1 Na em i kamap we Jaret, brata bilong em wantaim famili bilong ol, na tu ol pren bilong Jaret, brata bilong em wantaim famili bilong ol, ol i bin go daun long ples daun i stap long hap bilong not, (na nem bilong ples daun i Nimrot, bikos em wan nem bilong wanpela smatpela tru sutboi) wantaim ol sipsip bilong ol ol i bin bungim wantaim, man na meri, bilong olgeta kain.

2 Na ol tu bin putim uben na kisim ol pisin long antap, na redim wanpela kontena we ol i bin karim pis bilong wara wantaim ol.

3 Na ol tu bin karim deseret, tok klia bilong em em i binatang bilong hani, na ol i bin karim planti binatang wantaim ol olsem, na olgeta kainkain samting long pes bilong graun, ol pikinini kaikai bilong olgeta kain.

4 Na em i kamap we bihain ol i bin kamdaun long ples daun bilong Nimrot Bikpela i bin kam daun na toktok wantaim brata bilong Jaret, na em i bin i stap insait long klaut, na brata bilong Jaret i no lukim em.

5 Na em i kamap we Bikpela i bin tokim ol olsem ol i mas go long ples we nogat man i stap, ye, long dispela hap we nogat wanpela man i bin go bipo. Na em i kamap we Bikpela i bin lidim ol, na toktok wantaim ol taim em i sanap insait long klaut, na soim ol wanem hap ol mas go.

6 Na em i kamap we ol i bin wokabaut i go long ples we nogat man i stap, na wokim ol baj na brukim solwara i go wantaim ol, na Bikpela i bin soim rot we ol mas go olgeta taim wantaim han bilong em.

7 Na Bikpela i no laikim olsem ol bai stop long abrusim solwara long ples we nogat man i stap, tasol em i laikim olsem ol bai go het, tru tumas, long graun bilong promis, em i nambawan graun tru long olgeta graun, em God Bikpela i bin lukautim i stap long wanpela stretpela pipol.

8 Na em i bin tok tru antap long belhat bilong em long brata bilong Jaret, olsem husat man bai kisim dispela graun bilong promis, long dispela taim i go yet na oltaim, mas sevim em, trupela na wanpela God tasol, o ol bai bagarap olgeta taim, taim stret bilong belhat bilong em kamap long ol.

9 Na nau, yumi ken lukim ol lo bilong God long dispela graun, olsem em i wanpela graun bilong promis, na husat nesen kisim dispela graun bilong em yet mas sevim God, o ol bai bagarap olgeta, long taim stret bilong belhat bilong em kamap long ol, taim ol mau wantaim sin.

10 Long wanem, lukim, dispela i wanpela graun em i nambawan tru long olgeta narapela graun, olsem na, man em i kisim dispela graun mas sevim God, o bai bagarap olgeta, long wanem, em i oltaim oltaim lo bilong God. Na dispela bagarap bai i no inap kam i go inap long taim stret bilong pasin nogut namel long ol lain pikinini bilong graun bai kam, we ol bai bagarap olgeta.

11 Na dispela rekot bai kam long yupela, O yupela ol lain bilong Jentail, olsem yupela bai save long ol lo bilong God—olsem yupela bai tanim bel, na i no inap wokim pasin nogut yet i go inap long taim stret bai kam, we yupela bai i no inap bringim taim stret bilong belhat bilong God antap long yu wankain olsem ol pipol bilong dispela graun ol i bin wokim bipo.

12 Lukim, dispela i wanpela nambawan graun tru, na wanem nesen kisim em bai kamap fri long kalabus na long pasin kalabus, na long olgeta narapela nesen aninit long heven, sapos ol bai sevim God bilong dispela graun tasol, em i Jisas Krais, we ol samting mipela raitim i bin soim.

13 Na nau mi go het wantaim rekot bilong mi, long wanem, lukim, em i kamap we Bikpela i bin bringim Jaret wantaim lain brata bilong em i go long dispela bikpela solwara tru em i bin brukim ol graun. Na ol sanapim haus sel bilong ol taim ol i kam long solwara, na ol i kolim nem bilong ples Moriankuma, na ol i stap long ol haus sel long nambis long fopela krismas.

14 Na em i kamap we Bikpela i bin kam gen long brata bilong Jaret taim fopela krismas i pinis, na sanap long wanpela klaut na toktok wantaim em. Na Bikpela i bin toktok wantaim brata bilong Jaret long tripela aua, na strongim toktok long em bikos em i no tingim long singaut long nem bilong Bikpela.

15 Na brata bilong Jaret i bin sore long pasin nogut em i bin wokim, na singaut long nem bilong Bikpela long ol lain brata bilong em ol i bin i stap wantaim em. Na Bikpela tokim em: Mi bai pogivim yu wantaim lain brata bilong yu long sin bilong ol, tasol yu bai i no inap sin moa, long wanem, yupela mas tingim olsem Spirit bilong mi bai i no inap i stap wantaim man olgeta taim, olsem na, sapos yupela bai sin i go inap long yupela mau stret, yupela bai lus long pes bilong Bikpela. Na ol dispela em i tingting bilong mi long graun em mi bai givim long yupela long kisim bilong yupela yet, long wanem, em bai kamap wanpela nambawan graun tru long olgeta narapela graun.

16 Na Bikpela tok: Go long wok na wokim ol baj wankain olsem yu bin wokim bipo. Na em i kamap we brata bilong Jaret i bin go long wok wantaim ol lain brata bilong em, na wokim ol baj wankain olsem ol i bin wokim, olsem Bikpela i bin tokim ol. Na ol bai i liklik, na ol i no hevi long wara, tru tumas, ol i no hevi wankain olsem wanpela pisin antap long wara.

17 Na ol baj ol i bin wokim inap long ol i bin pasim gut tru, inap ol i ken holim wara wankain olsem wanpela dis, na as bilong ol ol i bin pasim wankain olsem wanpela dis, na ol arere bilong ol i gat nus, na antap bilong ol ol i bin pasim wankain olsem wanpela dis, na longpela bilong ol i longpela bilong wanpela diwai, na dua bilong ol, taim ol i pasim i pas wankain olsem wanpela dis.

18 Na em i kamap we brata bilong Jaret i bin singaut long Bikpela, olsem: O Bikpela, mi bin wokim wok em yu bin tokim mi, na mi wokim ol baj olsem yu bin tokim mi.

19 Na lukim, O Bikpela, nogat lait i stap insait long ol, mipela bai stiaim we? Na tu mipela bai idai, long wanem, mipela i no inap kisim win insait long ol, tasol em i win em i stap insait long ol, olsem na mipela bai idai.

20 Na Bikpela tokim brata bilong Jaret: Lukim, yu bai wokim wanpela hul long antap, na tu long as, na taim yupela sot long win, yupela bai opim hul na kisim win. Na sapos wara i kam insait long yupela, lukim, yupela mas pasim hul, nogut yupela bai idai long tait wara.

21 Na em i kamap we brata bilong Jaret i bin bihainim toktok bilong Bikpela na wokim olsem.

22 Na em singaut gen long Bikpela olsem: O Bikpela, lukim, mi wokim wankain olsem yu bin tokim mi, na mi redim ol baj long ol pipol bilong mi, na lukim, nogat lait i stap insait long ol. Lukim, O Bikpela, inap yu bai larim mipela brukim dispela bikpela solwara tru i go long tudak?

23 Na Bikpela askim brata bilong Jaret: Yu laikim mi bai mekim wanem inap long yu bai gat lait insait long ol baj bilong yu? Long wanem, lukim, yu bai i no inap wokim ol windo, bikos ol bai pundaun na bruk i go liklik liklik nabaut, na tu yu bai i no inap kisim paia wantaim yu, bikos yu bai i no inap go wantaim lait bilong paia.

24 Long wanem, lukim, yupela bai kamap wankain olsem wanpela bikpela pis long namel long solwara, bikos ol traipela tait tru bilong solwara bai paitim nogut tru long ol baj bilong yupela. Tasol, mi bai kisim yupela kamap gen long insait long solwara, bikos ol win i bin go aut long maus bilong mi, na tu mi bin salim ol ren wantaim hai wara.

25 Na lukim, mi redim yu long ol dispela samting, bikos yu no inap brukim dispela traipela solwara tru i go, olsem na mi redim yu long ol tait bilong solwara, na ol win em bin go aut, na ol haiwara em bai kam. Olsem na, yu laikim mi long mekim wanem long redim yu olsem yu bai gat lait taim yupela bai pasim i go aninit long solwara?