1 Iei non ewe fansoun pwe nupwen ekkena chon Leiman ekkewe ra fen no maun ngeni ekkewe chon Nifai ra pwa, mwirin ar kewe chommong weires ne nireno, pwe a namotmwan ar kutta ninninor, ra niwin sefan ngeni ewe fonuen Nifai.

2 Iwe non ewe fansoun pwe ekkewe chon Amalekai, pokiten ar kewe mi mano, ra fokkun song. Iwe nupwen ra kuna pwe rese tongeni angei niwinin an ekkoch foffor ngeni ir seni ekkewe chon Nifai, ra poputa ne amwasangata ekkewe aramas non song ngeni pwir kewe, ekkewe aramasen Antai-Nifai-Liai; iei minne ra poputa sefan ne nireno.

3 Iei ekkei aramas rese etiwa sefan ar repwe angei nour kewe pisekin maun, iwe ra mutata inisir pwe repwe ninnino anongonong won mochenin ekkewe chon koum ngeni ir.

4 Iei nupwen Ammon me pwin kewe ra kuna ei angangen kiteter me nein ekkewe ir mi fokkun unusen achengicheng, me pwan nein ekkewe ir mi fokkun unusen achengicheng ngeni ir—pun ra foffor ngeni ir usun ita ir chon nang ra ekkuneto seni Kot pwe repwe tumunur seni kiteter esemuch—iei minne, nupwen Ammon me pwin kewe ra kuna ei watten angangen kiteter, ra uren kirekiroch, iwe ra apasa ngeni ewe king:

5 Sipwe ionfengeni ekkei aramasen ewe Samon, me sipwe feitiw ngeni ewe fonuen Saraemla ngeni pwich kewe ekkewe chon Nifai, me suu seni ne poun ekkewe chon koum ngenikich, pwe sisap ninnino.

6 Nge ewe king a apasa ngeni ir: Nengeni, ekkewe chon Nifai repwe nikemino, pokiten ekkewe chommongun nii manau me tipis am aua fen fori ngeni ir.

7 Iwe Ammon a apasa: Upwe feino me eisini ewe Samon, iwe ika a apasa ngenikich, feitiw ngeni pwich kewe, oupwe no?

8 Iwe ewe king a apasa ngeni i: Ewer, ika ewe Samon a apasa ngenikem pwe aupwe no, aupwe feitiw ngeni pwim kewe, iwe am aupwe nour slave tori am aupwe forsefani ngeni ir ekkewe chommongun nii manau me tipis minne am aua fen fori ngeni ir.

9 Nge Ammon a apasa ngeni i: Mi ungeni ewe annukun pwich kewe, minne a foruta me ren semei we, pwe esap wor slave me neir; iei minne sipwene feitiw me apinukunuk won umoumochun pwich kewe.

10 Nge ewe king a apasa ngeni i: Eisini ewe Samon, iwe ika a apasa ngenikem pwe aupwe no, iwe aupwe no; ika esap ina aupwe mano non ewe fonu.

11 Iwe non ewe fansoun pwe Ammon a feino me eisini ewe Samon, iwe ewe Samon a apasa ngeni i:

12 Uwau ekkei aramas seni ei fonu, pwe resap mano; pun Setan a fen komochuno won netipen ekkewe chon Amalekai, ekkewe ra amwasangata ekkewe chon Leiman ar repwe song ngeni pwir kewe pwe repwe nireno; iei minne tou seni ei fonu; me feioch ekkei aramas non ei tappin fansoun, pun upwe tumunur.

13 Iwe iei non ewe fansoun pwe Ammon a feino me ureni ewe king ekkewe kapas meinisin minne ewe Samon a fen apasa ngeni i.

14 Iwe ra ionfengeni nour kewe aramas meinisin, ewer, ekkewe aramasen ewe Samon meinisin, me ra ionfengeni nour kewe penen man meinisin me pwin man, me feino seni ewe fonu, me feito ngeni ewe fonu pon minne a eimufeseni ewe fonuen Nifai seni ewe fonuen Saraemla, me feito arap ngeni ekkewe kianin ewe fonu.

15 Iwe non ewe fansoun pwe Ammon a apasa ngeni ir: Nengeni, ngang me pwi kewe am aupwe feino ngeni ewe fonuen Saraemla, iwe ami oupwe chok nonnom ikei tori am aupwe niwin; iwe am aupwe sotuni netipen pwim kewe, ika repwe mochen pwe oupwe feito non fonuer we.

16 Iwe non ewe fansoun pwe nupwen Ammon a feino ngeni non ewe fonu, pwe i me pwin kewe ra churi Alma, epekin non ewe neni minne ra fen kapas usun; iwe nengeni, ei a ew chufengen mi apwapwa.

17 Iei ewe pwapwa an Ammon a fokkun napanap a pwan mwo ureno; ewer, a nemenemeno non ewe pwapwan an Kot, pwan mwo tori apwangapwangenon an pochokun; iwe a turuno sefan ngeni ewe puun.

18 Iei esap ei ew fokkun pwapwa? Nengeni, ei ew pwapwa minne ese wor emon a angei tiwenon chok ika ewe mi ennetin aier me ewe chon kutta pwapwa mi tipetekison.

19 Iei ewe pwapwa an Alma ren an churi pwin kewe a ennetin napanap, me pwan ewe pwapwa an Aaron, an Omner, me Himnai; nge nengeni ar pwapwa ese kon nap seni ar pochokun.

20 Iwe iei non ewe fansoun pwe Alma a emmweni pwin kewe sefan ngeni ewe fonuen Saraemla; pwan mwo ngeni pwisin imwan we. Iwe ra feino me ureni ewe sou apung mi nap usun ekkewe mettoch meinisin a fen fis ngeni ir me non ewe fonuen Nifai, me nein pwir kewe, ekkewe chon Leiman.

21 Iwe non ewe fansoun pwe ewe sou apung mi nap a tinano ew porous non unusen ewe fonu, a mochen mongungun ekkewe aramas usun katonongen pwir kewe, ir ekkewe aramasen Antai-Nifai-Liai.

22 Iwe non ewe fansoun pwe mongungun ekkewe aramas a feito, a apasa: Nengeni, sipwe fangeta ewe fonuen Jerson, minne a nom non otiw unukun ewe sat, minne a pachengeni ewe Fonuen ras, minne a nom non eorun ewe fonu Fonuen ras; iwe ei fonu Jerson ina ewe fonu minne sipwe ngeni pwich kewe pwe epwe ew fonuer.

23 Iwe nengeni, sipwe enenia nouch kewe sounfiu nefinen ewe fonu Jerson me ewe fonu Nifai, pwe sipwe tumunu pwich kewe non ewe fonu Jerson; iwe ei sipwe fori fan iten pwich kewe, pokiten ar nuokus ne angei pisekin maun ne ungeni pwir kewe ren nuokusun ika repwe fori tipis; iwe ei ar nuokus mi nap a fis pokiten ar aier mi ariaffou minne ra fen mefi, pokiten ar kewe chommongun nii manau me ar kewe fofforungaw mi anoninen.

24 Iwe iei nengeni, ei sipwe fori ngeni pwich kewe, pwe repwe tongeni fonueni ewe fonuen Jerson; iwe sipwe eppeti ir seni ekkewe chon koum ngeni ir ren nouch kewe sounfiu, won ew apungupung ika repwe ngenikich ew kinikinin pisekir kewe pwe repwe tongeni aninis pwe sipwe tongeni anisi nouch kewe sounfiu.

25 Iei, non ewe fansoun pwe nupwen Ammon a rongorong ei, a niwin ngeni ekkewe aramasen Antai-Nifai-Liai, me pwan Alma a fiti, ngeni ewe fonu pon, ikewe ra aueta imwer kewe imw mangaku, me pwarano ngeni ir ekkei mettoch meinisin. Iwe Alma a pwan aporousa ngeni ir usun an we siwin, fiti fengen me Ammon me Aaron, me pwin kewe.

26 Iwe non ewe fansoun pwe a efisi pwapwa mi napanap me neir. Iwe ra feitiw ngeni ewe fonuen Jerson, me fonueni ewe fonuen Jerson; iwe ra iteni ekkewe aramasen Ammon me ren ekkewe chon Nifai; iei minne ra sokkono me ren ena it non fansoun feinfeino.

27 Iwe ra nom nein ekkewe aramasen Nifai, me pwan anneanong nein ekkewe aramas ir chon ewe mwichefenin Kot. Iwe ra pwan sokkono pokiten ar pochokunen memef ngeni Kot, me pwan ngeni aramas; pun ra unusen wenechar me pung non mettoch meinisin; me ra pochokun non ewe nuku usun Kraist, pwan mwo tori nesoponon.

28 Iwe ra ekiek won assuku chan pwir kewe ren unusen koput; iwe rese chiwen ar repwe echimw ne angei pisekin maun ne ungeni pwir kewe; iwe rese chiwen ekieki mano ren och ukukun anoninenin nuokus, pokiten ar apinukunuk me weweoch usun Kraist me ewe manausefan; iei minne, mano a nemenemeno non ir me pokiten Kraist a fen win.

29 Iei minne, repwe fen engino ngeni mano non ewe unusen ametekin me ariaffoun napanap minne mi tongeni fis me ren pwir kewe, me mwen ar repwe angei ewe ketinas are tok ar repwe wichi ir.

30 Iwe iei ra ew aramas mi nikitu me achengicheng, ew aramas mi fokkun chen noun ewe Samon.