1 Riqui, ñuca huauquicuna, nachu canguna yaringuichi Zenós achil villachijpa shimicunata liishca cajta, pai parlarca Israelpaj huasimanda, nishpa:

2 Uyaichi, Oh canguna Israelpaj huasimanda, ñucapaj shimicunata uyaichi, Apunchijpaj shuj achil villachij.

3 Riqui, Apunchijca shina nin, ñuca quiquingunata parijashpa ricuchisha, Oh Israelpaj huasi, shuj tarpushca olivo quiruhuan, caita shuj runa japirca micuchirca paipaj uvas chagrapi; cai viñarca, rucuyarca, chaqui callarirca.

4 Yalishca jipa amo uvas chagramanda llujshirca, ricurca paipaj olivo quiru chaqui callarijta; pai nirca: Cuchusha, muyundi allasha, micuchisha, imashpapash viñaj, llullu malquicuna llujshimuipapash, ama huañuchun.

5 Yalishca jipa pai cuchurca allarca muyundi, micuchircapash paipaj shimi nishcashna.

6 Yalishca jipa tauca punllacuna jipa huaquin viñai callarirca, viñaj llullu malquicuna; ashtahuangari, ali jatun yura jahua huañui callarirca.

7 Yalishca jipa uvas chagrapaj amo ricurca, pai nircapash paipaj sirvij runata: llaquiyanimi cai yurata chingachinamanda; chaimanda, ri fiti malquicunata shuj sacha olivo quirumanda, caiman apamui; ñucanchi fitishun jatun malquicunata chaqui callarinajujta, ninaman shitashun rupachun.

8 Riqui, uvas chagrapaj Apunchij nirca, japisha tauca cai viñaj llullu malquicunata, maipi ñuca munashcapi ali yurapi malquicunata quimichishpa churasha; imapash na canllu shina cai yurapaj sapi huañujpica, ñuca alchishpa chari ushangapa fucushcata ñucapallata; chaimanda, cai viñaj llullu malquicunata japisha, maipi ñuca munashcapi ali yurapi malquicunata quimichishpa churasha.

9 Sacha olivo quirumanda malquicunata japi, ali yurapi malquicunata quimichishpa churai chaipa randi; caicunata ñuca cuchushcata ninaman shitasha rupachisha, ama ñuca uvas chagrata huaglichichun.

10 Yalishca jipa uvas chagrapaj Apunchijpaj sirvij runaca rurarca uvas chagrapaj Apunchij shimi nishcata, ali yurapi malquicunata quimichishpa churarca sacha olivo quirupaj malquicunata.

11 Uvas chagrapaj Apunchij muyundi allachirca, cuchuchirca, micuchircapash, paipaj sirvij runata nishpa: Llaquiyanimi cai yurata chingachinamanda; chaimanda, imashpapash sapicunata ñucapallata alchishpa chari ushaipapash cani ama huañuchun ñuca alichisha ñucapallata, cai cuzasta rurashcani.

12 Chaimanda, ri; ricui, yurata micuchi, ñuca nishcashna.

13 Caicunata ñuca uvas chagrapaj urai uraipipacha churasha, maipi ñuca munashcapi, caica quiquinbaca imapash na canllu; caita rurani yurapipacha viñashca malquicunata alchishpa chari ushangapa; fucushcatapash ñucapa alichingapa na fucuj punllacunapa, llaquiyanimi cai yurata caimanda fucushcatapash chingachinamanda.

14 Yalishca jipa uvas chagrapaj Apunchij paipaj ñanda rirca, tarpushca olivo quirupaj chaipipacha viñashca malquicunata pacarca uvas chagrapaj urai uraipipacha, shujcunata shuj pushtupi cutishujcunata cutishuj pushtupi, pai munashcahuan munashcauraspash.

15 Tauca punllacuna yalishca jipa, uvas chagrapaj Apunchijca paipaj sirvij runata nirca: Shamui, uvas chagraman urai jacu, uvas chagrapi trabajai ushangapa.

16 Yalishca jipa uvas chargrapaj Apunchij, sirvij runapash: urai rirca uvas chagrapi trabajangapa. Yalisha jipa sirvij runaca paipaj amota nirca: Riqui, caita ricui: yurata ricui.

17 Yalishca jipa uvas chagrapaj Apunchij ricurca yuratapash ricurca maipimi sacha olivo malquicunata quimichishpa churashca carca; cai viñashca carca fucui callarishcapash carca. Pai ricurca cai ali carca; caimanda fucushca olivo yuramandapacha fucushcahuan rijcha carca.

18 Paipaj sirvij runata nirca: Riqui, sacha yurapaj malquicuna sapimanda humedadta japishca, chaimi sapica ashtaca shinllicaita mirachishca cashca; sapi ashtaca shinllicaimanda sacha malquicuna tarpushca fucushcata cushca can. Cunan, ñucanchi cai malquicunata na quimichishpa churanchiman carca, yuraca huañunma carca. Cunan, riqui, yura fucuchishca ashtaca fucushcata alichisha; ñucapa cai fucushcacunata alichisha na fucuj punllacunapa.

19 Yalishca jipa uvas chagrapaj Apunchij sirvij runata nirca: Shamui, jacu uvas chagrapaj urai uraimanbacha, ricugrishun olivo yurapipacha viñashca malquicunapash nacha ashtaca fucurcapash, ñucapa cai fucushcacunata alichisha na fucuj punllacunapa.

20 Yalishca jipa paicuna rirca maipi amo olivo yurapipacha viñashca malquicunata pacashcaman, sirvij runata nirca: Caicunata riqui; callarica ashtaca fucushcacunata cushcarca; caipash ali carca. Sirvij runata nirca: Fucushtaca japi, ñucapa alchishpa chari ushangapa na fucuj punllacunapa; riqui, pai nirca, micuchishcani tauca punllacunata, chai ashtaca fucushcacunata cushca.

21 Yalishca jipa sirvij runa paipaj amota nirca: Imashnata shamurcangui caiman cai yurata tarpungapa, nacashpaca cai yurapa malquita? Riqui, cai pushtuca tucui uvas chagrapaj pambamanda yali napacha fucuj carca.

22 Uvas chagrapaj Apunchijca paiman nirca: Ñucata ama villahuai; yacharcanimi chaica na fucuj pushtu cajta; chaimanda, ñuca quiquinda nircani, ñuca micuchishcani tauca punllacunata, can ricungui ashtacata fucushcacunata cushca.

23 Yalishca jipa uvas chagrapaj Apunchij paipaj sirvij runata nirca: Caiman ricui; riqui cutishuj malquitapash tarpushca cani; can yachangui cai pushtucari callaritapash yali napacha fucuj carca. Ashtahuangari, riqui yurata. Ñuca micuchishcani tauca punllacunata, ashtaca fucushcacunata cushca; chaimanda, tandachi, alichi na fucuj punllacunapa, ñucapallata alchishpa charingapa.

24 Yalishca jipa uvas chagra Apunchij paipaj sirvij runata nirca: Caiman ricui, cutishuj malquitapash ricui, ñuca tarpushcata; riqui micuchishcanipashmi; fucushcata cushcapashmi.

25 Sirvij runata nirca: Caiman ricui tucuritapash ricui. Riqui, caita tarpurcani ali pamba pushtupi; micuchishcani tauca punllacunata, tarpushca fucushcata yurapi shujlla pushtupi cushca, sacha fucushcata cutishuj pushtupi cushca; riqui, ñuca micuchishcani cai yurata cutishuj yuracunatashnallata.

26 Yalishca jipa uvas chagrapaj Apunchij sirvij runata nirca: Fiti malquicunata na ali fucushcata cushcacunata, ninaman shitai.

27 Ashtahuangari, sirvij runaca nirca: Fitishun, allashun muyundi micuchishunbash ashtahuan, quiquinman ali fucushcata cuipapash, na fucuj punllacunapa alichingui.

28 Yalishca jipa uvas chagrapaj Apunchij, uvas chagrapaj Apunchijpaj sirvij runapash tucui mishqui fucuchina yuracunata uvas chagramanda micuchirca.

29 Yalishca jipa tauca punllacuna yalishca carca, uvas chagrapaj Apunchij paipaj sirvij runata nirca: Shamui, uvas chagraman urai jacu, ñucanchi uvas chagrata cutin trabajai ushangapa. Riqui, punlla chayamujun, tucuri ñalla shamun; chaimanda, ñucapa alichina cani na fucuj punllacunapa.

30 Yalishca jipa uvas chagrapaj Apunchij sirvij runapash uvas chagraman urai rirca; yuraman chayarca chai yurapipacha viñashca malquicunata fitishca carca, chaipica sacha malquicunata quimichishpa churashca carca; riqui tucui laya fucushcacunata yuraca cargashca carca.

31 Yalishca jipa uvas chagrapaj Apunchij fucushcata malirca, tucui laya taucamanda illacaman. Uvas chagrapaj Apunchij nirca: Riqui, cai tauca punllacunata micuchishcanchi cai yurata, ñucapa alichishcani ashtaca fucushcacunata na fucuj punllacunapa.

32 Ashtahuangari riqui, cai punlla ashtaca fucushcata cushca, maijanbash na ali tian. Riqui, tucui laya na ali fucushcalla tian; ashtahuangari, tucui ñucanchi trabajo nimapa na sirvin; cunan llaquiyanimi cai yurata chingachinamanda.

33 Uvas chagrapaj Apunchij sirvij runata nirca: Imata cai yuramanda rurashun, cutin ali fucushcata ñucapa alchishpa charingapa?

34 Sirvij runa paipaj amota nirca: Riqui, quiquin sacha olivo quirumanda malquicunata quimichishpa churashcamanda caicuna sapicunacaman micuchishca can, causajcunara can na huañushcapash canllu; chaimanda ricushcangui caicuna alira cajta.

35 Yalishca jipa uvas chagrapaj Apunchij paipaj sirvij runata nirca: Yura ñucapaj nimapa na sirvihuan, sapicunapash nimapa na sirvihuan na ali fucushcacunata cunajushcamanda.

36 Shina cajpipash, ñuca yachani sapicunaca alicuna can, ñuca munashcapami paicunata alchishpa charishca cani; paicunapaj shinllipacha caimanda cunangaman ali fucushcacunata cushca can sacha malquicunamanda.

37 Ashtahuangari riqui, sacha malquicuna viñashca can sapicunapash ninanda mirashca; sacha malquicuna ninanda mirashca sapicunatapash yalishpa chaimi na ali fucushcacunata cushca can; ashtaca na ali fucushcacunata cuimanda huañui callarin; ñalla ismui callaringa, ninaman shitai tucunga, imatapash ñucanchi rurashpalla caita alchishpa charingapa.

38 Yalishca jipa uvas chagrapaj Apunchij paipaj sirvij runata nirca: Jacu urai rishun uvas chagrapaj urai uraipacha pushtucunaman, ricushunbash yurapipacha viñashca malquicunapashchu na ali fucushcacunata cushca.

39 Yalishca jipa paicuna urai rirca uvas chagrapaj urai uraipacha pushtucunaman. Yalishca jipa paicuna ricurca yurapipacha viñashca malquicunamanda fucushcacunapash huagliman tigrashca carca; ari, callari, catipash tucuripash; paicuna tucuilla huagliman tigrashca carca.

40 Tucuriman sacha fucushca yalishca carca chai yurapaj maipi ali fucushcata cushca pushtuta, shinamanda malquica anguyashpa chaquirca.

41 Yalishca jipa uvas chagrapaj Apunchij huacarca, sirvij runata nirca: Imatata ashtahuan rurai ushaiman carcani ñuca uvas chagrata?

42 Riqui, yacharcani uvas chagrapaj tucui fucushcacuna, caicunalla na, huagliman tigrashca carca. Cunan caicuna shuj viaje ali fucushcata cushcacunapash huagliman tigrashca; cunan tucui yuracuna ñuca uvas chagramanda nimapa na sirvin ashtahuangari cuchushpa ninaman shitashca cangapa.

43 Riqui cai tucuri, caipaj malqui anguyashca carca, ali fucuj alpapi tarpurcani; ari, maijanmi tucui pambapaj shuj pushtucunamanda ajllashca ñuca uvas chagramanda.

44 Can ricurcangui cuchurcanipash maijan cai alpa pushtuta huaglichijta, cai yurata tarpungapa chaipa randi.

45 Can ricurcangui chaimanda shuj pushtu ali fucushcata cushca carca, shuj pushtuca na ali fucushcata cushca carca; malquicunata na fitishpa ninaman shitaimanda, riqui, caicuna yalishcacuna can ali malquita chaimanda cai chaquishca can.

46 Cunan, riqui, masqui ñucanchi uvas chagraman tucui minishtishcata cujpipash, yuracuna huagliman tigran, na ali fucushcata cunllu; ñuca shuyarcani alchishpa charingapa, caimanda fucushcata ñucapa alichingapa na fucuj punllacunapa. Ashtahuangari, riqui, caicuna sacha olivo quirushna tigrashca can, imapapash na valij, ashtahuangari cuchushpa ninaman shitashca cangapa; Llaquinayanmi caicuna chingachinamanda.

47 Ashtahuangari imatata ashtahuan rurai ushaiman carcani ñuca uvas chagrata? casilla saquishcanichu ñuca maquita, ama micuchingapa? Na, micuchishcanimi, allashcanimi muyundi, cuchushcanimi, huanushcanimi; ñalla tucui punlla ñuca maquita chutashcani, tucurica ña chayamun. Llaquinayanmi tucui cai yuracunata ñuca uvas chagramanda cuchuna caimanda, ninaman shitashpa rupachina caimanda. Pita ñuca uvas chagrata huaglichishca?

48 Yalishca jipa sirvij runa paipaj amota nirca: Nachu quiquinba uvas chagrapaj vichai alsari—nacha malquicuna ali sapicuna cashcata yalirca? Malquicuna sapicunata yalishca caimanda, riqui caicuna ñapash viñarca shinlli sapicunata mishashpa, caicunamandallata shinlli caita japishpa. Riqui, ñuca nini, nachu caimanda quiquinba uvas chagrapaj yuracunaca huaglishcaman tigrarishca?

49 Yalishca jipa uvas chagrapaj Apunchij sirvij runata nirca: Jacuchi uvas chagramanda yuracunata cuchushun ninaman shitashun, ñuca uvas chagrata ama huaglichichun, imashpa ñuca tucuita rurashca cani. Imatata ashtahuan rurai ushaiman carcani ñuca uvas chagrata?

50 Ashtahuangari, riqui, sirvij runa uvas chagrapaj Apunchijta nirca: Ashata saquira.

51 Apunchij nirca: Ari, ashata saquisha, llaquiyanimi ñuca uvas chagrapaj yuracunata chingachinamanda.

52 Chaimanda, japishunchi huaquin cai malquicunamanda maijan ñuca uvas chagra urai uraipacha pushtucunapi tarpushcacunamanda, quimichishpa churashun yurapi maimanda shamushca; yuramanda fitishun malquicunata maijanmanda fucushcacunaca ninan jaya can, quimichishpa churashun paipaj pushtupi yurapipacha viñashca malquicunata.

53 Caita rurasha yura ama huañuchun, alchishpa chari ushaipapash cani caicunapaj sapicunata ñuca munaipa.

54 Riqui, yurapipacha viñashca malquicunapaj sapicunaca maipi munashca tarpushcacunaca causarajmi; chaimanda, alchishpa chari ushashapashmi ñuca munaipa, cai yuramanda malquicunata japisha, quimichishpa churasha. Ari, mama yurapi quimichishpa churasha, caicunapaj sapicunatapash alchishpa charingapa ñuca munaipa, imaura caicuna ali shinlli cajpica ñucaman ali fucushcata cui ushangapashchari, cushijushapashchari ñuca uvas chagrapaj fucuicunapi.

55 Yalishca jipa sacha yuraman tigrashcamanda yurapipacha viñashcata japirca, quimichishpa churashca yurapipacha viñashcacunapi, sacha yuraman tigrashcapash carca.

56 Paicuna yurapipacha viñashcatapash japirca maijan sacha yuraman tigrashca carca, mama yurapi quimichishpa churarcapash.

57 Uvas chagrapaj Apunchij sirvij runata nirca: Yuramanda sacha malquicunata ama cuchuichu, maijan ashtahuan jayacunatalla; caicunapi quimichishpa churai imashna ñuca nishcashna.

58 Ñucanchi cutin micuchishun uvas chagramanda yuracunata, chaimanda malquicunata fitishunbash; yuramanda malquicunata cuchushunbash maijan ismunajujcunata, maijan huañuna can, chaicunata ninaman shitashunbash.

59 Caita rurani, imashpapash, sapicuna shinlliyangapashchari alicuna caimanda; malquicunatapash cambiaimanda, alipash yali ushachun na alita.

60 Yurapipacha viñashca malquicunata caicunapaj sapicunandi alchishpacharishca caimanda, mama yurapi cutin yurapipacha viñashca malquicunata quimichishpa churashca, mama yurapaj sapicunatapash alchishpa charishca caimanda, ñuca uvas chagrapi yuracuna ali fucushcata cui ushangapashchari; ñuca cutin cushijui ushasha ñuca uvas chagrapaj fucuicunapi, imashpapash, ninanda cushijushapashchari sapicunatapash malquicunatapash callari fucushcamanda alchishpa charishcamanda—

61 Chaimanda, ri, sirvij runacunata cayai, ñucanchi utsialla trabajai ushangapa ñucanchi tucui ushaihuan uvas chagrapi, ñanda alichi ushangapa, cutin yurapipacha viñashca fucushcata apamungapa, maijan fucushca ali can tucui shuj fucushcacunamanda yalishpa juyailla.

62 Chaimanda, jacuchi trabajashunchi ñucanchi tucui ushaihuan cai tucuri punlla, riqui tucurica ña chayamun, caimi tucuri punlla imaura ñuca uvas chagrata fitisha.

63 Malquicunapi quimichishpa churai; callari tucuricunahuan caicuna callaricuna cachun, callaricuna tucuri cachun, allai muyundi yuracunata, ishcandi rucuta viñajtapash, callarita tucuritapash; tucuritapash callaritapash, tucuicuna cutin micuchishca cachun tucuripa.

64 Chaimanda, allai muyundi, fiti, huanui cutin ashtahuan, tucuripa, tucuri ña chayamun. Imashpapash cai tucuripi quimichishpa churashcacuna viñaipapash, yurapipacha fucushcatapash cunga, chai jipa paicunaman ñanda alichingui, paicuna viñai ushachun.

65 Imashna viñai callarijpi jaya fucushcata cuj malquicunata anchuchingui, alicunapaj shinlli caimanda jatun caimandapash; tucuilla na ali malquicunatapash shuj viajella ama anchuchinguichu, sapicuna yapa shinlli caipapash quimichishpa churangapa, cai huañuipapash, ñuca uvas chagrapaj yuracunata chingachiman.

66 Llaquiyanimi ñuca uvas chagrapaj yuracunata chingachinamanda; chaimanda na alicunata anchuchingui imashna viñajpi, sapipash yura jahuapash shinllipi pacta cachun, imaura ali na alita yalingacaman, na alica cuchushca ninaman shitashca canga, ama ñuca uvas chagrata huaglichichun; shina fichasha ñuca uvas chagramanda na alita.

67 Yurapipacha viñashca malquicunata cutin quimichishpa churasha yurapipacha viñashca yuracunapi;

68 Yurapipacha viñashca malquicunata quimichishpa churasha yurapipacha viñashca malquicunapi; shina cutin tandachisha yurapipacha fucushcata cuchun, caicuna shujlla cachun.

69 Na alica shitashca canga, ari, tucui ñuca uvas chagramanda canllaman; riqui, cai viajella ñuca uvas chagrata fitisha.

70 Yalishca jipa uvas chagrapaj Apunchij paipaj sirvij runata cacharca; sirvij runaca rirca rurarca Apunchij imashna mandashcata, shuj sirvij runacunatapash apamurca; paicuna huaquinllami carca.

71 Uvas chagrapaj Apunchij paicunata nirca: Richi trabajangapa uvas chagrapi, cangunapaj tucui ushaihuan. Riqui, cai can tucuri punlla ñuca uvas chagrata micuchina; tucurinaca maquipi can, na fucuj punlla ñapash shamun; canguna ñucahuan tucui ushaihuan trabajashpaca canguna cushijunguichi fucushcapi maijan ñuca alichisha ñucapa, ña chayamuna punllapa.

72 Yalishca jipa sirvij runacuna rirca trabajarcapash paicunapaj tucui ushaicunahuan; uvas chagrapaj Apunchijpash paicunahuan trabajarca; paicuna cazurca uvas chagrapaj Apunchijpaj rurachunbacha saquishcacunata tucui cuzascunapi.

73 Cutin tiai callarirca yurapipacha fucushcacuna uvas chagrapi; malquicunapash viñai callarirca ninanda sisai callarircapash; sacha malquicunata cuchui callarirca shitai tucurcapash; paicuna alichirca sapicunatapash yura jahuacunatapash pacta, imashna shinlli cashca.

74 Shina paicuna trabajarca, tucui utsiaihuan, uvas chagrapaj Apunchijpaj rurachunbacha saquishcacunahuan, imaura na ali uvas chagramanda canllaman shitashca cangacaman, Apunchij paipallata cutin alchishpa charishca cachun yurapipacha fucushcata; caicuna shujlla cuerposhna tigrachun; fucushcacunapash pacta cachun; uvas chagrapaj Apunchij paipallata alchishpa charishca cachun yurapipacha fucushcata, maijan paipaca ninan juyailla carca callarimanda.

75 Yalishca jipa imaura uvas chagrapaj Apunchij ricurca paipaj fucushca ali cajta, paipaj uvas chagra ashtahuan na huaglishca carca, paipaj sirvij runacunata cayarca nircapash: Riqui, cai tucuri punlla micuchishca cashcanchi ñuca uvas chagrata; canguna ricushcanguichi ñuca munaita rurashcani; alchishpa charishcani yurapipacha fucushcata, cai ali can, imashna callaripi carca shinallata. Cangunata achilyachini; canguna utsia cashcanguichi ñucahuan trabajaipi ñuca uvas chagrapi, ñuca rurachunbacha saquishcacunatapash alichishca canguichi, cutin ñucaman yurapipacha fucushcata apamushca canguichi, ñuca tarpuj pamba na ashtahuan huaglishcachu, na alita shitashcapash can, riqui canguna cushijunguichi ñucahuan uvas chagrapi fucushcamanda.

76 Riqui, tauca punllata ñuca alichisha uvas chagrapi fucushcata ñucapallata na fucuj punllapa, caica ña shamun; tucuri punlla ñuca uvas chagrata micuchishcani, fitishcanipash, allashcanipash muyundi, huanushcanipash; chaimanda fucushcata alichisha ñucapallata, tauca punllacunapa, imashna ñuca parlashcashna.

77 Imaura punlla shamujpica na ali fucushca cutin shamunga ñuca uvas chagraman, jipaman alita na alitapash tandachishca canga; alitaca ñucapallata alchishpa charisha, na alitaca shitasha paipaj pushtumanllata. Jipaman na fucuj punlla tucuripash shamun; ñuca uvas chagratapash ninahuan rupachisha.