Ka
Buke A Moramona

Nolaila, he mooolelo ia i hoopokole ia o ka mooolelo o ko Nepai poe, a o ko Lamana poe no hoi; i palapala ia aku i ko Lamana poe, he koena no lakou o ko ka hale o Iseraela; a i ka poe Iudaio a me ka poe Genetile no hoi: i palapala ia ma ke kauoha ana, a ma o ka Uhane la o ka wanana a me ka hoikeana no hoi. Kakau ia, a sila ia aku, a huna ia mamuli o ka Haku, i ole ai e hoopau ia ia mea; e puka mai ai ma ka haawina a me ka mana o ke Akua i ka hoomaopopo ia ana o ia mea: i sila ia ma ka lima o Moroni, a i huna ia mamuli o ka Haku e puka aku i ka manawa pono ma o ka poe Genetile la; ma ka haawina o ke Akua ka hoomaopopo ia ana o ia mea.

A he mooolelo hoi i hoopokole ia, a i kakau ia mailoko mai o ka Buke a Etera: he mooolelo ia o ko Iareda poe: he poe i hoopuehu ia i ka manawa a ka Haku i hookahuli ai i ka olelo a na kanaka ma ka wa a lakou e kukulu ana i halepakui e hiki aku ai i ka lani; he mea ia e hoike aku ai i ke koena o ko ka hale o Iseraela i na mea nui a ka Haku i hana ai no na kupuna o lakou; a i ike ai lakou i na berita a ka Haku, aole lakou i hoolei mau loa ia aku; a no ka hoomaopopo ana no hoi i ka poe Iudaio a me ka poe Genetile, o Iesu oia no ke Kristo, ke Akua Mau Loa, e hoike ana ia ia iho i na lahuikanaka a pau. Ano la, ina he mau mea hemahema kekahi, no ka hemahema no o na kanaka ua mau mea la; no ia mea, mai hoohewa i na mea a ke Akua, i loaa ai oukou me ke kina ole ma ka noho hookolokolo o Kristo.