1 Áádóó diné áłah nilínę́ę dóó ałdóʼ bikééʼ naazíinii kʼadí tʼáadoo sodadołziní yidííniid. Dóó nihijéí biyiʼdi nihisodizin niʼ ádaoohłeʼ lágo yidííniid.

2 Dóó ńdoohjeeh dóó daoohsįįh yidííniid. Áádóó ńdiijééʼ dóó deizįʼ.

3 Áádóó bááh ninááyiztiʼ dóó yikʼi sonáádoolzin, dóó bikééʼ naazíinii yitaizką́ doo dayííyą́ą́ʼ.

4 Dóó ałtso daʼiiyą́ąʼgo bááh ńdahohtííh dóó diné baa dahidohkááł yidííniid.

5 Dóó diné áłah jílínę́ę yitaadeizką́ chʼil naʼatłʼoʼii bitooʼ ałdóʼ baa nááneiníką́, dóó dayoodlą́ą́ʼ dóó áłah jílínę́ę baa náádookaał yidííniid.

6 Kʼad, bááh, dóó chʼil naʼatłʼoʼii bitooʼ, éí akééʼ naazíinii doo łaʼ yiníʼą́ą da, dóó doo łaʼ yiníką́ą da, doo ndóʼ áłah jílínę́ę da.

7 Ndi tʼáá aanii éí bááh yitah neezką́ doo daʼiiyą́ą́ʼ, dóó chʼil naʼatłʼoʼii bitooʼ ałdóʼ yitaizką́ doo dayoodlą́ą́ʼ.

8 Dóó kóhodííniid: Háíshį́į́ díí bááh yiyííyą́ʼígíí éí shitsʼíís jidooyį́įł dóó hatsʼíís dóó hayiʼsizíinii yee átʼée doo; áádóó háíshį́į́ díí chʼil naʼatłʼoʼii bitooʼ yoodlą́ʼígíí éí shidił jidoodlį́įł dóó hatsʼíís dóó hayiʼsizíinii yee átʼée doo dóó hwiiʼsizíinii éí doo dichin dóó doo dibááʼ náádoodleeł da, ndi tʼáadoo yídin nilíní da dooleeł.

9 Kʼad, diné áłah jílínę́ę ałtso daʼiiyą́ą́ʼ dóó daʼoodlą́ąʼgo, jó, tʼah ńtʼę́ę́ʼ Iiʼsizíinii bikʼidahooleʼ; dóó iinééʼ tʼááłáʼjįʼ hadadeeshghaazh, dóó Jesus yaa dahaznih, éí dayiiłtsą́ doo deidiiztsʼą́ą́ʼ.

10 Áádóó tʼáá ałtso Jesus yaa dahaznihgo, kóyidííniid: Jó kojįʼ díí beehazʼáanii díí diné, éí éí Israel bighandóó dineʼé danilínígíí bídéétʼiʼígíí, aTaaʼ yee shichʼįʼ haadzíʼę́ę ałtso baa naahosisneʼ.

11 Shą́ą́ʼ béédaohłniihgo, díí bee nihichʼįʼ haasdzíiʼ neʼ, dóó kódííniid neʼ Isaiah bizaad bidaʼalyaago—jó díí éí nááháasdzo, éí éí kǫ́ǫ́ nihidáahgo, éí bąą biiʼ dadínóhʼį́į́ʼ.

12 Dóó tʼáá aaníí, tʼáá aaníigo, ánihidishní, éí bizaad bidaʼalyaago índa aTaaʼ bidineʼé yił ałhadaʼdeestʼánę́ę bidaʼalnéeh dooleeł, O Israel bighandóó danilíinii.

13 Dóó índa, dineʼé daa dziihígíí nahasdzáán bikááʼgóó kódaadzaa yę́ę, haʼaʼaahdę́ę́ʼ, eʼeʼaahdę́ę́ʼ, dóó shádiʼááhdę́ę́ʼ dóó náhookǫsdę́ę́ʼ áłah ábidiʼdoolnííł; dóó Bóhólníihii biDiyin God bá nináʼnídláhígíí yéédahodoosįįł.

14 Dóó aTaaʼ díí kéyah baa didííʼááł shiłní, náásgóó dahodooleełii bá.

15 Dóó ánihidishní, Gentile dineʼé ayóó átʼéego hakʼidahojisdliʼgo dóó shidineʼé ałtso haataodaazhjéeʼgo bikééʼdóó doo beʼiinaʼ łahgo áńdeidlééhgóó—

16 Índa nihí, Jacob bighandóó dineʼé danohłínígíí tʼáá daadziihígíí, éí bitaadaahkai dooleeł; dóó tʼóó ahayóígi ánéelą́ąʼ doo áko éí bitahgi naahkai dooleeł; dóó náshdóítsoh naaldlooshii tsintahgóó dahólónígíí yitah yigááł nahalingo, dóó náshdóí ániid naagháhí dibé yitah yílwod nahalingo, éí éí, yitah yigáahgo yił nayiideeł dóó nayiłdlaad, dóó tʼáadoo yisdáboołtéłí da.

17 Nihílaʼ éí bee bikʼijįʼ dah dohłníih dooleeł nihikʼijįʼ nilíinii, dóó tʼáá ałtso nihikʼijįʼ danilíinii éí kʼídahidookał.

18 Dóó shidineʼé áłah ádeeshłííł diné léiʼ tłʼoh naadą́ą́ʼ ahąąh náyiiłjooł nahalingo.

19 Háálá aTaaʼ diné yił ahadeetʼánę́ę éí shidineʼé ádeeshłííł, aooʼ, nihideeʼ béeshgo ádeeshłííł, dóó nihikeeʼ béésh łitsoiigo ádeeshłííł. Dóó tsʼídá diné tʼóó ahayóí bee ndadoohłtsił; dóó nihitsʼą́ą́ʼ ńdeidiiláhą́ą, dóó binaalyeʼé danilínę́ę éí nahasdzáán ałtso bee Bóhólníihii diyingo bichʼįʼ kódeeshłííł. Jó áádóó, shí ákódeeshłííł.

20 Áádóó baa hodoolzhish, ní aTaaʼ, aajįʼ ayííłką́ągo shibééshhał tʼáá ákogi átʼáo ánihwiitʼaahii éí hakʼi dasitą́ą dooleeł; dóó tʼáá hazhóʼó beʼiinaʼ łahgo ánáyiidlaago tʼéiyá doo hakʼijįʼ ndookǫs da, ní aTaaʼ, aooʼ, tsʼídá tʼáá ałtsogo Gentile dineʼé kéédahatʼį́įgo éí hakʼijįʼ ndi ákótʼé.

21 Áádóó baa hodoolzhish shidineʼé, O Israel bighandóó danilíinii, éí ndeeshłééł.

22 Jó áádóó, díí diné éí díí kéyah bikáaʼgi bá hwiideeshʼaał dóó ńdahidooʼnééł, nihizhéʼé Jacob bił ałhadiʼnishtʼánę́ę áajįʼ biʼdoolnííł; dóó éí Jerusalem Ániidígíí dooleeł. Dóó yáʼąąshdi bee daʼadziilii éí nihiníiʼgi dooleeł; aooʼ, tʼáá shí nihiníiʼgi honishłǫ́ǫ doo.

23 Jó, Moses kóníigo łaʼ yaa yáłtiʼę́ę éí shí ashtʼį́: Bóhólníihii niDiyin God éí nihitahdóó Diyin God yá halneʼii łaʼ ninéididoołááł, shígi átʼée dooleeł; éí tʼáá haʼátʼííshį́į́ yee nanihinitinígíí deísínóołtsʼą́ąʼ dooleeł. Dóó tʼáá ałtso atsʼíís dóó ayiʼsizíinii doo Diyin God yá halneʼii dayiistsʼą́ʼígíí éí diné bitahdóó bidadiʼdoolkał.

24 Tʼáá aaníí ánihidishníigo, aoo, dóó Diyin God yá halneʼii tʼáá ałtso Samuel bikééʼdóó índa éí wónáásdóó, ląʼída dahoolneʼígíí, éí shaa ńdahaasneʼ.

25 Jó áádóó, nihí éí diyin yá halneʼii baʼáłchíní danohłį́; dóó Israel éí bighandóó nohłį́; dóó nihizhéʼé nihiTaaʼ yił ałhadaʼdeestʼánę́ę éí óohtʼį́ʼ, Abraham kóyidííniidę́ę: Dóó nikʼǫ́ǫ́ʼ éí binahjįʼ nihookááʼ dineʼé bikʼidahojídlíi dooleeł.

26 ATaaʼ éí nihichʼįʼ tsʼídá áłtsé nashiiłná, dóó nihichʼįʼ shiʼníłniiʼ tʼááłáʼí nohsinígo nihíká adeeshwoł áko bąąhági átʼéii nahjįʼ kódadoohłííł; dóó díí éí Diyin God bił ałhaʼdeetʼáanii baʼáłchíní nohłínígíí biniinaa—

27 Dóó kótʼéego nihikʼihojisdliʼgo áko aTaaʼ kóníigo Abraham yił ałhaʼdeetʼánę́ę: Nihikʼǫ́ǫ́ʼ binahjįʼ éí nihookááʼ dineʼé bikʼidahojídlíi dooleeł, nínę́ę biʼdoolnííł—Iiʼsizį́ Diyinii éí Gentile dineʼé bee bikʼijideeshdliił, díí Gentile dineʼé bikʼihojisdliʼgo tsʼídá aláahdi ábóodziil dooleeł, kótʼéego shidineʼé baa taidoojah, O Israel bighandóó danilíinii.

28 Dóó éí éí díí kéyah bikááʼgóó diné kéédahatʼínígíí tsʼídá doo deiłdin da dooleeł. Ákótʼée ndi, tsʼídá shinaʼnitin ałtso nidazhdiiláago, índa doo hajéí dazhdotłʼisgo habąąhági átʼéii éí hakʼijįʼ kóńdeeshdlííł, ní aTaaʼ.

29 Dóó shidineʼé bił ałhadiʼnishtʼánę́ę béédeeshnih; áko shá bihónéedzą́ą́ góneʼ ahąąh ndeeshʼish, dóó díí bizhéʼé kéyah baa diníʼánę́ę éí baa ńdideeshʼááł dóó nihí dooleeł dishníigo bił ałhadiʼnishtʼą́, éí díí kéyah Jerusalem, éí kéyah ahaʼdeetʼáanii bichʼįʼ hoolʼáágóó, ní aTaaʼ.

30 Áádóó náasdi baa hodoolzhish, shinaʼnitin hadaałtʼéego bínabídínóoltįįł;

31 Dóó shí Jesus Christ, Diyin God biYeʼ nishłínígíí, deidoodląął, dóó aTaaʼ bichʼįʼ shízhiʼ yinahjįʼ sodadilzin dooleeł.

32 Índa nihá hadaʼasíidii binééʼ deigo kódeidoolííł; dóó iinééʼ tʼááłáʼígo dahataał dooleeł; háálá tʼáá ájíłtso dabinááʼ yee daʼahootʼį́į dooleeł.

33 Índa aTaaʼ áłah ánááhodoodlííł, dóó kéyah Jerusalem éí bikéyah dooleeł biniiyé yee didooʼááł.

34 Índa bił dahózhǫ́ǫgo dahataał dooleeł—Tʼáá ánółtso ahił dahohtaał, Jerusalem dahóóchxǫʼę́ęgo kéédahohtʼíinii; aTaaʼ éí bidineʼé yikʼijisdliʼ, Jerusalem éí yikʼé nináʼnídlá.

35 ATaaʼ bibee adziilii ałʼąą dóoneʼé dah naashjaaʼgóó yił ííshjání áyiilaa; dóó tsʼídá ndahoneesʼą́ąjįʼ diné aTaaʼ bee yisdáʼiildéehii deidoołtsééł; dóó aTaaʼ dóó shí éí tʼááłáʼí niidlį́.

36 Dóó índa ńdaháasdzo yę́ę éí bidaʼdoolnííł: Chʼéénídzííd, chʼénínáánídzííd, dóó nidziilgo íʼdílnééh, O Zion; niʼééʼ ániidígíí biih nínááh, O Jerusalem, kintah diyinii, háálá kodóó éí doo daʼoodlánígíí índa bąąhági átʼéii yaa ndaakai doo łaʼ náádoodáał da.

37 Ńdiidááh, łeezh ádąąh nikad, dóó nídaah, O Jerusalem; nikʼos gónaa bináztʼiʼę́ę nahjįʼ kónílééh, O Zion bichʼéʼé ąąh shijééʼ danilíinii.

38 Háálá ákótʼáo Bóhólníihii éí kóní: Tʼáadoo bą́ą́h ílínígo ndanihiʼdiizniiʼ, dóó béeso tʼáá gééd nihá ninináʼdoolyééł.

39 Tʼáá aaníí, tʼáá aaníigo, ánihidishní, shidineʼé éí shízhiʼ bił béédahózin dooleeł; aooʼ, éí bíiníłką́ągo díí yáłtiʼígíí éí shí áshtʼį́įgo bił béédahodoozįįł.

40 Dóó índa kódadidooniił: Dooládóʼ danizhóní da dził yikáaʼgi dah dadéesʼeezígíí, éí haneʼ yáʼátʼéehii yaa dahalneʼii, kʼé hwiinidzin yíndaʼniłtinii; yáʼádaatʼéehgo dahináanii haneʼ baa hózhóonii yitaadeiʼáʼii, yisdánáʼiiłdéehii yaa dahalneʼii; éí Zion deiłní: NihiDiyin God bíhólnííh.

41 Dóó índa kótʼéego hodidootsʼį́į́ł: Bitsʼánóhkááh, bitsʼánóhkááh, áádę́ę́ʼ yíwohjįʼ, bąąhági ádaatʼéii tʼáadoo ndaahjaahí; binííʼdóó chʼínóhkááh; chin nihąąh ádingo ídaʼdółnééh Bóhólníihii binaalyéii dah danohłéii.

42 Háálá doo éí tsxį́įłgo chʼídoohkah da dóó doo chʼídadínóohdzoł da; háálá Bóhólníihii éí nihilą́ąjįʼ yigáał dooleeł, dóó Israel biDiyin God éí nihikééʼdę́ęʼgo nihaa áhályą́ą dooleeł.

43 Jó, shá naalʼaʼí éí tʼáá ałtsojįʼ dahóyą́ągo naalnish dooleeł; éí éí ayóó átʼéego dóó baa haʼniihgo dóó tsʼídá wódahdi dooleeł.

44 Tʼóó ahayóí nikʼee bił dahooyóí—biniiʼjįʼ éí achʼįʼ nahwiiʼná bee bikʼeʼeshchʼííʼ, diné tsʼídá tʼáadoo łaʼ kótʼéego bichʼįʼ nahwiiʼnáa da, dóó bitsʼíísdóʼ nihookááʼ dineʼé beʼashiiké ájiidzaa—

45 Áko tʼóó ahayóí ałʼąą dineʼé bił nahazʼą́ągo yikʼíidołkał; aláahdi naatʼáanii danilíinii hakʼee dazhdidoołhił, tʼáadoo bee hoł dahaneʼii éí daazhdínóołʼįįł; dóó tʼáadoo daazhdiitsʼį́įhii éí baa ntsídajíkees dooleeł.

46 Tʼáá aaníí, tʼáá aaníigo, ánihidishní, díí tʼáá ałtso baa dahodoolzhish, tsʼídá aTaaʼ bee hadiidzih shidííniidę́ę ndi. Índa ahaʼdeetʼaahii aTaaʼ bidineʼé yee yił ahaʼdeetʼánę́ę ałtso bidaʼdoolnííł; dóó índa Jerusalem shidineʼé yiih ńdahidooʼnééł, dóó náasdi daabí dooleeł.