1 Na em i kamap we Oriha i bin jasim wantaim stretpela pasin long graun long olgeta de bilong em, na ol de bilong em i planti tru.

2 Na em i bin gat planti pikinini man na meri, ye, em i bin gat tripela ten wan pikinini, namel long ol i tupela ten tri pikinini man.

3 Na em i kamap we em i bin gat Kip tu taim em i kamap lapun. Na em i kamap we Kip i bin kisim ples bilong em long rul, na Kip i bin gat Koriho.

4 Na taim Koriho i kamap tripela ten tu krismas, em sakim tok bilong papa bilong em, na i bin go i stap long graun bilong Neho, na em i bin gat planti pikinini man na meri, na ol i kamap naispela tru, olsem na, Koriho i bin pulim planti pipol long bihainim em.

5 Na taim em i bung wantaim wanpela ami, em kamap long graun bilong Moron we king i stap, na kisim em long kalabus, em i mekim kamap tru toktok bilong brata bilong Jaret olsem ol bai bringim ol i kam insait long kalabus.

6 Nau graun bilong Moron, we king i bin i stap, i klostu long graun em ol lain bilong Nifai i bin kolim Bagarap.

7 Na em i kamap we Kip wantaim ol pipol bilong em i bin i stap long kalabus aninit long Koriho pikinini bilong em i go inap long em kamap lapun tru, tasol, Kip i bin gat Sul taim em i kamap lapun long kalabus.

8 Na em i kamap we Sul bin belhat wantaim brata bilong em, na Sul i bin kamap strong, na em i bin gat traipela strong tru olsem long strong bilong man, na tu em kamap man bilong traipela save tru long jasmen.

9 Olsem na, em i bin kam long liklik maunten Efraim, na kisim mama ain long liklik maunten na kukim, na wokim ol naip bilong pait wantaim ain bilong ol lain ol i bin pulim i go wantaim em, na bihain em i givim ol samting bilong pait wantaim ol naip bilong pait, em i go bek long siti Neho, na pait wantaim brata bilong em Koriho we em i kisim kingdom na givim bek long papa bilong em Kip.

10 Na nau bikos long dispela samting em Sul i bin wokim, papa bilong em i bin givim kingdom long em, olsem na, em i stat long rul long ples bilong papa bilong em.

11 Na em i kamap we em i bin jasim wantaim stretpela pasin, na em karamapim olgeta pes bilong graun wantaim kingdom bilong em, long wanem, ol pipol i bin kamap planti tru stret.

12 Na em i kamap we Sul tu bin gat planti pikinini man na meri.

13 Na Koriho i bin tanim bel long planti pasin nogut bilong em yet, olsem na Sul i bin givim em pawa insait long kingdom bilong em.

14 Na em i kamap we Koriho i bin gat planti pikinini man na meri. Na namel long ol pikinini man bilong Koriho em wanpela nem bilong em i Noa.

15 Na em i kamap we Noa i bin sakim tok bilong king Sul wantaim papa bilong em Koriho, na pulim Koho brata bilong em, na tu olgeta brata bilong em wantaim planti pipol.

16 Na em i bin pait wantaim king Sul, we em i kisim nambawan graun bilong ol yet, na em kamap king long dispela hap bilong graun.

17 Na em i kamap we em i bin pait gen wantaim king Sul, na em i kisim king Sul, na karim em go long Moron na kalabusim em.

18 Na em i kamap we taim em i klostu kilim em idai, ol pikinini bilong Sul hait na go insait long haus bilong Noa long nait na kilim em, na brukim dua bilong haus kalabus i go daun na kisim papa bilong ol go aut, na putim em long sia bilong king bilong em insait long kingdom bilong em yet.

19 Olsem na, pikinini bilong Noa i bin wokim kingdom bilong em long ples bilong em, tasol ol i no moa kisim pawa long bosim king Sul, na ol pipol ol i bin i stap aninit long rul bilong king Sul i bin kamap planti na sindaun bilong ol i kamap gutpela tru.

20 Na kantri i bin bruk, na tupela kingdom i bin i stap, kingdom bilong Sul, na kingdom bilong Koho, pikinini bilong Noa.

21 Na Koho, pikinini bilong Noa tokim ol pipol bilong em long pait wantaim Sul, we Sul winim ol na kilim Koho.

22 Na nau Koho i bin gat wanpela pikinini man, nem bilong em Nimrot, na Nimrot i bin givap long kingdom bilong Koho long Sul, na em i winim bel bilong Sul, olsem na Sul i bin givim bikpela pawa long em, na em i bin wokim wanem samting em laikim insait long kingdom bilong Sul.

23 Na tu ol profet i bin kam namel long ol pipol taim Sul i bin rul, em Bikpela i bin salim, na ol profesai olsem pasin nogut na pasin bilong lotuim god-giaman bilong ol pipol i bin bringim kes long graun, na ol profesai olsem ol pipol bai kisim bagarap, sapos ol i no tanim bel.

24 Na em i kamap we ol pipol ol i bin tok nogut long ol profet, na tok bilas long ol. Na em i kamap we king Sul i bin jasim olgeta lain ol i tok nogut long ol profet.

25 Na em i bin kirapim wanpela lo long olgeta hap bilong graun, na givim pawa long ol profet olsem ol bai go long wanem hap ol i laikim, na ol pipol ol i bin kam long tanim bel bikos long dispela.

26 Na bikos ol pipol ol i bin tanim bel long pasin nogut na pasin bilong lotuim god-giaman bilong ol, Bikpela i bin larim ol, na sindaun bilong ol i stat long kamap gutpela gen long graun. Na em i kamap we Sul bin i gat planti pikinini man na meri taim em i kamap lapun.

27 Na no gat moa bikpela pait i bin kamap long ol de bilong Sul, na em i bin tingim planti bikpela samting tru em Bikpela i bin wokim long ol tumbuna papa bilong em long bringim ol long brukim bikpela solwara tru i kam long graun bilong promis, olsem na em i bin jasim wantaim stretpela pasin long olgeta de bilong em.