1 Kilang, riei ko, kumwail sohte tamataman wadek mahsen akan en soukohp Sihnos, me e mahsanihong peneinei en Israel, ketihtihki:

2 Rong mwahu, kumwail peneinei en Israel, oh rong ei lokaia kan, [ngehi] soukohp en Kauno.

3 Pwe kilang, Kauno ketin mahsanih, Kumwail peneinei en Israel, I pahn karasahiong kumwail tuhkehn olip pwoat me epwel mwahu, me aramas emen ale oh apwaliada nan eh mwaht; e ahpw osada, oh mahla, oh tepida mengila.

4 Kedekedeo soumas en nan mwahto ahpw kohla, ih ahpw diarada me nah tuhkehn olipo tepier mengila; e ahpw mahsanih: I pahn kamwakele, oh uhpwelih, oh apwalih mwahu, ma e sou pahn kawosehda kisin rah pwulopwul oh kahpw kan, oh sohte mehla.

5 Kedekedeo e ahpw kamwakele, oh uhpwelih, oh apwalih mwahu nin duwen sapwellime mahsen.

6 Kedekedeo mwurin rahn kei e ahpw tepida kadarala ekei kisin rah pwulopwul oh kahpw kan; ahpw kilang, paliweren tuhkeo tepida mengila.

7 Kedekedeo soumas en nan mwahto ahpw ketin kilangada, oh mahsanihong sapwellime ladu: E kansensuwed ong ie me tuhke pwoatet pahn mehsang ie; eri, kohwei oh parasang ekei rahn tuhkehn olip en nanwel, oh wahdohng ie; oh kita pahn parasang uhdahn rah kan me tepidahr mengila, oh kita pahn kesehlong nan kisiniei pwe re en isihsla.

8 Oh kilang, Kaun en mwahto ketin mahsanih, I pahn kihsang tohto kisin rah pwulopwul oh kapw pwukat, oh I pahn kapatairailla wasa sohte lipilipil me I mwahuki; oh e sohte katepe ma kalewen tuhke pwoatet pahn mehla, ihte I en kak kamourala wahn tuhke ko ong pein ngehi; eri, I pahn ale kisin rah pwulopwul oh kapw pwukat, oh I pahn kapatairailla wasa sohte lipilipil me I mwahuki.

9 Ke pahn ale rahn tuhkehn olip en nanwel kan, oh kapatahiehng ni uhdahn [tuhkehn olipo] pwehn wiliandi rah teiko; oh rah kan me I parasang I pahn kesehla nan kisiniei oh isikirailla, pwe re en dehr kawehla mwahl pwehl en ei mwetuwel.

10 Kedekedeo ladu en Kaun en mwahto ahpw wia nin duwen mahsen en Kaun en mwahto, oh kapatahieng rahn tuhkehn olip en nanwel ko.

11 Oh Kaun en mwahto mahsanih me e pahn anahne uhpwelih, kamwakele, oh apwali mwahu, [e ketin] mahsanih ong sapwellime laduo: E kansensuwed ong ie me tuhke pwoatet pahn mehsang ie; eri, I wia met pwe I en kak kamourala kalewe kan pwe re en dehr mengila, oh pwe I en kak nekidohng pein ngehi.

12 Eri, kohwei; tetehk tuhkehn, oh apwalih mwahu, nin duwen ei mahsen akan.

13 Oh [rah] pwukat I pahn kihla wasa doh kan nan ei mwetuwel, wasa sohte lipilipil me I men kihla ie, e sohte katepe ong uhk; oh I pahn wia met pwe I en kak kamourala uhdahn rahn tuhke ko; oh pil, pwe I en kak nekidohng pein ngehi wah kan ahnsou en rahk; pwe e kansensuwed ong ie me I pahn luhs sang tuhke pwoatet oh wah kan.

14 Kedekedeo Kaun en mwahto ahpw kohla, oh padokedi rahn tuhke mehlel en olipo wasa me doh kan nan mwahto, ekei nan ehu wasa oh ekei nan ekei wasa tohrohr, nin duwen nsene oh wasa me e kupwurki.

15 Kedekedeo mwurin ahnsou reirei eh douer powe, oh Kaun en mwahto ahpw mahsanih ong sapwellime laduo: Kohdo, kita pahn kohdihla nan mwahto, pwe kita en kak doadoahk nan mwahto.

16 Kedekedeo Kaun en mwahto, oh pil laduo, kohdilahng doadoahk nan mwahto. Kedekedeo laduo ahpw patohwanohng eh soumaso: Maing, komw ketin k wasaht; kilang tuhkeo.

17 Kedekedeo Kaun en mwahto ahpw mahsaniada tuhkehn olipo me rahn tuhkehn nanwel ko kapatapatehng; oh e wosadahr oh tepier kadarala wah. Oh e mahsaniada me e mwahu; oh wah kan duwehte udahn wah ko me kin wah ni tuhkeo.

18 E ahpw mahsanihong sapwellime laduo: Kilang, rahn tuhkehn nanwel kan koledier lemwulemwur en kalewe kan, oh kalewen tuhkeo kehlaildahr; oh pwehki kalowehu eh kehlaildahr, rahn tuhkehn nanwel kan wiahda wah mwahu. Eri met, ma kita sohte kapatahieng rah pwukat, tuhkeo pahn mehla. Oh met, kilang, wahn tuhkeht I pahn kak nekidala ong pein ngehi nan ahnsou en rahk.

19 Kedekedeo Kaun en nan mwahto ahpw mahsanihong laduo: Kohdo, kita pahn kohla nan wasa doh kan nan mwahto, oh kilang ma rahn tuhke mehlel ko sou pil kadarala wah tohto, pwe I en kak nekidala wah kan ong pein ngehi nan ahnsou en rahk.

20 Kedekedeo ira ahpw kohla wasa kan me soumaso ekihla ie rahn tuhke mehlel ko, oh e mahsanihong laduo: Kilang mehkan; e ahpw kilangada me keieuo eh kadarala wah tohto; oh e pil kilang me e mwahu. Oh e ahpw mahsanihong laduo: Dolungasang wah kan, oh kaunopada ong ahnsou en rahk, pwe I en kak nekidala ong pein ngehi; e ketin mahsanih, pwe kilang ahnsou werei me I apwalih mwahu, oh e kadarala wah tohto.

21 Kedekedeo laduo ahpw patohwanohng soumaso: Dahme komw ketikido oh padokedi tuhke pwoatet, de rahn tuhkeht wasaht? Pwe kilang, ih wasa me keieu sakanakan nan mwahte pwon.

22 Oh Kaun en nan mwetuwelo ahpw mahsanihong ih: Ke dehr kaweid ie; I eseier me wasaopwel sakanakan; eri, I pahn ndaiong uhk, me I apwalih mwahu ahnsou werei, oh ke kilang me e kadaralahr wah tohto.

23 Kedekedeo Kaun en mwahto ahpw mahsanihong sapwellime laduo: Kilang wasaht; kilang I pil poadokedi apwoat rahn tuhkeo; oh ke esehier me pwehl en wasah sakanakan sang me tepo. Ahpw, kilang tuhkeo. I apwalih mwahu ahnsou werei, oh e kadaralahr wah tohto; eri, dolungedi, oh kaunopada ong ahnsou en rahk, pwe I en kak nekidala ong pein ngehi.

24 Kedekedeo Kaun en mwahto ahpw mahsanihong sapwellime laduo: Kilang wasaht, oh pil kilang apwoat rah, me I poadokedier; kilang pwe I pil apwaliher, oh e pil kadaralahr wah tohto.

25 Oh e ahpw mahsanih ong laduo: Kilang wasaht oh kilang me kaimwseklahn poad. Kilang, met I poadokedi nan pwehl mwahu; oh I apwalih mwahu ahnsou werei, oh ekeite wasa nan tuhkeo me kadarala wah mwahu, oh ekei wasa nan tuhkeo kadarala wah suwed; kilang, I apwalih mwahu tuhkeht duwehte metei ko.

26 Kedekedeo Kaun en mwahto ahpw mahsanihong laduo: Parasang rah kan me sohte kadarala wah mwahu, oh kesehlong nan kisiniei.

27 Ahpw kilang, laduo patohwanohng ih: Kita sou kamwakele, oh uhpwelih, oh apwalih mwahu ekis werei sang met, ma e sou pahn kadarala wah mwahu ong komwi, pwe komwi en kak kaunopada ong ahnsou en rahk.

28 Kedekedeo Kaun en mwahto oh sapwellime laduo doula apwalih mwahu wahn mwahto pwon.

29 Kedekedeo mwurin ahnsou reirei, oh Kaun en mwahto mahsanihong sapwellime laduo: Kohdo, kita en kohdihla nan mwahto, pwe kita en kak doadoahk nan mwahto. Pwe kilang, imwin ahnsou kerendohr me nektehn leledo; eri, I pahn anahne kaunopadahng rahko, ong pein ngehi.

30 Kedekedeo Kaun en mwahto oh laduo ahpw kohdihla nan mwahto; oh ira kohlahng tuhkehn olip me rahn tuhke mehlel kan tipwasangehr, oh rahn tuhkehn nanwel kan kapatapatehngehr; oh kilang soangsoangen wah kei katauridier tuhkeo.

31 Kedekedeo Kaun en mwahto ahpw song wahn tuhkeo, ehu ehu soangen wah kan nin duwen ar tohto. Oh Kaun en mwahto ahpw mahsanih: Kilang, ahnsou werei kita apwalih mwahu tuhke pwoatet, oh I nekid ong pein ngehi wah tohto ahnsou en rahk.

32 Ahpw kilang, ahnsou wet e kadarala wah tohto, oh sohte me mwahu. Oh kilang, mie soangoasoangen wah suwed; oh sohte mwahn katep ehu pahn kohieng ie, mehndahte doadoahk koaros me kitail wiahiongehr; oh met e kansensuwed ong ie me I pahn luhsang tuhke pwoatet.

33 Oh Kaun en mwahto ahpw mahsanih ong laduo: Dahme kita pahn wiahiong tuhke pwoatet, pwe en kak pwurehng wah mwahu me I kak nekidohng pein ngehi?

34 Oh laduo ahpw patohwanohng soumaso: Kilang, pwehki omwi kapatahiong rahn tuhkehn olip en nanwelo re ahpw kakehlailihala kalowe kan, kahrehda re momour oh re saikinte mehla; eri komw mahsaniher me re mwamwahute.

35 Kedekedeo Kaun en mwahto ahpw mahsanihong sapwellime laduo: Tuhke pwoatet sohte mwahn katepe ong ie, oh kalowe kan sohte katepe ong ie ma e pahn kin kadarala wah suwed.

36 Ahpw, I ese me kalowe kan mwahu, oh kahrepe wet me I kin apwapwalihkinirailte; oh pwehki arail kehlail mehlel me kahrehda arail kak kadarala wah mwahu sang ni rahn tuhkehn nanwel kan.

37 Ahpw kilang, rahn tuhkehn nanwel kan keirda oh kehlail sang kalowe kan; oh pwehki rahn tuhkehn nanwel kan arail kehlail sang kalowe kan, ihme kahreda e kadaralahr wah suwed tohto; oh pwehki e kadaralahr wah suwed tohto ke kilangehr me e tepidahr pahn mehla; oh e pahn kereniongehr mahla, kahrehda e pahn lekdekiong nan kisiniei, ihte ma kita kak wia mehkot me pahn kamourala.

38 Kedekedeo Kaun en mwahto ahpw mahsanihong sapwellime laduo: Kita kohdihla wasa doh kan nan mwahto, oh kilang ma rah kan me wia rahn tuhke mehlel ko pil kadaralahr wah suwed.

39 Kedekedeo ira ahpw kohdihla wasa doh kan nan mwahto. Kedekedeo ira ahpw pil kilangada wahn rahn tuhke mehlel ko pil sakanakanlahr; ei, me keieuo oh keriauo oh me pil mehn mwuhr; oh irail koaros pil sakanakanla.

40 Oh wah suwed en mehn mwuhro powehdi wasa mwahu en nan tuhkeo me kin kadarala wah mwahu, lao raho mengila oh mehla.

41 Kedekedeo Kaun en mwahto ahpw tentenihr, oh mahsanihong laduo: Dahme I anahne wiahiong ei mwetuwele?

42 Kilang, I ese wahn mwetuwelet pwon sakanakanla, ahpw kaidehn mehkan. Oh met mehkan me kin kadarala wah mwahu pil iangehr sakanakanla; oh met tuhke kan koaros nan ei mwetuwel sohte katepe ihte ar pahn palapaldi oh lekdekiong nan kisiniei.

43 Oh kilang mehn mwuhre, me raho mengilahr, I poadokedi nan pwel mwahu; ei, mehlel wasa me I kesempwalki sang wasa koaros nan sahpw en ei mwetuwel.

44 Oh ke kilangehr me I lupukidihsang [tuhke] me kapwekapwe wasakiset, pwe I en kak wiliankihdi tuhke pwoatet nan dewe.

45 Oh ke kilangehr me mie wasa kis me kadaralahr wah mwahu, oh pil ekis wasa me kadaralahr wahu suwed; oh pwehki ei sohte katipwasang rah kan [me suwed] oh keseirailla nan kisiniei, kilang, re tohto sang me mwahuo kahrehiong e mengilahr.

46 Oh met, kilang, mendahte epwel mwahu koaros me kita wiahiongehr ei mwetuwel, tuhke kan koaros sakanakanlahr, kahrehda re sohte wah mwahu; oh mepwukat I koapworopworkihla me I pahn nekidala mwurin ahnsou en rahk, ong pein ngehi. Ahpw, kilang, re pil duwehlahr tuhkehn olip en nanwel, oh re sohlahr katepe ihte re konehng paldihsang oh lekidekilong nan kisiniei; oh e kansensuwed ong ie me I pahn luhsang irail.

47 Ahpw dahme I kak wiahiong ei mwetuwel me I sohte wia? E sohte itar doadoahk enpehi kat me kahrehiong ie en sohte apwalih mwahu? Soh, I apwalih mwahu, oh I uhpwelih, oh I kamwakele, oh I koiasih; oh I kapakapahwei pehi kat kereniong rahno pwon, oh imwio kerendohr. Oh e kansensuwed ong ie me I pahn lupukidihsang tuhkehn ei mwetuwel pwon, oh lekdekiong nan kisiniei pwe re en isihsala. Ihs me kasapwungehla ei mwetuwele?

48 Kedekedeo laduo ahpw patohwanohng eh soumaso: Kaidehn pwehki [tuhke kan] en omw mwetuwel eh reireila—rah kan sou kehlail sang kalowe kan me mwahu? Oh pwehki rah kan ar kehlail sang kalowe kan, kilang re keirada mwadang sang kehlail en kalowe kan, oh wie kehkehlaila. Kilang, I nda, kaidehn ih kahrepe wet me kahrehda tuhkehn nan sapwellimwomwi mwetuwel sapwungkilahr?

49 Kedekedeo Kaun en mwahto ahpw mahsanihong laduo: Kita kohla oh pelehdihsang tuhke kan en mwahto oh kesehlong nan kisiniei, pwe irail dehr kawehla mwahl pwehl en ei mwaht, pwe I wiahier soahng koaros. Dahme I kak wiahiong ei mwetuwel me I sohte wia?

50 Ahpw, kilang, laduo ahpw patohwanohng Kaun en mwetuwelo: [Komwi] mweidehng ekis ahnsou.

51 Oh Kauno ketin mahsanih: Ei, I pahn mweidehng ekis ahnsou, pwe e kansensuwed ong ie ma I pahn luhs sang tuhkehn ei mwetuwel.

52 Eri, kita ale rah kat me kita poadokedi wasa doh kan nan ei mwaht, oh kita kapwurehiong ni tuhke me re kohsang ie; oh kita parasang rah kan me wah keieu suwed ni tuhkeo, oh kapatahieng rahn tuhke mehlel ko pwe en weliandi.

53 Oh I pahn wia met pwe tuhkeo en dehr mehla, pwe I en kak kamourala kalowe kan ong pein ei koasondi.

54 Oh, kilang, kalowen rahn tuhke mehlel ko, me I poadokseli wasa kan me I men poadok ie, re momourte; eri, pwe I en kak kamourirailla ong pein ei koasondi, I pahn ale rah kan en tuhke pwoatet, oh I pahn kapatahieng ni tuhke ko. Ei, I pahn kapatahieng rah kan en tuhkeo me re tepin wosasang ie, pwe I enkak kamourala kalowe kan ong pein ngehi, pwe ahnsou me re pahn kehlailla re pahn kak kadarala wah mwahu ong ie, oh I pahn pereperenkihte wahn ei mwetuwel.

55 Kedekedeo ira kihsang ni uhdahn tuhkeo [rah kan] me sakanakanla, oh kapatapatehng ni tuhke kan [me kohsang uhdahn tuhkeo], me pil sakanakanla.

56 Oh irail pil ale [rahn kan en] tuhke kan me sakanakanlahr, oh kapatapatehng ni tuhkeo me re tepin wosasang ie.

57 Oh Kaun en nan mwahto mahsanihong laduo: Ke dehr parasang rah sakanakan kan ni tuhke kan, ihte rah kan me keieu suwed; oh ke pahn kapatahieng irail nin duwen dahme I pahn ndaionguhk.

58 Oh kita pahn pwurehng apwalih mwahu tuhkehn nan mwetuwelet, oh kita kamwakele rah kan; oh kita pahn parasang ni tuhke kan rah me mahlahr kan, me uhdahn pahn mehla, oh kesehlahng nan kisiniei.

59 Oh met I pahn wia, pwe kalowe kan en kak kehlailla pwehki arail mwahu; oh pwehki wekideklahn rah kan, pwe me mwahu en kak powehdi me suwed.

60 Oh pwehki ei kamourala rahn tuhke mehlel ko oh kalowe kan, oh rahn tuhke mehlel kan me I kapatahieng ni tuhke me re tepin wosasang ie, oh kamourala kalowen tuhkeo me re tepin wosasang ie, pwe tuhke kan en ei mwetuwelet en kak pwurehng kadar wah mwahu; oh pwe I en kak ahniki peren pwehki wahn ei mwetuwel, oh pwe I en kak pereniki mehlel ei kamourala kalowe kan oh tepin wah en rah kan—

61 Eri, kohwei, oh likwerih ekei ladu, pwe kitail en doadoahk loalloapwoat nan mwahtet, pwe kitail en kak kaunopada ahlo, pwe I en kak pwurehng kapwurehdo uhdahn wahn tuhkeo, me wia wahn tuhke mwahu oh keieu kesempwal sang wah koaros.

62 Eri, kitail kohla oh kaimwisengkihla atail doadoahk kehlail, pwe kilang imwilah kerendohr, oh iei met kaimwiseklahn ei pahn kamwakele ei mwetuwel.

63 Kapatahieng rah kan; tepkihda me ikmwurio pwe re en kak tihengala, oh me tihengalao pahn ikmwurihla, oh uhpwelih tuhke kan, me mah oh me pwulopwul, me tihengo oh ikmwurio; oh me ikmwurio oh me tihengo, pwe koaros en kak kaimwisengkihla ar pahn pwurehng epwel mwahu.

64 Eri, kaimwisengkihla uhpwelih irail, kamwakele irail, koiasih irail, pwe imwilah kerendohr. Oh ma kaimwiseklahn doadoahk en kapatapat pwukat pahn keirda, oh kadareiei uhdahn wahn tuhkeo, eri kumwail pahn kaunopada mwohrail, pwe re en kak keirda.

65 Oh ni arail pahn tepida keirda kumwail pahn kamwakelehsang rah kan me kin kadarala wah suwed, nin duwen kehlail en rah mwahuo oh ia uwe; oh kumwail sohte pahn wiahkinteieu kamwakelehsang koaros me sakanakan, pwe kalowe kan de nohn kelail sang me kapatapatehngo, oh me kapatapatehng pahn mehkihla, oh I ahpw luhsang tuhke kan en ei mwetuwel.

66 Pwe e kansensuwed ong ie me I pahn luhs sang tuhkehn ei mwaht; eri kumwail pahn kamwakelehsang [rah] sakanakan kan nin duwen [rah] mwahu eh pahn kekeirida, pwe kalowe oh powe en kak ahneki soahngen kehlailteieu, lao [rah] mwahu kan pahn powehdi [rah] sakanakan kan, oh me sakankan kan pahn palidi oh lekidekiong nan kisiniei, pwe re en dehr kawehla mwahl pwehl en ei mwetuwel; oh I pahn koakoahkehsang me suwed kan sang nan ei mwetuwel.

67 Oh rahn tuhke mehlel ko pahn pwurehng kapwurehiong nan tuhke mehlelo;

68 Oh I pahn ale rahn tuhke mehlel ko oh kapatahieng ni rahn tuhke kan ni tuhke mehlelo; oh met iei wiepe me I pahn pwurehng kapwurehkinirailpene, pwe irail en kak pwurehng kadareiei uhdahn wahn tuhkeo, oh re pahn wiahla ehu.

69 Oh [rah] sakanakan pahn lekidekla, ei, sang wasa koaros nan sahpw en ei mwetuwel; pwe kilang, ih kaimseklahn ei pahn kamwakele ei mwetuwel.

70 Kedekedeo Kaun en mwetuwelo ahpw kadarala sapwellime laduo; oh laduo ahpw kohla oh wia nin duwen dahme Kauno mahsanihong, oh wahdo ekei ladu; oh irail malaulau.

71 Oh Kaun en mwetuwelo mahsanihong irail: [Kumwail] kohwei, oh doadoahk nan mwetuwelo uwen amwail kak. Pwe kilang, met iei kaimwiseklahn ei pahn apwalih mwahu ei mwetuwel; pwe imwilah kerendohr, oh ahnsou en rahk pahn nektehn leledo; oh ma kumwail pahn iang ie doadoahk uwen amwail kak kumwail pahn perenki wah kan me I pahn nekidohng pein ngehi nan ahnsou keren.

72 Kedekedeo ladu kan ahpw kohla oh wia doadoahk uwen arail kak; oh Kaun en mwetuwelo iang irail doadoahk; oh irail peikiong kosonned akan en Kaun en mwetuwelo ni soahng koaros.

73 Oh e pwurehng tepida mie uhdahn wahn tuhke kan en nan mwahto; oh rah tuhke mehlel kan tepida keirada oh pweida mehlel; oh rah sakanakan kan tepida perpersang oh lekidekla; oh re kin apwalih pwe kalowe kan oh rah kan en pahrek, nin duwen kehlailih koaros.

74 Oh irail ahpw pwerisekiong doadoahk nin duwen mahsen akan en Kaun en mwetuwelo, lao [rah] sakanakan akan lekidekiei sang nan mwetuwelo, oh Kauno ahpw kamourala tuhkeo ong pein ih oh wah kan pwuralahng uhdahn wahn tuhkeo; oh re wiahla warteieu; oh wah kan duwepenehte; oh Kaun en mwahto nekidohng pein ih wah ko, met iei me keieu kesempwal ong ih sangete ni tapio.

75 Kedekedeo ahnsou me Kaun en mwahto kilangada me sapwellime wahn tuhke ko mwahu, oh sapwellime mwetuwelo solahr sakanakan, e ahpw ekerpene sapwellime ladu ko, oh mahsanihong irail: Kilang, ni kaimwiseklahn atail apwalih mwahu ei mwetuwel; oh kumwail dehdehkier me I wiahiong nin duwen nsenei; oh I kamouralahr uhdahn wahn tuhkeo, me mwahuo, duwehte nin tapio. Oh meid pai kumwail; pwehki amwail iang ie wia doadoahk pwerisek nan ei mwaht, oh kapwaiada ei kosonned akan, oh pwurehng wadohng ie uhdahn wahn tuhke ko, oh ei mwetuwel solahr sakanakan, oh me suwed lekideklahr, kilang kumwail pahn iang ie pereperen pwehki wahn ei mwetuwel.

76 Pwe kilang, ahnsou reirei I pahn nekidohng pein ngehi wahn ei mwetuwelmwurin ahnsou en rahk, me pahn mwadang lelledo; oh pwehki kaimwseklahn ahnsou me I pahn apwalih mwahu ei mwetuwel, oh kamwakele, oh uhpwelih, oh kesehiong koiasi loale; Eri I pahn nekidohng pein ngehi wahn tuhke ko, erein ahnsou werei, nin duwen dahme I koasoaiahier.

77 Oh ni ahnsou me wah suwed ko pahn pwurehng pwarada nan ei mwetuwel, I ahpw pahn kihpene me mwahu oh me suwed; oh me mwahu kan I pahn nekidohng pein ngehi, oh me suwed kan I pahn kesehlahng nan dewe. Oh ahnsou en rahko oh imwio pahn lelledo; oh I pahn isikalla ei mwetuwel.