1 Oh met kedekedeo mwurin sounpar kei douwehr powe, mie ohl emen kohdo rehn aramas en Nihpai kan, me adaniki Serem.

2 Kedekedeo e ahpw tepida kalohkehng aramas akan, oh padapadahngkihong irail me sohte Krais. Oh e kalohngki soahng tohto me pitihedi aramas akan; oh met e wia pwe en kak kawehla padahk mehlel en Krais.

3 Oh e pwerisekiong doadoahk pwe en kak kahluwahsang mohngiong en aramas akan, lao e ahpw kahluwahsang mohngiong [en aramas] tohto; oh e ese me ngehi, Seikop, kin pwoson Krais me pahn ketido, eri e kin nantihong rapahki ahnsou mwahu me e pahn kak kohdo rehi.

4 Oh e wia aramas loalokong men, pwehki e marainiki unsek wiepen koasoakoasoi en aramas akan; eri, e kin doadoahngki koasoi en lidip kan, oh kadek lokaia, nin duwen manaman en tepilo.

5 Oh e kaskasik me e pahn kawehla ei pwoson, mehndahte kaudiahl tohto oh soahng tohto me I kilangehr me pid duwen mepwukat; pwe ni mehlel I kilangehr tohnleng kei, oh irail sewese ie. Oh I pil rongehr kepitien Kauno mahsanihong ie mahsen pwukat, ekeiahnsou; eri, I sohte kak itikekda.

6 Oh kedekedeo e ahpw kohdo rehi, oh iet mwomwen eh koasoi ong ie, ndinda: Riei ohl Seikop, I pwangalahr rapahki ahnsou mwahu me I pahn kak koasoi ong komwi; pwe I kin rong oh ese me komw kin kokohseli, kalakalohngkiseli dahme komw kin kahdaniki rongamwahu, de padahk mehlel en Krais.

7 Oh ke kahluwahsangehr aramas tohto me kahrehda arail sapwungala katiasang nan sapwellimen Koht ahlo, oh solahr kin kapwaiada kosonned en Moses kan me iei ahl pwungo; oh wekidalahr kosonned en Moses ong pwongih aramas emen me komw nda me pahn kohdo sounpar epwiki kei mwuhr. Oh met kilang, ngehi, Serem, ndaiong komwi me met iei [padahk] lahlahwe; pwe sohte aramas emen kak ese soahng pwukat; pwe komwi sohte kak esehda soahng kan me pahn kohdo. Oh ih mwomwen koasoi me Serem peliankin ie.

8 Ahpw kilang, Kauno Koht ketikihongehr loaleiet sapwellime Ngehno, I ahpw kasarowehdi nan ah lokaia koaros.

9 Oh ngehi kalelapak reh: Ke kahmahmiki Krais me pahn ketido? E ahpw sapengki: Ma e pahn mie Krais I sohte pahn kahmahmiki; ahpw I ese me sohte Krais, oh saikinte mie, oh sohte douluhl pahn mie.

10 I ahpw kalelapak reh: Ke kamehlele pwuhk sarawi kan? E ahpw sapengki, Ei.

11 Oh I ndaiong ih: Eri ke sohte wehwehki; pwe re kadehdehki mehlel duwen Krais. Kilang, I ndaiong uhk me sohte soukohp men me wiahda nting, de kokohp, ihte irailkin koasoakoasoia duwen Krais.

12 Oh kaidehn ihte met—e pil kasansaldahr ong ie, pwe I rongehr oh kilangehr; oh e kasansaldahr ong ie sang ni manaman en Ngehn Sarawi; eri, I ese ma tomw sohte wiawihda, aramas koaros pahn salongala.

13 Kedekedeo e ahpw ndaiong ie: Kasalehiong ie ehu manaman kapwuriamwei sang ni manaman en Ngehn Sarawi, duwen me ke kin inenen wehwehki.

14 Oh I ahpw kalelapak reh: Ihs ngehi pwe I en kasongosonge Koht en ketin kasalehiong uhk ehukilel pid duwen mehkot me esehier me mehlel? Ahpw ke pahn kahmahmki, pwehki kowe nein tepilo. Eri, kaidehn nsenei en pweida; ahpw ma Koht pahn kalokeiuk, a en wia ehu kilel ong kowe me e ketin sapwellimaniki manaman, nanleng oh ni sampah; oh pil, Krais pahn ketido. Oh kupwuromwihte en pweida, Maing Kaun, kaidehn insenei.

15 Kedekedeo ni ahnsou me ngehi, Seikop, koasoaiahier koasoai pwukat, manaman en Kauno ketidihdo powe, e ahpw pwupwidiong nan pwehlo. Kedekedeo mie meapwapwalihki erein rahn kei.

16 Kedekedeo e ahpw ndaiong aramas akan: Kumwail kohpene lakapw, pwe I pahn mehlahr; eri, I men koasoi ong aramas akan koaros mwohn ei pahn mehla.

17 Kedekedeo mandahn rahno pokono ahpw pokonpene; e ahpw koasoi sansal ong irail oh kapwungala soahng kan me e padahkihong irail, oh kadehdehki Krais, oh manaman en Ngehn Sarawi, oh doadoahk en tohnleng kan.

18 Oh e ndaiong irail ni sansal, me e lohdi pahn manaman en tepilo. Oh e koasoia duwen ehl, oh mour soutuk, oh lokolok soutuk.

19 Oh e nda: I masepwehk pwe mwein I wiadahr dihpo me sohte mahkpe, pwe I wiahda likamw ong Koht; pwe I kahmahmiki Krais, oh nda me I kamehlele pwuhk sarawi kan; ahpw re kadehdehki mehlel duwen ih. Oh pwehki ei likamw ong Koht I masepwehngkihda kowahlap me ei repenpwung pahn apwal; ahpw I wehkada ong Koht.

20 Kedekedeo mwurin eh ndahier koasoai pwukat e ahpw solahr kak koasoai, oh e kadarala ngene.

21 Oh ahnsou me pokono kadehdehier mepwukat me e koasoiadahr mwohn e pahn mweidalahr ngeneo, irail pwuriamweikihla mehlel; lao manaman en Koht ketidihdo pohrail, oh tiada pohrail kahrehda arail pwupwidi nan pwehlo.

22 Eri, soahng wet kaperen ong ie, Seikop, pwe I peki rehn Semeio me ketiket nanleng; pwe e ketin karonge ei pekipek oh sapengala ei kapakap.

23 Kedekedeo popohl oh limpoak en Koht pwurehng kopwurupwurdo rehn aramas akan; oh irail onopki pwuhk sarawi kan, oh solahr rong padahk kan en ohl suwed menet.

24 Kedekedeo soahngen wiepe tohto wiawi pwe en sewese mehn Leimen kan en alehdi oh kapwurehdohng mehn Leimen kan kamarain en padahk mehlelo; ahpw e sohte katepe, pwe irail pereniki mahwin oh kakerehdi nta, oh irail ahneki kailok poatoapoat ong kiht riarail akan. Oh irail kin nantiheng uwen arail kak koaros en kaweikitala ahnsou koaros.

25 Eri, aramas en Nihpai kan kin sinsilehkin irail neirail dipwisou en mahwin kan, oh arail kehlail koaros, koapwkoapworopworki Koht oh paip en komourparail; eri, irail kin doudoulahte, powehdi arail imwintihti kan.

26 Kedekedeo ngehi, Seikop, ahpw mahlahr; oh poadoapoad en aramas pwukat kin ntingdi nan pileit en Nihpai teiko, eri, I pahn kaimwisekalahr poadoapoad wet, oh kadehdehki me I ntingihdier nin duwen marain koaros me I ese, sang ni ei koaskoasoia me ahtahnsou pil sohralahr, oh aht mour pil sohrala rasehng ouraman ehu, pwehki aht wia aramas me kelehpwlahr oh mehlel kei, sansaruwaruseli, pekeus sang nan Serusalem, ipwidi nan apwal, nan sapwtehn, oh riat akan kailongkinkiht, me kin kahrehda mahwin oh pingiping; eri, se kin mwahmwahiei erein aht ahnsou.

27 Oh ngehi, Seikop, kilangada me I nektehn kohdihlahng nan ei sousou; eri, I ndaiong nei pwutak Inos: Ale pileit pwukat. Ngehi eri padahkihong soahng kan me riei pwutako, Nihpai, kehkehlingkihong ie, oh e inoukihong ie me e pahn peikiong kehkehlik wet. Oh I kaimwseklahr ei nting pohn pileit pwukat, me iei nting mwotomwot; oh ei rahn mwahu ong mehmen me pahn wadek, a I koapworopworki me riei tohto pahn wadek ei koasoai kat. Riei ko, kaselehlia.