Ka Hoikeana A Na Mea Ikemaka Ekolu.

E ike na lahuikanaka, na ohana, na olelo, a me na kanaka ma kahi e hiki ai auanei keia buke, o makou nei, ma ka lokomaikai o ke Akua ka Makua, a me ko kakou Haku o Iesu Kristo, ua ike makou i na papa maluna iho olaila i kakau ia ai keia mooolelo, he mooolelo ia o ko Nepai poe, a o ko Lamana poe no hoi, na hoahanau o lakou, a o ko Iareda poe hoi, ka poe i hele mai mai ua halepakui la mai, ka mea i olelo ia; a ua ike no hoi makou ua unuhi ia ia ma ka haawina a me ka mana o ke Akua, no ka mea, na kona leo i hai mai pela ia makou; nolaila, ua ike maoli makou me ka maopopo, he oiaio ua buke nei. A ke hoike aku nei no hoi makou, ua ike makou i na kaha maluna iho o na papa; a ua hoike ia mai la ia mau mea ia makou ma ka mana o ke Akua, aole ma ko ke kanaka. A ke hai aku nei makou me ka oiaio no, ua iho mai la kekahi anela o ke Akua mai ka lani mai, a ua lawe mai la oia a kau mai la imua o ko makou mau maka, a nana aku la makou a ike i na papa, a me ke kahakaha ana maluna iho olaila; a ua ike makou ma ka lokomaikai o ke Akua ka Makua, a me ko kakou Haku o Iesu Kristo, ko makou ike ana, a me ko makou hoike ana aku i ka oiaio o keia mau mea; a he mea kupanaha ia i ko makou mau maka, aka hoi, na ka leo o ka Haku makou i kauoha mai e hoike aku no keia mea; nolaila, ke hoike aku nei makou no keia mau mea, i malama ia ai na kauoha a ke Akua. A ua ike no hoi makou ina e hoomau pono makou iloko o Kristo, e hoomaemae aku makou i ko makou mau aahu i ke koko o na kanaka a pau, a e loaa me ke kina ole imua o ka noho-hookolokolo o Kristo, a e noho pu mau loa auanei me ia ma na lani. A no ka Makua, a me ke Keiki, a me ka Uhane Hemolele ka hoonani ia, a o ke Akua hookahi no ia. Amene.