1 Ashtahuangari riqui, ñuca, Jacob, shungupi mapaillacunaman parlangapa munani. Diospi confiaichi shinlli yuyaicunahuan, paita ninan fehuan achil mañaichi, cangunapa llaquicunapi pai cushichingami, cangunamandapash pai shayaringa, urai cachamungapash alicaita picuna cangunata tucuchingapa mascajcunaman.

2 Oh tucui shungupi mapa illacuna, vichai alsaichi cangunapaj umacunata Diospaj shimita alicachishpa chasquichi, ninan munanayai jahuapi chasquichi paipaj juyaita; canguna na tucurinacaman ushanguichi, cangunapaj yuyaicuna shinlli cajpi.

3 Ashtahuangari, ay, ay, canguna shungupi mapa illa na cajcuna, maijan cai punlla mapa can Diospa ñaupapi; canguna arrepentirijpica alpa llaquichishca na canga cangunamanda; Lamanitacunaca, picuna cangunashna na mapacuna can, shina cajpipash paicuna llaquichishca can shuj jatun llaquihuan, cangunata llaquichinga tucuchingacaman.

4 Punllaca ñapash shamun, canguna na arrepentirijpica paicuna charinga cangunapaj chasquina alpata, Apunchij Dios anchuchinga ali rurajcunata cangunamanda.

5 Riqui, Lamanitacuna cangunapaj huauquicuna, picunata millanayachinguichi paicunapaj mapacunamanda paicunapaj aicha caracunapi llaquichishcamandapash, cangunata yali ali rurajcuna can; Apunchijpaj rurachunbacha saquishcacunata, ñucanchipaj taitaman cushca carca paicuna na cungashcachu—paicuna shujlla huarmita charina carca, chaishu huarmicunataca nishujta, paicunapura na fornicacióncunata rurangachu.

6 Cunan, cai rurachunbacha saquishcata paicuna pactachingapa atirin; chaimanda, paicunapaj ricuicunamanda, cai rurachunbacha saquishcacunata alichimanda, Apunchij Dios paicunata na tucuchinga, ashtahuangari paicunata llaquinga; shuj punlla paicuna shuj achilyachishca llactapuracunaman tigranga.

7 Riqui, paicunapaj cusacuna paicunapaj huarmicunata juyan, paicunapaj huarmicunapash paicunapaj cusacunata juyan; paicunapaj cusacunapash paicunapaj huarmicunapash paicunapaj huahuacunata juyan; paicunapaj na crina paicunapaj cangunata millanayaipash paicunapaj taitacunapaj na ali ruraicunamanda can; chaimanda, mashna paicunata yali ali canguichi, jatun Rurajpaj ricuipi?

8 Oh ñuca huauquicuna, ñuca manllani canguna juchacunamanda na arrepentirishpalla paicunapaj aicha caracuna ashtahuan yura canga cangunapata yali, imaura canguna apamushca cajpi paicunahuan Diospaj jatun tiarina ñaupaman.

9 Chaimanda, shuj rurachunbacha saquishcata cangunaman cuni, imami Diospaj shimi, canguna ama ashtahuan paicunata plituchun paicunapaj yanalla aicha caramanda; paicunapaj mapallacunamanda ama plituchun; ashtahuangari yarichi cangunapaj mapallacunata, yarichi paicunapaj mapallacunaca paicunapaj taitacunamanda shamurca.

10 Chaimanda, yarichi cangunapaj huahuacunata, imashna llaquichishca canguichi paicunapaj shungucunata paicunapaj ñaupapi ricuchita churashcamanda; yarichipash cangunapaj mapallacunamanda, cangunapaj huahuacunata apai ushanguichi tucuchinaman, paicunapaj juchacuna cangunapaj umacunapi mirashca canga chai tucuri punllapi.

11 Oh ñuca huauquicuna, uyaichi ñuca shimicunata; rijchachichi tucui cashcacunata cangunapaj almacunamanda; chaspirichi rijchari ushangapa huañuipaj puñuimanda; ucu pachapaj llaquicunamanda cacharirichi ama ayapaj ángelcunaman tigranguichi, nina azufrepash cochaman shitai tucungapa maijan cati huañui can.

12 Cunan ñuca, Jacob, Nefipaj llactapuracunaman ashtahuan cai cuzascunata parlarcani, paicunata cayachishpa fornicaciónmanda mapata ruraicunamandapash, tucui laya juchamandapash, paicunaman nishpa caicunamanda manllanayai ima shamunamanda.

13 Cai llactapuracunapaj rurashcacuna patsajmanda shujpash na quilcashcachu cai jirru fangacunapi; maijan cunan taucapacha cai callarin, ashtahuangari tauca paicunapaj rurashcacuna quilcashca can shujta yali jatun jirru fangacunapi, paicunapaj macanajuicuna, paicunapaj fiñanajuicuna, paicunapaj jatun mandajcunapaj reinadocunapash.

14 Cai jirru fangacuna Jacobpaj jirru fangacuna nishpa shutichishca can, chaicuna rurashca carca Nefipaj maquihuan. Ñuca tucuchini cai shimicunata parlashpa.