INcwadzi yaJaromu

1 Manje buka, mine, Jaromu, ngibhala emavi lambalwa njengekwemiyaleto yababe, Enoshi, kute umlandvo wesitukulwane setfu ugcinwe.

2 Futsi njengoba laba bongcwengcwe babancane, nanjengoba leti tintfo tibhalwe ngenhloso yekutsi kuzuze bomnaketfu emaLamani, ngaloko-ke, kumele kutsi ngibhale kafisha; kodvwa angitutibhala tintfo tekuphrofetha kwami, noma tekwembulelwa kwami. Ngoba yini lengingayibhala ngetulu kwaloko bobabe labakubhalile na? Ngoba abalivetanga yini lisu lensindziso na? Ngitsi kini, Yebo; futsi loku kuyangenelisa.

3 Buka, kufanele kube kuningi lokumele kwentiwe emkhatsini walaba bantfu, ngenca yebulukhuni betinhlitiyo tabo, nekungeva kwetindlebe tabo, nekuphumphutseka kwetingcodvo tabo, kanye nekuba lukhuni kwetinhloko tabo; noko, Nkulunkulu unesihawu lesikhulu kubo, futsi usengakabasusi eveni lonkhe.

4 Futsi kukhona labaningi emkhatsini wetfu labanetembulo letiningi, ngoba akusibo bonkhe labanetinhloko letilukhuni. Futsi njengoba labaningi bete tinhloko letilukhuni futsi banelukholo, banebudlelwane naMoya loNgcwele, lowembulela bantfwana bebantfu, ngekwelukholo lwabo.

5 Manje, buka, iminyaka lengemakhulu lamabili bese yendlulile, nebantfu baNefi bese bakhule bacina kulelive. Betama kugcina umtsetfo waMosi kanye nelusuku lwesabatha lungcwele eNkhosini. Futsi abalwephulanga; noma baluhlambalate. Imitsetfo yalelive yayicine kakhulu.

6 Futsi bebahlakateke kakhulu eveni lonkhe, ngalokunjalo nemaLamani. Wona bekamaningi kakhulu kunalabo bemaNefi; futsi wona bekakutsandza kubulala phindze anatsa ingati yetilwane.

7 Futsi kwenteka kutsi eta tikhatsi letiningi kutolwa natsi, emaNefi. Kodvwa emakhosi etfu kanye nebaholi betfu bebangemadvodza lacinile elukholweni lweNkhosi; babafundzisa bantfu tindlela teNkhosi; ngaloko-ke, samelana nemaLamani futsi sawakhipha aphuma eveni letfu, futsi sacala kucinisa emadolobha etfu, noma ngabe nguyiphi indzawo leyayilifa letfu.

8 Futsi sandza kakhulu, sagcwala eveni lonkhe, sanotsa kakhulu ngeligolide, nangesiliva, nangetintfo letiligugu, kanye nasekwenteni umsebenti locolekile welugodvo, ngetakhiwo kanye nangemishini, ngalokunjalo nangensimbi lecinile nangekhopha, nangelitfusi kanye nensimbi, senta tonkhe tinhlobo temathulusi latinhlobonhlobo ekulima umhlabatsi, kanye netikhali temphi—yebo, imicibisholo lekhaliphile lecijile, nemigodla, netikhali, nemikhonto lejikwako, kanye nako konkhe kwekulungiselela imphi.

9 Ngako-ke njengoba sasitilungiselele kuhlangana nemaLamani, akaphumelelanga ekulweni natsi. Kodvwa livi leNkhosi lacinisekiswa, leyalikhuluma kubobabe betfu, itsi: Kangangoba niyoyigcina imiyaleto yami niyawuphumelela kulelive.

10 Futsi kwenteka kutsi baphrofethi beNkhosi babesabisa bantfu baNefi, njengekwelivi laNkulunkulu, kutsi uma bangayigcini imiyaleto, kodvwa bawela esiphambekweni, batobhujiswa baphele eveni lonkhe.

11 Ngaloko-ke, baphrofethi, nebaphristi, kanye nebafundzisi, basebenta ngekukhutsala, bancusa bantfu ngako konkhe kumela bulukhuni kutsi bakhutsale; bafundzisa umtsetfo waMosi, kanye nenhloso yekunikwa kwawo; babenta kutsi babuke phambili kuMesiya, futsi bakholwe kuye lotako kube shengatsi besekakhona. Futsi babafundzisa ngalendlela.

12 Futsi kwenteka kutsi ngekwenta njalo babahlenga ekubhujisweni eveni lonkhe; ngoba batihlaba tinhlitiyo tabo ngelivi, babaphehlela njalonjalo ekuphendvukeni.

13 Futsi kwenteka kutsi emakhulu lamabili nemashumi lamatsatfu nesiphohlongo eminyaka beseyendlulile—seloku kunetimphi, nemibango, kanye nekuphikisana, sikhatsi lesidze kakhulu.

14 Futsi mine, Jaromu, angeke ngibhale lokuningi, ngoba laba bongcwengcwe bancane. Kodvwa bukani, bomnaketfu, ningabuka kulabanye bongcwengcwe baNefi; ngoba bukani, kubo imibhalo yetimphi tetfu icoshiwe, njengekwemibhalo yemakhosi, noma leyo labenta kutsi ibhalwe.

15 Futsi nginiketa laba bongcwengcwe etandleni tendvodzana yami Omini, kute bagcinwe njengekwemiyaleto yabobabe.