1 Iwe non ewe fansoun non nepoputan ewe inik me wonuen ierin muun ekkewe sou apung won ekkewe aramasen Nifai, pwe Siplon a angei nemenem won ekkei mettoch mi monomon minne a fen kawor ngeni Ilaman me ren Alma.

2 Iwe i emon mwan mi pung, iwe a fetan wenechar me mwen Kot; me a soposopono ne achocho ne fori mi och, ne aneasochisi ekkewe annuk an ewe Samon an Kot; me pwan pwin we.

3 Iwe non ewe fansoun pwe Moronai a pwan mano. Iwe iei a muchuno ewe inik me wonuen ierin muun ekkewe sou apung.

4 Iwe non ewe fansoun pwe non ewe inik me fisu ierin muun ekkewe sou apung, mi wor ew watten mwichen mwan, pwan mwo ukukun nimu ngorow fepuku mwan, fiti punuwer kewe me nour kewe, ra tou seni ewe fonuen Saraemla ngeni non ewe fonu minne a nom ennefen.

5 Iwe non we fansoun pwe Eikot, pokiten i emon mwan mi fokkun mochen keao minefon mettoch, iei minne a feino me fana efoch wan fokkun watten sipw, me won kian ewe Fonuen ras, arap ngeni ewe fonu Tatakis, me a osuweno non ewe sat notou, arap ngeni ewe aukukkunun fonu minne a weneno ngeni ewe fonu ennefen.

6 Iwe nengeni, mi wor chommong me nein ekkewe chon Nifai ekkewe ra tonong won me saino fiti chommong pisekin mwongo, me pwan chommong fefin me semirit; iwe ra saino ennefen. Iwe iei a muchuno ewe inik me fisuwen ier.

7 Iwe non ewe inik me wanuen ier, ei mwan a pwan fana ekkoch sipw. Iwe ewe aewin sipw a pwan niwin, me chommong aramas ra tonong won; iwe ra pwan angei aner kewe chommong mwongo, me saino sefan ngeni ewe fonu ennefen.

8 Iwe non we fansoun pwe rese chiwen rongorong usur. Iwe am aua ekieki pwe ra mono non anonnonun ewe sat. Iwe non ewe fansoun pwe efoch pwan sipw a saino; iwe ian a no ian am ause sinei.

9 Iwe non ewe fansoun pwe non ei ier mi chommong aramas ra feino non ewe fonu ennefen. Iwe iei a muchuno ewe inik me wanuen ier.

10 Iwe non ewe fansoun non ewe inik me tiuwen ierin muun ekkewe sou apung, Siplon a pwan mano, iwe Korianton a no ngeni ewe fonu ennefen non efoch sipw, pwe epwe uweiano ekkoch pisekin mwongo ngeni ekkewe aramas ra fen saino ngeni ena fonu.

11 Iei minne mi auchea an Siplon epwe mutano ekkei mettoch mi monomon, me mwen an mano, won noun Ilaman we, ewe a iteni Ilaman, ewe a eiteit seni itan seman we.

12 Iei nengeni, ekkewe mak meinisin minne ra nom fan nemenien Ilaman ra makkeno me titino me nein ekkewe noun aramas non unusen ewe fonu, tiwenon chok ekkewe kinikin minne ra annuk me ren Alma pwe resap wareno ie.

13 Nge inamo, ekkei mettoch repwe tumun non monomon, me keititiw seni ew tappin aramas ngeni pwan ew; iei minne, non ei ier, ra fen mumuta won Ilaman, me mwen manon Siplon.

14 Iwe non ewe pwan fansoun non ei ier pwe mi wor ekkoch chon rikino ekkewe ra fen feino ngeni ekkewe chon Leiman; iwe ra pwan mwasangeta sefan ne song ngeni ekkewe chon Nifai.

15 Iwe non ewe pwan chok ier ra feitiw fiti ew chommongun mwichen sounfiu pwe repwe maun ngeni ekkewe aramasen Moronaia, are ngeni ewe mwichen sounfiun Moronaia, non minne ra kuf me kasuno sefan ngeni pwisin fonuer kewe, ra riaffouni chommong mi mano.

16 Iwe iei a muchuno ewe inik me tiuwen ierin muun ekkewe sou apung won ekkewe aramasen Nifai.

17 Iwe iei a muchuno uruon Alma we, iwe Ilaman noun we anuon, me pwan Siplon, i ewe noun anuon.