1 Áádóó Jesus díí ałtso saad yee hanáánáádzíiʼgo, naakitsʼáadahí tʼááłáʼí nízinígo kóníigo yichʼįʼ hahasdzííʼ: ATaaʼ bichʼįʼ anáásdzáá dóó bikʼijįʼshąʼ, haʼátʼíí bee shikʼihozhdoodliił dashíínóhʼní.

2 Dóó tʼáá ałtso ádaaní, tʼáá hazhóʼó táltʼéego tʼéiyá, kódaaníigo: Ałtso są́ bikʼi hiikaigo dóó bikʼijįʼ, ndaʼnohtin dooleeł éí éí nihidííníniidę́ę, ałtsogo, tsxį́įłgo nił hazʼą́ąjįʼ nínááhidiikah.

3 Dóó éí kóyidííniid: Díí shitsʼą́ą́dóó danohsinígíí bee nihikʼihojídlíi dooleeł; éí bąą, tsostsʼidiin dóó baʼaan naaki nihéédááhaigo shił hazʼą́ądi shaa hidoohkah; dóó shí shinahjįʼ háádadoohłyįh.

4 Dóó ałtso yichʼįʼ yáłtiʼgo, diné táltʼéhę́ę yichʼįʼ yiizįʼ, dóó kwíídííniid: Nihíshąʼ éí aTaaʼ bichʼįʼ anáásdzáá dóó bikʼijįʼ, haʼátʼíí bee nihíká adeeshwoł danohsin?

5 Háálá deinízinígíí yee yichʼįʼ hadadoodzih yę́ę yichʼįʼ niʼ daniizį́į́ʼ, dóó bijéí biyiʼ tʼóó yąąh dabíniʼgo naazį́.

6 Dóó yichʼįʼ haadzííʼ: Jó, baa ntsídaahkeesígíí shił bééhózin, Jew dineʼé tʼah doo dah dashiiłhéégóó, John, ayóí ííníshʼníinii, nihookáaʼgi naʼnishtingo bił tádíshʼaashę́ę, shiyííkeedę́ę, ałdóʼ danohsin.

7 Éí bąą, hózhǫ́ nihikʼihojídlíi dooleeł, háálá nihí éí anoonééł doo nihidééłníi da dooleeł; ndi dahinohnáa dooleeł áko aTaaʼ bílaʼ ashdlaʼii baʼáłchíní yee yindoolnishígíí ałtso dadínóołʼįįł, índa tsʼídá ałtso aTaaʼ yee nihwiizʼánę́ę ałtso bidaʼalyaajįʼ, shí ayóó átʼéii yáʼąąsh bibee adziilii bił nánísdzáajįʼ.

8 Dóó tsʼídá doo anoonééł bidaʼneezgai nihidadééłníi da dooleeł, ndi shí ayóó átʼéii bił níyáago jineeskʼolgi átʼéego łahgo ádoohnííł anoonééł bił hazʼą́ nihitsʼíís anoonééł bikʼéstiʼ yę́ę éí nahjįʼ dóó doo anoonééł bidééłníijįʼ; dóó índa shiTaaʼ bił hazʼą́ądi nihikʼihojidoodliił.

9 Dóó nááná, nihitsʼíís biiʼ honohłǫ́ǫgo neezgai doo nihee hólǫ́ǫ da dooleeł, doo yínííł ndi tʼáá hazhóʼó nihookááʼ dineʼé bąąhági átʼéii yaa naakaiígíí tʼéiyá; dóó díí tʼáá ałtso ádeeshłííł háálá danohsinígíí biniinaa, háálá díí nahasdzáán tʼahdii sizį́į́dą́ą́ʼ, diné bitsʼíís dóó biyiʼsizíinii shaa ndahidoohʼish danohsinígíí biniinaa.

10 Dóó díidí biniinaa tsʼídá ił hózhóonii nihiiʼ hadidoobį́į́ł dóó shiTaaʼ bił hazʼą́ądi dínóohbįįł; aooʼ, shí aTaaʼ tsʼídá ił hózhóonii tʼáá átʼé yee shikʼijoosdliʼígi átʼéego; nihídóʼ ił hózhǫ́ tʼáá átʼé bee nihikʼidahozhdoodliił; dóó tʼáá shígi ánóhtʼée dooleeł, dóó shí éí aTaaʼ átʼéhígi áníshtʼé; dóó aTaaʼ dóó shí éí tʼááłáʼí niidlį́.

11 Dóó Iiʼsizį́ Diyinii éí aTaaʼ dóó shí nihaa halneʼ, dóó shí shiniinaa, aTaaʼ éí Iiʼsizį́ Diyinii bílaʼ ashdlaʼii baʼáłchíní yichʼįʼ kóyiilaa.

12 Áádóó Jesus díí saad ałtso yee haadzíiʼgo, naakitsʼáadahí bílátah yee yidadeeshchid tʼáá hazhóʼó táltʼéego tʼáá kǫ́ǫ́ dooleeł danínę́ę tʼéiyá tʼáá dooda, dóó índa dah ńdiidzá.

13 Jó áádóó, yáʼąąsh ąą ádzaa, dóó díí táltʼéego yáʼąąsh gódei abiʼdootʼeezh, dóó tsʼídá doo baa haneʼii deinééłʼį́į́ʼ dóó deidiiztsʼą́ą́ʼ.

14 Dóó díí tʼáadoo baa dahołneʼé dabiʼdooʼniid; doo ndi díí dayiiłtsánígíí dóó deidiiztsʼą́ʼígíí baa hodoonihígíí doo yídáághahgóó ályaa;

15 Dóó daatsʼí bitsʼíís bee éí doodago bitsʼíís daatsʼí tʼáá géedgo; doo bił béédahózin da; háálá bitsʼíís tʼáá íiyisíí bitsʼádaʼdeezdíín daazlį́į́ʼ, áko bitsʼíís doo anoonééł bidadééłníígóó ádabiʼdiilyaa, áko Diyin God tʼáá bí dayooʼį́ daazlį́į́ʼ.

16 Ndi áádóó éí nahasdzáán bikááʼgóó nináádaʼdíniitą́ą́ʼ; ákótʼée ndi yáʼąąshdi tʼáadoo leʼé deidiiztsʼą́ʼą́ą dóó dayiiłtsánę́ę éí doo yaa dahalneʼ da, háálá tʼáadoo baa dahohłneʼé dabiʼdooʼniid.

17 Dóó kʼad, díí ałtso bitsʼíís bitsʼádaʼdeezdíín daazlį́į́ʼ yę́ędą́ą́ʼ, daatsʼí bitsʼíís łahgo ádáádzaa yee doo anoonééł dabidééłníi da daazlį́į́ʼ, shí éí doo shił bééhózin da;

18 Ndi kóníłtsogo tʼéiyá shił bééhózin, díí haneʼ náádaháasdzo yę́ę binahjįʼ—nahasdzáán bikááʼgóó diné ndeinitingo ndaakai dóó haashį́į́ néelą́ą́ʼ binaʼnitin, dayoosdląądígíí éí sodizin bá hooghan yihidiikai; tó yee deisį́įʼgo, dóó tʼáá ałtsogo tó bee dabiʼ doolzį́ʼígíí éí Iiʼsizį́ Diyinii bichʼįʼ kódaalyaa.

19 Dóó doo sodizin bá hooghan yee daʼatahígíí éí awáalyaa góneʼ yah ańdabiiłtłʼiʼ ńtʼę́ę́ʼ. Dóó awáalyaa doo dabiiłtsóo da ńtʼę́ę́ʼ, háálá éí tʼóó ałtsʼádahineezdeeʼ ńtʼę́ę́ʼ.

20 Dóó łeeyiʼ hahwiisgeedgóó yah ańdayiiltłʼiʼ; ndi Diyin God bizaad yee nahasdzáán ndayiiłdił, áko índa beʼadziilii binahjįʼ nahasdzáán biyiʼdę́ę́ʼ hadahakaah; dóó éí bąą nízaad góyaa hahwiisgeed doo łaʼ bótąʼí da silį́į́ʼ.

21 Dóó táadi éí tsídzabiʼdiistłʼííd dóó tʼáadoo ádáádzaaí da.

22 Dóó naakidi éí naaldlooshii daʼałchinii bighan góneʼ yah adabiʼdiistłʼííd; jó áádóó áłchíní dibé yázhí daʼałtʼoʼígíí nahalingo tʼóó yił ndaané, dóó tʼáadoo átídabiilaaí da.

23 Áádóó éí ákótʼáo Nephi dineʼé yitahgóó nikidadiikai, dóó tʼáá ałtso diné kéyah bikáaʼgi kéédahatʼį́įgo Christ binaʼnitin yíndaʼniłtin; dóó binahjįʼ diné Bóhólníihii yichʼįʼ dah dahidiikai, dóó Christ bisodizin bá hooghan yee dah yíkaiígíí yidiikai, dóó ákótʼáo kweʼé diné nooséłígíí bikʼidahojisdliʼ, Jesus yee haadzíʼę́ę bikʼehgo.

24 Dóó kʼad shí, Mormon, díí baa hashneʼígíí haa danízahjįʼ niʼkwéshłééh.

25 Jó, tsʼídá kʼad doo anoonééł bikʼiidooldoh da haʼnínę́ę bízhiʼ ádeeshłííł ńtʼę́ęʼgo, ndi Bóhólníihii dooda shidííniid; éí bąą doo bikááʼ áshłéeh da, háálá éí nihookááʼ dineʼé bitsʼąą ńdeestʼį́į́ʼ.

26 Jó ndi, shí éiyá deiłtsą́, dóó shíká iijééʼ.

27 Jó áádóó Gentile dineʼé yitaadaakai dooleeł, dóó doo Gentile dineʼé béédahósin da dooleeł.

28 Jew dineʼé ałdóʼ yitaadaakai dooleeł, dóó doo Jew dineʼé béédahósin da dooleeł.

29 Áádóó baa hodoolzhish, Bóhólníihii yaa ntsékeesígíí bikʼehgo Israel bidineʼé taooskai yę́ę ałtso ndeidínóotį́į́ł, dóó índa ałʼąą dóoneʼé bił nahazʼą́ągo, ałkʼéí danidlíinii bitahgóó, ałʼąą dabizaadii dóó diné danilíinii bitahgóó naʼnitin kódeidoolííł, dóó áádę́ę́ʼ diné daʼoosdląądígíí Jesus yaa deidiyooʼish, áko deinízinę́ę ałtso bá bidaʼdoolnííł, dóó ałdóʼ Diyin God bibee adziilii bee akʼeh hodidlíinii biiʼnaazláhígíí bikʼehgo.

30 Dóó éí táltʼéego éí Diyin God bá ndaalʼaʼígíí ndahalin, dóó Jesus bízhiʼ binahjįʼ aTaaʼ yichʼįʼ sodadilzingo éí tʼáá háíshį́į́ diné yichʼįʼ ííshjání ádadiʼdoolniił.

31 Éí bąą, naanish ayóó átʼéego dóó ayóó ánoolningo ádeidoolííł, tʼah doo ayóó áhootʼé bee yiłkaahgóó éí bijį́ diné tʼáá ałtso Christ bibee ánihwiitʼaah bikááʼdahʼasdáhí bidááhdóó deidoozįįł.

32 Aooʼ azhą́ Gentile dineʼé bitahgóó ndi naanish ayóó átʼéego ayóó ánoolningo ádeidoolííł, tʼah doo ayóó áhootʼé bee yiłkaahgóó.

33 Dóó tsʼídá tʼáá átʼé Christ ayóó átʼéego binaanish áyiilaaígíí Diyin God bizaad ndaajaahgo, áko éí, Christ bizaadígíí binahjįʼ, díí tʼáá aaníí ádahodooníiłgo nihił béédahózin dooleeł.

34 Dóó yíi yá haláaneʼ háíshį́į́ Jesus bizaad, dóó ałdóʼ náyiizláʼą́ą hatah yiníłʼaʼą́ą, doo dazdiiztsʼą́ʼígíí; háálá Jesus bizaad dóó hatah yiníłʼaʼígíí bizaad doo dazhniizį́į́ʼgóó éí Jesus doo dazhniizį́įʼ da dooleeł, dóó éí bąą níiníłką́ągo éí doo hodínóozįįł da.

35 Dóó éí dinéhígíí éí tʼáadoo hoʼdizhchį́į́góó éí há yáʼátʼéeh dooleeł ńtʼę́ę́ʼ. Háálá daʼ Diyin God bíníjiiłʼaʼgo tʼáá ákogi bibee ánihwiiʼaahii nahjįʼ kózhdoolííł danohsin, éí éí diné tʼóó yikʼinaaskai, áko binahjįʼísh yisdánáʼiildééh.

36 Jó dóó kʼad, áłtséédą́ą́ʼ Bóhólníihii náyiizláaʼgo baa haasdzíʼę́ę, aooʼ, díí táltʼéego ndi yáʼąąsh gódei daazlį́ʼę́ę, éí daatsʼí aninéejįʼ dóó doo aninéejįʼ ádabiʼdiilyaa jó éí doo shił bééhózin da.

37 Jó ndi, áłtséédą́ą́ʼ iʼíishłaa yę́ę áádóó wóshdę́ę́ʼ, Bóhólníihii díí binabídéełkid, dóó éí díí shił ííshjání áyiilaa díí bitsʼíís łahgo átʼéego ályaago tʼéiyá, doo anoonééł bikʼiidooldoh da;

38 Éí bąą, doo dadínóonéeł da biniiyé bitsʼíís łahgo ádaatʼéego ádaalyaa, áko doo tiʼdahooníih da dooleeł doodago doo yínííł danízin da dooleeł tʼáá hazhóʼó nihookááʼ dineʼé bibąąhági átʼéii yaa yínííł danízin dooleeł.

39 Kʼad díí bitsʼíís łahgo ádaalyaaígíí éí doo nihoníyáadi atsʼíís łahgo ádadooníłígíí bił aheełtʼée da; ndi bitsʼíís éí łahgo ádáádzaa, áko índa Satan beʼiiníziinii beʼadziil doo bidadééłníi da daazlį́į́ʼ, áko yínítáahgo doo yíighah da silį́į́ʼ; dóó tʼáá bitsʼíís dahólǫ́ǫgo doo bąąh chingóó ádabiʼdiilyaa, áko dadiyin daazlį́į́ʼ, dóó nihookááʼgóó ańdaatʼiʼii doo bidadééłníi da daazlį́į́ʼ.

40 Dóó díí tʼáá kódaatʼéego Christ bibee ánihwiitʼaah bíiníłką́ąjįʼ ahodoolzhish; dóó éí bijį́ bitsʼíís hózhǫ́ łahgo ádadoonííł, dóó aTaaʼ bił hazʼą́ą góneʼ yah anáhidookah áko doo chʼínááhidookah da, ndi hoolʼáágóó Diyin God yáʼąąshdi yił dahólǫ́ǫ dooleeł.