1 Ngoku kwenzekile okokuba kowesithandathu unyaka wolawulo lwabagwebi phezu kwabantu bakaNifayi, akuzange kubekho zimbambano nazimfazwe kulo ilizwe laseZarahemla;

2 Kodwa abantu babe bandezelekile, ewe, bebandezeleke kakhulu ngenxa yokulahlekelwa ngabazalwana babo, kananjalo nokulahlekelwa yimpahla emfutshane nemihlambi yeenkomo zabo, kananjalo nokulahlekelwa ngamasimi eenkozo zabo, ezazinyathelelwe phantsi kweenyawo zaze zatshatyalaliswa ngamaLeymenayithi.

3 Kwaye zazinkulu kakhulu iimbandezelo zabo kangangokuba imiphefumlo yonke yaba nesizathu sokuba lusizi; kwaye babekholelwa okokuba yayizizigwebo zikaThixo zithunyelwa phezu kwabo ngenxa yenkohlakalo yabo namasikizi abo; ke ngoko bavuselelwa kwinkumbulo yomsebenzi wabo.

4 Kwaye baqalisa ukumisa ibandla ngokupheleleyo; ewe, kwaye abaninzi babhaptizwa emanzini aseTsidon baza bamanyelwa ebandleni likaThixo; ewe, babhaptizwa ngesandla sika-Alma, owaye engcwaliswe njengombingeleli omkhulu phezu kwabantu bebandla, ngesandla sikayise uAlma.

5 Kwaye kwenzekile kowesixhenxe unyaka wolawulo lwabagwebi kwabakho imiphefumlo emalunga namawaka amathathu namakhulu amahlanu eyathi yazimanya nebandla likaThixo yaza yabhaptizwa. Kwaye waphela njalo owesixhenxe unyaka wolawulo lwabagwebi phezu kwabantu bakaNifayi; kwaye kwabakho uxolo ngalo lonke ixesha kulo lonke elo lixa.

6 Kwaye kwenzekile kowesibhozo unyaka wolawulo lwabagwebi, okokuba abantu bebandla baqalisa ukuba babe nekratshi, ngenxa yobutyebi babo obugqithisileyo, neesilika zabo ezicwengileyo, neelineni zabo ezolukwe ngokucekethekileyo, kwaye ngenxa yemihlambi yabo emininzi neenkomo, negolide yabo nesilivere, nazo zonke iintlobo zezinto ezixabisekileyo, abathi bazizuza ngokusebenza ngenkuthalo yabo; kwaye kuzo zonke ezi zinto baphakamela kwikratshi lamehlo abo, kuba baqalisa ukunxiba izinxibo zexabiso elikhulu.

7 Ngoku oku kwaku ngunobangela wembandezelo enkulu kuAlma, ewe, nakwabaninzi babantu awathi uAlma wabamisela ukuba babeziititshala, nababingeleli, nabadala phezu kwebandla; ewe, abaninzi babo babebuhlungu kakhulu ngenxa yenkohlakalo ababeyibona ukuba iqalisile ukubakho phakathi kwabantu babo.

8 Kuba babona baza baqaphela ngosizi olukhulu ukuba abantu bebandla baqalisa ukuphakamela kwikratshi lamehlo abo, nokubeka iintliziyo zabo phezu kobutyebi naphezu kwezinto ezililize zehlabathi, ukuze baqalise ukugxekana, omnye komnye, kwaye baqalisa ukutshutshisa abo babengakholelwa ngokwentando nolonwabo lwabo.

9 Kwaye njalo, kulo wesibhozo unyaka wolawulo lwabagwebi, kwaqalisa ukubakho iimbambano ezinkulu phakathi kwabantu bebandla; ewe, kwabakho oomona, nokukrutha-kruthana, nolunya, neentshutshiso, nekratshi, ngokude lidlule ikratshi labo babengengabo abebandla likaThixo.

10 Kwaye njalo waye waphela owesibhozo unyaka wolawulo lwabagwebi; yaza inkohlakalo yebandla yaba sisikhubekiso esikhulu kwabo babengengabo abebandla; kwaye njalo ibandla laqalisa ukungabi nampumelelo kwinkqubela-phambili yalo.

11 Kwaye kwenzekile ekusungulweni konyaka wesithoba, uAlma wayibona inkohlakalo yebandla, waza wabona kanjalo ukuba umzekelo webandla wawuqalisa ukukhokelela abo babengakholwa ukusuka kwelinye isuntsu lobugwenxa ukuya kwelinye, njalo besizisa intshabalalo yabantu.

12 Ewe, wabona ukungalingani okukhulu phakathi kwabantu, abanye beziphakamisele phezulu ngekratshi labo, bebacekisa abanye, bebanikela imiva yabo abasweleyo nabaze nabo babelambile, nabo babenxaniwe, nabo babegula kwaye bebandezelekile.

13 Ngoku oku kwakungunobangela omkhulu wezijwili phakathi kwabantu, ngeli lixa abanye babezithoba, benceda abo babeludinga uncedo lwabo, olunje ngokunikela ngezinto zabo kwabo babengamahlwempu nabasweleyo, bedlisa abalambileyo, kwaye benyamezela zonke iintlobo zeembandezelo, ngenxa kaKrestu, omele eze ngokomoya wesiprofetho;

14 Bekhangele phambili kuloo mhla, njalo bezuza uxolelo lwezono zabo; bezaliswe luvuyo olukhulu ngenxa yovuko lwabafileyo, ngokwentando negunya lenkululo kaYesu Krestu ukusuka kumakhamandela okufa.

15 Kwaye ngoku kwenzekile okokuba uAlma, ezibonile iimbandezelo zabalandeli abathobekileyo bakaThixo, neentshutshiso ezazifunjwe phezu kwabo yintsalela yabantu bakhe, kwaye ekubona konke ukungalingani kwabo, waqalisa ukuba lusizi kakhulu; nangona kunjalo uMoya weNkosi awuzange umdanise.

16 Kwaye wonyula indoda esisilumko eyayiphakathi kwabadala, waza wayinika igunya ngokwelizwi labantu, ukuze ibe negunya lokuwisa imithetho malunga nemithetho eyayinikiwe, nokuba ayisebenzise ngokwenkohlakalo namatyala abantu.

17 Ngoku igama lalendoda lalinguNifayiha, kwaye wonyulwa ukuba abe ngumgwebi oyintloko; waze wahlala kuso isihlalo-sokugweba ukuba agwebe kwaye alawule abantu.

18 Ngoku uAlma akazange alunikele kuye ubizo lokuba ngumbingeleli omkhulu phezu kwebandla, kodwa walugcina ubizo lobubingeleli obukhulu kuye; kodwa wasinikezela isihlalo-sokugweba kuNifayiha.

19 Kwaye oku wakwenza ukuze yena ngokwakhe abe nokubheka phambili phakathi kwabantu bakhe, okanye phakathi kwabantu bakaNifayi, ukuze abe nokushumayela ilizwi likaThixo kubo, ukuba vuselela ekukhumbuleni umsebenzi wabo, kwaye abe nokulisusa, ngelizwi likaThixo, lonke ikratshi nobuqhetseba nazo zonke iimbambano ezaye ziphakathi kwabo bantu bakhe, engaboni nandlela anokuthi ababange ngayo kwakhona ngaphandle kokuba abacinizele ngobungqina obumsulwa ngokuchasene nabo.

20 Kwaye njalo ekuqalekeni kowesithoba unyaka wolawulo lwabagwebi phezu kwabantu bakaNifayi, uAlma wasinikezela isihlalo-sokugweba kuNifayiha, waza wazibophelela ngokupheleleyo kububingeleli obukhulu bohlobo olungcwele lukaThixo, ukuba angqine ngelizwi, ngokomoya wesityhilelo nowesiprofetho.