1 Iwe iei, non ewe fansoun non ewe rue me wonuen ierin muun ekkewe sou apung won ekkewe aramasen Nifai, nengeni, nupwen ekkewe chon Leiman ra neno non ewe aewin soran ewe aewin maram, nengeni, ra kuna Amalekaia pwe a mano me non pwisin imwan we imw mangaku; me ra pwan kuna pwe Tiankam a monneta pwe epwene maun ngeni ir non ena ran.

2 Iwe iei, nupwen ekkewe chon Leiman ra kuna ei ra nuokus; iwe ra fangeta ar we kokkot ne fetano ngeni ewe fonu ennefen, me marsefan fiti nour kewe sounfiu meinisin ngeni ewe teninimwen Mulek, me kut pekin tumun non ar kewe tittin eppet.

3 Iwe non ewe fansoun pwe pwin Amalekaia we a kefinita pwe epwe king won ekkewe aramas; iwe itan Ammoron; iwe king Ammoron, ewe pwin king Amalekaia, a kefinita pwe epwe nemenem non nenian we.

4 Iwe non ewe fansoun pwe a annuku pwe noun kewe aramas repwe amwochu ekkewe teninimw, minne ra fen angei me ren ewe assukun cha; pun rese mwo angei ekkoch teninimw tiwenon chok an pöno watten char.

5 Iwe iei, Tiankam a kuna pwe ekkewe chon Leiman ra tiniken ar repwe amwochu ekkewe teninimw minne ra fen angei, me ekkewe kinikinin ewe fonu minne ra fen angei nemenem won; me a pwan kuna watten chochor, Tiankam a ekieki pwe ese auchea pwe i epwe sossot ne maun ngeni ir non ar kewe imwen eppet mi tittino.

6 Nge a annomatiw noun kewe mwan unukun, usun ita a for monnetan maun; ewer, iwe ennetin a monneta pwe epwe eppeti inisin seni ir, ren an kauuta tit mi rokopwanino me amonneta nenien tumun.

7 Iwe non ewe fansoun pwe a emmweni ei monnetan maun tori an Moronai a tinano ew watten mwichen mwan pwe epwe apochokuna noun kewe sounfiu.

8 Iwe Moronai a pwan titino annuk ngeni i pwe i epwe amwochu ekkewe chon kanapus meinisin ekkewe ra turunong ne poun; pokiten usun ekkewe chon Leiman ra fen niapeni chommong chon kanapus, pwe i epwe amwochu ekkewe chon kanapusen ekkewe chon Leiman meinisin pwe repwe ew niwinin ekkewe ir ekkewe chon Leiman ra fen niapenir.

9 Iwe a pwan titino annuk ngeni i pwe i epwe apochokunano ewe fonu Fonuen ras, me tumunu ewe aukukkunun aan minne a aaneno ngeni ewe fonu ennefen, ren nuokusun ika ekkewe chon Leiman repwe angei ena kinikinin fonu me wor ar pochokun ne aosukosuker won ew me ew kinikin.

10 Iwe Moronai a pwan titino ngeni i, a mochen pwe i epwe nikitu ne eppeti ena kinikinin ewe fonu, me pwe i epwe kutta meinisin tufich an epwe aosukosuka ekkewe chon Leiman non ena kinikin, ren ukukun met a wor non an pochokun, pwe eni i mi tongeni angei sefan me ren kokkot are ekkoch pwan napanap ekkewe teninimw minne ra fen ono seni ne pour; me pwe i epwe eppeti me apochokunano ekkewe teninimw unukun, minne ra fen turunong ne poun ekkewe chon Leiman.

11 Iwe i a pwan apasa ngeni i, ua mochen feino ngonuk, nge nengeni, ekkewe chon Leiman ra fiu ngenikem non ekkewe kian ewe fonu unukun ewe sat notou; iwe nengeni, upwe no ungeni ir, iei minne use tongeni feino ngonuk.

12 Iei, ewe king (Ammoron) a fen tou seni ewe fonuen Saraemla, me a fen pwarano ngeni ewe kiwin usun manon pwin we, me a fen ionfengeni ew chommongun mwicheichen mwan, me fetano ngeni ekkewe chon Nifai non ekkewe kia unukun ewe sat notou.

13 Iwe iei a sossot an epwe aosukosuka ekkewe chon Nifai, me an epwe peseino ew kinikinin nour kewe mwichen sounfiu ngeni ena kinikinin ewe fonu, nupwen a annuku ekkewe ir a fen nikitiretiw pwe repwe nemeni ekkewe teninimw minne i a fen niapenir, pwe repwe pwan aosukosuka ekkewe chon Nifai me won ekkewe kia unukun ewe sat otiw, me angei nemenem won fonuer kewe non ukukun met a wor non ar pochokun, anongonong won pochokunen nour kewe sounfiu.

14 Iwe iei ekkewe chon Nifai ra nom non ekkena efeiengawen nikinik non amuchunon ewe rue me wonuen ierin muun ekkewe sou apung won ekkewe aramasen Nifai.

15 Nge nengeni, non ewe fansoun non ewe rue me fisuen ierin muun ekkewe sou apung, pwe Tiankam, anongonong won ewe annuk an Moronai—ewe a fen forata sounfiu pwe repwe tumunu eor me ekkewe kian ewe fonu notou, me a poputani an karis ngeni ewe fonu Fonuen ras, pwe i epwe tongeni anisi Tiankam ren noun kewe mwan ne angei sefani ekkewe teninimw minne ra fen pout seni ir—

16 Iwe non ewe fansoun pwe Tiankam a angei annuk pwe epwe fori ew maun won ewe teninimwen Mulek, me angei sefani ika mi tufich.

17 Iwe non ewe fansoun pwe Tiankam a for pisekin amonneta an epwe fori ew maun won ewe teninimwen Mulek, me karisino fiti noun we mwichen sounfiu ne ungeni ekkewe chon Leiman; nge a kuna pwe ese tufich an epwe akkufur nupwen ir mi nom non ar kewe tittin eppet; iei minne a fangeta an kewe kokkot me niwin sefan ngeni ewe teninimwen Fonuen ras, pwe epwe witi wareton Moronai, pwe i epwe tongeni angei pochokun ngeni noun kewe sounfiu.

18 Iwe non ewe fansoun pwe Moronai a wareto fiti noun kewe sounfiu ren ewe fonu Fonuen ras, non soponon ewe rue me fisuwen ierin muun ekkewe sou apung won ekkewe aramasen Nifai.

19 Iwe non nepoputan ewe rue me wanuen ier, Moronai me Tiankam me chommong me nein ekkewe kaptin mi nap ra fori ew mwichen maun—usun met repwe fori an ekkewe chon Leiman repwe feiniu ungeni ir ne maun; are pwe repwe tongeni ren ekkoch popun michireu seni ar kewe neni mi pochokun, pwe repwe tongeni angei tufich wor me angei sefani ewe teninimwen Mulek.

20 Iwe non ewe fansoun pwe ra tinano ekkoch chon kuno ngeni ekkewe sounfiun ekkewe chon Leiman, ekkewe ra tumunu ewe teninimwen Mulek, ngeni nour we sou emmwen, itan Jacob, ra mochen i pwe epwe feiniu fiti noun kewe sounfiu pwe epwe churi ir won ekkewe sonosonoch nefinen ekkewe ru teninimw. Nge nengeni, Jacob, i emon chon Soram, ese mochen feiniu fiti noun kewe sounfiu pwe epwe churi ir won ekkewe sonosonoch.

21 Iwe non ewe fansoun pwe Moronai, ese wor an apinukunuk an epwe churi ir won ew neni mi pungoch, iei minne, a apungano won ew kokkot pwe i epwe tongeni otupau ekkewe chon Leiman seni ar kewe neni mi pochokun.

22 Iei minne a annuku pwe Tiankam epwe angei ew kukkunun mwicheichen mwan me karisitiw unukun orossetin ewe fonu; iwe Moronai me noun kewe sounfiu, fansoun nepwin, ra fetan non ewe fonu pon, won notoun ewe teninimwen Mulek; iwe iei, non ewe soran, nupwen ekkewe chon mas noun ekkewe chon Leiman ra kuna Tiankam, ra sa me ureni Jacob, nour we sou emmwen.

23 Iwe non ewe fansoun pwe ekkewe sounfiun ekkewe chon Leiman ra karisino ne ungeni Tiankam, ra ekieki pwe chochor kewe repwe akkufu Tiankam pokiten kukkunun chochon. Iwe nupwen Tiankam a kuna ekkewe sounfiun ekkewe chon Leiman ra feiniu ngeni i a poputa ne marsefanitiw ngeni orossetin ewe fonu, ennefen.

24 Iwe non ewe fansoun pwe nupwen ekkewe chon Leiman ra kuna pwe a poputa ne su, ra apinukunuk me tapwer ren pochokun. Iwe nupwen Tiankam a emmwenano ekkewe chon Leiman ekkewe ra tapweno mwirir non namotmwan, nengeni, Moronai a annuku pwe ew kinikinin noun kewe sounfiu ekkewe ir mi nom ren pwe repwe karis ngeni ewe teninimw, me angei nemenem won.

25 Iwe iei ra apwonueta, me nieno ekkewe meinisin ra nomwetiw pwe repwe tumunu ewe teninimw, ewer, ekkewe meinisin resap fangeta nour kewe pisekin maun.

26 Iwe iei Moronai a angei nemenem won ewe teninimwen Mulek ren ew kinikinin noun kewe sounfiu, nupwen a fetano fiti ekkewe nussun pwe repwe churi ekkewe chon Leiman nupwen repwe niwin sefan seni ar tapweno mwirin Tiankam.

27 Iwe non ewe fansoun pwe ekkewe chon Leiman ra tapwei Tiankam tori ar feito unukun ewe teninimwen Fonuen ras, iwe ra chu me ren Liai me ew kukkunun mwichen sounfiu, minne ra nomwetiw pwe repwe tumunu ewe teninimwen Fonuen ras.

28 Iwe iei nengeni, nupwen ekkewe kaptin mi nap noun ekkewe chon Leiman ra kuna Liai fiti noun kewe sounfiu ra feito ungeni ir, ra su non watten osukosuk, ra nuokus ika eni resap chiwen tori ewe teninimwen Mulek me mwen Liai epwe tori ir; pun ra apwangapwang pokiten ar we fetan, iwe ekkewe mwan noun Liai ir mi chok pochokuchok.

29 Iei ekkewe chon Leiman rese sinei pwe Moronai a fen nom mwirir fiti noun kewe sounfiu; iwe mettoch meinisin ra nuokusiti pwe Liai me noun kewe mwan.

30 Iei Liai ese kon mochen an epwe tori ir tori ar repwe churi Moronai me noun kewe sounfiu.

31 Iwe non ewe fansoun pwe mwen an ekkewe chon Leiman marsefan towaweno ra rokopwanino me ren ekkewe chon Nifai, me ren ekkewe mwan noun Moronai won epek, me ekkewe mwan noun Liai won ewe pwan epek, ir meinisin ra pochokuchok me uren pochokun; nge ekkewe chon Leiman ra apwangapwang pokiten ar we nangatamen fetan.

32 Iwe Moronai a annuku noun kewe mwan pwe repwe turuta wor tori ar repwe fangeta nour kewe pisekin maun.

33 Iwe non ewe fansoun pwe Jacob, pokiten i nour sou emmwen, me pwan i emon chon Soram, me pokiten a wor ren ewe pwaracho ese tongeni kuf, a emmweni ekkewe chon Leiman ne no maun ren pochokunen ningeringer ngeni Moronai.

34 Pokiten Moronai a nom non aanen ar fetan, iei minne Jacob a tiniken an epwe nireno me pokueno ew aanan ngeni ewe teninimwen Mulek. Nge nengeni, Moronai me noun kewe mwan ra kon pochokun; iei minne rese fangeta me mwen ekkewe chon Leiman.

35 Iwe non ewe fansoun pwe ra fiu me ruepek ren fokkun ningeringer; iwe mi wor chommong ra ninnino me ruepek; ewer, iwe Moronai a feiengaw me Jacob a ninnino.

36 Iwe Liai a fiu pochokun me mwirir ren sokkun ningeringer fiti noun kewe mwan mi pochokun, iwe ekkewe chon Leiman mwirin ra fangeta nour kewe pisekin maun; iwe ekkewe nussur, pokiten ra osukosuk, rese sinei ian repwe feino ie are ion repwe fiu ngeni.

37 Iei Moronai a kuna ar osukosuk, a apasa ngeni ir: Ika oupwe wato noumi kewe pisekin maun me fangereta, nengeni am aupwe kouno ne assuku chami.

38 Iwe non ewe fansoun pwe nupwen ekkewe chon Leiman ra rongorong ekkei kapas, nour kewe kaptin mi nap, ekkewe meinisin rese ninnino, ra feito me aturatiw nour kewe pisekin maun ren pechen Moronai, me pwan annuku nour kewe mwan pwe repwe fori usun chok ra fori.

39 Nge nengeni, mi chommong ekkewe rese mochen fori; iwe ekkewe ir rese mochen fangeta nour kewe ketinas ra ono me fofo, iwe nour kewe pisekin maun ra angei seni ir, iwe ra echimw pwe repwe karis fiti pwir kewe ngeni ewe fonu Fonuen ras.

40 Iwe iei chochon ekkewe chon kanapus ekkewe ra ono a nap seni chochon ekkewe ra fen ninnino, ewer, a nap seni ekkewe ra fen ninnino me ruepek.