1 Iwe non ewe fansoun pwe mwirin ru ran me ru pwin ita repwene angei inisin me akkonatiw non ew nenien peias, minne ra fen fori pokiten ewe popun repwe ireno ar kewe mi mano.

2 Iei ewe kiwin a fen rongorong usun itefounon Ammon, iei minne a titi me mochen pwe i epwe feinong ngeni.

3 Iwe non ewe fansoun pwe Ammon a fori usun a fen annuk, iwe a feinong ngeni ewe kiwin, me a mochen pwe epwe sinei met a mochen pwe i epwe fori.

4 Iwe a apasa ngeni i: Ekkewe chon angangen punuwei we ra fen pwarano ngeniei pwe en emon soufosun emon Kot mi fel, me pwe a wor om manaman ne fori chommong angang mi amwarar non itan;

5 Iei minne, ika pwe iei met a fis, ua mochen pwe kopwe feinong me attona punuwei we, pun i a fen kokkon won an we pet ren ukukun ru ran me ru pwin; iwe ekkoch ra apasa pwe esemo mano, nge ekkoch ra apasa pwe a mano me a pwan pwongaw, me ita i epwene nom non ewe nenien peias; nge ren pwisin inisi, me rei pwe ese pwongaw.

6 Iei, ei met Ammon a mochen, pun i mi sinei pwe king Leimonai a nom fan manamanen Kot; a sinei pwe ewe rochopwakun pwonupwonun nukunukumang a katuruno seni an ekiek, me ewe saram minne a asaramano an ekiek, ewe saramen ningen Kot, minne mi amwarar a asaramano an kirekiroch—ewer, ei saram a awora sokkun pwapwa non ngunun, ewe kuchun rochopwak a katuruno, iwe ewe saramen manau esemuch a sarameno non ngunun, ewer, a sinei pwe ei a nemenano inisin we, me a kekino non Kot—

7 Iei minne, met ewe kiwin a mochen seni ina chok met an mochen. Iei minne, a feinong pwe epwe attona ewe king anongonong won met ewe kiwin a mochen seni; iwe a kuna ewe king, iwe a sinei pwe esemo mano.

8 Iwe a apasa ngeni ewe kiwin: Esemo mano, nge a mour non Kot, iwe non ewe soran i epwe pwata sefan; iei minne kosap peiasenano.

9 Iwe Ammon a apasa ngeni: Ka nuku ei? Iwe a apasa ngeni i: Ese wor nei chon pwarata tiwenon chok om kapas, me ewe kapas an nöum kewe chon angang; nge inamo ua nuku pwe epwe fis anongonong won usun met ka fen apasa.

10 Iwe Ammon a apasa ngeni: Ka feioch pokiten om fokkun nuku; ua apasa ngonuk, fefin, esemo wor och sokkun nuku me nein ekkewe aramasen chon Nifai meinisin.

11 Iwe non ewe fansoun pwe a neno ren ewe pet an punuwan we, seni ena fansoun pwan mwo tori ewe fansoun non ewe soran minne Ammon a finata pwe i epwe pwata.

12 Iwe non ewe fansoun pwe a pwata, anongonong won ekkewe kapas an Ammon; iwe nupwen an a pwata, a eitieuu poun ngeni ewe fefin, me apasa: Feioch ewe iten Kot, me ka feioch.

13 Pun usun ennetin en mi manau, nengeni, ua fen kuna ai we Chon Angasano; iwe i epwe feito, me epwe uputiw me won emon fefin, iwe i epwe angasa aramas meinisin ekkewe ra nuku non itan we. Iei, nupwen a apasa ekkei kapas, netipan a ureno me non i, iwe a pwan turuno ren pwapwa; iwe ewe kiwin a pwan turutiw, pokiten ra nemenemeno me ren ewe Ngun.

14 Iei Ammon a kuna Ngunun ewe Samon a tou anongonong won an kewe iotek won ekkewe chon Leiman, pwin kewe, ekkewe ra esenipato fokkun watten netipeta me nein ekkewe chon Nifai, are nein ekkewe aramas noun Kot pokiten ar kewe angangangaw me ar kewe eereni, a fotopukutiw won pukuwan, me poputa ne wau ngunun non iotek me kinisou ngeni Kot ren met i a fen fori fan iten pwin kewe; iwe a pwan nemenemeno ren pwapwa; iwe iei ir me unumon ra turuno ngeni ewe puun.

15 Iei, nupwen ekkewe chon angang noun ewe king ra kuna pwe ra fen turuno, ra pwan poputa ne sio ngeni Kot, ren nuokusun ewe Samon a fen pwan feito wor, pun ir ekkewe ra fen uta me mwen ewe king me pwarata ngeni i anongonong won ewe manaman mi napanap an Ammon.

16 Iwe non ewe fansoun pwe ra kokkori iten ewe Samon, non ar pochokun, pwan mwo tori ar ra turuno ngeni ewe puun meinisin, tiwenon chok emon me nein ekkewe fin chon Leiman, itan we Apis, i a fen siwin ngeni ewe Samon ren chommong ier, pokiten ew nemasepwi mi amwarar an seman we—

17 Iei pokiten a fen siwin ngeni ewe Samon, me ese pwarano, iei minne, nupwen a kuna pwe ekkewe chon angangen Leimonai meinisin ra turuno ngeni ewe puun, me pwan nour we fefin chon nemenem, ewe kiwin, me ewe king, me Ammon ra koneno won ewe puun, a sinei pwe ina ewe manamanen Kot; iwe a ekieki pwe ei tufich, ren an epwe pwarano ngeni ekkewe aramas met a fis me neir, pwe ren ar repwe kuna ei nikinik epwe fori ir pwe repwe nuku ewe manamanen Kot, iei minne a sa seni imw ngeni imw, ne pwarano ngeni ekkewe aramas.

18 Iwe ra poputa ne achufengeni inisir ngeni imwen ewe king we. Iwe a feito ew mwicheich, iwe ren ar mairu, ra kuna ewe king, me ewe kiwin, me nour kewe chon angang ra koneno won ewe puun, iwe ir meinisin ra kokkon ikewe usun ita ir mi mano; iwe ra pwan kuna Ammon, iwe nengeni, i emon chon Nifai.

19 Iwe iei ekkewe aramas ra poputa ne ngunungun me neir pwisin; ekkoch ra apasa pwe a ew mettoch mi ennetin ngaw a feito wor, are won ewe king me imwan we, pokiten a mutata pwe ewe chon Nifai epwe nonnom non ewe fonu.

20 Nge ekkoch ra apungur, ra apasa: Ewe king a wato ei mettoch mi ngaw won imwan we, pokiten a nieno noun kewe chon angang ekkewe nour kewe penen man ra toropas fetan me ren ekkewe konikin Sipus.

21 Iwe ra pwan kapung me ren ekkewe mwan ekkewe ra uta me ren ekkewe konikin Sipus me atoropasa ekkewe penen man minne ir noun ewe king, pun ra song ren Ammon pokiten chochon ekkewe i a nieno me nein pwir kewe me ren ekkewe konikin Sipus, nupwen a tumunu ekkewe penen man noun ewe king.

22 Iei, emon me neir, ewe pwin we a fen ninnino me ren ewe ketinas noun Ammon, pokiten a fokkun song ren Ammon, a uwau noun we ketinas me feino pwe epwe tongeni turuta won Ammon, pwe epwe nieno i; iwe nupwen an eitieta ewe ketinas pwe epwe pokueno i, nengeni, a turuno me mano.

23 Iei sia kuna pwe Ammon ese tongeni ninnino, pun ewe Samon a apasa ngeni Mosaia, seman we: Upwe tumunu i, iwe epwe fis ngeni anongonong won om nuku—iei minne, Mosaia a fangeno i ngeni ewe Samon.

24 Iwe non ewe fansoun pwe nupwen ewe mwicheich a kuna pwe ewe mwan a turuno ren mano, ewe a eitieta ewe ketinas pwe epwe nieno Ammon, nuokus a feito wor meinisin, iwe rese pwaracho ar repwe wanong pour pwe repwe attapa i are emon me nein ekkewe ra fen turuno; iwe ra poputa ne ingeno sefan me pwisin neir ren met epwe popun ei manaman mi napanap, are met ekkei mettoch meinisin ra wewe ngeni.

25 Iwe non ewe fansoun pwe mi chommong me neir ekkewe ra apasa pwe Ammon i ewe Ngun mi Nap, me ekkoch ra apasa pwe i a ekkuneto me ren ewe Ngun mi Nap;

26 Nge ekkoch ra apungur meinisin, ra apasa pwe i emon anungaw, ewe a fen titito me ren ekkewe chon Nifai pwe epwe eriaffour.

27 Iwe mi wor ekkoch ekkewe ra apasa pwe Ammon a titito me ren ewe Ngun mi Nap pwe epwe eriaffour pokiten ar kewe angangangaw; me pwe ewe Ngun mi Nap i ewe a chok nonnom ren ekkewe chon Nifai fansoun meinisin, ewe a fen angasereno seni ne pour; iwe ra apasa pwe ei Ngun mi Nap ewe a fen nieno chommong me nein pwir kewe, ekkewe chon Leiman.

28 Iwe iei ewe anini fengen a poputa ne fokkun pochokuneno me neir. Iwe nupwen ra anini fengen, ewe fefin chon angang ewe a fori pwe ewe mwicheich epwe ioifengen a feito, iwe nupwen a kuna ewe anini fengen minne a fis nein ewe mwicheich a fokkun netipechou, pwan mwo tori an suputiw chonun mesan.

29 Iwe non ewe fansoun pwe a feino me angei ewe kiwin me ren poun, pwe eni epwe tongeni aueta seni ewe puun; iwe mwitir chok an attapa poun a uta won pechen, me puchor ren ew neuwomongun mongungu, a apasa: O mwareiti Jises, ewe a fen amanauaei seni ew anoninenin hell! O Kot mi efeioch, kopwe umoumoch won ekkei aramas!

30 Iwe nupwen a apasa ei, a kamoch fengeni poun, pokiten a ureno ren pwapwa, a kapas chommong kapas minne rese weweoch; iwe nupwen a fori ei, a angei ewe king, Leimonai, me ren poun, iwe nengeni a pwata me uta won pechen.

31 Iwe i, mwitir, nupwen a kuna ewe anini fengen me nein noun kewe aramas, a feino me poputa ne apungur, me poputa ne aitir ekkewe kapas minne a fen rongorong seni awen Ammon; iwe meinisin ekkewe ra rongorong an kewe kapas ra nuku, iwe ra siwin ngeni ewe Samon.

32 Nge mi chommong me neir ekkewe rese mochen rongorong an kewe kapas; iei minne ra feino soposopono.

33 Iwe non ewe fansoun pwe nupwen Ammon a pwata a pwan aninis ngeni ir, me pwan ekkewe chon angang noun Leimonai meinisin ra pwan aninis; iwe ir meinisin ra afanafan ngeni ekkewe aramas ewe pwan chok mettoch—pwe netiper a fen siwin; pwe ese chiwen wor ar mochenin fori mi ngaw.

34 Iwe nengeni, chommong ra afanafan ngeni ekkewe aramas pwe ra fen kuna chon nang me ra fen kapas ngeni ir; iwe iei ra fen aporousa ngeni ir ekkewe mettochun Kot, me usun an wenechar.

35 Iwe non ewe fansoun pwe mi chommong ekkewe ra nuku non ar kewe kapas; iwe meinisin ekkewe ra nuku ra papatais; iwe ra winiti aramas tupwon, iwe ra forata ew imwen fan me neir.

36 Iwe iei ewe angangen ewe Samon a poputa me nein ekkewe chon Leiman; iei ewe Samon a poputa ne wau Ngunun we wor; iwe sia kuna pwe poun mi keitiuu ngeni aramas meinisin ekkewe ra aier me nuku non itan we.