Pwuhk en Seikop
Rien Nihpai Ohl

1 Pwe kilang, kedekedeo sounpar limeisek limau mwurin ahnsou me Lihai mwesel sang Serusalem; eri, Nihpai kihong ngehi, Seikop, kosonned ehu me pid duwen pileit tikitik kan, me mepwukat ntingdier powe.

2 Oh e kihong ngehi, Seikop, kosonned ehu me I pahn ntingihdi pohn pileit pwukat duwen ire kan me I medewe me keieu kesempwal; a I sohte pahnnohn sair, ihte ekiste, duwen poadoapoad en aramas pwukat me kahdaniki aramas en Nihpai.

3 Pwe e ndaiong ie me poadoapoad en nah aramas akan pahn ntingedi pohn nah pileit teiko, oh me I pahn kanaiehng pileit pwukat oh kihong kadaudokei kan, sang nan ehu dih kohlahng nan ehu dih.

4 Oh ma mie padahk me sarawi, de kaudiahl me kesempwal, de kokohp, a I pahn ntingihdi pohn pileit pwukat soahng kan me keieu kesempwal, oh ntingihdi uwen me kak koaros, me pid duwen Krais, oh pwe en wia kamwahupen aramas akan.

5 Pwehki [aht] pwoson oh pwunod laud, ni mehlel e kasansalongkiht duwen nait aramas akan, soahng kan me pahn wiawi ong irail.

6 Oh se pil alehdier kaudiahl tohto, oh ngehn en kokohp laud; eri, se esehier duwen Krais oh sapwellime wehi, me pahn kohdo.

7 Eri se kin pwerisekiong doadoahk rehn nait aramas akan, pwe sen kak kangoangehkin irail en kohdo rehn Krais, oh alehda sapwellimen Koht kalahngan, pwe irail en kak pidelong oh kommoaldi reh, pwe e en dehr kahukihla nan sapwellime engieng me irail sohte pahn pidelong, duwehte seri en Israel ko arail pelianda [Koht] nan sapwtehno oh kasongosonge.

8 Eri, se men Koht en ketin seweseikiht se en kak kangoangehki aramas koaros en dehr kahngohdiong Koht, pwe e de pahnengiengda, ahpw aramas koaros en kamehlele Krais, oh medemedewe sapwellime pwoulao, oh iang lokolongki sapwellime lohpwuo oh kanamenek en sampah; eri, ngehi, Seikop, koasonehdi me I pahn kapwaiada koasondi en riei ohl Nihpai.

9 Met Nihpai mahlahr, oh pwehki e esehier me e kereniongehr pahn mehla, ih eri kasarawiala ohl men en wia arail nahnmwarki oh kaun en nah aramas akan ahnsouo, nin duwen mwehin nanmwarki kan.

10 Pwehki aramas akan ar kin inenen poakpoake Nihpai, pwehki e wia soun silepe mwahu men ong irail, pwehki e kin kolokol nein Leipen kedlahso pwe en wiedoandoare irail, oh pwehki e kin pwerisek en doadoahk rahn koaros nan ah mour ong epwelparail—

11 Kahrehda, aramas akan mwahuki katakataman mwareo. Oh mehmen me kin wiahla arail kaun mwuri, aramas akan kin kahdankin irail, keriau en Nihpai, kesiluh en Nihpai, oh kadakadaur kohla, nin duwen mwehin nanmwarki kan; oh ih mwohmw wet me aramas akan kin ekerkinirail, sohte lipilipil ia udahn mwararail akan.

12 Kedekedeo Nihpai ahpw kepelsalehdala.

13 Met, aramas akan me sohte wia Mehn Leimen, re wia Mehn Nihpai; ahpw, irail kin kahdaniki Mehn Nihpai, Mehn Seikop, Mehn Sosep, Mehn Soram, Mehn Leimen, Mehn Lemuel, oh Mehn Ismael.

14 Ahpw ngehi, Seikop, sohte pahn kapisetikiedi ni adarail akan, ahpw I pahn ekerkinirailte Mehn Leimen kan me kin songosong en kawehla aramas en Nihpai kan, oh irail akan me kempoakepahki Nihpai, I pahn ekerkinirail Mehn Nihpai kan, de aramas en Nihpai, nin duwen mwehin nanmwarki kan.

15 Oh met kedekedeo aramas en Nihpai kan apw tepida keptakaila nan mohngiongarail kan, pahn keriau en arail nanmwarki, oh re tepida pereniki wiewia tiahk kan me suwed, me duwehte Depit en kawao me kin inengieng pwoudiki lih tohto oh pekehi tohto, oh pil sapwellime pwutak Solomon.

16 Ei, oh irail pil tepida rapahki kohl oh silper oh tepida aklapalapala.

17 Eri ngehi, Seikop, patohwan ong irail mahsen pwukat ni ahnsou me I padahk ong irail nan tehnpas sarawio, mwurinte ei alehdi pwukoah sang rehn Kauno.

18 Pwe ngehi, Seikop, oh riei pwutak Sosep kasarawihongehr samworo oh sounpadahk en aramas pwukat, sang ni pehn Nihpai.

19 Oh se kapwaiada aht pwukoah doadoahk ong Kauno, ni aht alehda pwukoah, me se pahn dipaniki dihp en aramas akan ma se sohte pahn padahkihong irail mahsen en Koht sang ni uwen aht kak koaros; eri, se kin pwerisek en doadoahk pwe ntahrail de kasaminehla aht likou kan; pwe ma soh, ntahrail pahn kasaminehla aht likou kan, oh se pahn sohte kak mwakelekel ni imwin rahno.