni Jesus dagitoy a balikas kadagiti disipulona, simmango manen iti ummong ket kinunana kadakuada:

18 Adtoy, pudno, pudno, kunak kadakayo, masapul nga agannad ken agkararagkayo a kanayon amangan ta masulisogkayo; gapu ta kayatnakayo a tagikuaen ni Satanas, tapno yakayakennakayo a kas iti trigo.

19 Ngarud masapul nga agkararagkayo iti Ama iti naganko.

20 Ket ania man a dawatenyo iti Ama iti naganko, a nalinteg, a mamatikayo a magun-odyo, adtoy maitedto kadakayo.

21 Agkararagkayo a sangaamaan iti Ama, a kanayon iti naganko, tapno mabendisionan dagiti assawa ken annakyo.

22 Ket adtoy, aguummongkayo a masansan; ket saanyo a paritan ti uray asino man a tao nga umay iti ummongyo no aguummongkayo, ngem ketdi palubosanyo nga umayda kadakayo ket saanyo a paritan ida;

23 Ngem ikararaganyo ida, ket saanyo ida a baybay-an; ket no masansan nga umayda kadakayo ikararaganyo ida iti Ama, iti naganko.

24 Ngarud, itag-ayyo ti silawyo tapno agraniag iti lubong. Adtoy siak ti silaw nga itag-ayyo—iti naimatanganyo nga inaramidko. Adtoy nakitayo a nagkararagak iti Ama, ket nasaksianyo amin.

25 Ket nasaksianyo nga imbilinko nga awan kadakayo ti umadayo, ngem imbilinko ketdi nga umaykayo kaniak, tapno marikna ken makitayo; ket kasta met ti aramidenyo iti lubong; ket asino man a saan nga agtungpal iti daytoy a bilin itulokna ti bagina a mayasideg iti sulisog.

26 Ket ita napasamak nga idi naibagan ni Jesus dagitoy a balikas, inturongna manen ti panagkitana kadagiti disipulo a pinilina, ket kinunana kadakuada:

27 Adtoy, pudno, pudno, kunak kadakayo, ikkankayo iti sabali a bilin, ket masapul a mapanakton iti Amak tapno tungpalek dagiti dadduma a bilin nga intedna kaniak.

28 Ket ita adtoy, daytoy ti bilin nga itedko kadakayo, a saanyo a palubosan a makiranud iti lasag ken darak ti asino man nga ammoyo a saan a maikari, no dakayonto ti mangipaay iti dayta;

29 Ta asino man a mangan ken uminum iti lasag ken darak a saan a maikari kanen ken inumenna ti pannakailunod ti kararuana; ngarud pawilanyo ti tao no ammoyo a saan a maikari a mangan ken uminum iti lasag ken darak.

30 Nupay kasta, saanyonto a papanawen, ngem agpaaykayo kenkuana ket ikararaganyo iti Ama, iti naganko; ket no agbabawi ken mabuniagan iti naganko, isunton ti panangawatyo kenkuana, ken ipaayanyonto iti lasag ken darak.

31 Ngem no saan nga agbabawi saan a maibilang kadagiti taok, tapno saanna a dadaelen dagiti taok, ta adtoy ammok ti karnerok, ket mabilangda.

32 Nupay kasta, saanyo a papanawen iti sinagogayo, wenno iti lugar a pagdaydayawanyo, gapu iti kasta agtultuloykayo nga agpaay; gapu ta saanyo nga ammo no kaano ti isusubli ken panagbabawida, ket umayda kaniak nga addaan iti naan-anay a panggep iti pusoda, ket agasakto ida; ket dakayonto ti puon ti pannakayasidegda iti pannakaisalakan.

33 Ngarud, tungpalenyo dagitoy a sao nga imbilinko kadakayo tapno saankayo a makedngan; ta asi pay ti kedngan ti Ama.

34 Ket itedko kadakayo dagitoy a bilin gapu iti panagsisinnuppiat a mapaspasamak kadakayo, ket nagasatkayo no awan ti panagsisinnuppiat iti nagbabaetanyo.

35 Ket ita mapanak iti Ama, gapu ta masapul a mapanak iti Ama nga agpaay iti pagimbaganyo.

36 Ket napasamak nga idi ginibusan ni Jesus ti panagsaona, sinagidna kadagiti imana dagiti disipulo a pinilina, a saggaysa, agingga a nasagidna amin ida, ket nakisao bayat ti panangsagidna kadakuada.

37 Ket saan a nangngeg ti ummong dagiti balikas nga insawangna, ngarud saanda a napaneknekan; ngem pinaneknekan dagiti disipulona nga intedna kadakuada ti pannakabalin a mangted iti Espiritu Santo. Ket iparangkonto kadakayo iti masakbayan a pudno daytoy a pammaneknek.

38 Ket napasamak nga idi nasagid amin ni Jesus ida, adda bimmaba nga ulep ket liningdanna ti ummong tapno saanda a makita ni Jesus.

39 Ket bayat ti pannakalingedda pimmanaw manipud kadakuada, ket immuli sadi langit. Ket nakita ken napaneknekan dagiti disipulona nga immuli manen sadi langit.