1. Na bono erio egaika engaki ekero Yeso akwana aya naboigo akayarwa ase omoganda; na akaba okorwa kera egento ase bare ebinene na ebike.

2. Erio agateba ng’a: amariko aya atari ase more, Omonene ochikire ng’a inyare kobayaa; na nigo chiarenge chisemi ng’a amang’ana aya abe akorugwa ase ekegori kia bosio.

3. Erio akamenta amang’ana onsi, nonya korwa omochakano goika engaki agocha ase obonene – – nonya nebinto biranyare gocha ase obosio bwense, goika nonya nebinto bionsi binyie ase riberera, na ense nebekwe amo buna omoringo, na igoro na ense chiete;

4. Nonya goika ase rituko riria rinene, ekero abanto, na ebisaku, na chinse chionsi na chimeme chionsi barabe bagotenena ase obosio bwa Nyasae, kogambigwa emeremo yabo, abare abaya gose ababe –

5. Onye bakoba abaya mbabe bakobokigwa ase obogima bwa kare na kare; na onye bakoba abebibe, nigo barasoe ase okoboko gwekina; batananegete, oyomo ase okoboko oko na oyonde ase okoboko oko, koreng’ana namabera na ekeene, na obochenu boria bore ime ya Kristo, oria orengeo ense etaratongwa.

6. Na bono tekoba ekorikwa ase egetabu eke nonya namang’ana emia aria Yeso abete ekeene okworokereria ase abanto;

7. Korende rigereria ase chibao echi chia Nephi nigo chibwate amang’ana aria abete okworokereria ase abanto.

8. Na ebinto ebi narikire nigo bire ebike kobua biria aorokereretie abanto; narikire ebinto ebi ase bare ase okobiganeria biche ase abanto aba korwa ase abanto bebisaku koreng’ana buna Yeso akwanete.

9. Na ekero barayanyore aya ayabagwenerete koyanyora ritang’ani, gotema okwegena kwabo, onye ekoba bo mbabe bakwegena ebinto ebi na ebinto ebinene imbiorokigwe ase bare.

10. Onye ekoba bo ng’a tibakwegena ebinto ebi, aseigo kera egento nkebe gekorusigwa ase bare na kobekwa ase ekina.

11. Rigereria kanya nabeire ang’e koyarika, onsi aria arigetwe ase chibao chia Nephi korande Omonene nigo ayankanetie, ase ogoteba ng’a ninteme okwegena kwa abanto bane.

12. Aseigo inche Mormoni inkorika ebinto biria nabete ingochikwa n’Omonene. Nabono inche Mormoni, ngokora inde enkwana yane, na nakobirika ebinto biria nachigetwe.

13. Aseigo, nigo nagani ng’a momanye ng’a ekeene Omonene naorokereretie abanto, ase engaki ya amatuko atato; naboigo nyuma akaba okweorokia bweka ase bare kera engaki, na koyosamunyora omogati na koyosesenia, na kobaa.

14. Erio egaika engaki akworokereria abana bomoganda baria bakwanetwe na koirania chimeme chiabo inse, na bagakwana amang’ana yagokumia ase abaise babo, kobua aria aorogetie abanto; na agasibora chimeme chiabo erinde banyare gwatora.

15. Erio ekero agenda igoro – – eriakabere akeorokia ase bare naende akagenda ase ise, ekero abagwenirie abarwaire, na ebirema, nakobaigora amaiso abo abarenge emeuko nakoigora emetino koigwa, na amama, na kobagwenia ase chinchera ao ao nakobokia omonto korwa ase amakweri na kworokia chinguru chiaye ase bare, erio akairwa ase ise.

16. Rigereria, egaika engaki ase emambia omoganda okaba amo, na bonsi bakarora na koigwa abana aba; nonya nabana abake bakamanora emenwa yabo gokwana na agankania ng’a onde tarika amang’ana aya.

17. Erio egaika engaki aborokigwa baria Yeso achorete bagochaka korwa engaki eria kobatisa na kworokia ase obonge buna babete bagocha ase bare; na buna ase obonge babatisetwe ase erieta ria Yeso bakaba bagoichorwa n’Omoika Omochenu.

18. Na abange babo bakarora amang’ana amakong’u na atari gokwaneka, ayio atari buya koyarika.

19. Erio bakorokereria barabwo ase barabwo; na bakaba nebinto ase obomo, na kera omonto akaba ogokora amaya ase oyonde.

20. Erio egaika engaki bagokora amang’ana aya onsi buna Yeso abachigete.

21. Na baria bonsi babatisetwe ase erieta ria Yeso bakarokwa ekanisa ya Kristo.