1. Erio egaika engaki agochika omoganda gotiga gosaba, naboigo aborokigwa baye. Na akabachika ng’a tibaba bagotiga amasabo ase chinkoro chiabo.

2. Na akabachika gotenana namagoro. Naboigo kegima bagatenena namagoro abo.

3. Erio egaika engaki agosamunyorana omogati na koyosesenia, na kobaa aborokigwa baye koria.

4. Erio ekero bakorire koria akabachika ng’a babe bagosamunyorana omogeti na kobaa omoganda.

5. Na ekero bakora koyoa omoganda oyo naboigo akaba okobaa edivai konywa, naboigo akabachika boigo kobaa omoganda.

6. Bono, mogati tonya koba aroro, gose edivai, koretwa amo naborokigwa gose amo nomoganda;

7. Ekeene akabaa omogati koria, na omosabibu konywa.

8. Erio akabatebia ng’a: Na onde bwonsi orarie omogati oyo nabe okoria omobere one ase omoyo oye; na oyokonywa edivai eye onyure amanyinga ane ase omoyo oye; na omoyo oye tokorora enchara gose erang’o korende nigo arabe oichire.

9. Erio buna omoganda oria omogati na konywa erio kegima Omoika Omochenu ogacha ase bare, erio bakarera ase eriogi erimo na komoa obonene ase Kristo oria bonsi baroche na koigwa.

10. Erio ekero bonsi barwa obonene ase Kristo, erio akabatebia ng’a: Bono nakorire amachiko ane aria Tata ang’ete inchike abanto aba, abwe bare abenyomba ya Israel.

11. Inyora inakwanete ng’a ekero amang’ana aya a’Isaya agoikerana – – rigereria imoyabwate na narikire, aseigo yarigererie.

12. Na ekeene, ekeene, nabatebirie ng’a ekero araikerane naboigo ogoikerana kweira eria Tata ariete ase abanto baye, benyomba ya Israel.

13. Naboigo abatigari baria barabe bagosiaretereka ase obosio bwense, mbache ime korwa mocha na korwa bosongo, na korwa sugusi na korwa irianyi; na imbabe bakoretwa ase obong’aini bwa Nyasae obo, oria obaboririe.

14. Na Tata nigo anchigete ng’a inyare kobaa ense eye, ase obomenyo bwaino.

15. Na nabatebirie ng’a onye abanto bebisaku tibakoangama nyuma ogoseseneka gotoracha okwe baranyore, ekero babasiareire abanto bane –

16. Erio inwe abwe more abatigari benyomba ya yakobo baragende ase egati yabo; na imobe egati yabo abwo bare abange; na imobe egati yabo buna esibwori ere egati yeching’iti chiorosana, na buna esibwori emanwa ase chimanwa chie chingondi, echio ekero achire chigosarigwa nagotandorwa koba ebing’ese, na onde tari orakonye.

17. Amaboko aino naimokigwe igoro ase ababisa baino, na ababisa baino mbaitwe.

18. Na nimbe inkobasangereria amo bunya omonto ogosangereria etukia ere inse ase enyomba yaye.

19. Na nimbakore abanto bane baria Tata arosetie obobwatani nabwe, na ninkore chingunchara chiaino koba chichuma, na gokora ebitago biaino koba echuma. Na imobe mokonacha abanto koba ebing’ese; na nimbe inkobakora babe bakonyora okobwa kwabo ase Omonene na okorendwa kwabo ase Omonene bwense yonsi. Na rigereria, inche ninche ere oria okorete bo.

20. Na nebe egoika engaki otebire Tata, ng’a omoyio oye bwekeene nobe ogosungwa rituko riria igoro yabo, gotatiga baangamire nigo orabe okobagwera, otebire Tata, nonya nase chinse chionsi chiabanto bebisaku.

21. Na neike engaki indabe inkomenta abanto bane, O enyomba ya Israel.

22. Na rora abanto aba nabwe indarete ase ense eye, ase ogoikerania obobwatani bwane narosetie na Tata oino Yakobo; na nebe Yerusalemu enyia na chinguru chia igoro inchibe igoro yabo abanto aba; naboigo nimbe egati yaino.

23. Rigereria inche ninche oria Musa abete ogokwana, nagoteba ng’a: Nyasae Omonene oino nabe okoimokia omobani korwa egati ya abamino ase more, buna inche; goetera ase are inwe imobe mokoigwa kera egento arabe ogokwana ase more. Na neike engaki ekero kera omoyo oria orange koigwa omobani oyo arabe okonachwa korwa ase abanto.

24. Ekeene nabatebirie na ababani bonsi korwa Samuel na baria bakobwatia, abange buna nakwanire, babeire bagokwana igoro yane.

25. Na rigereria nigo more abana ba obabani na nigo more abenyomba ya Israel; na more abanto beira eria Tata abegete ase abaiso baino na goteba ase ibrahimu ng’a: Ase oroiboro rwao kera egesaku inkebe gegosesenigwa.

26. Na Tata onyimokirie igoro ritang’ani, na gontoma ase more kobasesenia ase ogoonchora kera oyomo oria osirire ase ebibe; na nase engencho more abana beira –

27. Nyuma yayio mogasesenigwa nagoikerani eira ya Tata Abrahimu ogoteba ng’a: Ase oroiboro rwao kera egesaku gi’ense ngesesenigwe – – ase okorwa Omoika Omochenu ase abanto bebisaku, ogoseseneka okwe korakore abanto bebisaku koba abanto abanene ase bonsi, ase ogosiarereka kwa abanto bane, O enyomba ya Israel.

28. Na imbabe bagochayeka ase abanto bense eye. Taimang’ana ekero baranyore oboikeranu bwenchiri, korende onye bagokong’ia chinkoro chiabo nimbairanie ase ebibe biabo nabibe ase amaboko abo otebire Tata.

29. Na goika inginyore eira eria nabegete amo nabanto bane; nigo narosetie eira eye ase okobareta amo ase engaki ere eng’ene erinde naende imbae ense ya abaise koba obomenyo bwabo, eyio ere ense ya Yerusalemu, eyio ere ense yeira ase bare kare na kare, otebire Tata.

30. Erio neike engaki ensa egocha, oboikeranu bwenchiri yane boranyare korandigwa ase bare;

31. Na imbanyegene ng’a nigo inde Yeso Kristo, Omwana o’Nyasae na imbasabe ase Tata ase erieta riane.

32. Na abarendi babo babe bagoaka egeturi, na ase eriogi erio barabe bagotera; ekiagara bararore maiso marore.

33. Erio Omonene nabe okobabeka amo naende na koba Yerusalemu koba obomenyo bwabo.

34. Erio nario barabe amo ase ogotera barre nomogoko – – mogasiria chinsemo chia Yerusalemu; Omonene oremirie abanto baye, ekiagera oboririe Yerusalemu.

35. Omonene nigo abete okoimoikia okoboko kwaya ase kera egesaku kerache; na ense yonsi nerore ogotoreka kwomonene Tata; na Tata amo nainche nigo tore abamo.

36. Na erio nebe egoika aria onsi arikire ng’a: boka, boka, naende na esoke chinguru chiaino O Zayoni; esoke chiganchwa chiaino chindabu, O Yerusalemu, omochi omochenu, ekiagera onde tari orache ase more otarogetie ore omonyabibe.

37. Ebokie korwa ase amaroba; boka, ikaransa O Yerusalemu; erusie korwa ase engori ere ase ebigoti biaino O inwe abasibwa abaiseke ba Zayoni.

38. Ekiagera otebire Omonene ng’a mweonirie inwe abanyene bosa, na imoborigwe bosa.

39. Ekeene, ekeene, nabatebirie, ng’a abanto bane mbamanye erieta riane ase rituko riria mbamanye ng’a inche oria okwanetie.

40. Na imbatebe ng’a inaki egetunwa keria gechenegete amagoro aye are igoro ere oyokoreta amang’ana amaya ase bare, ere oyokoreta omorembe ere oyokoreta amang’ana amaya ase bare, oyokoreta ogotoreka na ogoteba ase Zayoni ng’a: Nyasae oino obuire!

41. Na okorera nkobeo gogoteba ng’a karweo karweo igaa, timokuna keria kere ekemwamu; karwe egati yaye kabe abachenu mokobogoria ebibekerero bi’Omonene.

42. Ekiagera timokogenda nagento gose koiruruka; korende Omonene nabatang’ane, na Nyasae oIsrael nabe omorendi oino.

43. Rigereria abasomba bane mbakore buya; na nabe ogotogigwa na koimokererigwa igoro.

44. Buna abange bakumeti ase ore – – abanto baye bakanywomwa kobua monto onde bwonsi korwase abana bamwanyabanto –

45. Naboigo nabe okomesia kera ense; abarwoti mbabe bagosieka emenwa yabo ase are, ekiagera batanya gotebigwa ing’a bakerore na keria batanya korora mbakemanye.

46. Ekeene, ekeene, nabatebirie ebinto ebi bionsi ekeene mbiikerane, koreng’ana buna Tata anchigete. Naboigo eira eye Tata abegete ase abanto baye eikerane; naboigo Yerusalemu nemenywe na abanto bane naende na nebe ense y’obomenyo bwabo.