1 Ahpw kilang, ngehi, Seikop, pahn koasoai ong kumwail akan me nan kapehd mwakelekel. [Kumwail] en tengeteng rehn Koht nan amwail madamadau, oh kapakap ong ih sang ni pwoson kehlail, oh e pahn ketikihong kumwail popohl nan amwail kahpwal kan, oh e pahn ketin karonge amwail anahn, oh kadaridihdo kalokopen irail akan me pahn song en kaweikumwailla.

2 Kumwail koaros me nan kapehd mwakelekel, kumwail sarada oh alehdi mahsen kaselel en Koht, oh kamadipwiki sapwellime limpoak; pwe ma amwail madamadau kan tengeteng, kumwail kak kohkohlahte.

3 Ahpw, meid suwed, meid suwed, ong kumwail me sohte nan kapehd mwakelekel, me samin mwohn silangin Koht rahn wet; pwe ma kumwail sohte pahn koluhla sahpwet pahn keriahla pwehki kumwail; oh Mehn Leimen kan, me sohte samin duwehte kumwail, mendahte arail riahkihla keria kalok ehu, irail pahn kalokeikumwail lao kumwail kamwomwomwla.

4 Oh ahnsou pahn lelledo mwadang, ma kumwail sohte pahn koluhla irail pahn sapwenikihla sapwamwail sahpw en sohso, oh Kauno Koht pahn kahluwahsang kumwail me mwahu kan.

5 Kilang, riamwail Mehn Leimen kan, me kumwail kin kailongki pwehki arail samin oh keria me kohdohng pohn kilirail kan, irail mwahu sang kumwail; pwe re saikinte monokehla kosonned en Kauno, me kohieng atail pahpao—me re pahn pwoudikihte lihtehmen, oh sohte pahn pekehikihda emen lih tohrohr, oh sohte tiahk en kamwahl pahn wiawi nanpwungarail.

6 Oh met, irail nantihong kapwaiada kosonned wet; eri, pwehki arail momouriki met, ni arail kin kapwaiada kosonned wet, Kauno Koht sohte pahn kamwomwirailla, ahpw pahn ketin kupwurmahk ong irail; oh ehu rahn irail pahn wiahla aramas meid pai kei.

7 Kilang, ohl pwopwoud kan poakohng arail werek kan, oh lih pwopwoud kan poakohng arail werek kan; ohl oh lih pwopwoud kan poakohng neirail seri kan; oh kahrepen arail soupwoson oh arail kailongkin kumwail pwehki sang wiewia suwed en arail pahpa kahlap ako; eri, ia uwen amwail mwahu sang irail, mwohn silangin Soun Kepikipik lapalapo?

8 Kumwail riei ko, I perki ma kumwail sohte pahn koluhkihla dipamwail kan, pohn kilirail ko pahn pwetepwet sang kilimwail kan, ni ahnsou me kumwail pahn kahluwahla mwohn mwoahl en Koht.

9 Eri, kosonned ehu I pahn kihong kumwail, me iei mahsen en Koht, me kumwail en dehr kauwe irail pwehki pohn kilirail toantoal; de pil kauwe irail pwehki arail samin, ahpw kumwail en tamataman pein amwail samin, oh tamataman me arail samino kohieng irail pwehki arail pahpa kahlap ako.

10 Eri, kumwail pahn tamataman noumwail seri kan, mwomwen amwail kansensuwediala mohngiongarail kan pwehki karasaras me kumwail kasalehiong irail; oh pil, tamataman me pwehki amwail samin, kumwail kakete kahrehiong noumwail seri kan ar pahn mehla, oh diparail akan pahn kohdahng pohmwail ni imwin rahno.

11 Kumwail riei ohl oko, kumwail rong mwahu ei kaweid kan; kapirada pepehm en palingenamwail akan; itik kumwail pwe kumwail en kak pwourda sang nan amwail meir kelik en mehla; oh kumwail sapwadada sang lokolok en ehl pwe kumwail de wiahla tohnleng kan en tepilo, oh lekideklahng nan lehn kisiniei oh suwepwel me iei mehla keriau.

12 Oh met ngehi, Seikop, ndahiongehr aramas en Nihpai kan soahng tohto, kaparkinirail nenek oh tiahk en ineng suwed kan, oh soahngen dihp teikan koaros, ndindahiong irail duwen kalokepen suwed pwukat.

13 Oh epwiki kis ehu en kemwekid enaramas pwukat, me tepidahr ngederla, sohte kak ntingdi pohn pileit pwukat; ahpw arail kemwekid tohto me ntingidi pohn pileit laud ko, oh arail mahwen kan, oh arail pingiping kan, oh mwehi en arail nanmwarki kan.

14 Pileit pwukat kahdaniki pileit kan en Seikop, oh re wiawihda sang pehn Nihpai. Oh I kaimwisekalahr koasoakoasoia duwen mahsen pwukat.