1 Iei mwirin an Alma a apasa ekkei kapas, ra tinato ew porous ren pwe ra mochen sinei ika repwe nuku non emon Kot, pwe repwe tongeni angei ei uwan foun ira minne i a fen kapas usun, are ifa usun repwe fotuki ewe foun ira, are ewe kapas minne i a fen kapas usun, minne i a apasa pwe mi auchea pwe epwe fot non netiper; are non met napanap repwe poputa ne aea ar nuku.

2 Iwe Alma a apasa ngeni ir: Nengeni, oua fen apasa pwe ouse tongeni fen ngeni ami Kot pokiten oua katuruu seni ami kewe sinakok. Nge nengeni, ua apasa ngenikemi, ika oua ekieki pwe ouse tongeni fen ngeni Kot, oua fokkun muan, iwe oupwe attonaochu ekkewe pukefel; ika oua ekieki pwe ra fen aitikemi ei, ouse weweitir.

3 Oua chechemeni pwe oua fen anneani met Sinos, ewe soufosun nom, a fen apasa usun iotek are fan?

4 Pun a apasa: En ka unusen umoumoch, O Kot, pun ka fen rongorong ai iotek, pwan mwo nupwen ua nom non ewe fonu pon; ewer, ka fen umoumoch nupwen ua iotek usun ekkewe ir chon koum ngeniei, iwe ka kunuto rei.

5 Ewer, O Kot, me ka fen umoumoch ngeniei nupwen ua sio ngonuk non ai we atake; nupwen ua sio ngonuk non iotek, iwe ka rongorong ngeniei.

6 Iwe pwan, O Kot, nupwen ua no ngeni imwei we ka rongorong ngeniei non ai iotek.

7 Iwe nupwen ua no ngeni ai kapet, O Samon, me iotek ngonuk, ka rongorong ngeniei.

8 Ewer, ka uren umoumoch ngeni noum semirit nupwen ra sio ngonuk, ren ar repwe rongorong me reom me esap me ren aramas, iwe kopwe rongorong ngeni ir.

9 Ewer, O Kot, ka fen uren umoumoch ngeniei, me rongorong ai kewe sio me nein om kewe mwicheich.

10 Ewer, me ka fen pwan rongorong ngeniei nupwen ua fen katuruu me ua fen koput me ren ekkewe chon koum ngeniei; ewer, ka fen rongorong ngeni ai kewe sio, me ka song ren ekkewe chon koum ngeniei, iwe ka churi ir non om song fiti mwitirin kiteter.

11 Iwe ka rongorong ngeniei pokiten ai kewe riaffou me ai ennet; iwe pokiten Noum we ka fen uren umoumoch ngeniei, iei minne upwe sio ngonuk non ai kewe riaffou meinisin, pun non en ina ai pwapwa; pun ka fen akunnano om kewe kapung seniei, pokiten Noum we.

12 Iwe iei Alma a apasa ngeni ir: Ami mi nuku ekkewe pukefel minne ra fen makketiw me rer chon nom?

13 Nengeni, ika ami mi nuku, mi auchea oupwe nuku met Sinos a apasa; pun, nengeni a apasa: Ka fen akunnano om kewe kapung pokiten Noum we.

14 Iei nengeni, ami pwi, upwe eis ika oua fen anneani ekkewe pukefel? Ika oua fen anneani, ifa usun ami ouse tongeni nuku non ewe Noun Kot?

15 Pun ese makketiw pwe Sinos chok anamon a kapas usun ekkei mettoch, nge Sinok pwan a kapas usun ekkei mettoch—

16 Pun nengeni, a apasa: En ka song, O Samon, ren ekkei aramas, pokiten rese weweiti om kewe umoumoch minne ka fen wata wor pokiten Noum we.

17 Iwe iei, ami pwi, oua kuna pwe emon aruwen soufosun nom a fen pwarata usun ewe Noun Kot, iwe pokiten ekkewe aramas rese weweiti an kewe kapas ra mwonei ngeni fau ngeni mano.

18 Nge nengeni, esap ikkei chok meinisin; esap ikkei ir chok ekkewe ra fen kapas usun ewe Noun Kot.

19 Nengeni, Moses a kapas usun i; ewer, iwe nengeni ew esisin a seikita me non ewe fonu pon, pwe ion chok epwe neta won epwe tongeni manau. Iwe chommong ra nengeni me manau.

20 Nge ekkoch ra weweiti wewen ekkewe mettoch, iwe ei pokiten pochokununon netiper. Nge mi chommong ekkewe ir mi fokkun pochokununo pwe rese mochen nengeni, iei minne ra mano. Iei ewe popun rese mochen nengeni pokiten rese nuku pwe epwe echikarer.

21 O ami pwi, ika oupwe tongeni chikar ren chok ami nenetai mesemi pwe oupwe tongeni chikar, ousap mwitir nengeni, are oupwe fen apochokunano netipemi non ami ouse nuku, me winiti mi chipwang, pwe ousap nenetai mesemi, pwe oupwe tongeni mano?

22 Ika epwe ina, riaffou epwe feito womi; nge ika esap ina, iwe nenefetan me poputa ne nuku non ewe Noun Kot, pwe i epwe wareto pwe epwe angasa noun kewe aramas, me pwe i epwe riaffou me mano pwe epwe achasefani tipisir; me pwe i epwe manau sefan seni mano, minne epwe efisi ewe manausefan, pwe aramas meinisin repwe uta me mwan, pwe repwe kapung atun ewe soponon me ranin kapung, anongonong won ar kewe angang.

23 Iwe iei, ami pwi, ua mochen pwe oupwe fotuki ei kapas non netipemi, iwe nupwen a poputa ne watteno iwe oupwe pwan foneni ren ami nuku. Iwe nengeni, epwe winiti efoch ira, epwe marita non ami ngeni manau esemuch. Iwe mwirin amo Kot epwe mut ngenikemi pwe ami kewe chou repwe tongeni paneno, me non pwapwan Noun we. Iwe pwan mwo ekkei meinisin ami mi tongeni ika ami mi mochen. Amen.