1 Iwe non ewe fansoun pwe ra kouno me marsefan ekis seni ir. Iwe Moronai a apasa ngeni Seraemna: Nengeni, Seraemna, pwe am ause mochen pwe am aupwe mwan chon assuku cha. Oua sinei pwe ami oua nom non pöum, nge inamo am ause mochen nikemino.

2 Nengeni, am ause tou pwe am aupwe maun ngenikemi pwe am aupwe tongeni assuku cha fan iten nemenem; am ause pwan mochen uwei emon neimi ngeni ewe choun fotek. Nge iei ewe fokkun popun ren minne oua feito ungenikem; ewer, me oua song rem pokiten am we namanam.

3 Nge iei, oua kuna pwe ewe Samon a nom rem; me oua kuna pwe a fangekeminong non pöum. Iwe iei ua mochen pwe oupwe weweiti pwe ei a fis ngenikem pokiten am namanam me am nuku non Kraist. Iwe iei oua kuna pwe ouse tongeni atano am we nuku.

4 Iei oua kuna pwe iei ewe ennetin nuku an Kot; ewer, oua kuna pwe Kot epwe anisi, me isoni, me tumunukem, anongonong won am nikitu ngeni i, me ngeni am nuku, me am namanam; iwe ewe Samon esap tongeni mutata pwe am aupwe ninnino tiwenon chok ika am aupwe turunong non atai annuk me amam am nuku.

5 Iwe iei, Seraemna, ua annuku ngenikemi, non iten ewe Kot mi unusen manaman, ewe a fen apochokunano pöum ina minne am aua fen angei pochokun womi, me ren am nuku, ren am namanam, me ren am angangen fen, me ren am mwichefen, me ren ewe aninis mi monomon minne am aua mefi pwe am aupwe ngeni punuwem kewe me noum kewe, me ren ena ngaseno minne a fotikem ngeni fonuem kewe me muum kewe; ewer, me pwan ren aneasochisin ewe kapasen Kot mi monomon, ewe minne am aua niwinimangei am unusen pwapwa ngeni; me ren mettoch meinisin mi unusen achengicheng ngenikem—

6 Ewer, iwe esap ikkei meinisin; ua annuku ngenikemi me ren ekkewe mochen meinisin minne a wor remi fan iten manau, pwe oupwe fangeta noumi kewe pisekin maun ngenikem, iwe am ausap sotuni ne assuku chami, nge am aupwe mut ngenikemi manauemi, ika oupwe feino me ousap chiwen feito sefan ne maun ngenikem.

7 Iwe iei, ika ousap fori ei, nengeni, oua nom non pöum, iwe upwe annuku nei kewe mwan pwe repwe turuta womi, me fori ekkewe kinasen mano non inisimi, pwe ousap chiwen fis; iwe mwirin sipwe kuna ion a wor an pochokun won ekkei aramas; ewer, sipwe kuna ion epwe emmweninong non fotek.

8 Iwe iei non ewe fansoun pwe nupwen Seraemna a rongorong ekkei kapas a feito me fangeta noun we ketinas me noun ewe tok, me noun we nikappich non poun Moronai, me a apasa ngeni i: Nengeni, ikkei nöum kewe pisekin maun, am aupwe fangereta ngonuk, nge am ausap mutata inisim pwe am aupwe akkaponu ew pwon ngonuk, minne am mi sinei pwe am aupwe atai, me pwan nöum kewe; nge angei nöum kewe pisekin maun, me mut ngenikem am aupwe feino ngeni non ewe fonu pon; ika esap ina iwe am aupwe amwochu nöum kewe ketinas, iwe am aupwe mano are win.

9 Nengeni, am ausap seni ami we namanam; am ause nuku pwe Kot a fen wakeminong non poumi; nge am aua nuku pwe ami we nikatuputup ewe a fen tumunukemi seni nöum kewe ketinas. Nengeni, noumi kewe chechen neup me ami kewe eppet ekkewe ra fen tumunukemi.

10 Iwe iei nupwen Seraemna a osopwano ekkei kapas, Moronai a aniwini ewe ketinas me ekkewe pisekin maun, minne a fen angei, ngeni Seraemna, a apasa: Nengeni, sipwe osopwano ewe maun.

11 Iei use tongeni angei sefani ekkewe kapas minne ua fen apasa, iei minne usun ewe Samon mi manau, ousap feino tiwenon chok ika oupwe feino fiti ew pwon oupwe akkaponu pwe ousap niwin sefan ngenikemi ne maun. Iei pokiten oua nom non pöum am aupwe assuku chami won ewe puun, are oupwe fang ngeni ekkewe apungupung minne ua fen pesei.

12 Iwe iei nupwen Moronai a apasa ekkei kapas, Seraemna a amwochu noun we ketinas, iwe a song ren Moronai, iwe a mwitir fetano pwe epwe tongeni nieno Moronai; nge nupwen an eitieta noun we ketinas, nengeni, emon me nein noun Moronai kewe sounfiu a wichi pwan mwo ngeni ewe puun, iwe a kup me ren kamwochun we; iwe a pwan wichi Seraemna ren an pokueno unuchen mokuran iwe a turutiw ngeni ewe puun. Iwe Seraemna a marsefan me mwer ngeni nenukanapan noun kewe sounfiu.

13 Iwe non ewe fansoun pwe ewe sounfiu ewe a uta unukur, ewe a pokueno unuchen mokuran Seraemna, a angeiata ewe unuchen mokur seni ewe puun me ren ekkewe metan mokur, iwe a annomu won nesopuchikin noun ewe ketinas, iwe a eitieno ngeni ir, a apasa ngeni ir ren ew neuwomongun mongungu:

14 Usun chok ei unuchen mokur a fen turutiw ngeni ewe puun, minne unuchen mokuren noumi we mi nap, oupwe pwan turutiw ngeni ewe puun tiwenon chok ika oupwe fangeta noumi kewe pisekin maun me feino fiti ew pwonen kinamwe.

15 Iei ir mi chommong, nupwen ra rongorong ekkei kapas me kuna ewe unuchen mokur minne a nom won ewe ketinas, ra mairu ren nuokus; iwe chommong ra feito me aturatiw nour kewe pisekin maun ren pechen Moronai, me tonong non ew pwonen kinamwe. Iwe meinisin ekkewe ra tonong non ew pwon mi pin ra mumuta ne feino non ewe fonu pon.

16 Iei non ewe fansoun pwe Seraemna a fokkun song, iwe a amwasangata nussun noun kewe sounfiu ar repwe song, pwe repwe fiu ren watten pochokun ngeni ekkewe chon Nifai.

17 Iwe iei Moronai a song, pokiten nukumachen ekkewe chon Leiman; iei minne a annuku noun kewe aramas pwe repwe turuta wor me nireno. Iwe non ewe fansoun pwe ra poputa ne nireno; ewer, iwe ekkewe chon Leiman ra fiu ren nour kewe ketinas me ar pochokun.

18 Nge nengeni, inisir kewe mi seneno me mokurer kewe mi seneno ra pwano ngeni kenin ekkewe ketinas noun ekkewe chon Nifai; ewer, nengeni ra pwer me feiengaw, ewer, me ra mwitir fokkun turuno me mwen ekkewe ketinas noun ekkewe chon Nifai; iwe ra poputa ne ninnitiw, pwan mwo usun ewe sounfiun Moronai a fen osini.

19 Iei Seraemna, nupwen a kuna pwe ita repwene ninnino, a ennetin sio ngeni Moronai, a pwon pwe epwe pwon me pwan noun kewe aramas ngeni ir, ika repwe mut ngeni ekkewe nussun manauer, pwe resap chiwen feito pwe repwe maun ngeni ir.

20 Iwe non ewe fansoun pwe Moronai a annuku pwe ewe angangen mano epwe kouno sefan me nein ekkewe aramas. Iwe a angei ekkewe pisekin maun seni ekkewe chon Leiman; iwe mwirin ar ra tonong non ew pwon mi pin ngeni i usun kinamwe ra mutata pwe repwe feino ngeni ewe fonu pon.

21 Iei ukukun ar kewe mi mano rese anneani pokiten watten chochon; ewer, ewe ukukun ar kewe mi mano a fokkun watte, ir me ru won kinikinin ekkewe chon Nifai me won kinikinin ekkewe chon Leiman.

22 Iwe non ewe fansoun pwe ra aturanong ar kewe mi mano non ekkewe konikin Sidon, iwe ra fen no me ra peiaseno non anonnonun ewe sat.

23 Iwe ekkewe sounfiun ekkewe chon Nifai, are sounfiun Moronai, ra niwin me feito ngeni imwer kewe me fonuer kewe.

24 Iwe iei a muchuno ewe engon me wanuen ierin muun ekkewe sou apung won ekkewe aramasen Nifai. Iwe iei a muchuno uruon Alma we, minne a makketiw won ekkewe seleichen Nifai.