1 Iwe pwan, ami pwi, ua mochen emmweni ami ekiek ngeni ewe fansoun nupwen ewe Samon Kot a awora ekkei annuk ngeni noun semirit; iwe ua mochen pwe oupwe chechemeni pwe ewe Samon Kot a seikata pris, anongonong won an we tetten mi fel, minne a anongonong won ewe tetten an Noun we, pwe epwe aiti ekkei mettoch ngeni ekkewe aramas.

2 Iwe ekkena pris ra seikita anongonong won ewe tetten an Noun we, non ew napanap pwe ren ewe popun ekkewe aramas repwe tongeni sinei non met sokkun napanap ar repwe esuku Noun we ar repwe angei ngaseno.

3 Iwe iei ewe napanap usun minne ra seikita—ra kokko me monneta seni nepoputan ewe fonufan anongonong won ewe mirit an Kot, pokiten ar fokkun nuku me angang mi och; nepoputan ra mumuta ar repwe fini öch are ngaw; iei minne pokiten ra finata och, me aea fokkun nuku mi pochokun, ra kokko ren ew wiis mi fel, ewer, ren ena wiis mi fel minne a monneta ren, me anongonong won, ew ngaseno a fen monneta fan iten ekkena sokkun.

4 Iwe iei ra fen kokko ngeni ei wiis mi fel pokiten ar nuku, nupwen ekkoch rese etiwa ewe Ngunun Kot pokiten pochokunen netiper me chunnunon ar ekiek, nge, ika esap ren ei iwe epwe fen ita wor ar tufich usun pwir kewe.

5 Are amuchunon, nepoputan ra chok nonno fengen ngeni pwir kewe; iei ei wiis mi fel a fen monneta seni nepoputan ewe fonufan fan iten ekkei sokkun resap apochokunano netiper, iwe a nom non kinikinin ewe achasefanin Noun we Anamon, ewe a monneta—

6 Iwe iei ra kokko me ren ei wiis mi fel, me seikita ngeni ewe pristut mi nap seni ewe tetten mi fel an Kot, ar repwe afanafana an kewe annuk ngeni ekkewe noun aramas, pwe repwe pwan tongeni tonong non an we nenien asoso—

7 Ei pristut mi nap a fis anongonong won ewe tetten an Noun we, minne tetten a feito seni nepoputan ewe fonufan; are non ekkoch kapas, ese wor nepoputan ran are nesoponon ier, a monneta seni feinfeino ngeni unusen feinfeino, anongonong won an mirit usun mettoch meinisin—

8 Iei ra seikita anongonong won ei napanap—ra kokko ren ew wiis mi fel, me seikita ren ew angangepin mi fel, me wata wor ewe pristut mi nap seni ewe tetten mi fel, ewe wiis, me angang mi pin, me pristut mi nap, ese wor nepoputan are nesoponon—

9 Iei ra winiti pris mi nap feinfeino chok, anongonong won ewe tetten an ewe Nau, Noun ewe Sam Anamon, ewe ese wor nepoputan ran are nesoponon ier, ewe mi uren chen, pungoch, me ennet. Iwe a iei usun. Amen.

10 Iei, usun ua apasa usun ewe tetten mi fel, are ei pristut mi nap, mi chommong ekkewe ra seikita me winiti pris mi nap noun Kot; iwe a fis pokiten ar fokkun nuku me aier, me ar wenechar me mwen Kot, ra finata pwe repwe aier me fori wenechar nap seni ar repwe mano;

11 Iei minne ra kokko anongonong won ei tetten mi fel, me ra enimenimochuno, iwe ufer kewe ra nim me pwecheno me non chan ewe Nam.

12 Iei ir, mwirin ar ra enimenimochuno me ren ewe Ngun mi Fel, pokiten ufer kewe ra pwecheno, ra nimenimoch me rese nimengaw me mwen Kot, rese tongeni nengeni tipis tiwenon chok ika ren koput; iwe ir mi chommong, fokkun ennetin chommong, ekkewe ra nimenimochuno me tonong non ewe nenien asoso an ewe Samon ar Kot.

13 Iwe iei, ami pwi, ua mochen pwe oupwe etipetekisona inisimi me mwen Kot, me uwani angang mi fich ngeni aier, pwe oupwe pwan tonong non an we nenien asoso.

14 Ewer, etipetekisona inisimi pwan mwo usun ekkewe aramas non ranin Melchizedek kewe, ewe pwan emon pris mi nap anongonong won ei chok pwan tetten minne ua fen kapas usun, ewe a pwan wata won ewe pristut mi nap feinfeino.

15 Iwe iei i ewe pwan chok Melchizedek ewe Abraham a möni asoren ew ne engon ngeni; ewer, pwan mwo semach we Abraham a möni asoren ew ne engonun kinikinin mettoch meinisin a pisekini.

16 Iei ekkei angangepin ra kawor anongonong won ei napanap, pwe ren ewe popun ekkewe aramas repwe tongeni esuku ewe Noun Kot, a ina esisinen ei tetten, are a ina an tetten, iwe ei pwe repwe tongeni esuku i fan iten omusomusen ar tipis, pwe repwe tongeni tonong non ewe nenien asoso an ewe Samon.

17 Iei ei Melchizedek a emon kingen ewe fonuen Salem; iwe noun kewe aramas ra pochokununo non angangangaw me angang mi anieput; ewer, ra monucheno meinisin; ra uren sokopaten fofforungaw meinisin;

18 Nge Melchizedek a fen aea nuku mi pochokun, me angei ewe wiisen pristut mi nap anongonong won ewe tetten mi fel an Kot, a afanafana aier ngeni noun kewe aramas. Iwe nengeni, ra aier; iwe Melchizedek a forata kinamwe non ewe fonu non ranin kewe; iei minne a iteni ewe princen kinamwe, pun i ewe kingen Salem; iwe a nemenem fan seman we.

19 Iei, mi wor chommong me mwen i, mi pwan chommong mwirin, nge ese wor a nap seni; iei minne, usun i a fen nap ar kapas usun.

20 Iei usap kon kapas usun ewe mettoch; met ua fen apasa epwe naf. Nengeni, ekkewe pukefel ra nom mwemi; ika oupwe angawano ir epwe ngeni pwisin ami kiteter.

21 Iwe iei non ewe fansoun pwe nupwen Alma a apasa ekkei kapas ngeni ir, a eitieu poun ngeni ir me affata ren ew mongungu mi neuwomong, a apasa: Iei ewe fansoun sipwe aier, pun ewe ranin amanau a arapeto;

22 Ewer, iwe ewe mongungun ewe Samon, me ren awen chon nang, a afanafana ngeni muu meinisin; ewer, a afanafana, pwe epwe tongeni wor ar porousen pwapwa wachemuk; ewer, iwe a affata ekkei porousen pwapwa me nein noun kewe aramas meinisin, ewer, pwan mwo ngeni ir ekkewe ra toropas fetan won unungen ewe fonufan; ina minne ra fen feito ngenikem.

23 Iwe ra fen pwano ngenikem non fatafatochun kapas, pwe am aupwe tongeni weweiti, pwe am ausap tongeni muan; iwe ei pokiten am oua chon tawan non ew fonu mi sokkono; iei minne, am aua fokkun chen, pun ekkei porousen pwapwa ra affat ngenikem non meinisin kinikinin am kewe atake.

24 Pun nengeni, chon nang ra afanafana ngeni chommong atun ei fansoun non fonuem; iwe ei ren ewe popun amonnetan netipen ekkewe noun aramas ar repwe angei an kapas atun ewe fansoun an wareto non an ning.

25 Iwe iei am aua chok witiwit ne rongorong ekkewe porous mi apwapwa ar repwe afanafan ngenikem me ren awen ekkewe chon nang, usun an wareto; pun ewe fansoun a feito, am ause sinei ifa mwitirin. Mochenin Kot pwe ita epwe non rani; nge epwe ekiseno ika non och fansoun, non upwe pwapwa.

26 Iwe epwe pwano ngeni mwan mi ennet me fel, me ren awen chon nang, atun ewe fansoun an wareto, pwe ekkewe kapas an semem kewe repwe tongeni pwonueta, anongonong won met minne ra fen apasa usun i, minne a anongonong won ewe ngunun osini minne a nom rer.

27 Iwe iei, ami pwi, ua anean seni anonnonun kinikinin netipei, ewer, fiti ennetin aurek pwan mwo tori metek, pwe oupwe ausening ngeni ai kapas, me aturano ami kewe tipis, me ousap ammangano ewe ranin ami aier;

28 Nge ita oupwe etipetekisona inisimi me mwen ewe Samon, me kokkori itan we mi fel, me soposopono ne mammasa me iotek, pwe ousap sossot nap seni minne oua tongeni engino ngeni, iwe amo oupwe emmwen me ren ewe Ngun mi Fel, winiti mi tipetekison, mosonoson, fangoch, nikitu, uren tong me engino;

29 Me wor nuku non ewe Samon; me wor ew apinukunuk pwe oupwe angei manau esemuch; me wor ewe tongen Kot fansoun meinisin non netipemi, pwe oupwe tongeni seikita non ewe ranin soponon me tonong non an we nenien asoso.

30 Iwe amo ewe Samon epwe mut ngenikemi aier, pwe ousap tongeni watiw an song womi, pwe ousap tongeni fofotiw me ren ekkewe senimechan hell, pwe ousap tongeni riaffouni ewe aruwen mano.

31 Iwe Alma a apasa pwan chommong kapas ngeni ekkewe aramas, minne rese makketiw non ei puk.