1. Alima akarora ng’a amang’ana ya Amuleki amokiriri Zeezromu, na akarora ng’a Amuleki omonyorire oborimo bwaye ase okomosaria, na komorora ogotengechigwa ase ebibe biaye, erio akaigora omonwa oye nakomotebia, na komenta amang’ana ya Amuleki na komotebia ebinto kobua ebi, gose koigora amariko kobua aria Amuleki amotebetie.

2. Amang’ana aria Alima akwanete ase Zeezromu akaigugwa nabanto baetanaine; ekiagera omoganda nigo orenge omonene aseigo akaba ogokwana ase obong’aini obo:

3. Aye Zeezromu kwarorire ng’a kwairirwe noborimo na obobe bwao, tori kong’aina abanto boka, korende nigo okong’ainereria nonya nase Nyasae; nigo amanyete ebirengererio biao na ebirengererio biao biabeire bigotomanyiagwa n’omoika oye.

4. Na rora omoroberio oo nigo orenge omobe mono buna oyo, bwebirecha kobang’aina abanto aba erinde nario barabe mamincha yaito, gotwanga nagotoseria.

5. Aya nigo are omoroberio bw’ogosaria kwao na omanyire chinguru ase ore. Bono goika omanye ng’a keria nakwanire ase ore nigo ingogeteba ase bonsi.

6. Rigereria nabatebirie inwe mwensi ng’a aya nigo arenge oboribo ase ogosaria kwaino, aria arwete einde anyare konyora abanto aba ng’a nario moramoigwere na kobasiba nechinyororo chiaye, kare na kare ase ogosareka, koreng’ana nechinguru chi’echera yaye.

7. Erio ekero Alima akwana amang’ana aya, Zeezromu agachaka gotengechigwa mono kegima, ekiagera abete okobugwa nechinguru chia Nyasae na agatantanigwa ng’a Alima na Amuleki nigo babuete ching’uru chiaye nobong’aini bwaye, naboigo agatantanigwa ase okomanya ebirengererio bienkoro yaye; ekiagera baetwe chinguru chikomanya amang’ana aya koreng’ana buna omoika bw’obobani orwete.

8. Na Zeezromu agachaka koboria nobwororo ase obongora, erinde anyare komanya igoro yobonda bwa Nyasae. Naende akamotebia Alima ng’a: Inee engencho ya amang’ana aya Amuleki akwanete igoro y’okobokigwa kwabakure bonsi abare ababe na abatari ababe na babe bakoretwa gotenena ase obosio bwa Nyasae kogambigwa koreng’ana namakoro abo?

9. Erio Alima agacha komotebia igoro ya amang’ana aya onsi na komotebia ng’a: Nigo arure ase abange komanya obobisi bwa Nyasae, nonya tabekirie inse ase ogochika ogokong’u ng’a banyare koyarwa koreng’ana nekerengo kiamang’ana noborendi n’obong’aini arwete ase bare.

10. Aseigo, oria orakong’ie omoyo oye, na okonyora okoremerwa kwa amang’ana; na oria orabe takong’etie enkoro yaye, ase are oyo nanyore ekerengo ekenene kia amang’ana, goika engaki akoegwa amange komanya obobisi bwa Nyasae na koyamanya ase obonge.

11. Na baria barakong’ie chinkoro chiabo, ase bare bairwe eng’eria enke ya amang’ana goika babe tibari nagento igoro ya amakumia aye; na bairiru obosomba na saitani, na koraua ase ogosareka. Eye nero engencho yechinyororo chia chahanamu.

12. Na amulek okwanire igoro ya amakweri na okobokigwa korwa ase omobere ogokwa gocha ase omobere otagokwa, na korentwa ase egora ya Nyasae, kogambigwa koreng’ana namakoro aino.

13. Na onye emioyo yaito ekoba emekong’u, na onye togokong’ia emiyo yaino mamincha yering’ana, nigo eganeirie ng’a kanga tari yanyoreka ase tore ekiagera obomenyo bwaito nigo borabe obobe mono na goika togambigwe.

14. Aseigo amang’ana aito natogambie, amakoro aito natogambie; na titokonyorekana ng’a ntori na kemoa; na ebirengererio biaito mbitogambie boigo; na ase oboakong’u obo ntokomocha komorengereria Nyasae oito; na nigo erabe bosa ekero torayachike amagena gotogwera gotobisa korwa ase obosio bwaye.

15. Korende aya takoba goika toche nagotenena ase are ase obonene bwaye na ase chinguru chiaye na koira na koorokia obosoku bwaito bwa kare na kare ng’a ekina kiaye nigo kere egiekeene; na nigo are omochenu, na nigo are omonyamabera ase abana ba mwanyabanto, na nigo abwate chinguru gokonya kera omonto oria bwegenete nakoreta amatunda y’okoangama.

16. Na bono, rigereria nabatebiria ng’a amakweri ngocha are, nonya namakweri akabere ayio are amakweri yekemoika; na engaki ngoika ere eria orakwe ase ebibe, arabe ogokwa amakweri yekemoika buna amakweri yomobere; nigo arakwe buna ebinto bikoira oboikeranu.

17. Na neike engaki ekero emechando yabo erabe buna enyancha yomorero, eyio omorero oye ogwoka kare na kare na gosibwa nechinyororo kare na kare koreng’ana nechuguru na egesibo gia Saitani, kobakora koigwera okobua kwaye.

18. Ekeene nabatebirie nigo barabe buna baria batamanyete ng’a ogotoreka ngwachete; ekiagera tibagokonyeka koreng’ana nekeene kia Nyasae, na tibagokwa na korora igaria atari na okoburukana.

19. Erio ekero Alima akora gokwana amang’ana aya, abanto bagachaka koba bagokumia;

20. Korende narengeo Antiona oyorenge omogambi ase bare agacha nagoteba ng’a: Inee eke ninki kwabeire gogokwana, ng’a omonto nabokigwe na gonchorwa korwa ase omobere oyo na kaegwa omobere otagokwa?

21. Inee engencho yamariko aya ninki, agoteba ng’a Nyasae akamobeka cherubimu ore nomoyio ogwoka ase ense ya sugusu yomogondo o Edeni ng’a abaibori baito abatang’ani tibabaisa gotwa omote oria bw’obogimia na komenya kare na kare? Na nigo tokorora ng’a gonchoreria nkoiyo nonya bare komenya kare na kare.

22. Erio Alima akamotebia ng’a: ebi nebinto indengereretie kobikwana, bono twarorire Adamu nigo agwete ase engencho ariete omote oria okanetwe, koreng’ana nering’ana ria Nyasae; naboigo nigo tomanyete ng’a ase okogwa oko kwaye, mwanyabanto bonsi bagasira na koba abanto bagwete.

23. Bono nabatebirie onye Adamu aria ritunda riomote oria bwobogima, kanga makweri tari na kanga ring’ana nigo rire bosa nagokora Nyasae koba omorimo ekiagera atebete ng’a: oyorarie omote oyo nakwe.

24. Na twarorire ng’a amakweri nigo achete ase abanto, Amakweri aria akwanetwe na Amuleki, ayio are amakweri y’omobere naigo omonto akaegwa ribaga koangama; aseigo abogima obo bokaba obokong’u; ensa koearegania komonyora Nyasae; ensa koearegania ase engaki yomoerio eyio yakwanirwe naintwe, eyio ere nyuma yokobokigwa kwa abarure.

25. Onye otaba omoroberio bwogotoreka, okwo kwabangetwe korwa ase omochakono bwense kanga kobokigwa tikoba ase abakure, korende bono omoroberio bwogotoreka okaba, oyio orarete okobokigwa kwa abakure, koria gwakwanetwe.

26. Onye ndiria abaibori baito bariete omote oria bwobogima kanga nigo twasira kare na kare na omoroberio bw’ogotoreka kanga toba, na ring’ana ria Nyasae kanga nigo riaba bosa ritari gokora meremo.

27. Rigereria tari bo, korende nigo yabegetwe ase abanto ng’a bakwe; na nyuma ya amakweri basoe ekina keria twakwanete igoro yaye, ekio kere ekiomoerio.

28. Na erio Nyasae agachora ebinto birache ase abanto komanya igoro yebinto achorerete abanto;

29. Erio agatoma amaraika aye gokwana nabwo, nakobakora abanto koorokia obonene bwaye.

30. Erio bagachaka korwa engaki eyio korangeria erieta riaye; aseigo Nyasae agakwana nabanto, nakoba nomoroberio bw’ogotoreka, oria arosetigwe korwa omochakano bwense; na aya nigo akoretwe komanywa koreng’ana nokwegena kwabo na okoangama kwabo nemeremo yabo.

31. Aseigo akabaa abanto amachiko ekero basaretie aria yeritang’ani buna ebinto biabosa, na koba buna Nyasae, bamanyete amaya na amabe, kwebeka ase ogokora gwokobua kwabo na gokora amaya gose amabe –

32. Erio Nyasae akabaa amachiko, ekero aorogetie omoroberio bwogotoreka, ng’a tibasoa, ase ogosaria koba amakweri akabere, are buna amakwere akare na kare buna ebinto bire ase obuya ng’a kanga omoroberio bwagotoreka toba nanguru, ekiagera emeremo yobochenu ebe tesariri koneng’ana nobonene bwa Nyasae.

33. Erio Nyasae akarargeria abanto ase erieta riomwana oyo, (Aya nigo arenge omoroberio bwogotoreka obegetwe) nagoteba ng’a: Onye mokoangama na timokong’ia emioya, erio nimbe namabera ase more goetera ase Omwana one omomoima;

34. Aseigo onde bwonsi, oraangame na takong’ia omoyo oye, nabe nokoboria goetera ase Omwana one omomoima ase ebibe biaye; na aba goika basoe ase ogotimoka kwane.

35. Na onde bwensi orakong’ie omoyo oye nagokora ebibe ase obororo bwane tagosoa ase oborwoti bwane.

36. Bono abaminto, rora nabatebirie ng’a onye mogokong’ia emiyo yaino timogosoa ase ogotimoka kw’Omonene; Aseigo ebibe biaino biamogechirie na ekagera agatoma endamwamu yaye ase more buna ritang’ani koreng’ana nering’ana riaye ase okogechia kwomoerio buna omochakano gosoa ase emechando etakoera ase emioyo yaino; koreng’ana nering’ana riaye ase amakweri yomoerio naboigo buna ayeriteng’ani.

37. Abaminto, rora ntomanyete ebinto ebi, na nigo bire ebichenu, tiga toangame na totige gokong’ia emiyo yaito, erinde nario totamobeke agechigwe nagotoma endamwamu yaye ase tore tiga tosoe ase ogotimoka kwa’Nyasae, okwo kwarosigwe koreng’ana nering’ana riaye.