1 Iwe non ewe fansoun pwe ekkewe chon Nifai ekkewe rese ninnino me ren ekkewe pisekin maun, mwirin ar peiasenano ekkewe ra fen ninnino—iei chochon ekkewe ra ninnino rese anneani, pokiten watten chommongur—mwirin ar ra wes ne peiasenano nour kewe mi mano ra niwin ngeni fonuer kewe meinisin, me ngeni imwer kewe, me punuwer kewe, me nour kewe.

2 Iei chommong fefin me semirit ra fen ninnino me ren ewe ketinas, me pwan chommong me nein nour kewe penen man me nour kewe pwin mwan; me pwan chommong me nein ar kewe ataken grain ra tano, pun ra fen chapapetiw me fan pechen ekkewe chommongun mwicheichen mwan.

3 Iwe iei ren ukukun chommongun ekkewe chon Leiman me ekkewe chon Amlisai ekkewe ra fen ninnino me won oroppan ewe chonupupu Sidon ra katurunong non ekkewe konikin Sidon; iwe nengeni chur kewe ra nom non anonnonun ewe sat, me ra chommong.

4 Iwe ekkewe chon Amlisai ra sokkono seni ekkewe chon Nifai, pun ra pwisin esisiner ren enuwe par won chamwer non napanapen ekkewe chon Leiman; nge rese raisono mokurer usun ekkewe chon Leiman.

5 Iei mokuren ekkewe chon Leiman mi raisono; iwe ir mi seneno, tiwenon chok ekkewe penit minne a fofo ngeni nukanaper, me pwan ar kewe fouten eppet, minne a fofo ngeni ir, me nour kewe nikappich, me nour kewe foun nikappich, me nour kewe foun fau, me nour kewe aunun, me soposopono.

6 Iwe unuchen ekkewe chon Leiman ra fokkun chochon, anongonong won ewe esisin minne a nom won semer kewe, minne a ew anumamau wor pokiten ar atai annuk me ar ungeni pwir kewe, ir Nifai, Jacob, me Joseph, me Sam, ekkewe ir mwan mi pung me fel.

7 Iwe pwir kewe ra achocho ar repwe nireno, iei minne ra anumamau; iwe ewe Samon Kot a wata ew esisin wor, ewer, won Leiman me Lemuel, me pwan ekkewe anuon noun Ishmael, me ekkewe fin Ishmael.

8 Iwe ei a fis pwe mwirimwirir kewe repwe tongeni sokkono seni mwirimwirin pwir kewe, pwe ren ewe popun ewe Samon Kot epwe tongeni tumunu noun kewe aramas, pwe resap tongeni nofit fengen me nuku non ekkewe eereni mi muan minne epwe esenipato ar kiteter.

9 Iwe non ewe fansoun pwe ion chok a nofiti chonun ngeni chonun ekkewe chon Leiman epwe wata ewe pwan chok anumamau won mwirimwirin.

10 Iei minne, ion chok epwe mutata inisin pwe epwe emmwenino me ren ekkewe chon Leiman epwe eiteitinong non ena itenap, iwe a wor ew esisin a nom won.

11 Iwe non ewe fansoun pwe ion chok esap nuku non eerenien ekkewe chon Leiman, nge epwe nuku ekkewe uruo minne ra uweiau seni ewe fonuen Jerusalem, me pwan non eerenien semer kewe, minne mi pung, ekkewe ra nuku non ekkewe annukun Kot me aneasochisir, ra iteni ekkewe chon Nifai, are ekkewe aramasen Nifai, seni ena fansoun feino—

12 Iwe ir ekkewe ra isoni ekkewe uruo minne mi ennet usun nour kewe aramas, me pwan usun ekkewe aramasen ekkewe chon Leiman.

13 Iei sipwene niwin sefan ngeni ekkewe chon Amlisai, pun a pwan wor ew esisin a nom wor; ewer, ra pwisin wata ewe esisin wor, ewer, pwan mwo ew esisinen enuwe par won chamwer.

14 Iei ewe kapasen Kot a pwonueta, pun ikkei ekkewe kapas minne a apasa ngeni Nifai: Nengeni, a wor an ekkewe chon Leiman anumamau, iwe upwe wata ew esisin wor pwe ir me mwirimwirir kewe repwe keimuno sonuk me mwirimwirum kewe, seni ei fansoun me feinfeino, tiwenon chok ika repwe aier seni ar fofforungaw me niwin ngeniei pwe epwe wor ai umoumoch wor.

15 Iwe pwan: Upwe wata ew esisin won i ewe a nofiti chonun ngeni pwium kewe, pwe repwe tongeni pwan anumamau.

16 Iwe pwan: Upwe wata ew esisin won i ewe a fiu ngonuk me mwirimwirum kewe.

17 Iwe pwan, ua apasa i ewe a suno sonuk esap chiwen iteni mwirimwirum; iwe upwe efeiochuk, me ion chok epwe iteni mwirimwirum, seni ei fansoun me feinfeino; iwe ikkei ekkewe pwon an ewe Samon ngeni Nifai me ngeni mwirimwirin kewe.

18 Iei ekkewe chon Amlisai rese sinei pwe ra apwonueta ekkewe kapasen Kot nupwen ar we poputa ne esisina inisir won chamwer; nge inamo ra pwano ne ungeni Kot; iei minne mi auchea pwe ewe anumamau epwe tota wor.

19 Iei ua mochen pwe oupwe kuna pwe ra pwisin wata wor ewe anumamau; iwe pwan mwo emon me emon aramas mi anumamau a pwisin wata kapung won inisin.

20 Iei non ewe fansoun pwe ese chommong ran mwirin ewe maun minne a fis non ewe fonuen Saraemla, me ren ekkewe chon Leiman me ekkewe chon Amlisai, pwe a pwan wor ew mwichen sounfiun ekkewe chon Leiman a feito won ekkewe aramasen Nifai, non ewe pwan chok neni ikewe ewe aewin mwichen sounfiu a churi ekkewe chon Amlisai.

21 Iwe non ewe fansoun pwe mi wor ew mwichen sounfiu ra tinano pwe epwe asureuu me non fonuer we.

22 Iei pokiten Alma pwisin a riaffou ren ew feiengawen kinas ese feita pwe epwe fiu atun ei fansoun ngeni ekkewe chon Leiman;

23 Nge a tinata ew chommongun mwichen sounfiu repwe ungeni ir; iwe ra feita me nieno chommong me nein ekkewe chon Leiman, me asueno ekkewe nussun me neir seni ekkewe kianin fonuer we.

24 Iwe ra niwin sefan me poputa ne awora kinamwe non ewe fonu, rese chiwen osukosuk non ew fansoun ren ekkewe chon koum ngeni ir.

25 Iei ekkei mettoch meinisin ra wesino, ewer, ekkei maun meinisin me anini fengen ra poputa me muchuno non ewe animuwen ierin muun ekkewe sou apung.

26 Iwe non ew ier mi wor ngerou me engon ngerou ngun ra titino ngeni ewe fonufan esemuch, pwe repwe tongeni angei niwinir anongonong won ar angang, ika pwe repwe öch are ika repwe ngaw, repwe angei pwapwa esemuch are riaffou esemuch, anongonong won ewe ngun minne ra finata pwe repwe aneasochis ngeni, ika pwe epwe emon ngun mi öch are emon mi ngaw.

27 Pun emon me emon aramas a angei niwinin seni i ewe a finata pwe epwe aneasochis ngeni, iwe ei a anongonong won ekkewe kapasen ewe ngunun osini; iei minne mut ngeni epwe anongonong won ewe ennet. Iwe iei amuchunon ewe animuwen ierin muun ekkewe sou apung.