1 Ket ita napasamak iti maikawalopulo ket innem a tawen, nagtalinaed latta dagiti Nephita iti kinadakes, wen, iti nakaro a kinadakes, bayat a napasnek nga inkalikagum dagiti Lamanita a mangtungpal kadagiti bilin ti Dios, a mayannurot iti linteg ni Moises.

2 Ket napasamak nga iti daytoy a tawen adda maysa a Samuel, a Lamanita, nga immay iti daga ti Zarahemla, ket rinugianna ti nangasaba kadagiti tattao. Ket napasamak a nangasaba isuna, iti adu nga aldaw, maipapan iti panagbabawi kadagiti tattao, ket pinnapanawda isuna, ket agsubli koman iti bukodna a daga.

3 Ngem kitaen, nangngegna ti timek ti Apo, a masapul nga agsubli manen isuna, ken agipadto kadagiti tattao no aniaman dagiti bambanag a maipaltiing iti pusona.

4 Ket napasamak a saanda nga ipalubos a sumrek isuna iti siudad; ngarud napan ket immuli iti paderna, ket inyunnatna ti imana ket immawag iti napigsa a timek, ket impadtona kadagiti tattao aniaman dagiti bambanag nga inpaltiing ti Apo iti pusona.

5 Ket imbagana kadakuada: Kitaen, siak, ni Samuel, maysaak a Lamanita, ibagak dagiti balikas ti Apo nga impaltiingna iti pusok; ket kitaen impaltiingna iti pusok a mangibaga kadagitoy a tattao nga agbibitin ti espada ti hustisia kadagitoy a tattao; ket saan a mapalabas ti uppat a gasut a tawen sakbay nga agtinnagto ti espada ti hustisia kadagitoy a tattao.

6 Wen, agur-uray ti nakaro a pannakadadael kadagitoy a tattao, ket pudno a mapasamak daytoy kadagitoy a tattao, ket awan ti makaisalakan kadagitoy a tattao malaksid ti panagbabawi ken pammati ken ni Apo a Jesucristo, a pudno nga umay ditoy lubong, ken agsagaba iti adu a bambanag ken mapapatayto para kadagiti tattaona.

7 Ket kitaen, impakaammo kaniak ti maysa nga anghel ti Apo, ket inyegna dagiti naragsak a damag iti kararuak. Ket kitaen, naibaonak kadakayo a mangipakaammo met kadakayo, tapno maaddaankayo ​​kadagiti naragsak a damag; ngem kitaen saandak nga awaten.

8 Ngarud, daytoy ti imbaga ti Apo: Gapu iti kinatangken dagiti panagpuspuso ti tattao dagiti Nephita, malaksid no agbabawida ikkatekto ti balikasko kadakuada, ket ikkatekto ti Espiritok manipud kadakuada, ket saankonto nga anusan idan, ket pagbalinek a kontra kadakuada ti puspuso dagiti kakabsatda.

9 Ket saanto a mapalabas ti uppat a gasut a tawen sakbay nga ibilinko ti pannakasaplitda; wen, sarungkarak ida babaen ti espada ken panagbisin ken angol.

10 Wen, sarungkarak ida iti naranggas a pungtotko, ket addanto kadagidiay maikapat a henerasion ti agbiagto, manipud kadagiti kabusoryo, tapno kitaen ti namimpinsan a pannakadadaelyo; ket sigurado a mapasamakto daytoy malaksid no agbabawikayo, imbaga ti Apo; ket iyegto kadagidiay maikapat a henerasion ti pannakadadaelyo.

11 Ngem no agbabawikayo ken agtalekkayo iti Apo a Diosyo ikkatekto ti pungtotko, imbaga ti Apo; wen, kastoy ti imbaga ti Apo, nabendisionan dagiti agbabawi ken agtalek kaniak, ngem ay-ay pay ti saan nga agbabawi.

12 Wen, ay-ay pay daytoy dakkel a siudad ti Zarahemla; gapu ta kitaen, maisalakan daytoy gapu kadagidiay nalinteg; wen, ay-ay pay daytoy naindaklan a siudad, gapu ta madlawko, imbaga ti Apo, nga adu, wen, inggana kadagiti ad-adu a paset daytoy naindaklan a siudad, a mangpatangken kadagiti puspusoda kontra kaniak, imbaga ti Apo.

13 Ngem nabendisionan dagiti agbabawi, gapu ta isuda ti isalakanko. Ngem kitaen, no saan a gapu kadagiti nalinteg nga adda iti daytoy naindaklan a siudad, kitaen, pababaek ti apuy manipud iti langit ket dadaelenna daytoy.

14 Ngem kitaen, gapu kadagiti nalinteg a maisalakan daytoy. Ngem kitaen, umay ti tiempo, imbaga ti Apo, nga inton mapatalawto dagiti nalinteg manipud kadakayo, isunto ti panagagluomyo iti pannakadadael; wen, ay-ay pay daytoy naindaklan a siudad, gapu iti kinadakes ken kinarimon nga adda kenkuana.

15 Wen, ket ay-ay pay ti siudad ti Gideon, gapu iti kinadakes ken dagiti kinarimon nga adda kenkuana.

16 Wen, ket ay-ay pay dagiti amin a siudad nga adda iti daga iti aglawlaw, a kukua dagiti Nephita, gapu kadagiti kinadakes ken kinarimon nga adda kadakuada.

17 Ket kitaen, mapasamakto ti maysa a lunod iti daga, imbaga ti Apo ti Pangen, gapu kadagiti tattao nga adda iti daga, wen, gapu kadagiti kinadakesda ken kinarimonda.

18 Ket mapasamakto, imbaga ti Apo dagiti Pangen, wen, ti naindaklan ken pudno a Diostayo, a ti asinoman a mangilemmeng kadagiti kinabaknag iti daga saandanton a pulos a masarakan ida, gapu iti nakaro a lunod ti daga, malaksid no nalinteg a tao isuna ken ilemmengnanto para iti Apo.

19 Agsipud ta kayatko, imbaga ti Apo, nga ilemmengda para kaniak dagiti kinabaknangda; ket mailunodto dagiti saan a mangilemmeng kadagiti kinabaknangda para kaniak; gapu ta awan ti mangilemmeng kadagiti kinabaknangda para kaniak malaksid no ti nalinteg; ket ti saan a mangilemmeng kadagiti kinabaknangna para kaniak, nailunod isunan, ken kasta met ti kinabaknang, ket awanto ti makapaisubli iti daytoy gapu iti lunod ti daga.

20 Ket dumtengto ti aldaw nga ilemmengdanto dagiti kinabaknangda, gapu ta tinarigagayan da unay dagiti puspusoda dagiti kinabaknang; ken gapu ta tinarigagayan da unay dagiti puspusoda dagiti kinabaknangda, ket ilemmengdanto dagiti kinabaknangdada inton aglibasda iti sanguanan dagiti kabusorda; gapu ta saanda nga ilemmeng ida para kaniak, nailunod dagitoy ken kasta met dagiti kinabaknangda; ket iti dayta nga aldaw masaplitandanto, imbaga ti Apo.

21 Kitaenyo, dakayo a tao iti daytoy dakkel a siudad, ket denggenyo dagiti balikasko; wen, denggenyo dagiti balikas nga imbaga ti Apo; ta kitaen, imbagana a nailunodkayo gapu kadagiti kinabaknangyo, ken kasta met a nailunod dagiti kinabaknangyo gapu ta tinarigagayan da unay dagiti puspusoyo dagitoy, ket saankayo a dimngeg kadagiti balikas ti nangted kadagitoy kadakayo.

22 Saanyo a malagip ti Apo a Diosyo kadagiti banag a nakabendisionanyo, ngem kanayon a malaglagipyo dagiti kinabaknangyo, saankayo man la agyaman iti Apo a Diosyo para kadagitoy; wen, saan a naiturong dagiti puspusoyo iti Apo, ngem napnokayo la unay ti panagpannakkel, ti kinapangas, ken ti kasta unay a kinatangsit, panagiinapal, panagririri, panagiginnura, panangidadanes, ken panangpapatay, ken amin a kita ti kinadangkes.

23 Gapu iti daytoy a rason nga imbilin ti Apo a Dios a nasken a mapasamak ti lunod iti daga, ken kasta met kadagiti kinabaknangyo, ket gapu daytoy kadagiti kinadangkesyo.

24 Wen, ay-ay pay dagitoy a tattao, gapu iti daytoy a panawen a dimteng, ta pagtalawenyo dagiti propeta, ket uyawenyo ida, ken bakalenyo ida kadagiti bato, ken papateyanyo ida, ken ar-aramidenyo ti amin a kita ti kinadangkes kadakuada, uray kas iti inaramidda idi un-unana a panawen.

25 Ket ita no agsasaokayo, ti ibagayo: No ti panagbiagtayo isu ti panagbiag dagiti ammatayo idi un-unana, saantayo koma a pinatay dagiti propeta; saantayo koma binakal ti bato ida, ken pinatalaw ida.

26 Kitaen nakarkarokayo pay ngem kadakuada; gapu ta inggana a sibibiag ti Apo, no umay ti maysa a propeta kadakayo ket ipakaammona kadakayo ti balikas ti Apo, a mangpaneknek kadagiti basbasol ken kinadangkesyo, makapungtotkayo kenkuana, ket patalawenyo isuna ken ikagumaanyo ti amin a kita ti wagas a mangpapatay kenkuana; wen, ibagayonto nga isu ket ulbod a propeta, ken isu ket managbasol, ken kukua ti sairo, gapu ta paneknekanna a dakes dagiti aramidyo.

27 Ngem kitaen, no umay ti maysa a tao kadakayo ket ti ibagana: Aramidenyo daytoy, ket awan ti dakesna; aramidenyo dayta ket saankayto agsagaba; wen, ibagannanto: Surotenyo iti kinapannakkel dagiti bukodyo a puspuso; wen, surotenyo dagiti napannakkel a panagkitayo, ket aramidenyo ti aniaman a tarigagayan ti puspusoyo—ket no umay ti maysa a tao kadakayo ket ibagana daytoy, awatenyo isuna, ket ibagayo nga isuna ket maysa a propeta.

28 Wen, itan-okyonto isuna, ket itedyonto kenkuana ti sanikuayo; itedyonto kenkuana ti balitokyo, ken ti pirakyo, ket kawesanyonto iti nangina a kawes; ket gapu ta agsasao kadagiti makaay-ayo a balikas kadakayo, ken ibagna a nasayaat ti amin, no kasta awanto ti masarakanyo a biddut kenkuana.

29 O dakayo a nadakes ken dakayo a nasubeg a henerasion; dakayo a nasubeg ​​ken dakayo a nasukir a tattao, kasano ti kabayag nga ipagarupyo nga anusannakayo ti Apo? Wen, kasano ti kabayag nga ipalubosyo ti bagbagiyo nga iturongnakayo dagiti maag ken bulsek a mangiturturong? Wen, kasano ti kabayag a pilienyo ti sipnget imbes a ti lawag?

30 Wen, kitaen, simgedden ti pungtot ti Apo kontra kadakayo; kitaen, inlunodna ti daga gapu iti kinadangkesyo.

31 Ket kitaen, dimtengen ti tiempo nga inlunodna dagiti kinabaknangyo, ta nagbalinda a nagalis, ta saanyo maiggaman ida; ket saanyo a mapagtalinaed ida kadagiti napanglaw a panagbiagyo.

32 Ket agpakaasikayonto iti Apo kadagiti napanglaw a panagbiagyo; ket awan pagmaayan ti panagpakaasiyo, gapu ta napasamakken ti kinalangalang kadakayo, ket sigurado ti pannakadadaelyo; ket isunton nga agsangit ken agtaguobkayonto iti dayta nga aldaw, imbaga ti Apo dagiti Pangen. Ket kalpasanna agdung-awkayto, ket ibagayo:

33 O ta nagbabawiak koma, ken saanko a pinatay dagiti propeta, ken binatok ida, ken pinatalaw ida. Wen, iti dayta nga aldaw ibagayonto: O ta nalagipmi koma ti Apo a Diosmi iti dayta nga aldaw nga intedna kadakami dagiti kinabaknangmi, ket iti dayta a tiempo saanda koma a nagbalin a nagalis ta mapukawmi ida; gapu ta kitaen, napukawen dagiti kinabaknangmi.

34 Kitaen, idissomi ti maysa nga alikamen ditoy ket iti kinabigatan awanen daytoy; ket kitaen, naala kadakami dagiti espadami iti aldaw a sinarakmi ida tapno usarenmi para iti pannakigubat.

35 Wen, inlemmengmi dagiti kinabaknangmi ket nagpukawda manipud kadakami, gapu iti lunod ti daga.

36 O ta nagbabawikami koma iti aldaw a naipalgak kadakami ti balikas ti Apo; ta kitaen nailunod ti daga, ket nagbalinen a nagalis ti amin a bambanag, ket saanmi a maiggaman ida.

37 Kitaen, napalawlawankami kadagiti demonio, wen, napalawlawankami kadagiti anghelna a nagkalikagum a mangdadael kadagiti kararuami. Kitaen, nakaro dagiti kinadakesmi. O Apo, saanmo kadi a mabalin nga isardeng ti pungtotmo kadakami? Ket daytoyto ti pagsasaoyo kadagidiay nga aldaw.

38 Ngem kitaen, napalabasen dagiti aldaw ti pannubokyo; intantanyo ti aldaw ti pannakaisalakanyo agingga nga agnanayon a naladaw unayen, ket siguardo ti pannakadadaelyo; wen, gapu ta kinalikagumyo iti amin a panagbiagyo para iti saanyo a magun-od; ket kinalikagumyo ti kinaragsak babaen iti panagaramid iti nadangkes, banag a kontra iti kinalinteg nga adda iti naindaklan ken Agnanayon nga Daulotayo.

39 O dakayo a tao iti daga, ta dumngegkayo koma kadagiti balikasko! Ket ikararagko nga isardeng koma ti pungtot ti Apo manipud kadakayo, ket agbabawikayo ken maisalakankayo.