1 Iwe non ewe fansoun pwe non nepoputan ewe rue me tiuwen ierin ekkewe sou apung, pwe Ammoron a titino ngeni Moronai pwe a mochen pwe i epwe ekkesiwin chon kanapus.

2 Iwe non ewe fansoun pwe Moronai a mefi pwe epwe fokkun pwapwa ren ei tingor, pun i a mochen ekkewe pisekin mwongo minne ra kawor ngeni aninisin ekkewe chon kanapusen ekkewe chon Leiman repwe ngeni aninisin pwisin noun kewe aramas; iwe i a pwan mochen noun kewe pwisin aramas fan iten apochokunen noun kewe sounfiu.

3 Iei ekkewe chon Leiman ra angei chommong fefin me semirit, iwe ese wor emon fefin are emon semirit me nein ekkewe chon kanapus noun Moronai, are ekkewe chon kanapus minne Moronai a fen angei ir; iei minne Moronai a apungano won ew kokkot pwe epwe angei meinisin chon kanapusen ekkewe chon Nifai seni ekkewe chon Leiman usun mi tufich.

4 Iei minne a makkei echo toropwe, me tinano me ren emon chon angangen Ammoron, ewe pwan chok a uweiato echo toropwe ngeni Moronai. Iei ikkei ekkewe kapas minne i a makkei ngeni Ammoron, a apasa:

5 Nengeni, Ammoron, ua ekis mak ngonuk usun ei maun minne ka fen efisi ngeni nei kewe aramas, are fen minne pwium we a fen efisi ngeni ir, me minne ka fen chok tiniken pwe kopwe sopweno mwirin an we mano.

6 Nengeni, upwe ekis uronuk usun ewe pungochun Kot, me ewe ketinasen an ningeringer mi napanap, minne mi ittiw wom tiwenon chok ika kopwe aier me amerasefani noum kewe sounfiu ngeni pwisin fonuom we, are ewe fonu mi nom fan nemeniom, minne a nom non ewe fonuen Nifai.

7 Ewer, upwe uronuk ekkei mettoch ika kemi tongeni ausening ngeni ir; ewer, upwe uronuk usun ewe anoninenin hell minne a awitiwit an epwe etiwa sokkun chon nii manau usun en me pwium we oua fen fori, tiwenon chok ika kopwe aier me fangeta om kewe popun mi niiningaw, me niwin sefan fiti noum kewe sounfiu ngeni pwisin fonuom kewe.

8 Nge usun akkom kese etiwa ekkei mettoch, me ka fen fiu ngeni ekkewe aramasen ewe Samon, pwan mwo ngang upwe ekieki pwe kopwe pwan fori sefan.

9 Iwe iei nengeni, am aua monneta epwe am aupwe churikemi; ewer, iwe tiwenon chok ika kopwe fangeta om kewe popun, nengeni, oupwe watiw ewe ningeringerin ewe Kot minne ouse etiwa womi, pwan mwo ngeni ami unusen kiteter.

10 Nge, usun ewe Samon mi manau, nöum kewe sounfiu repwe feita womi tiwenon chok ika oupwe marsefan, iwe oupwe mwitir chu ren mano, pun am aupwe amwochu am kewe teninimw me fonuem kewe; ewer, iwe am aupwe tumunu am we namanam me ewe angangen Kot.

11 Nge nengeni, ua ekieki pwe ua kapas ngonuk usun ekkei mettoch non namotmwan; are ua ekieki pwe en emon noun hell; iei minne upwe esipano nei toropwe ren ai uronuk pwe usap ekkesiwin chon kanapus, tiwenon chok won ekkoch apungupung pwe kopwe fangeta emon mwan me punuwan me noun kewe semirit, ren emon chon kanapus, ika epwe iei usun kopwe fori, upwe ekkesiwin.

12 Iwe nengeni, ika kosap fori ei, upwe feino ungonuk fiti nei kewe sounfiu; ewer, upwe pwan mwo episeki ren pisekin maun nei kewe fefin me semirit, iwe upwe feino ungonuk, iwe upwe tapweok pwan mwo tori non fonuom we, ina ewe fonuen am we aewin neuo; ewer, iwe epwe cha fan iten cha, ewer, manau fan iten manau; iwe upwe ngonuk maun pwan mwo tori om ka ninnino seni unungen ewe fonufan.

13 Nengeni, ua nom non ai song, me pwan nei kewe aramas; oua fen achocho ami oupwe nii manaueikem, iwe am aua fen chok achocho ne eppeti inisim. Nge nengeni, ika oupwe sossot pwe oupwe wesen nikemino am aupwe achocho ne nii kemino; ewer, iwe am aupwe achocho ne angei fonuem we, ewe fonuen am we aewin neuo.

14 Iei ua esipano nei toropwe. Ngang Moronai; ngang emon sou emmwenin ekkewe aramasen ekkewe chon Nifai.

15 Iei non ewe fansoun pwe Ammoron, nupwen a angei ei toropwe, a song; iwe a makkei pwan echo toropwe ngeni Moronai, iwe ikkei ekkewe kapas minne a makkei, a apasa:

16 Ngang Ammoron, ewe kingen ekkewe chon Leiman; ngang ewe pwin Amalekaia ewe oua fen nii manauan. Nengeni, upwe angei niwinin chan womi, ewer, iwe upwe feita womi fiti nei kewe sounfiu pun use nuokusiti om kewe kapasen efeiengaw.

17 Pun nengeni, sememi kewe ra amuanni pwir kewe, ina minne ra sona seni ir ar kewe tufich ngeni ewe government nupwen mi pung pwe epwe no ngeni ir.

18 Iwe iei nengeni, ika oupwe watiw noumi kewe pisekin maun, me wanong inisimi pwe repwe nemenem me ren ekkewe ir ewe government mi pung pwe epwe no ngeni ir, iwe upwe annuku pwe nei kewe aramas repwe watiw nour kewe pisekin maun me resap chiwen maun sefan.

19 Nengeni, ka fen ngasepwichinau chommong kapasen efeiengaw ngeniei me nei kewe aramas; nge nengeni, am ause nuokusiti om kewe kapasen efeiengaw.

20 Nge inamo, upwe mutata ne ekkesiwin chon kanapus anongonong won om we tingor, fiti pwapwa, pwe upwe tongeni tumunu anei kewe mwongo fan iten nei kewe mwanin maun; iwe am aupwe efisi ew maun minne esap much, ika epwe ren nemenemen ekkewe chon Nifai ngeni am pochokun are ngeni ar resap chiwen fis ese much.

21 Iwe usun ena Kot ewe ka apasa pwe am ause etiwa, nengeni, am ause sinei usun emon sokkun chon nang; kose pwan sinei; nge ika pwe mi wor emon sokkun chon nang, am ause sinei nge eni a fen forikem usun chok a forikemi.

22 Iwe ika pwe mi wor emon tefin me ew hell, nengeni esap fen tinukeno ikewe pwe kopwe nonnom ren pwi we ewe oua fen nii manauan, ewe oua fen ara pwe a fen no ngeni ew sokkun neni? Nge nengeni ekkei mettoch rese auchea.

23 Ngang Ammoron, me emon mwirimwirin Soram, ewe sememi kewe ra echimwa me uweiau seni Jerusalem.

24 Iwe nengeni iei, ngang emon chon Leiman mi pwaracho; nengeni, ei maun a fen fis pwe epwe angei niwinin ar kewe muan, me pwe repwe tumunu me angei ar kewe pung ngeni ewe government; iwe ua esipano nei toropwe ngeni Moronai.