1 Iwe non ewe fansoun pwe ra feino, me poputa ne afanafana ewe kapasen Kot ngeni ekkewe aramas, ra tonong on ar kewe sinakok, me non imwer kewe; ewer, me ra pwan mwo afanafana ewe kapas won aaner kewe.

2 Iwe non ewe fansoun pwe mwirin ar angang chommong me neir, ra poputa ne fetanoch me nein ekkewe woungawen kinikinin aramas; pun nengeni, ra katuruu seni ar kewe sinakok pokiten nikinikingawen ufer kewe—

3 Iei minne rese mumuta ar repwe tonong non ar kewe sinakok ren ar repwe fen ngeni Kot, pokiten ra nom non pekin mi nimengaw; iei minne ir mi woungaw; ewer, ra nom non pekin mi nimengaw me ren pwir kewe usun mecha mi namotmwan; iei minne ra woungaw ren pisekisekin fonufan; me ra pwan woungaw non netip.

4 Iei, nupwen Alma a afanafan me kapas ngeni ekkewe aramas won ewe chukuchukuta Onita, a feito ew watten mwicheich ngeni i, ir ekkewe ua fen kapas usun, ekkewe ir mi woungaw non netip, pokiten ar woungaw ren pisekisekin fonufan.

5 Iwe ra feito ren Alma; iwe ewe emon a kon auchea me neir a apasa ngeni i: Nengeni, met pwi kei repwe fori, pun ra fen koput me ren aramas meinisin pokiten ar woungaw, ewer, iwe kon napenon me ren ekkewe pris; pun ra fen aturakemiu seni am kewe sinakok minne am aua fen angang weires ne aureta ren pwisin pöum; iwe ra aturakemiu pokiten am fokkun woungaw; iwe ese wor am neni ne fen ngeni am Kot; iwe nengeni, met am aupwe fori?

6 Iwe iei nupwen Alma a rongorong ei, a akunnu inisin, a mwitir sapengeni i, iwe a kuna ren ennetin pwapwa; pun a kuna pwe ar kewe riaffou a ennetin etipetekisoner, me ra pwan monneta ar repwe rongorong ewe kapas.

7 Iei minne ese chiwen pwan kapas ngeni ekkewe ekkoch mwicheich; nge a eitieu poun, me sio ngeni ekkewe i a kuner, ekkewe ra ennetin aier, me a apasa ngeni ir:

8 Ua kuna pwe oua tipetekison non netip; iwe ika epwe ina, ami oua feioch.

9 Nengeni pwimi we a fen apasa, Met sipwe fori?—pun am aua fen katuruu seni am kewe sinakok, pwe am ausap tongeni fen ngeni am Kot.

10 Nengeni ua apasa ngenikemi, oua ekieki pwe ouse tongeni fen ngeni Kot tiwenon chok ika epwe non ami kewe sinakok?

11 Iwe soposopono, upwe eis, oua ekieki pwe ousap fen ngeni Kot fan ew chok non ew wik?

12 Ua apasa ngenikemi, mi murino pwe oua fen katuruu seni ami kewe sinakok, pwe oupwe tipetekison, me pwe oupwe tongeni kaeo mirit; pun mi auchea pwe oupwe kaeo mirit; pun pokiten oua fen katuruu, oua uren koput me ren pwimi kewe pokiten ami fokkun woungaw, pwe oua emmwen ngeni ew tipetekisonen netip; pun mi auchea pwe oua fen emmwen ngeni ami oupwe tipetekison.

13 Iwe iei, pokiten oua echimw pwe oupwe tipetekison ami oua feioch; pun emon aramas fan ekkoch, ika a echimw pwe epwe tipetekison, a kutta aier; iwe iei ennetin, ion chok a aier epwe kuna umoumoch; iwe i ewe a kuna umoumoch me engino ngeni nesoponon i ewe pwan chok epwe manau.

14 Iwe iei, usun ua apasa ngenikemi, pwe pokiten oua echimw pwe oupwe tipetekison oua fen feioch, ouse ekieki pwe ra kon feioch ekkewe ra ennetin etipetekisona inisir pokiten ewe kapas?

15 Ewer, i ewe a ennetin etipetekisona inisin, me aier seni an kewe tipis, me nikitu ngeni nesoponon, i ewe pwan chok epwe feioch—ewer, epwe kon feioch nap seni ekkewe ir ra echimw pwe repwe tipetekison pokiten ar fokkun woungaw.

16 Iei minne, ra feioch ir ekkewe ra etipetekisona inisir me nukun ar repwe echimw pwe repwe tipetekison; are fen, non ekkoch kapas, a feioch i ewe a nuku non ewe kapasen Kot, me a papatais me nukun nukumachen netip, ewer, me nukun an a emmwen ngeni an epwe sinei ewe kapas, are pwan mwo an echimw pwe epwe sinei, me mwen ar repwe nuku.

17 Ewer, mi chommong ekkewe ra apasa: Ika kopwe pwar ngenikem ew esisin seni nang, mwirin am aupwe sinei usun ennetin; mwirin am aupwe nuku.

18 Iei ua eis, iei usun nuku? Nengeni, ua apasa ngenikemi, Apw; pun ika emon aramas a sinei ew mettoch ese wor an popun epwe nuku, pun a sinei usun.

19 Iwe iei, ifa ukukun watten anumamauen i ewe a sinei mochenin Kot me ese fori, nap seni i ewe a chok nuku, are a chok wor an popun epwe nuku, me a turunong non atai annuk?

20 Iei usun ei mettoch oupwe apungu. Nengeni, ua apasa ngenikemi, pwe a ina won ewe efoch pau usun pwan chok won ewe efoch; iwe epwe fis ngeni emon me emon aramas anongonong won an angang.

21 Iwe iei usun ua apasa usun nuku—nuku esap ren an epwe wor ew unusochun sinei mettoch; iei minne ika a wor ami nuku oupwe apinukunuku mettoch minne ouse kuna, minne ra ennet.

22 Iwe iei, nengeni, ua apasa ngenikemi, me ua mochen pwe oupwe chechemeni, pwe Kot mi uren umoumoch ngeni meinisin ekkewe ra nuku non itan we; iei minne a mochen, akkomwan, pwe oupwe nuku, ewer, pwan mwo non itan we.

23 Iwe iei, a pwarano an kapas me ren noun kewe chon nang ngeni aramas, ewer, esap chok mwan pwe pwan fefin. Iei esap ikkei chok meinisin; kukkun semirit a kawor ngeni ir kapas non chommong fansoun, minne a apungu ekkewe mi mirit me ekkewe mi tipachem.

24 Iwe iei, ami pwi achengicheng, pokiten oua fen mochen pwe oupwe sinei me rei met oupwe fori pokiten oua fen riaffou me katuruu—iei use mochen pwe oupwe ekieki pwe ua mochen apungu kemi anongonong chok won met minne mi ennet—

25 Pun use ara pwe ami meinisin oua fen echimw pwe oupwe atipetekisona inisimi; pun ua ennetin nuku pwe mi wor ekkoch me neimi ekkewe oupwe etipetekisona inisimi, ese pwan nifinifin non met chok napanap repwe nom non.

26 Iei, usun ua apasa usun nuku—pwe esap ew unusochun sinei—pwan mwo ina usun ren ai kewe kapas. Ouse tongeni sinei usun ennetir akkom, ngeni unusoch, nap seni nuku a ew unusochun sinei.

27 Nge nengeni, ika oupwe neno me annenoi ewe tufichin mwokutukutun inisimi, pwan mwo ren ew angangen sossot won ai kewe kapas, me aea ew kukkunun kinikinin nuku, ewer, pwan mwo ika ouse tongeni fori nap seni ami mochen oupwe nuku, mut ngeni ei mochen epwe angang non ami, pwan mwo tori ami oupwe nuku non ew napanap pwe oupwe tongeni awora nenien ekis kinikinin ai kewe kapas.

28 Iei, sipwene anonnoi ewe kapas ngeni efou foun ira. Iei, ika oua enenia, pwe efou foun ira epwe tongeni fot non netipemi, nengeni, ika pwe epwe efou foun ira mi ennet, are efou foun ira mi öch, ika ouse aturau pokiten ami ouse nuku, pwe oupwe ungeni ewe Ngunun ewe Samon, nengeni, epwe poputa ne watteno fan mwarimi; iwe nupwen oupwe mefi ekkei mwokutukutun watteno, oupwene poputa ne apasa non netipemi—Iwe pwe ei a efou foun ira mi öch, are pwe ewe kapas mi öch, pun a poputa ne awatteno nguni; ewer, a poputa ne asaramano ai wewe, ewer, a poputa ne anno ngeniei.

29 Iei nengeni, ei esap anapano ami nuku? Ua apasa ngenikemi, Ewer; nge inamo esemo marita ngeni ew unusochun sinei.

30 Nge nengeni, nupwen ewe foun ira a watteno, me pwuk, me poputa ne mar, iwe mi auchea oupwene apasa pwe ewe foun ira mi öch; pun nengeni a watteno, me pwuk, me poputa ne mar. Iwe iei, nengeni, ei esap apochokunano ami nuku? Ewer, epwe apochokunano ami nuku; pun oupwe apasa pwe ngang mi sinei pwe mi öch ei foun ira; pun nengeni a pwuk me poputa ne mar.

31 Iwe iei, nengeni, ami mi sineiochu pwe ei efou foun ira mi öch? Ua apasa ngenikemi, Ewer; pun efou me efou foun ira a pwisin uwani pwisin napanapan.

32 Iei minne, ika efou foun ira a marita mi öch, nge ika ese marita, nengeni ese öch, iei minne a katuruno.

33 Iwe iei, nengeni, pokiten oua fen sotuni ewe angangen sossot, me fotuki ewe foun ira, iwe a watteno me pwuk, me poputa ne mar, mi auchea pwe oupwe sinei pwe ewe foun ira mi öch.

34 Iwe iei, nengeni, ami sinei mi unusoch? Ewer, ami sinei mi unusoch non na mettoch, me ami nuku mi asoso; iwe ei pokiten ami mi sinei, pun ami mi sinei pwe ewe kapas a fen watteno non ngunumi, me ami mi pwan sinei pwe a pwukuta, pwe ami wewe a poputa ne sarameno, me ami ekiek a poputa ne napeno.

35 O ika epwe ina, esap ei mi ennet? Ua apasa ngenikemi, Ewer, pokiten mi saram; iwe met chok mi saram, mi öch, pokiten mi weweoch, iei minne mi auchea oupwe sinei pwe mi öch; iwe iei nengeni, mwirin oua fen mefi ei saram ami sinei a unusoch?

36 Nengeni ua apasa ngenikemi, Apw; mi auchea ousap nikitano ami nuku, pun oua fen chok aea ami nuku ne fotuki ewe foun ira pwe oupwe tongeni sotuni ewe angangen sossot pwe oupwe sinei ika ewe foun ira mi öch.

37 Iwe nengeni, nupwen ewe ira a poputa ne mar, oupwene apasa: Sipwene foneni ren watten tumun, pwe epwe pwuk waran, pwe epwe tongeni marita, me poputa ne uwani foun ira ngenikich. Iwe iei nengeni, oua foneni ren watten tumun epwe pwuk waran, me marita, me uwani foun ira.

38 Nge ika oua tumunungaw ngeni ewe ira, me ika ousap ekieki usun foneniochun, nengeni esap pwuk och waran; iwe nupwen ewe pwichikaren ewe akkar a watteno me kenano, pokiten ese wor waran a pwaseno, iwe oupwe wieta me aturano.

39 Iei, ei esap pokiten ewe foun ira ese öch, esap pwan pokiten uwan we esap anno; nge pokiten ami we puun mi ngaw, iwe ouse foneni ewe ira, iei minne ouse tongeni angei uwan we.

40 Iwe iei, ika ousap foneni ewe kapas, ika ouse esuku mwemi ren efou mesen nuku ngeni uwan we, ouse tongeni kini uwan we seni ewe iran manau.

41 Nge ika oupwe foneni ewe kapas, ewer, foneni ewe ira nupwen a poputa ne mar, ren ami nuku ren unusen achocho, me ren tipepos, oupwe esuku uwan we, epwe pwuk waran; iwe nengeni epwe efoch ira a marita ngeni manau esemuch.

42 Iwe pokiten ami achocho me ami nuku me ami tipepos ngeni ewe kapas ne foneni, epwe tongeni puk waran non ami, nengeni, ekiseno chok oupwene kini uwan we, minne mi fokkun auchea, minne a ngarangar nap seni mettoch mi ngarangar meinisin, me minne mi pwechepwech nap seni mettoch mi pwechepwech meinisin, ewer, me nimenimoch nap seni mettoch mi nimenimoch meinisin; iwe oupwe kametip won uwan ei pwan mwo tori ami oua motuno, pwe ousap chiwen echik, ousap pwan kaka.

43 Non na fansoun, ami pwi, oupwene angei niwinin ami nuku, me ami achocho, me tipepos, me engino, oua fen witiwit an ewe ira epwe uwani foun ira ngenikemi.