1 Ket napasamak iti maikapat a pulo ket dua a tawen ti panagturay dagiti ukom, kalpasan ti panangipasdek manen ni Moronihah iti kappia iti nagbaetan dagiti Nephita ken dagiti Lamanita, kitaen awan ti asinoman a mangpunno iti tugaw‑panangukom; ngarud nangrugi manen ti panagsusupiat kadagiti tattao maipapan iti no siasino ti mangpunno iti tugaw‑panangukom.

2 Ket napasamak a natudingan ni Helaman, a lalaki nga anak ni Helaman, nga agtugaw iti pangukoman, babaen ti timek dagiti tattao.

3 Ngem kitaen, naguray ni Kishkumen, a nangpapatay ken ni Pahoran, iti gundaway tapno patayen met ni Helaman; ket sinuportaran isuna ti armado a grupona, a nangaramid iti maysa a katulagan a masapul nga awan iti asinoman a makaammo iti kinadakesna.

4 Ta adda maysa a Gadianton, nga eksperto unay iti komunikasion, ken kasta met iti manangallilaw nga aramid, a mangidaulo iti nalimed nga aramid a pammapatay ken panagtakaw; ngarud nagbalin isuna a lider ti armado a grupo ni Kishkumen.

5 Ngarud gun-odenna ti paborda babaen ti saan a napasnek a panangidayaw kadakuada, ken kasta met ken ni Kishkumen, a no ikabilda isuna iti tugaw‑panangukom madutokan kadagiti kameng ti armado a grupona iti posision nga addaan bileg ken turay kadagiti tattao; ngarud inkagumaan ni Kishkumen a papatayen ni Helaman.

6 Ket napasamak nga idi adda isuna iti asideg ti tugaw‑panangukom tapno patayen ni Helaman, kitaen ti maysa kadagiti katulongan ni Helaman, nga adda iti ruar iti rabii, ken nakaala, babaen ti panaglimmo, iti pannakaammo kadagidi plano a naiplastar iti daytoy nga armado a grupo a mangpapatay ken ni Helaman—

7 Ket napasamak a nagkitada ken ni Kishkumen, ket imapakitana kenkuana ti pagilasinan; ngarud impakaammo ni Kishkumen kenkuana ti panggep ti tarigagayanna, a tarigagayanna nga iturongna isuna iti tugaw‑panangukom tapno mapapatayna ni Helaman.

8 Ket idi naammuan ti adipen ni Helaman ti panggep ti puso ni Kishkumen, ken no kasano a panggepna ti mangpapatay, ken kasta met a panggep dagiti amin a kameng ti armado a grupona ti mangpapatay, ken mangtakaw, ken manggun-od iti bileg, (ket daytoy ti nalimed a planoda, ken ti panagkukumplotda) kinuna ti katulongan ni Helaman ken ni Kishkumen: Mapantayo iti tugaw‑panangukom.

9 Ita napnek unay ni Kishkumen iti daytoy, gapu ta talaga nga impagarupna a matungpalna ti planona; ngem kitaen, bayat ti papanda iti tugaw-panangukom binagsol ti katulongan ni Helaman ni Kishkumen uray iti pusona, isu a natay nga awan ti panagsennaay. Ket nagtaray ket imbagana ken Helaman dagiti amin a bambanag a nakitana, ken nangngegna, ken naaramidna.

10 Ket napasamak a nangibaon ni Helaman iti armada a mangtiliw kadagitoy armado a grupo a mannanakaw ken nalimed a mammapatay, tapno maipatungpal kadakuada ti sentensia nga ipapatay sigun iti linteg.

11 Ngem kitaen, nagbuteng ni Gandianton idi naammuanna a saan a nagsubli ni Kishkumen ta amangan a natayen; ngarud binilinna ti armadana a suroten isuna. Ket sipapardas a nagtalawda manipud iti daga, babaen iti nalimed a dalan, nga agturong iti let-ang; ket isu nga idi nangibaon ni Helaman a mangtiliw kadakuada awan ti pakasarakan kenkuana.

12 Ket ad-adu pay ti maisarita maipapan kadaytoy a Gadianton kalpasanna. Ket iti kasta a nagpatingga ti maikapat a pulo ket dua a tawen ti panagturay dagiti ukom kadagiti tattao ni Nephi.

13 Ket kitaen, makitayonto iti maudi a paset iti daytoy a libro a pinaneknekan daytoy a Gadianton ti pannakaparmek, wen, dandani ti intero a pannakadadael dagiti tattao ni Nephi.

14 Kitaen saanko kayat a sawen ti maudi a paset ti libro ni Helaman, ngem kayatko a sawen ti maudi a paset ti libro ni Nephi, a nakaalaak amin a salaysay a naisuratkon.