Ti Libro ni Helaman

1 Ket ita kitaen, napasamak iti panangrugi ti maikauppat a pulo a tawen ti panagturay dagiti ukom kadagiti tattao ni Nephi, nangrugi ti nakaro a rigat kadagiti tattao dagiti Nephita.

2 Ta kitaen, ni Pahoran ket natayen, ket pimmanawen iti daga; ngarud nangrugi ti nakaro a panagsususik maipanggep iti no siasino ti rumbeng a mangala iti tugaw ti panangukom kadagiti agkakabsat, a lallaki nga annak ni Pahoran.

3 Ita dagitoy dagiti nagnagan dagiti makikompetensia para iti tugaw–pangukoman, isuda met dagiti nagpataud nga agsisinupiat dagiti tattao: ni Pahoran, ni Paanchi, ken ni Pacumeni.

4 Ita saan la a dagitoy dagiti lallaki nga annak ni Pahoran (agsipud ta aduda), ngem isuda dagitoy makikompetensia para iti tugaw-pangukoman; ngarud, nangpataudda iti tallo a pannakabingaybingay kadagiti tattao.

5 Nupay kasta, napasamak a nadutokan ni Pahoran nga agbalin a hepe nga ukom ken gobernador dagiti tattao ni Nephi babaen ti timek dagiti tattao.

6 Ket napasamak a ni Pacumeni, idi nakitana a saanna magun-od ti tugaw‑pangukoman, nakikaysa iti timek dagiti tattao.

7 Ngem kitaen, kasta unay ti pungtot ni Paanchi, ken dayta a paset dagiti tattao a nagtarigagay nga isu ti agbalin a gobernadorda; ngarud, dandanin nga allilawenna dagidiay tattao nga agrebelde kontra kadagiti kakabsatda.

8 Ket napasamak nga idi dandanin nga aramidenna daytoy, kitaen, natiliw, ket nasuig sigun iti timek dagiti tattao, ket nasentensiaan a matay; gapu ta nagrebelde ket inkagumaanna a dadaelen ti libertad dagiti tattao.

9 Ita idi nakita dagidiay tattao a nagtarigagay nga isu ti agbalin a gobernadorda a nasentensiaan a matay, ngarud nakapungtotda, ket kitaen, nangibaonda iti maysa a Kishkumen, uray pay iti tugaw-pangukoman ni Pahoran, ket pinatayda ni Pahoran bayat ti panagtugawna iti tugaw‑pangukoman.

10 Ket kinamat dagiti katulongan ni Pahoran; ngem kitaen, napardas unay ti panagtaray ni Kishkumen ta awan ti tao a makakamat kenkuana.

11 Ket napan isuna kadagiti nangibaon kenkuana, ket nagaramida amin iti maysa a katulagan, wen, nagsapatada babaen iti agnanayon a Namarsuada, a saanda ibaga iti asinoman a pinapatay ni Kishkumen ni Pahoran.

12 Ngarud, saan a nabigbig dagiti tattao ni Nephi ni Kishkumen, gapu ta nakapammarang isuna idi pinatayna ni Pahoran. Ket ni Kishkumen ken ti armado a grupona, a nakitulag kenkuana, nakitiponda kadagititattao, iti wagas a saanda amin a matakuatan; ngem kas kadagiti natakuatan ti kaadu kadagiti nasentensiaan iti ipapatay.

13 Ket ita kitaen, nadutokan ni Pacumeni, sigun iti timek dagiti tattao, nga agbalin a hepe nga ukom ken gobernador dagiti tattao, tapno agturay a kasukat ti lalaki a kabsatna a ni Pahoran; ket sigun daytoy iti kalinteganna. Ket naaramid amin dagitoy iti maikauppat a pulo a tawen ti panagturay dagiti ukom; ket adda pagpatinggaanna daytoy.

14 Ket napasamak nga iti maikauppat a pulo ket maysa a tawen ti panagturay dagiti ukom, nakaummong dagiti Lamanita iti saan mabilang nga armada dagiti lallaki, ket inarmasda ida kadagiti espada, ken kadagiti simetro ken bai, ken kadagiti pana, ken kadagiti kabal ti ulo, ken kadagiti kabal ti barukong, ken iti amin a kita ti kalasag iti tunggal kita.

15 Ket napanda manen tapno makigubat kontra kadagiti Nephita. Ket indauluan ida ti maysa a tao nga agnagan iti Coriantumr; ket maysa a kaputotan ni Zarahemla; ken maysa a simiasi manipud kadagiti Nephita; ken maysa a dakkel ken nabileg a tao.

16 Ngarud, impagarup ti ari dagiti Lamanita, nga agnagan iti Tubaloth, a lalaki nga anak ni Ammoron, a gapu ta maysa a nabileg a tao ni Coriantumr, kabaelanna a sarangten dagiti Nephita, babaen ti pigsana ken kasta met iti naindaklan a siribna, isu a babaen ti panangibaonna kenkuana magun-odna ti bileg a mansakup kadagiti Nephita—

17 Ngarud pinagpungtotna ida, ket inummongna dagiti soldadona, ket dinutokanna ni Coriantumr nga agbalin a dauloda, ket pinagmartsana ida nga agturong iti daga ti Zarahemla tapno makigubat kadagiti Nephita.

18 Ket napasamak a ta gapu iti kasta unay a panagsususik ken kasta unay a panagrigrigat ti gobierno, saanda a nakaipan kadagiti umdas a guardia iti daga ti Zarahemla; gapu ta impagarupda a saan a maitured dagiti Lamanita a mapan iti sentro dagiti dagada tapno rauten ti naindaklan a siudad a Zarahemla.

19 Ngem napasamak a talaga nga indauloan ni Coriantumr ti nagadu a soldadona a nagmartsa, ket nakapanda kadagiti agnanaed iti siudad, ket nakaparpardas unay ti panagmartsada isu nga awan ti tiempo dagiti Nephita a mangummong kadagiti armadada.

20 Ngarud pinatay ni Coriantumr ti agbambantay iti asideg ti pagserkan ti siudad, ket nagmartsa a kaduana ti intero nga armadana iti siudad, ket pinapatayda ti tunggal maysa a nakilaban kadakuada, isu a tinagikuada ti intero a siudad.

21 Ket napasamak a naglibas ni Pacumeni, ti hepe nga ukom, iti sanguanan ni Coriantumr, uray pay kadagiti pader ti siudad. Ket napasamak a tiniro ni Coriantumr bayat nga adda isuna iti pader, isu a natay. Ket kasta ti naggibusan ti panagbiag ni Pacumeni.

22 Ket ita idi nakita ni Coriantumr a kukuana ti siudad ti Zarahemla, ket nakitana a nakalibas dagiti Nephita iti sanguananda, ket napapatayda, ket naalada, ken naipanda iti pagbaludan, ken nagun-odna ti pannakatagikua ti kapigsaan a nasarekedkedan a lugar iti intero a daga, nagtured ti pusona isu a dandanin a napan tapno makilaban kontra iti amin a daga.

23 Ket ita saan a nagtalinaed isuna iti daga ti Zarahemla, ngem nagmartsa a kaduana ti dakkel nga armada, uray nga agturong iti siudad ti Bountiful; ta determinasionna ti mapan ken mangparmek babaen iti espada, tapno magun-odna dagiti amianan a paset ti daga.

24 Ket, ta impagarupna a ti sentro ti daga ti kadakkelan a pigsada, ngarud nagmartsa isuna, ta saan a nangted kadakuada iti tiempo nga ummongen ti bagbagida malaksid no iti babassit a grupo; ket iti kastoy a wagas rinautna ida ken pinatayna ida babaen iti espada.

25 Ngem kitaen, nangted iti dakkel a gundaway ken ni Moronihah daytoy a panagmartsa ni Coriantumr iti tengnga ti daga, iti laksid ti kinadakkel ti bilang dagiti Nephita a napapatay.

26 Ta kitaen, impagarup ni Moronihah a saan a maitured dagiti Lamanita a mapan iti sentro ti daga, ngem ketdi rautenda dagiti siudad nga adda kadagiti igid dagiti beddeng a kas iti inaramidda idi; ngarud binilin ni Moronihah a masapul a manteneren dagiti armadada dagidiay lugar iti igid dagiti beddeng.

27 Ngem kitaen, saan a nagbuteng dagiti Lamanita sigun iti tarigagayna, ngem napanda iti sentro ti daga, ket innalada ti kabesera a siudad nga isu ti siudad ti Zarahemla, ket nagmartsada kadagiti napateg a kabesera ti daga, papatayenda dagiti tattao iti dakkel a panangpapatay, kas met dagiti lallaki, babbai, ken ubbing, sakupenda ti adu a siudad ken adu a sarikedked.

28 Ngem idi natakuatan ni Moroniha daytoy, dagus nga imbaonna ni Lehi a kadua ti armada nga aglikmut kadagiti lugar tapno mangsabat kadakuada sakbay a makapanda iti daga a Bountiful.

29 Ket kasta ti inaramidna; ket sinabatna ida sakbay a nakapanda iti daga a Bountiful, ket nakigubatda kadakuada, isu a rinugianda ti nagatras nga agturong iti daga ti Zarahemla.

30 Ket napasamak a sinabat ida ni Moronihah iti panagatrasda, ket nakigubatda kadakuada, isu a nagbalin a nadara unay ti gubat; wen, adu ti napapatay, ket nasarakan met ni Coriantumr a maysa kadagiti naibilang a napapatay.

31 Ket ita, kitaen, saan a makaatras dagiti Lamanita iti aniaman a pagturongan, uray iti amianan, wenno iti abagatan, wenno iti daya, wenno iti laud, ta napalawlawanda iti tunggal pagturongan babaen kadagiti Nephita.

32 Ket kasta ti panangilumlom ni Coriantumr kadagiti Lamanita iti tengnga dagiti Nephita, isu a naipanda iti bileg dagiti Nephita, ket isu a mismo ti napapatay, ket simmuko dagiti Lamanita iti sidong dagiti Nephita.

33 Ket napasamak a sinakup manen ni Moronihah ti siudad ti Zarahemla, ket imbilinna a masapul a pumanaw iti daga dagiti Lamanita a naala a balud a sitatalna.

34 Ket kasta ti naggibusan ti maikauppat a pulo ket maysa a tawen ti panagturay dagiti ukom.