1 და ახლა, აჰა, ჩემო ძმებო, როგორც მე გითხარით, რომ მე ვიწინასწარმეტყველებდი, აჰა, ჩემი წინასწარმეტყველება: სიტყვები, რომლებიც თქვა წინასწარმეტყველმა ზენოსმა ისრაელის სახლის შესახებ, რომელშიც მან ის ბაღის ზეთისხილის ხეს შეადარა, აუცილებლად უნდა ახდეს.

2 და ის დღე, როდესაც იგი კვლავ, მეორეჯერ აღმართავს ხელს, რათა შეკრიბოს თავისი ხალხი, არის დღე, როდესაც უკანასკნელად უფლის მსახურნი გაემართებიან მისი ძალით, რომ გააპოხიერონ და გასხლან მისი ვენახი; და ამის შემდეგ მალე მოვა დასასრული.

3 და რაოდენ კურთხეულნი არიან ისინი, რომლებიც ბეჯითად შრომობდნენ მის ვენახში; და რაოდენ დაწყევლილნი არიან ისინი, რომლებიც იქნებიან გაძევებულნი თავიანთ საკუთარ ადგილზე! და ქვეყანა დაიწვება ცეცხლით.

4 და როგორი მოწყალეა ჩვენ მიმართ ჩვენი ღმერთი, რადგან მას ახსოვს ისრაელის სახლი, როგორც ფესვები, ასევე ყლორტები; და ის მთელი დღის განმავლობაში გაიწვდის მათკენ ხელს; და ისინი არიან ქედფიცხელი და ურჩი ხალხი, მაგრამ ყველანი, ვინც არ გაიქვავებს გულს, ღვთის სასუფეველში გადარჩებიან.

5 ამიტომ, ჩემო საყვარელო ძმებო, გემუდარებით კეთილგონიერი სიტყვებით, რომ მოინანიოთ და მოხვიდეთ გულის მთელი მოწადინებით; და ელტვოდეთ ღმერთს ისე, როგორც ის გელტვით თქვენ. და სანამ მისი მოწყალე ხელი გამოწვდილია თქვენკენ დღის სინათლეში, ნუ გაიქვავებთ გულებს.

6 დიახ, დღეს თუ გინდათ მოისმინოთ მისი ხმა, ნუ გაიქვავებთ გულს; განა რატომ უნდა მოკვდეთ?

7 რადგან, აჰა, მას შემდეგ, რაც მთელი დღე გკვებავდნენ ღვთის კეთილი სიტყვით, ნუთუ მოისხამთ ცუდ ნაყოფს ისე, რომ მოსაკვეთი და ცეცხლში ჩასაყრელნი გახდეთ?

8 აჰა, ნუთუ უარყოფთ ამ სიტყვებს? ნუთუ უარყოფთ წინასწარმეტყველთა სიტყვებს და ნუთუ უარყოფთ ყველა სიტყვას, რომელიც ითქვა ქრისტეს შესახებ, მას შემდეგ, რაც ასე ბევრმა ილაპარაკა მის შესახებ; ნუთუ უარყოფთ ქრისტეს კეთილ სიტყვას და ღვთის ძალასა და სულიწმინდის ძღვენს? და ნუთუ ჩააქრობთ სულიწმინდას და დასცინებთ გამოსყიდვის დიდ გეგმას, რომელიც თქვენთვის არის დაწესებული?

9 ნუთუ არ იცით, რომ თუ ამას გააკეთებთ, გამოსყიდვის და აღდგომის ძალა, რომელიც არის ქრისტეში, მოგიყვანთ სირცხვილითა და საშინელი დანაშაულით ღმერთის სამსჯავროს წინაშე?

10 და სამართლის ძალის შესაბამისად, რადგან სამართლის უარყოფა შეუძლებელია, თქვენ უნდა წახვიდეთ ცეცხლისა და გოგირდის ტბაში, რომლის ალი ჩაუქრობელია და რომლის კვამლი ადის მაღლა უკუნითი უკუნისამდე და ეს ცეცხლისა და გოგირდის ტბა არის უსასრულო წამება.

11 მაშინ, ჩემო საყვარელო ძმებო, მოინანიეთ, შედით ვიწრო კარიბჭით და დარჩით გზაზე, რომელიც არის რთული, სანამ არ მიიღებთ მარადიულ სიცოცხლეს.

12 იყავით გონიერნი; მეტი რისი თქმა შემიძლია?

13 ბოლოს, მე გემშვიდობებით იქამდე, სანამ არ შეგხვდებით ღმერთის საამო სამსჯავროს წინაშე, რომელი სამსჯავროც განგმირავს ბოროტთ საშინელი ძრწოლვითა და შიშით. ამინ.