1 Yalishca jipa tauca huatacuna yalishca jipa, Nefipaj llactapuracunaman shuj runa shamurca, paipaj shuti carca Sherem.

2 Yalishca jipa llactapuracunaman yachachi callarirca, paicunaman villashpa ima Cristo na tiangachu nishpa. Pai llactapuracunaman tauca cuzascunata yachachirca uyanayaita llullashpa; caita pai rurarca Cristopaj yachajuicunata urmachingapa.

3 Pai trabajarca utsialla llactapuracunapaj shungucunata pandachingapa, shinashpa tauca shungucunata pandachirca; pai yachashpata ñuca, Jacob, shamuna Cristopi feta charijta, pai tauca mascarca imashna ñucahuan tuparinata.

4 Pai yachajushca carca, shinamanda shuj alipacha yachaita llactapuracunapaj shimirimaimanda charirca; chaimanda, pai ashtaca uyanayai llullanacunata, parlangapa ashtaca ushaitapash charirca, ima shina ayapaj ushaihuan.

5 Paica shuyaita charirca femanda ñuca pandarichun, masqui tauca achil ricushcacunata tauca cuzascunatapash maijanmanda ñuca rijsishca carcani; ciertopacha ángelcunatapash ricushca carcani, paicuna ñucata achil yachachishca carca. Uyashcapash carcani Apunchijpaj shimita parlashca paipaj shimihuanbacha, huaquinbi huaquinbi; chaimanda, ñuca na pandari ushasha.

6 Yalishca jipa ñucapaman shamurca, cashna laya parlahuarca, nishpa: Huauqui Jacob, ñuca tauca mascashcani imashna tuparinata canhuan parlangapa; uyashcani yachanipash ashtaca puringui, yachachishpa quishpiringapa villaicuna nishcacunata, nacashpaca Cristopaj yachajuicunata.

7 Can pandachishca cangui tauca cai llactapuramanda shinamanda paicuna huaglichin Diospaj ali ñanda, Moiséspaj catichunbacha saquishcacunata na alichin caimi ali ñan can; Moiséspaj catichunbacha saquishcacunataca tigrachingui adoraciónman shuj causajta pimi shamunga ningui cunanmanda tauca patsaj huatacunapi. Cunan riqui, ñuca, Sherem, villani cai can na ali shimihuan rimana; pipash na yachan cashna cuzascunata; pipash na villai ushan shamuna cuzascunata. Cashna layapi Sherem fiñajurca ñucahuan.

8 Ashtahuangari riqui, Apunchij Dios ñuca almapi paipaj Espírituta jicharca, cashna paita pandachircani tucui paipaj shimicunapi.

9 Paita nircani: Na ninguichu Cristo shamunata? Pai nirca: Shuj Cristo tiajpica, paita na nimanllu; ashtahuangari ñuca yachani Cristo na tianllu, na tiashcapashchu, nimaurapash na tiangachu.

10 Paita nircani: Cringuichu achil quilcashcacunata? pai nirca, Ari.

11 Paita nircani: Shinaca caicunata na yuyaipi chasquishcanguichu; caicunaca ciertopacha Cristomanda testifican. Riqui, canda nini na maijan achil villachijcunapash quilcashca can, achil villachishca can, paicuna Cristomanda na parlashpaca.

12 Caica na tucuilla can—ñucaman ricuchishca can, uyashcani ricushcanipash; ñucaman ricuchishcapash can Espíritu Santopaj ushaihuan; chaimanda, ñuca yachani shujpa juchacunamanda huañuna na tiashca cajpica tucui runacuna chingashca canman.

13 Yalishca jipa pai nihuarca: Shuj señalta ricuchihuai cai Espíritu Santopaj ushaihuan, maijanmanda can ninanda yachangui.

14 Paita nircani: Pita cani ñuca Diosta tentangapa quiquinman ricuchichun shuj señalta imapi can yachangui cierto cajta? Shina cashpapash na ninguirami caita, ayapaj caimanda. Shina cajpipash, ñuca munashca ama rurashca cachun; ashtahuangari Dios chugrichijpica shuj señal cachun pai ushai charijta, ishcandi jahua pachapi cai alpapipash; Cristo shamunamandapash. Quiquinba munai, Oh Apunchij, rurashca cachun, na ñucapa.

15 Yalishca jipa imaura ñuca, Jacob cai shimicunata parlashca cajpi, Apunchijpaj ushai paipaman shamurca, cashna pai alpaman urmarca. Yalishca jipa tauca punllacunata micuchishca carca.

16 Yalishca jipa llactapuracunaman pai nirca: Caya punlla tandanajuichi, ñuca huañugrini; chaimanda llactapuracunaman parlangapa munani nara huañushpallata.

17 Yalishca jipa caya punlla ashtacapacha tandanajushcacuna tandanajushca carca; pai parlarca punchalla na pandanalla paicunata ima cuzascunata pai yachachishcacunatapash na nirca, Cristota villarca, Espíritu Santopaj ushaitapash, ángelcunapaj achil yachachitapash.

18 Paicunaman punchalla na pandanalla parlarca, pai pandachishca cashcamanda ayapaj ushaihuan. Parlarca ucu pachamanda, mana tucurinamanda, mana tucurina llaquichinamandapash.

19 Pai nirca: Ñuca manllani na perdonanalla juchata rurashcani, Diosta llullashcani; Cristota na nishcani, nircani achil quilcashcacunata crini; caicuna paimanda ciertopacha testifican. Diosta shina llullashca caimanda ninanda manllani ñucapa cashna cai manllanayai canata; ashtahuangari Diosman ñuca villani.

20 Yalishca jipa imaura pai cai shimicunata nishca cajpica ashtahuan na ni usharcachu, pai espírituta curca.

21 Ashtacapacha tandanajushca ricushca cashpa cai cuzascunata imaura pai parlarca ña cugrijushpa espírituta, paicuna ninanda manllarishca carca; cashna Diospaj ushai paicunaman uriajumurca, paicuna yali tucushca carca shinamanda alpaman urmarca.

22 Cunan, cai cuzas ñuca, Jacobpa, sumaj carca, ñuca mañashca carcani ñuca Taitata pimi jahua pachapi carca; pai uyashca carca ñuca mañaita ñuca achil mañaitapash pactachihuarca.

23 Yalishca jipa sumaj causai Diospaj juyaipash cutinlla apamushca carca llactapuracunaman; paicuna achil quilcashcacunata mascarca, na alita ruraj runapaj shimicunata ashtahuan ñana cazurca.

24 Yalishca jipa tauca imashapash canacunata yashca carca tigrachingapa cutinlla apamungapa Lamanitacuna na llullata yuyaipi chasquichun; ashtahuangari tucui yanga carca, paicunaca cushijurca macanajuicunapi yahuarta jicharicunapipash, paicuna shuj mana tucurina na ricunayachinata ñucanchi, paicunapaj huauquicunaman, ricuchirca. Catilla paicuna mascarca paicunapaj macanajunacunapaj ushaihuan ñucanchita tucuchingapa.

25 Chaimanda, Nefipaj llactapuracuna shinlliyarca paicunapaj macanajunacunahuan, tucui paicunapaj ushaihuan, Diospi crishpa paicunapaj quishpichina rumipi; chaimanda, paicuna chai horascaman, paicunapaj na ricunayachijcunapa mishajcuna cai usharca.

26 Yalishca jipa ñuca, Jacob, rucuyai callarircani; cai llactapuracunapaj tandachishpa quilcashcacuna cutishuj Nefipaj jirru fangacunapi quilcashcapi apamun, chaimanda, ñuca tucuchini cai tandachishpa quilcaita, villashpa ñuca quilcanita ñuca ali yachaihuan, nishpa punllacuna yalishca ñucanchihuan, shinallata ñucanchi causaicunapash yalishca can shuj muscui laya canshna, ñucanchi cashcanchi shujllacuna shuj solemne llactapuracuna, yanga purijcuna, Jerusalénmanda shitai tucushca, llaqui yalicunapi nacirishcacuna, shuj jichushca pambapi, ñucanchi huauquicunahuan na ricunayachi tucushcapash, imami macanajuchirca pliturichircapash; chaimanda, ñucanchi causai punllacunapi llaquiyanchi.

27 Ñuca, Jacob, ricurcani ñuca ñalla pambaj pushtuman uriajunata; chaimanda, ñuca churi Enósman nircani: Japi cai jirru fangacunata. Paiman cuzascunata nircani ñuca huauqui Nefi mandahuashcata, mandashcacunata pai cazusha nircapacha. Tucuchini ñuca quilcaicunata cai jirru fangacunapi, quilcashca ashalla cashca; liijcunata cayacaman nini, shuyani tauca ñuca huauquicuna ñuca shimicunata liichun. Huauquicuna, cutin ricuringacaman.