1 Áádóó kʼad náhástʼédiin dóó baʼaan tʼááłáʼí ałtso nááhai dóó Lehi Jerusalemdóó dah diinánę́ędą́ą́ʼ éí kojįʼ hastą́ądi neeznádiin nááhai; dóó ákweʼé yihahgo éí Lachoneus alą́ąjįʼ ánihwiiʼaahii dóó éí kéyah dah siʼánídóó naatʼáanii nilį́į́ ńtʼę́ęʼgo.

2 Dóó Nephi, Helaman biyeʼ, Zarahemladóó dah diiyá, biyeʼ Nephi, alą́ąjįʼ naagháhígíí, béésh łitsoii bikááʼ haneʼę́ę, dóó tʼáá ałtso haneʼ ndaajaahą́ą yaa yinínil, dóó tʼáadoo leʼé Lehi Jerusalemdóó dah diinánę́ędą́ą́ʼ diyingo baa ntsáhákees yę́ę ałdóʼ yeinínil.

3 Índa éí kéyahdóó dah diiyá, dóó ííyájígo, tʼáadoo bééhoozin da; dóó biyeʼ Nephi éí haneʼę́ę bitsáskʼeh góneʼ yaa ánááhályą́, aooʼ, bidineʼé baa haneʼgo.

4 Áádóó náhástʼédiin dóó baʼaan naaki náháahgo, jó, Diyin God yá dahalneʼii náásgóó yaa dahalneʼę́ę hózhǫ́ bidaʼalnééh silį́į́ʼ, háálá diné bitahgóó binahjįʼ éédahózinii dóó álílee naʼanish konishghánígo áhoonííł silį́į́ʼ.

5 Ndi łaʼ éiyá Samuel, Laman bidineʼé nilíinii, saad kóhodoonííł níigo yee haadzíʼę́ę bilááhgóó ahoolzhiizh daaní.

6 Dóó bikʼisóó yaa bił dahózhǫ́, kódaaníigo: Jó kʼad éí Samuel bizaad kóhodoonííł níigo yee haadzíʼę́ę, bilááhgóó ahoolzhiizh, dóó tʼáadoo beʼelyaa da, éí bąą, nihił dahózhónígíí dóó díí deinohdlánígíí tʼáadoo biniiyéhé da silį́į́ʼ.

7 Áádóó tʼóó ahayóígo kéyah bikááʼgóó hahodiidláád; dóó daʼoodlánę́ę, éí díí áhodoonííł hodooʼniidę́ę shąʼ tʼáadoo ádzaagóó daniizį́įʼgo, yaa yínííł yíkai daazlį́į́ʼ.

8 Jó ndi, Samuel bizaad dayoosdląądę́ę éí tʼáá áłahjįʼ ńléí łaʼ ajį́ dóó łaʼ atłʼééʼ dóó łaʼ nááná jį́ tʼááłaʼajį́ dooleeł tłʼééʼ éí ádin haʼnínę́ę hádeidéezʼį́į́ʼ, áko éí binahjįʼ bił béédahodoozįįł beʼoodląʼ éí doo tʼáá ádzaago da.

9 Áádóó kʼad éí doo daʼoodlánígíí łaʼ ajį́ yee ndahazʼą́, ákóneʼ tʼáá ałkʼidą́ą́ʼ sodizin yitʼihę́ę dayoodlánígíí ałtso ndootsił, tʼáá hazhóʼó Samuel Diyin God yá halneʼii kóhodoonííł níigo, bee éédahózinii yee haadzíʼę́ę beʼelyaago tʼéiyá doodzih deidííniid.

10 Áádóó kʼad Nephi, Nephi biyeʼ, díí bidineʼé bąąhági átʼéii yaa ńdiikaigo, tʼáá íiyisíí yaa yínííł niizį́į́ʼ.

11 Áádóó dah diiyá dóó nahasdzáán bikáaʼjįʼ nitsidinígoʼ, dóó tsʼídá yéigo biDiyin God bidineʼé yaa náʼooskan, aooʼ, ńléí bizhéʼé yę́ę bisodizin dayoodlą́ągo ndadootsił hodooʼniidę́ę.

12 Áádóó tsʼídá yéigo Bóhólníihii yichʼįʼ sodilzingo łaʼ ajį́ azlį́į́ʼ; jó áádóó, Bóhólníihii binééʼ disétsʼą́ą́ʼ, kóníigo:

13 Nitsiitsʼiin de ánínééh dóó nił hózhǫ́; jó háálá, ádahodoonííł hodooʼniidę́ę éí baa hoolzhish, díí tłʼééʼ éí bee éédahózinii ńdoolyééł, dóó yiską́ągo éí nahasdzáán bikáaʼjįʼ nishááh, áko nihookááʼ dineʼé bił ííshją́ą́ ádeeshłííł tʼáá ałtso diyingo shá dahalneʼii yee hadahaasdzíʼę́ę éí bidaʼdeeshłííł.

14 Jó, shí éí shidineʼé baa níyá, tsʼídá ałtso hodeeyáádą́ą́ʼ diné bił ííshją́ą́ ádaashłaa yę́ę tʼáá ałtso biʼdeeshłííł biniiyé, dóó aTaaʼ dóó aYeʼ nilíinii tʼáá áła, bíniʼ biʼdeeshłííł—shí shiniinaa aTaaʼ binaanishígíí biʼdeeshłííł dóó shitsʼíís hólónígíí biniinaa aYeʼ binaanishígíí ałdóʼ biʼdeeshłííł. Jó áádóó, bíiníłką́, dóó díí tłʼééʼ éí bee éédahózinii ííshją́ą́ ádoolnííł.

15 Áádóó Nephi saad yidiiztsʼą́ʼą́ą beʼelyaa, tʼáá bee haʼoodzíʼę́ęgi átʼéego, jó háálá, iʼííʼą́ągo tʼáadoo tłʼééʼ hazlį́įʼ da; dóó diné tʼóó bił ádahóóyóí chadahałheełę́ę ádingo biniinaa.

16 Dóó tʼóó ahayóí diné, Diyin God yá dahalneʼii dabizaad doo dayoodlánę́ę, nahasdzáán bikáaʼjįʼ naaʼaníídeeʼ daneezná nahalingo, háálá yéédaalniih Diyin God yá dahalneʼii dabizaad dayoodlánę́ę ndadiiltsił daaníigo yidahodeezánę́ę bitsʼą́ą́ʼ yíchxǫʼgo; háálá bee ééhózinii ííshją́ą́ ádoolnííł haʼnínę́ę éí baa hoolzhiizh.

17 Dóó doo daʼoodlánę́ę éí Diyin God biYeʼ hodíinaʼgo ííshją́ą́ ábidiʼdoolníłígíí yaa ákodaniizį́į́ʼ; aooʼ, diné tʼáá ałtso ndi eʼeʼaah doo haʼaʼaahjįʼ, náhookǫsjígo dóó shádiʼááhjígo kéédahatʼínígíí, tʼóó báhádzidgo yikʼee dadeesyizgo biniinaa nahasdzáán bikáaʼjįʼ naaʼahineezdeeʼ.

18 Háálá éí bił béédahózin Diyin God yá dahalneʼii, áhodooníłígíí tʼáá aaníinii yaa dahalneʼgo ląʼída nááhai, dóó bee ééhózinii baa hóóneʼę́ę éí tʼáá íídą́ą́ʼ baa hoolzhiizh; dóó ńdaasdzííd bąąhági átʼéii yaa naakai yę́ę dóó doo daʼoodlánę́ę biniinaa.

19 Áádóó éí bitłʼééʼ tʼáadoo chahóółhéel da, tʼóó ałníʼníʼą́ągo adinídínígi átʼéego adinídíín. Áádóó abínígo jóhonaaʼéí, tʼáá hanádáhági átʼéego, hanáánáádzá, áádóó éí bił béédahózin éí bijį́ éí Bóhólníihii adoochíłígíí, háálá bee ééhózinígíí éí ííshją́ą́ ályaa.

20 Áádóó, aooʼ, tsʼídá, tʼáá ałtsoní, Diyin God yá dahalneʼii yaa dahoolneʼę́ę bidaʼalyaa.

21 Áádóó ałdóʼ saad yę́ę bikʼehgo, sǫʼ ániidí léiʼ hááyá.

22 Áádóó kóhoodzaa dóó bikʼijįʼ Satan beʼiiníziinii, diné bitahgóó yoochʼííd yiʼníłniiʼ, bijéí dooltłʼis, áko díí bee ééhózinii dóó álílee naʼanish deiniłʼínę́ę doo deidoodląął da biniiyé; ndi azhą́ yoochʼííd dóó naʼadloʼ hólǫ́ǫ ndi tʼóó ahayóí diné daʼoosdląąd, dóó Bóhólníihii binahatʼá yikééʼ dadiikai.

23 Áádóó Nephi, dóó ląʼída ałdóʼ, diné yitahgóó nikidiikai, beʼiinaʼ łahgo áńdayiidlaaígíí tó yee deisį́įhgo, áko tʼóó ahayóí bąąhági átʼéii yóó ádeidiyizʼą́. Dóó ákótʼáo diné kéédahatʼį́įgo nááhodiiyeel.

24 Dóó doo saad ahétʼááh dahólǫ́ǫ da, tʼáá hazhóʼó tʼáá díkwíhígo diné łaʼ ndaʼdiniitą́ą́ʼ, Diyin God bizaad binahjįʼ Moses bibeehazʼáanii bee óólzinę́ę éí ninítʼiʼ daaníigo. Kʼad díí éí doo ákódaʼiilaa da, tʼáadoo Diyin God bizaad yikʼidaʼdiitą́ą da.

25 Ndi áádóó díí doo ákótʼéégóó dahalneʼę́ę hazhóʼó ninádabiʼdiʼneestą́ąʼgo yaa ákodaniizį́į́ʼ, dóó íhidiikai, háálá beehazʼáanii tʼah doo ałtso beʼelnéeh da bééhoozingo ályaa, dóó tsʼídá ałtso ndaaztʼiʼjįʼ biʼdoolnííł biʼdooʼniid; aooʼ, saad díí biʼdoolnííł bidííniid; aooʼ, tsʼídá ndaaztʼiʼjįʼ dóó ndaneesʼą́ąjįʼ ałtso biʼdoolnííł doo éí bił yóó ahodoogáał da; éí bąą díí yihahígíí biyiʼ éí doo ákódaʼiilaa yę́ę bił ííshją́ą́ ádaalyaa dóó yee ádaa dahoolneʼ.

26 Dóó ákótʼéego náhástʼédiin dóó baʼaan naaki ałtso nááhaigo, díí bee ééhózinii Diyin God yá dahalneʼii náásgóó ádahodoonííł daanínę́ę éí bidaʼalyaago biniinaa, diné yaa bił dahóózhǫǫd.

27 Áádóó náhástʼédiin doo baʼaan tááʼ éí ałdóʼ ahodeezyeelgo ałtso nínáánááhai, tʼáá hazhóʼó Gadianton bidaʼniʼįįhii, dziłyiʼgo kéédahatʼínígíí tʼéiyá diné yitahgóó nikidadiikai, tsʼídá ndahonitłʼahgo ńdanitʼingo kéédahatʼį́įgo biniinaa chʼééh bikʼeh daazhdidleeh; éí bąą diné ndeistseed, dóó tʼóó ahayóí diné dayíígą́ą́ʼ.

28 Áádóó, náhástʼédiin dóó baʼaan dį́į́ʼ yihah góneʼ díí daʼniʼįįhii tʼóó ahayóí silį́į́ʼ, Nephi bidineʼé yitsʼą́ą́jí daazlį́ʼígíí yihidiikaigo biniinaa, áko Nephi bidineʼé ákǫ́ǫ́ kéédahatʼínígíí ayóó átʼáo yaa yinííł danízin.

29 Dóó Laman bidineʼé bitahgóó yéigo yínííł hazlį́į́ʼ, jó háálá, tʼóó ahayóí haʼáłchíní dabidziilgo daneeyánígíí, tʼáá bí ádaa ntsídaakees daazlį́ʼígíí, éí Zoram bidineʼé, yoochʼííd dóó łikango bá ndahaʼáago, Gadianton bidaʼniʼįįhii yihidiikai.

30 Dóó ákótʼáo Laman bidineʼé ałdóʼ bichʼįʼ dahodiisnááʼ, dóó beʼoodląʼ dóó yáʼátʼéehgo dahinánę́ę yaa kódzaa, háálá ániid hanáánootʼánígíí bąąhági átʼéego deeskaigo biniinaa.