1 Áádóó Jesus naakitsʼáadahgo hastóí náyiizláʼą́ą ndaakaigo deidiiztsʼą́ą́ʼ dóó dayiiłtsánę́ę yíndaʼniłtin, dóó Jesus bízhiʼ binahjįʼ tó yee daʼiisį́į́ʼ áádóó naakitsʼáadahii tʼááłaʼ yéigo sodadilzin dóó chʼiyáán ádąąh deitʼį́įgo áłah daazlį́į́ʼ.

2 Dóó Jesus yichʼįʼ ííshjání ánááʼdiilyaa, háálá éí bízhiʼ binahjįʼ aTaaʼ yichʼįʼ sodadilzin; dóó baa níyá dóó yiníiʼgi yiizįʼ, dóó iiłní: Haʼátʼíísh nihaa nishłé?

3 Dóó ádeiłní: Bóhólníihii, díí sodizin bá hooghan binahjįʼ áłah néídleehígíí bízhiʼ bee wójíi dooleełígíí bee nihił hólneʼ; háálá díí éí biniinaa diné yee ałghadaʼditʼááh.

4 Dóó Bóhólníihii ábiłní: Tʼáá aaníí, tʼáá aaníigo, ánihidishní, haʼátʼíísh éí biniiyé diné bitah akʼijįʼ ídlį́ dóó saad ahídeetʼą́?

5 Diyin God bizaadísh doo deínóhłtaʼ da, shą́ą́ʼ éí ání Christ bízhiʼ ákʼidadidoohtʼááł, éí éí shí shízhiʼ? Jó díí ázhiʼ éí akéeʼdi yoołkáłígíí biyiʼ bee danihiʼdójíi dooleeł.

6 Dóó tʼáá háíshį́į́ shízhiʼ ákʼiidootʼą́ągo, dóó nihoníyáajįʼ yáʼátʼéehgo iinánígíí bidiniłkaalgo, éí akéeʼdi yoołkáłígíí biyiʼ yisdádoogááł.

7 Éí bąą, tʼáá haʼátʼííshį́į́ óhłéhígíí, éí shízhiʼ binahjįʼ ádoohłííł; éí bąą díí sodizin bá hooghan binahjįʼ áłah néídleehígíí éí shízhiʼ bee yíídóozhiił; dóó shízhiʼ binahjįʼ aTaaʼ bichʼįʼ sodadidoołzįįł áko sodizin bá hooghan shinahjįʼ yikʼijidoodliił.

8 Dóó haash yitʼáo éí shí shisodizin bá hooghan dooleeł tʼáá hazhóʼó shízhiʼ bee wójíigo tʼéiyá? Háálá sodizin bá hooghan Moses bízhiʼ bee wójíigo éí Moses bisodizin bá hooghan dooleeł; éí doodago sodizin bá hooghan diné bízhiʼ bee wójíigo éí diné bisodizin bá hooghan dooleeł, ndi díí sodizin bá hooghan shízhiʼ bee wójíigo éí shí shisodizin bá hooghan dooleeł, shinaʼnitin dóó shiʼoʼoolʼįįł biyiʼ siláago.

9 Tʼáá aaníí ánihidishní, shinaʼnitin bee ánihiʼdiilyaa; éí bąą tʼáá haʼátʼííshį́į́ óhłéhígíí, shízhiʼ binahjįʼ ółʼį́į dooleeł; éí bąą díí sodizin bá hooghan bá, shízhiʼ binahjįʼgo aTaaʼ bichʼįʼ sodoołzingo, aTaaʼ éí nihididootsʼį́į́ł;

10 Dóó ákogo éiyá díí sodizin bá hooghan éí shinaʼnitin bee ábiiʼdiilyaago índa aTaaʼ biyiʼjįʼ binaanish ííshjání íidoolííł.

11 Ndi shinaʼnitin doo bee ályaagóó, dóó diné binaʼanish bee ályaago, éí doodago chʼį́įdii beʼiiníziinii binaanish bee ályaago, tʼáá aaníí ánihidishní éí tʼóó hónízahjįʼ hoł dahózhǫ́ǫ dooleeł, dóó náásgóó bił nahodootʼih, áádóó éí naaʼahidookał dóó kǫʼ biih dooltłʼił, áádę́ę́ʼ doo tsxį́į́ł ninááʼiildéeh da.

12 Háálá binaanish ádayiilaaii éí tʼáá bił dahólǫ́, háálá binaanish ádayiilaaii biniinaa naaʼahidookał; éí bąą bee nihił hweeshniʼę́ę béédaohłniih.

13 Jó shinaʼnitin nihichʼįʼ kwíishłaa, dóó díí éí shinaʼnitin nihichʼįʼ kwíishłaaígíí átʼé—shizhéʼé bíniʼ beʼeshłéehgo biniiyé nahasdzáán bikáaʼgi níyá, shizhéʼé shiníłʼaʼígíí biniinaa.

14 Dóó tsin ałnáozʼaʼí bikáaʼgi dah shidiʼdooltééł biniiyé shiTaaʼ shiníłʼaʼ, dóó bikʼijįʼ tsin ałnáozʼai bikáaʼgi dah shidiʼdiiltį́įgo, tʼáá ałtso diné shaa hakáah dooleeł biniiyé, áko diné dah dashidiiłtínígi átʼáo aTaaʼ diné dah deididoołtééł, áko shidááhdóó deidoozįįł, binaanish ádayiilaa yę́ę binahjįʼ bá ndahwidiyeeshʼááł, beʼiinaʼ daatsʼí yáʼátʼéehgo ádayiilaa éí doodago daatsʼí tʼáá bąąhági átʼéego iiná ádayiilaaígíí binahjįʼ—

15 Dóó díí éí biniiyé dashiʼdiiltį́; éí bąą, aTaaʼ bibee adziilígíí binahjįʼ diné tʼáá ałtso shaa hidookah, áko binaanish ádayiilaa yę́ę binahjįʼ bá ndahodiyootʼááł.

16 Áádóó baa hodoolzhish, tʼáá háíshį́į́ bąąhági átʼéii yóó iidiiʼánígíí dóó shízhiʼ binahjįʼ tó bee biʼdoolzį́ʼígíí éí Iiʼsizį́ Diyinii biyiʼ dooleeł; dóó nahasdzáán bikááʼ bá nihootʼą́ąjįʼ yéigo átʼį́įgo iiná hazhóʼó áyiilaago; jó, nihookááʼ dineʼé bá ndahwiistʼą́ąjįʼ ahoolzhiizhgo éí díí diné shizhéʼé bidááhdóó nizhónígo iiná áyiilaago bá hadeesdzih.

17 Dóó tʼáá háíshį́į́ nahasdzáan bikááʼ bá nihootʼą́ąjįʼ doo yíníłdzilgóó, éí éí naaʼahidookał dóó kǫʼ biih hidooltłʼił ałdóʼ, áádę́ę́ʼ doo ninááʼiildéeh da, aTaaʼ tʼáá ákogi átʼáo bibee ánihwiitʼaahii biniinaa.

18 Dóó díí éí saad bílaʼ ashdlaʼii baʼáłchíní yee neineeztą́ą́ʼ. Dóó díí biniinaa saad yee yichʼįʼ haadzíʼę́ę yiʼiilaa, áko doo biyoochʼíid da, ndi bizaad yee hahadziihii ałtso yiʼdoolííł.

19 Dóó tʼáá haʼátʼííshį́į́ chin bąąh shį́į́ éí bił hazʼą́ą góneʼ doo yah adoogáał daʼ; éí bąą tsʼídá shidił bee habąąhági átʼéii ádąąh táájishgisgo tʼéiyá bihanáʼáyį́į́h góneʼ yah ázhdoogááł, háálá beʼoodląʼígíí, dóó bąąhági átʼéii tʼáá ałtso yóó deidiyizʼánígíí, dóó nihookááʼ bá ndahwiistʼą́ bijį́įjįʼ sodizin deidohsinígíí biniinaa.

20 Kʼad díí éí beehazʼáanii átʼé: Nahasdzáán ndaneezʼáajįʼ kéédahohtʼíinii, niheʼiinaʼ łahgo áńdaahdlééh, dóó shaa hohkááh dóó shízhiʼ binahjįʼ tó bee danihiʼdilzį́į́h, áko Iiʼsizį́ Diyinii doo nihąąh chingóó ánihiidoolííł, áko ánihwiitʼaah bijį́įdi doo nahąąh chingóó shidááhdóó nihidoohkah.

21 Tʼáá aaníí, tʼáá aaníigo, ánihidishní, díí éí shí shinaʼnitin; áko díí shisodizin bá hooghan biyiʼ tʼáadoo leʼé ádoohłíłígíí éí nihił bééhózin; háálá nihinááł shinaanish íishłaaígíí éí nihinaanish ádeínóhsin; dashinółʼį́įʼgo íishłaaígíí jó éí ádadoohłííł;

22 Éí bąą, díí óohłaago nihikʼihojídlíi dooleeł, háálá nihoníyá bijį́įdi éí yisdánihidiʼdooʼnił.

23 Díí daoołtsánígíí dóó dasidootsʼą́ʼígíí bikááʼ ádaahłééh, tʼáá hazhóʼó dooda nihiʼdooʼniidę́ę tʼéiyá dooda.

24 Díí diné binaanish ádeidoolíłígíí, bikááʼ ádadoohłííł, ałkʼidą́ą́ʼ ádáádzaahą́ą, ádayiilaa yę́ęgi átʼáo.

25 Jó háálá, díí haneʼ hádadoolaaígíí, dóó ánáádadooníłígíí biyiʼdóó, diné bá ndahwidiyootʼááł, háálá díí náádaháasdzooígíí binahjįʼ binaanish ádayiilaaígíí diné bił bééhózin dooleeł.

26 Jó áádóó, tsʼídá tʼáá ałtsoní éí aTaaʼ bikʼehgo bikááʼ aalnííł; éí bąą díí haneʼ nááhádzoohígíí biyiʼdóó nihookááʼ dineʼé bá ndahwiidiyootʼááł.

27 Dóó nihí naakitsʼáadahí danohłíinii nihił hashneʼ, tʼáá ákótʼéego anáhidootʼáłígíí nihaa deeshłééł éí éí bikʼehgo, díí diné bá ndahwidiyootʼááł. Éí bąą, dinéshąʼ haitʼéhígíí nohłį́į doo? Tʼáá aaníí shí ánihidishní, jó shígi ánóhtʼée doo.

28 Dóó kʼad éí aTaaʼ bichʼįʼ ńdésdzá. Dóó tʼáá aaníí ánihidishní, tʼáá haʼátʼííshį́į́ shízhiʼ binahjįʼ aTaaʼ bíínóhkeedígíí nihaidoolééł.

29 Éí bąą, bíʼdíínóhkeed, dóó nihaa doolyééł; dáádílkał nanóhłtsʼin, dóó nihichʼįʼ ąą ádoolnííł; háálá tʼáá háiida adókeedígíí, éí baʼdoolyééł, dóó dáádílkał neiniłtsʼinígíí, éí bá ąą ádoolnííł.

30 Jó dóó kʼad, tsʼídá yéigo éiyá, nihaa shił hózhǫ́, dóó ałdóʼ kweʼé nooséłígíí; aooʼ, azhą́ nihiTaaʼ ndi nihaa bił hózhǫ́, dóó diyin bá ndaalʼaʼí ałdóʼ nihaa bił dahózhǫ́, háálá nihiniinaa dóó kweʼé nooséłígíí; háálá éí doo łaʼ yóó ííyáhígíí biniinaa.

31 Jó, díí shá bikʼidadiʼdoohtį́į́ł; háálá ááłdishní kʼad kweʼé hoolzhishgo hinánígíí; dóó éí doo łaʼ yóó ííyáa da; dóó éí ił hózhǫ́ tʼáá ałtso binahjįʼ shiiʼ hólǫ́.

32 Jó ndi, kodóó dį́įʼdi są́ náʼoogą́ą́ʼ góneʼ nooséłígíí éí tsʼídá yéigo baa yínííł nisin, háálá chʼį́įdii beʼiiníziinii dabisnáahgo yikééʼ dah diikai yóó adootʼáanii biyeʼ nahalingo; háálá béésh łigai dóó óola yee ndashiiłniih doo, áádóó chʼosh ałchozhii ńdayigháashii dóó daʼniʼįįhii yił yah adahaʼnééh dóó deiniʼįįh éí yee ninadasídeezʼą́. Dóó aadi yoołkáałgo éí baa deeshááł, índa binaanish ádayiilaaii éí tʼáá bí bikʼijįʼ áńdadeeshdlííł.

33 Áádóó díí Jesus ałtso yee haadzíiʼgo naakitsʼáadahí kóníigo yichʼįʼ hanáánáádzííʼ: Áhoołtsʼóózígo yah aʼatiindę́ę́ʼ yah ahohkááh; háálá iiná doo ninítʼiʼii éí áłtsʼóózígo bił yah ahóótʼiʼ, doo áhoołtsʼóózígo bichʼįʼ atiin, dóó tʼáá díkwíhígo tʼéiyá yikʼi hakááh, ndi hoolʼáágóó anoonééł éí hóteelgo yah aʼatiin, dóó hóteelgo bichʼįʼ atiin, dóó tʼóó ahayóí éí yikááʼ yikah, tłʼééʼ hodooleełjįʼ, éí biyiʼ éí doo łaʼ diné naanish íidoolíił da.