1 Met kilang, kedekedeo ngehi, Seikop, kalohk kehlail ong nei aramas akan, (ohekeite ei mahsen kan me I kak ntingihdi, pwehki doahk laud en ntingihdi aht lokaia kan pohn pileit) ahpw se ese me soahng kan me se ntingihdi pohn pileit kan pahn mihmihte;

2 Ahpw ma se sohte pahn kin ntingihdi soahng kan pohn pileit kan re uhdahn pahn ohla oh sohrala; ahpw se kin ntingihdi ekeite mahsen kan pohn pileit kan, me pahn kamarainih nait seri kan, oh pil riat me kesempwal akan, duwen kiht, de duwen arail pahpa kahlap ko—

3 Met soahng wet me se pereniki; oh se kin loaloapwoatohng aht doadoahk en ntingihdi mahsen pwukat pohn pileit kan, ni aht koapworopworki me riat kesempwal akan oh nait seri kan pahn alehdi ni kaping nan mohngiongarail kan, oh wadek pwe re en en kak esehla sang ni peren, duwen tepin arail nohno oh pahpa kan, a kaidehn nsensuwedki de mwamwahliki.

4 Pwe, iei kahrepe wet me se ntingihkihdi soahng pwukat, pwe irail en kak ese me se ese Krais, oh se kin koapworopworiki sapwellime lingan sounpar epwiki kei mwohn eh pahn ketido; oh kaidehn kiht kelehpw me koapworopworkihte sapwellime lingano, ahpw pil soukohp sarawi koaros me kohdo mwoht.

5 Kilang, irail kin kamehlele Krais oh pwongih Sahmo ni mware, oh se pil kin pwongih Sahmo ni mware. Oh ih kahrepe wet me se kin kolokolete kosonned en Moses, me kin kainenehiongpalingenaht reh; oh iei kahrepe wet me [kosonnedo] kasarawihlahr ong aht pahn mour pwung, duwehte me wiawihong Eipraam nan sahpwtehno en peikiong poahngok en Koht pwe en meirongkihla nah pwutak Aisek, me iei karasepen Koht oh sapwellime Iehroso.

6 Eri, se kin rapahki [mahsen en] soukohp akan, oh se kin alehdi kaudiahl tohto oh ngehn en kokohp; oh pwehki kadehde pwukat koaros, se ahneki koapworopwor, oh aht pwoson ahpw inenen kehlailla, lao se kak lokaiahte ni mwaren Sises ah tuhke kan pahn peikiong kiht, de nahna kan, de iloak en nansed akan.

7 Ahpw, Kauno Koht ketin kasalehiongehr kiht aht luwet akan pwe sen kak ese me sang ni sapwellime kalahngan, oh sang ni e ketikihdi pein ih rehn aramas akan, me kahrehda se kak ale manaman en wia soahng pwukat.

8 Kilang, sapwellimen Kauno doadoahk kan me lapalap oh kapwuriamwei. Ia uwen apwal en diar wasa loal en sapwellime rir kan; oh e pahn apwal ong aramas en diarada sapwellime koasoandi kan koaros. Oh sohte aramas emen kak ese sapwellime koasoandi kan e lao pahn ketin kasalehiong ih; eri, riei ko, kumwail dehr soikala kaudiahl kan en Koht.

9 Pwe kilang, sang ni manaman en sapwellime mahsen, aramas pwarada pohn sampah, iei sampah me pil kepikipikda sang ni manaman en sapwellime mahsen. Eri, ma Koht kak mahsente oh sampah ahpw miehda, oh mahsente oh aramas miehda, Eri, dahme e sohte pahn kak mahsenkihongete sampah, de pil soahng kan me wipen nin lime kan nin [sampah], nin duwen kupwure?

10 Eri, riei ko, kumwail dehr song en kaweid Kauno, ahpw ale kaweid sang reh. Pwe kilang, kumwail pein esehier me e kin ketin kaweid sang ni eripit, oh pwuhng, oh kalahngan lapalap, ong wiepen nin lime kan koaros.

11 Eri, riei ohl kesempwal akan, kumwail ehuong ih sang ni tomwpen Krais, sapwellime Iehroso, oh kumwail ahpw pahn iang iasada, nin duwen manaman en iasadao me sang rehn Krais, oh wiahla tepin wahn Krais ong Koht, ahneki pwoson, oh alehdi koapworopwor nan sapwellime lingan mwohn eh pahn ketin kasalehda pein ih ni paliwar.

12 Oh met, kempoakepai ko, kumwail dehr pwuriamweiki soahng pwukat me I ndaiong kumwail; pwe dahme kitail sohte pahn koasoaiahki tomwpen Krais, oh nantihong esehla mehlel duwen ih, oh pil nantihong esehla duwen iasadao oh sampah me pahn kohdo mwuhr?

13 Kilang, riei ko, mehmen me pahn kokohp, en kohpkihdadahme aramas akan kak wehwehki; pwe Ngehno kin ketin mahsen mehlel oh sohte likamw. Eri, e kin mahsanih soahng kan me uhdahn mie, oh soahng kan me uhdahn pahn mie; eri, soahng pwukat kin kasansal ong kitail ni sansal, ong komourpen palingenatail kan. Ahpw kilang, kitail sohte wia soun kadehde kelepw nan soahng pwukat; pwe Koht ketin mahseniongehr soukohp en kawa kan.

14 Ahpw kilang, mehn Suhs akan wia aramas keptakai kei; oh re kailongki mahsen sansal kan, oh kemehla soukohp akan, oh rapahki soahng kan me re sohte kak wehwehki. Eri, pwehki arail maskun, oh re maskunkilahr arail kilikilengla daulih kilello, re uhdahn pahnpwupwudi; pwe Koht ketikihsang irail me sansal akan, oh ketkihong irail soahng tohto me re sohte kak wehwehki, pwehki ihme irail inangih. Oh Koht ketin wia met pwehki arail inangih, pwe irail en dipekelekel.

15 Oh met ngehi, Seikop, alehdier kaweid sang Ngehno I en wia kokohp; pwe I kasawihada sang doadoahk kan en Ngehno me kin mih loaleiet, pwehki mehn Suhs akan arail pahn pwupwudi, irail pahn kasohwe takaio me re kak poahsoanki oh kokouda powe.

16 Ahpw kilang, nin duwen me ntingdi nan pwuhk sarawi kan, me takai wet pahn wiahla poahsoan keieu lapalap, oh kaimwseklahn poahsoan, oh poahsoan keieu mehlel, me mehn Suhs akan kak kokouda powe.

17 Oh met, kempoakepai ko, ia mwomwen soahng wet eh kak pweida, me mwurin arail kasohwe poahsoan mehlelo, arail pahn kak kokouda powe, pwe en kak wiahla arail takaien pwukakeimw?

18 Kilang, riei kempoakepahi ko, I pahn kasalehiong kumwail me rir wet; masohte mehkot me pahn kahrehiong ie Ien luwetala sang ei kin miniminiong Ngehno, oh dipekelekel pwehki sang ni ei pwunodikin kumwail mehlel.