1 Iei nupwen Ammon me pwin kewe ra keimufesen non ekkewe kianin ewe fonuen ekkewe chon Leiman, nengeni Aaron a sai ngeni ewe fonu minne a iteni me ren ekkewe chon Leiman, Jerusalem, ra eita ngeni mwirin ewe fonuen ikewe semer kewe ra uputiw ie; iwe a towaweno ngeni ekkewe kianin Mormon.

2 Iei ekkewe chon Leiman me ekkewe chon Amalekai me ekkewe aramasen Amulon ra aueta ew teninimw mi napanap, minne a iteni Jerusalem.

3 Iei ekkewe chon Leiman pwisin won inisir a naf ar pochokuneno, nge ekkewe chon Amalekai me ekkewe chon Amulon ir mi kon chok pochokun senir; iei minne ra fori ekkewe chon Leiman pwe repwe apochokunano netiper, pwe repwe pochokununo non fofforungaw me ar angang mi anieput.

4 Iwe non ewe fansoun pwe Aaron a feito ngeni ewe teninimwen Jerusalem, iwe akkom a poputa ne afanafan ngeni ekkewe chon Amalekai. Iwe a poputa ne afanafan ngeni ir non ar kewe sinakok, pun ra kauuta sinakok anongonong won ewe tetten an Nior; pun chommong me nein ekkewe chon Amalekai me ekkewe chon Amulon ra anongonong won ewe tetten an Nior.

5 Iei minne, nupwen Aaron a tonong non ew me nein ar kewe sinakok pwe epwe afanafan ngeni ekkewe aramas, iwe nupwen an a kapas ngeni ir, nengeni a uta emon chon Amalekai me poputa ne anini ngeni i, a apasa: Met ena ka fen pwarata? Ka fen kuna emon chon nang? Pwata chon nang rese pwato ngenikem? Nengeni met ekkei aramas rese öch usun noum kewe aramas?

6 Ka pwan apasa, tiwenon chok ika am pwe aier am pwe mano non ngun. Ifa usun ka sinei ekiekin me mochenin netipem? Ifa usun ka sinei pwe mi wor am popun am pwe aier? Ifa usun ka sinei pwe ause aramas tupwon? Nengeni, am aua fen kauuta imwenipin, iwe am aua achufengenikem pwe am pwe fen ngeni Kot. Am aua nuku pwe Kot epwe angasa aramas meinisin.

7 Iei Aaron a apasa ngeni i: Ka nuku pwe ewe Noun Kot epwe wareto pwe epwe angasano aramas seni ar tipis?

8 Iwe ewe mwan a apasa ngeni i: Am ause nuku pwe ka sinei och sokkun mettoch. Am ause nuku non ekkei eereni mi puch. Am ause nuku pwe ka sinei usun mettoch repwe feito, am ause pwan nuku pwe semom kewe me pwan semem kewe ra sinei usun ekkewe mettoch minne ra apasa, are usun met minne epwe feito.

9 Iei Aaron a poputa ne suki ekkewe pukefel ngeni ir usun ewe wareton Kraist, me pwan usun ewe manausefanin ekkewe mi mano, me ese pwan tongeni wor ngaseno fan iten aramas tiwenon chok ika epwe seni ewe mano me riaffou an Kraist, me ewe achasefanin chan we.

10 Iwe non ewe fansoun nupwen a poputa ne awewei ekkei mettoch ngeni ir ra song ren, me poputa ne turunufasei; iwe rese mochen rongorong ekkewe kapas minne a apasa.

11 Iei minne, nupwen a kuna pwe rese mochen rongorong an kewe kapas, a tou seni ar we sinakok, me feito ngeni ew sopw minne a iteni Anai-Antai, iwe ikewe a kuna Miulakai an afanafana ewe kapas ngeni ir; me pwan Amma me pwin kewe. Iwe ra anini ngeni chommong usun ewe kapas.

12 Iwe non ewe fansoun pwe ra kuna pwe ekkewe aramas repwe apochokunano netiper, iei minne ra tou me feito ngeni ewe fonuen Mitonai. Iwe ra afanafana ewe kapas ngeni chommong, iwe ekkoch ra nuku non ekkewe kapas minne ra afanafana.

13 Nge inamo, Aaron me ew chochon mwichen pwin kewe ra ono me katurunong non kanapus, iwe nussur kewe ra suno seni ewe fonuen Mitonai ngeni ekkewe kinikinin neni unukur.

14 Iwe ekkewe ra katurunong non kanapus ra riaffouni chommong mettoch, iwe ra ngaseno me ren poun Leimonai me Ammon, iwe ra amwongonir me aufoufer.

15 Iwe ra feino sefan pwe repwe afanafana ewe kapas, iwe iei ra ngaseno ren ewe aewin fansoun seni kanapus; iwe iei ra fen riaffou.

16 Iwe ra feino ngeni ian chok neni ra emmwenino ie me ren Ngunun ewe Samon, ra afanafana ewe kapasen Kot non ew me ew sinakok an ekkewe chon Amalekai, are non ew me ew mwichen ekkewe chon Leiman ian ra tongeni katonong ie.

17 Iwe non ewe fansoun pwe ewe Samon a poputa ne efeiochur, ina minne ra uwei chommong ngeni ewe mirit usun ewe ennet; ewer, ra pesei chommong repwe sinei usun ar tipis, me usun eerenien semer kewe, minne rese pung.

18 Iwe non ewe fansoun pwe Ammon me Leimonai ra niwin seni ewe fonuen Mitonai ngeni ewe fonuen Ishmael, minne ina ewe fonuen ar kewe neuo.

19 Iwe king Leimonai ese mutata pwe Ammon epwe angang ngeni i, are epwe noun chon angang.

20 Nge a annuku pwe epwe wor sinakok epwe kauuta non ewe fonuen Ishmael; iwe a annuku pwe noun kewe aramas, are ekkewe aramasen minne ra nom fan an nemenem, repwe achufengenir.

21 Iwe a pwapwa wor, iwe a aiti ir chommong mettoch. Iwe a pwan affata ngeni ir pwe ir ew aramas mi nom fan an nemenem, me pwe ir ew aramas ngaseno, pwe ir mi ngaseno seni eriaffoun ewe king, seman we; pun seman we a fen mut ngeni i pwe epwe tongeni nemenem won ekkewe aramas minne ra nom non ewe fonuen Ishmael, me non unusen ewe fonu unukun.

22 Iwe a pwan affata ngeni ir pwe mi tongeni wor ar pung ne fen ngeni ewe Samon ar Kot anongonong won ar mochen, non menni chok neni ra nom non, ika epwe non ewe fonu minne a nom fan nemenien king Leimonai.

23 Iwe Ammon a afanafan ngeni ekkewe aramasen king Leimonai; iwe non ewe fansoun pwe a aiti ir mettoch meinisin usun ekkewe mettoch ren pekin wenechar. Iwe a peser iteiten ran, fiti unusen achocho; iwe ra aneasochis ngeni an kapas, iwe ra nikitu ne aneasochisi ekkewe annukun Kot.