1 Ket napasamak nga idi nagpatingga ti maikanem a pulo ket dua a tawen ti panagturay dagiti ukom, napasamak amin dagitoy a bambanag ket nagbalin a nalinteg a tattao ti kaaduan kadagiti Lamanitas, iti kasta nalab-awan ti kinalintegda ti kinalinteg kadagiti Nephita, gapu iti kinatibker ken kinatalgedda iti pammati.

2 Asipud ta kitaen, adu kadagit Nephita ti nagbalin a nasukir ken saan nga agbabawi ken nakaro ti kinadakes, iti kasta laksidenda ti balikas ti Dios ken amin a panangasaba ken panagipadto a napasamak kadakuada.

3 Nupay kasta, naaddaan iti naindaklan a ragsak dagiti tattao gapu iti pannakakomberte dagiti Lamanita, wen, gapu iti simbaan ti Dios, a naipasdek kadakuada. Ket naglalangen ti tunggal maysa kadakuada, ken nagragsak ti tunggal maysa kadakuada, ken naaddaanda iti naindaklan a ragsak.

4 Ket napasamak nga adu kadagiti Lamanita ti napan iti daga ti Zarahemla, ket indeklarada kadagiti tattao dagiti Nephita ti wagas ti pannakakomberteda, ket binalakadanda ida a maaddaan iti pammati ken agbabawi.

5 Wen, ket adu ti nangasaba nga addaan iti naindaklan unay a bileg ken turay, a nagbanag iti panagkumbaba ti adu kadakuada iti kaunggan ti kinapakumbaba, tapno agbalinda a napakumbaba a pasurot ti Dios ken ti Kordero.

6 Ket napasamak nga adu kadagiti Lamanita ti napan iti daga nga agpaamianan; ket napan met da Nephi ken Lehi iti daga nga agpaamianan, tapno mangasaba kadagiti tattao. Ket kasta a nagpatingga ti maikanem a pulo ket tallo a tawen.

7 Ket kitaen, adda kappia iti amin a daga, iti kasta napan dagiti Nephita iti aniaman a paset ti daga a kayatda, kadagiti Nephita man wenno kadagiti Lamanita.

8 Ket napasamak a napan met dagiti Lamanita iti sadinoman a lugar a kayatda, kadagiti Lamanita man wenno kadagiti Nephita; ket iti kasta naddaanda iti nawaya a pannakilangen iti tunggal maysa kadakuada, tapno gumatang ken aglako, ken tapno makagun-od iti gunggona, a mayannurot iti tarigagayda.

9 Ket napasamak a nagbalinda a nabaknang iti kasta unay, agpadpada dagiti Lamanita ken dagiti Nephita; ket naddaanda iti kasta unay a kinaadu ti balitok, ken ti pirak, ken ti amin a kita ti napateg a metal, agpadpada iti daga iti abagatan ken iti daga iti amianan.

10 Ita naawagan iti Lehi ti daga nga abagatan, ken ti daga iti amianan naawagan iti Mulek, a naawagan manipud iti lalaki nga anak ni Zedekias; ta inyeg ti Apo ni Mulek iti daga iti amianan, ken ni Lehi iti daga nga agpaabagatan.

11 Ket kitaen, adda amin a kita ti balitok kadagitoy a dua a daga, ken ti pirak, ken ti napateg a mineral iti tunggal kita; ket adda met dagiti naannad a trabahador, a nagtrabaho iti amin a kita ti mineral ket pinapinoda daytoy; ket iti kasta nagbalinda a nabaknang.

12 Naruay ti panagmulada kadagiti makan a bukbukel, agpadpada iti amianan ken iti abagatan; ket rimmang-ayda iti kasta unay, agpadpada iti amianan ken iti abagatan. Ket talaga nga immadu ken pimmigsada iti kasta unay iti daga. Ket nagtarakenda iti adu a dinguen ken arban, wen, adu nga urbon.

13 Kitaen sipipinget a nagtrabaho ken nagabel dagiti babbaida, ken nagaramidda iti amin a kita ti lupot, iti napino a lino ken lupot iti tunggal kita, tapno kawesanda ti kinalamolamoda. Ket isu a naglabas a sikakappia ti maikanem a pulo ket uppat a tawen.

14 Ket naaddaanda iti naindaklan a ragsak ken kappia iti maikanem a pulo ket lima a tawen, wen, adu a panangasaba ken adu a padto maipanggep ti mapasamakto. Ket kasta ti panaglabas ti maikanem a pulo ket lima a tawen.

15 Ket napasamak nga iti maikanem a pulo ket innem a tawen ti panagturay dagiti ukom, kitaen, napapatay ni Cezoram ti maysa a saan nga am-ammo a tao bayat ti panagtugawna iti tugaw‑pagukoman. Ket napasamak nga iti dayta met la a tawen, a ti lalaki nga anakna, a dinutokan dagiti tattao a kasukatna, ket napapatay met. Ket kasta ti panaglabas ti maika-innem a pulo ket lima a tawen.

16 Ket nangrugi manen a dimmakes dagiti tattao iti panangrugi ti maikanem a pulo ket pito a tawen.

17 Ta kitaen, napaut a binendisionan ida ti apo kadagiti kinabaknang ti lubong isu a saanda nasugsogan nga agpungtot, a makigubat, wenno iti pammapatay; ngarud rinugianda a pannakaseknan kadagiti puspusoda dagiti kinabaknangda; wen, rinugianda ti agkalikagum a makagun-od iti gunggona tapno maipangatoda ti bagbagida kadagiti dadduma; ngarud rinugianda ti nagaramid iti nalimed a pammapatay, ken agtakaw ken agsamsam, tapno makagun-odda iti gunggona.

18 Ket ita kitaen, dagidiay mammapatay ken mangsamsam ket maysa a grupo a binukel da Kishkumen ken Gadianton. Ket ita napasamak nga adu, uray kadagiti Nephita, ti karaman ti grupo ni Gadianton. Ngem kitaen, ad-adu ti bilangda kadagiti nadakdakes a paset dagiti Lamanita. Ket naawaganda a mannanakaw ken mammapatay ni Gadianton.

19 Ket isuda a talaga ti nangpapatay iti hepe nga ukom a ni Cezoram, ken ti lalaki nga anakna, bayat ti kaaddada iti tugaw-pagukoman; ket kitaen, saanda a nasarakan.

20 Ket ita napasamak nga idi naammuan dagiti Lamanita nga adda dagiti mannanakaw kadakuada kasta unay ti ladingitda; ket inusarda ti amin a wagas a kabaelanda a mangpapatay kadakuada manipud iti rabaw ti daga.

21 Ngem kitaen, ni Satanas ti nagsugsog kadagiti puspuso ti kaaduan dagiti Nephita, iti kasta nakikaysada kadagidiay grupo dagiti mannanakaw, ket inaramidda dagiti katulaganda ken sapatada, a mangsalaknib ken mangtaginayon iti tunggal maysa kadakuada iti ania man a narigat a kasasaad a pakaisagmakanda, a saanda nga agsagaba kadagiti panangpapatayda, ken panagsamsamda, ken panagtakawda.

22 Ket napasamak nga addaanda kadagiti pagilasinan, wen, dagiti nalimed a pagilasinan, ken dagiti nalimed a balikasda; ket adda daytoy tapno mailasinda ti maysa a kabsat a nagaramid iti katulagan, a no aniaman a kinadakes nga aramiden ti kabsatna ket masapul a saan a madangran ti kabsatna, wenno kadagidiay a kameng ti armado a grupo, a nakaaramid iti daytoy a katulagan.

23 Ngarud mabalinda ti mangpapatay, ken mangsamsam, ken agtakaw, ken agaramid iti panagbalangkantis ken amin a kita ti kinadakes, a maikontra kadagiti linteg ti pagilianda ken kasta met kadagiti linteg ti Diosda.

24 Ket siasinoman kadagiti kameng ti armado a grupoda a mangipakaammo iti lubong iti kinadakesda ken dagiti kinarimonda, nasken a maisaklang, saan a sigun kadagiti linteg ti pagilianda, ngem ketdi sigun kadagiti linteg ti kinadakesda, nga inted ni Gadianton ken Kishkumen.

25 Ita kitaen, isu dagitoy a nalimed a sapata ken katulagan nga imbilin ni Alma iti lalaki nga anakna a saan a mapan iti lubong, ta amangan a dagitoy ti agbalin a wagas a pakaigapuan iti pannakadadael dagiti tattao.

26 Ita kitaen, saan a naammuan ni Gadianton dagidiay nalimed a sapata ken katulagan manipud kadagiti kasuratan a naited ken ni Helaman; ngem kitaen, naipakammo iti puso ni Gadianton babaen iti dayta met laeng a persona a nangallukoy kadagiti immuna a nagannaktayo a mangan iti maiparit a bunga—

27 Wen, dayta met laeng a persona a nagaramid ti plano ken ni Cain, a no papatayenna ti kabsatna a ni Abel saanto a maammuan ti lubong. Ket nagaramid isuna iti plano ken ni Cain ken dagiti pasurotna manipud iti dayta a tiempo.

28 Ket kasta met a dayta met laeng a persona ti nangipakaammo iti puso dagiti tattao a mangipatakder iti torre nga umdas ti kangatona tapno makadanonda idiay langit. Ket dayta met laeng a persona ti nangallilaw kadagiti tattao a naggapu iti dayta a torre iti daytoy a daga; a nangiwaras kadagiti aramid ti kinasipnget ken kinarimon iti amin a rabaw ti daga, agingga a naguyodna dagiti tattao iti entero a pannakadadael, ken iti agnanayon nga impierno.

29 Wen, dayta met laeng a persona ti nangiyeg iti puso ni Gadianton nga itultuloyna latta ti aramid ti kinasipnget, ken ti nalimed a panangpapatay; ket inyegna daytoy manipud idi punganay ti tao uray agingga iti daytoy a panawen.

30 Ket kitaen, isu ti mangisungsong ti amin a basol. Ket kitaen, ituloyna dagiti aramidna iti kinasipnget ken nalimed a panangpapatay, ket itedna dagiti panggepda, ken dagiti sapatada, ken dagiti katulaganda, ken dagiti planoda iti nakaam-amak a kinadakes, iti agsasaruno a kaputotan sigun iti kabaelanna a tenglen dagiti puso ti annak ti tattao.

31 Ket ita kitaen, nagun-odna ti napigsa a panangtengngel kadagiti puso dagiti Nephita; wen, iti kasta nagbalinda a dakes unay; wen, ta ti kaaduan kadakuada ti nanagtallikud iti dalan ti kinalinteg, ket pinayatpayatanda dagiti bilin ti Dios, ken nagturongda kadagiti bukodda a dalan, ken nagaramidda para iti bagbagida kadagiti didiosen babaen iti balitokda ken pirakda.

32 Ket napasamak a dimteng kadakuada amin dagitoy a kinadakes iti las-ud ti saan nga adu a tawen, isu a ti kaaduan a paset daytoy ti dimteng kadakuada iti maikanem a pulo ket pito a tawen ti panagturay dagiti ukom kadagiti tattao ni Nephi.

33 Ket kimmaro ti kinadakesda iti maikanem a pulo ket walo a tawen met, a nagresulta iti nakaro a panagladingit ken panagleddaang dagiti nalinteg.

34 Ket ngarud makitatayo a nangrugi a maaw-awan ti pammati dagiti Nephita, ket kimmaro ti kinadakes ken kinarimonda, bayat a nangrugi nga immadu iti kasta unay dagiti Lamanita iti pannakaammo iti Diosda; wen, rinugianda a tungpalen dagiti alagaden ken bilinna, ken agbiag iti kinapudno ken kinalinteg iti sanguananna.

35 Ket ngarud makitatayo a nangrugi nga umadayo ti Espiritu ti Apo kadagiti Nephita, gapu iti kinadakes ken kinatangken ti puspusoda.

36 Ket ngarud makitatayo a rinugian ti Apo nga ibukbok ti Espirituna kadagiti Lamanita, gapu iti kinalaka ken kinatulokda a patien dagiti balikasna.

37 Ket napasamak a sinapul dagiti Lamanita ti armado a grupo dagiti mannanakaw ni Gadianton; ket inkasabada ti balikas ti Dios kadagiti kaaduan a dakes a paset kadakuada, iti kasta naan-anay ti panagsardeng ti kaadda dagitoy armado a grupo dagiti mannanakaw manipud kadagiti Lamanita.

38 Ket napasamak iti sabali a bangir, pinaadu ken sinuportaran ida dagiti Nephita, mangrugi iti nadakdakes a paset kadakuada, agingga a nasaknapda ti intero a daga dagiti Nephita, ken naallukoyda ti kaaduan a paset dagiti nalinteg agingga a naibabada ti bagbagida a patien dagiti aramidda ken makiraman kadagiti samsamda, ken makikadua kadakuada kadagiti nalimed a panangpapatay ken panagkukutsabada.

39 Ket ngarud nagun-odda ti kakaisuna a panangtarawidwid ti gobierno, isu a pinayatpayatan ken kinabil ken inabuso ken tinallikudanda dagiti napanglaw ken naemma, ken dagiti napakumbaba a pasurot ti Dios.

40 Ket ngarud makitatayo nga addada iti nakaam-amak a kasasaad, ken agluomda para iti agnanayon a pannakadadael.

41 Ket napasamak a kastoy a nagpatingga ti maikanem a pulo ket walo a tawen ti panagturay dagiti ukom kadagiti tattao ni Nephi.